Imibuzo Evela Kubafundi

◼ Kutheni le nto embalwa kangaka amaNgqina kaYehova athabatha kwisonka nakwiwayini kwisikhumbuzo saminyaka le seSidlo SeNkosi Sangokuhlwa?

Kungenxa yokuba amaNgqina kaYehova, ngokwahlukileyo kwiicawa zeNgqobhoko, ayayamkela imfundiso yeBhayibhile yokuba linani elincinane labantu eliya kuphila ezulwini nokuba bonke abanye abakhonzi bakaThixo abathembekileyo baya kufumana umvuzo wobomi obungunaphakade emhlabeni.

Sekulithuba elide iicawa zifundisa ukuba izulu liya kuba ngumvuzo wabo bonke abakholisa uThixo; bonke abanye baya esihogweni somlilo. IBhayibhile ithetha okwahlukileyo koko. IZibhalo zibonisa ngokucacileyo ukuba kuphela ngabantu abathile, abanjengabapostile abaya kulawula noKristu ezulwini. UYesu wathi aba ‘bangumhlambi omncinane.’ IBhayibhile ithi inani labo lili-144 000. (Luka 12:32; ISityhilelo 14:3, 4) Abaninzi ababekhonze uYehova ngokuthembekileyo naye wakholiswa ngabo bafa ngaphambi kokuba uYesu avule indlela yokuya kuphila ezulwini. (Mateyu 11:11; Hebhere 10:19-21) Ibe emva kokukhethwa kwabo ‘bomhlambi omncinane,’ izigidi zabanye abantu ziye zaba ngamaKristu okwenyaniso. Kubo bonke aba bantu banyanisekileyo abangengabo abo ‘bomhlambi omncinane,’ iBhayibhile ibafumbethele ikamva lobomi obungunaphakade kwiparadisi ebuyiselweyo emhlabeni. (INdumiso 37:20, 29; ISityhilelo 21:4, 5) Kodwa kutheni le nto abo bantu banjalo nabo bengathabathi kwisonka newayini? UYesu wabonisa ukuba ukuthabatha kule mifuziselo ebudeni beSidlo SeNkosi Sangokuhlwa kuphela kwakuya kuba kokwabo babizelwe ukuphila ezulwini, abo bakumnqophiso omtsha.

Kakade ke, ukuba nokholo kwidini likaYesu kubalulekile kubo bonke abo baya kuxolelwa nguThixo baze bafumane ubomi obungunaphakade, enoba baya kuphila ezulwini okanye kwiparadisi esemhlabeni. UKristu wakubonisa oku kuYohane 6:51-54: “Ndim isonka esiphilileyo, esi sehlayo emazulwini. Ukuba ubani [nabani na, NW] uthe wasidla esi sonka, wodla ubomi obungunaphakade; . . . isonka endiya kumnika sona mna, siyinyama yam, endiya kuyinikela ubomi behlabathi [uluntu olukhululweyo] . . . Lowo uyidlayo eyam inyama, alisele elam igazi, unobomi obungunaphakade.”

Kanti, kuyaphawuleka ukuba uYesu wayengawabhekisi nje kubafundi bakhe loo mazwi. Akuba ngezolo elungiselele ngokungummangaliso ukudla kwabantu abangamawaka, eso sihlwele seza kuYesu kummandla waseKarpenahum. Esi sihlwele sancokola naye ngoko wakuthetha kuYohane 6:51-54. Ngoko uYesu wayengathethi ngokuyintloko nabafundi bakhe xa wathi ‘wayesisonka’ sokomfuziselo ‘esihla sivela ezulwini’ esinokulungiselela amathemba angobomi obungunaphakade kunemana eyadliwa entlango.—Yohane 6:24-34.

Uqwalasela oko kwenzeka mandulo entlango, khumbula abo baphuma eYiputa besiya entlango. ‘Babengoonyana bakwaSirayeli ababengathi bakumakhulu amathandathu amawaka, ngaphandle kosapho nenkitha engumxube.’ (Eksodus 12:37, 38; 16:13-18) Le “nkitha engumxube” yayiquka namaYiputa awayetshatwe ngamaSirayeli namanye amaYiputa awayebotshwe ngabande linye noSirayeli. AmaSirayeli nale “nkitha engumxube” babefuna imana ukuze bahlale bephila. Noko ke, ngaba le “nkitha engumxube,” yayinamathemba anjengawamaSirayeli? Yayingenawo. Nakubeni yayinokunqula noSirayeli yaye inethemba lokungena kwiLizwe Ledinga, yayingenakuba ngookumkani okanye ababingeleli phantsi komnqophiso woMthetho. Ngoko ukudla imana yokoqobo entlango akuzange kwenze wonk’ ubani abe namathemba afanayo.

Lo ngumahluko omele uwukhumbule njengoko ucinga ngoko kwathethwa nguYesu kubafundi bakhe malunga nonyaka emva kokuba wathetha amazwi akuYohane 6:51-54. Ngesi sihlandlo samva, uYesu wayechaza ngento entsha eyayiza kwenziwa equka isonka newayini yokoqobo ezaziza kufuzisela umzimba negazi lakhe. Ngoxa wayesungula esi sikhumbuzo seSidlo SeNkosi Sangokuhlwa, uYesu wathi kubalandeli bakhe abasondeleyo: “Le ndebe ingumnqophiso omtsha osegazini lam, eliphalalela nina.” Kwakwelo qaqobana labapostile, wongezelela wathi: “Nina ke ningabo basoloko behleli nam ekulingweni kwam. Nam ndinimisela ubukumkani, njengokuba uBawo endimisele mna, ukuze nidle, nisele, esithebeni sam ebukumkanini bam, nihlale ezitroneni, nigweba izizwe ezilishumi elinazibini zakwaSirayeli.”—Luka 22:20, 28-30.

Phawula ukuba kula mazwi amva abo babeza kutya isonka newayini yokoqobo njengemifuziselo efuzisela umzimba negazi likaYesu yayingabafundi ‘abakumnqophiso omtsha.’ Kwakhona abo banjalo babeya kuba komnye umnqophiso, lowo uYesu wawenza nabo ukuze babe nesabelo ekulawuleni ‘ebukumkanini bakhe.’ Ngokucacileyo, apha uYesu wayebhekisela kwabo babeya ‘kwenziwa ookumkani nababingeleli kuye uThixo wethu ukuze babe ngookumkani phezu komhlaba.’ (ISityhilelo 5:10) Ngenkulungwane yokuqala, uThixo waqalisa ukukhetha abo be-144 000 ababeya kuba nesabelo kobu Bukumkani basezulwini. AmaKristu aseKorinte ayengabanye beli qela, kuba bachazwa njengabo ‘bangcwaliselwe kuKristu Yesu, ababizwe ukuba babe ngcwele.’ (1 Korinte 1:2; thelekisa amaRoma 1:7; 8:15-17.) Abo ‘bangcwele’ babeya kuba nesabelo kwiSidlo SeNkosi Sangokuhlwa, bethabatha benoxabiso kwisonka sokomfuziselo nakwiwayini ethetha ‘umnqophiso omtsha osegazini lakhe.’—1 Korinte 11:23-26.

Namhlanje kukho intsalela encinane esaphilayo emhlabeni yabo bakhethwe nguThixo ukuba baye kuphila ezulwini. Kuphela ngabo banjalo ‘abakumnqophiso omtsha’ abavunyelweyo ukuba bathabathe kule mifuziselo, yesonka newayini, ebudeni beSikhumbuzo saminyaka le.

Kakade ke, onke amaKristu okwenyaniso namhlanje akhangele phambili ekuphileni ngonaphakade emhlabeni phantsi kolawulo loBukumkani ayazi ukuba oku kunokwenzeka ngokubonisa ukholo kwidini likaYesu. Kunjengokuba uYesu waxelela eso sihlwele, yena ‘usisonka esiphilileyo, esi sehlayo emazulwini.’ (Yohane 6:51) Kanti, oko akuthethi ukuba abo banethemba lokuphila emhlabeni bafanele bathabathe kwimifuziselo yokoqobo yeSikhumbuzo kuba abakho ‘kumnqophiso omtsha,’ bengekho nakumnqophiso noYesu wokuba ‘babe kubukumkani bakhe, bahlale ezitroneni.’

Ngenxa yoko, eli qela likhulu elinamathemba okuphila emhlabeni alithabathi kule mifuziselo, yesonka newayini. Kodwa oku akubonisi nakancinane ukuba liswele ukholo okanye alinaluxabiso ngomzimba nangegazi likaYesu. Enyanisweni, ngenxa yoxabiso olunzulu ngedini lakhe nethemba elivuyisayo lasemhlabeni eliphambi kwalo, lonke ngokuqinisekileyo libakho nyaka ngamnye njengababukeli abanembeko eSikhumbuzweni SeSidlo SeNkosi Sangokuhlwa. Ngale ndlela, libonisa ukholo lwalo ibe linikela ubungqina bokuba lonwabile kuba intsalela ‘yomhlambi omncinane’ nesihlwele ‘sezinye izimvu’ bamanyene ngobubele.—Yohane 10:16.