Abavakalisi BoBukumkani Bayabalisa
‘Isivuno Silungile’ EBurma
◻ ILIZWE elihle laseBurma linabavakalisi beendaba ezilungileyo abangaphezulu kwe-1 500. Iindibano zabo zakutshanje beziqhutyelwe eLushai, eseBurma, yaye ngeelwimi zesiHaka Chin, apho bekuze abantu abangama-2 273. Amava alandelayo atyhila umdla abanawo abantu ababumvu ngesigidimi soBukumkani yaye agxininisa oko kwabonwa nguYohane embonweni: “Nesivuno sehlabathi sesilungile.”—ISityhilelo 14:15, TE.
Oku Kwenzeka EDinam
◻ Ngoxa wayekubulungiseleli bendlu ngendlu eMatupi, omnye uvulindlela okhethekileyo wadibana nomfundi owayenomdla ngokukhethekileyo ekwazini ngesihogo. Xa wathi wacaciselwa ukuba isihogo seBhayibhile lingcwaba nje eliqhelekileyo loluntu, wothuka gqitha. Akazange akwazi ukuzibamba kodwa oku wafuna ukukuxelela izalamane zakhe ezazikwidolophu yaseDinam. Ebudeni beeholide zesikolo, wagoduka esiya kwidolophu yakowabo waza wasasaza le nyaniso ingesihogo. Umkhwe wakhe wayenomdla gqitha efuna ukwazi okungakumbi, ngoko wahamba nalo mfundi ukubuyela eMatupi ukuze athethe ngokwakhe nalo vulindlela. Wahlala kangangeveki eMatupi waza wafundisisa nalo vulindlela. Kamva, ebudeni botyelelo lwakhe lwesibini eMatupi, wagxininisa ekubeni oovulindlela batyelele idolophu yabo, kuba, wathi, kwakukho abantu abaninzi abanomdla apho. Bobathathu oovulindlela basamkela ngovuyo esi simemo. Kwabathatha iiyure ezili-12 zohambo oluqobayo ukufikelela eDinam.
Ngosuku oovulindlela abafika ngalo eDinam kwakukho umngcwabo, yaye abantu ababevela kwiidolophu ezikufuphi nabo bafuna ukuva ngesi sihogo seBhayibhile. Bagxalathelana bonke befuna ukubona iindwendwe. Kwaqhutywa ingxubusho yeBhayibhile eyaqalisa ngentsimbi yesi-7:00 ngorhatya de kwayintsimbi ye-11:00 ebusuku. Umntu onolwazelelelo kwesi sihlwele wayinqumamisa ingxubusho ngeye-11:00 ebusuku, evumela oovulindlela ukuba bakhe baphumle okwexeshana ukuze balungiselele usuku olulandelayo. Ngentsasa elandelayo, baqalisa ingxubusho yeBhayibhile malunga nentsimbi yesixhenxe baza baqhubeka de kwayintsimbi yeshumi ebusuku, benamaxesha amafutshane onqumamo kuphela ukulungiselela izidlo. Xa oovulindlela bathi bemka kule dolophana, abantu ababumvu bacela ukuba baphinde babuye baze bachithe ixesha elingakumbi nabo. Elinjani lona ilungelo ukunceda abantu abanje ukufundiseka ngeendaba ezixabisekileyo zoBukumkani. Enyanisweni, isivuno ‘silungile’ eBurma!
Ukufumana Inyaniso Kwincwadi Elahliweyo
◻ Enye indoda eBurma yayityelela umhlobo wayo othengisa iincwadi ezindala namaphephandaba njengamaphepha alahliweyo yaze yabona incwadi endala engenaqweqwe iphakathi kwaloo maphepha. Yayichola yaza yaqalisa ukuyifunda. Kungekudala yaba nomdla gqitha kuyo. Kwathi kanti yincwadi yeWatch Tower Society ethi Ukuphulaphula KuMfundisi Omkhulu. Yabhalela iofisi yesebe loMbutho ukuze ifumane iincwadi ezingakumbi. Iofisi yesebe ngokukhawuleza yathumela uvulindlela kuyo. Isifundo saqaliswa nayo, yaye emva nje kwezihlandlo ezimbalwa zokufundisisa, yasiqonda isigidimi senyaniso yaza yaqalisa ukucoca ubomi bayo bezenzo ezibi yaza kamva yazitshabalalisa izithixo zayo zonqulo lobuHindu. Kungekudala, yona nomafungwashe wayo bazahlulela kuYehova baza babhaptizwa. Ngoku inguvulindlela othe ngxi.
Enyanisweni, “ukuvuna okunene kuninzi, kodwa bona abasebenzi bambalwa” kwintsimi echumileyo yaseBurma.—Mateyu 9:37, 38.