Izifundo Ezivela KwiZibhalo: Mika 1:1–7:20

Ukuphakanyiswa Kokuba Sesikweni KukaYehova Negama Lakhe

UMPROFETI uMika wayephila kwinkulungwane yesibhozo Ngaphambi kweXesha Eliqhelekileyo, xesha elo lalilelokunqulwa kwezithixo nokungabikho kokusesikweni kwaSirayeli nakwelakwaYuda. Iimeko zangoko zifana ncam nezo zesameleyo namhlanje kangangokuba izigidimi nezilumkiso zikaMika zifanelekile kwixesha lethu. Yaye iindaba ezimnandi awazinikelayo zisinika ithemba lokwenene kwihlabathi elilawulwa nguSathana.—1 Yohane 3:19.

Mhlawumbi isigidimi sikaMika sishwankathelwe kakuhle ngakumbi kula mabinzana mathathu alandelayo: “Athi ke . . . abo basebenze ububi.” “Akubizayo uYehova kuwe, kukuthi wenze okusesikweni, uthande inceba, uhambe noThixo wakho ngokuthozamileyo.” “Thina ke sihamba egameni likaYehova uThixo wethu, ngonaphakade kanaphakade.”—Mika 2:1; 6:8; 4:5.

Unqulo Lwezithixo Luyagwetywa

UYehova akabanyamezeli ixesha elide abenzi bobubi. Ukunqulwa kwezithixo nemvukelo zande kakhulu kwaSirayeli nakwelakwaYuda. Ngenxa yoko, uYehova uyayibona yonke into abayenzayo. Imifanekiso yabo eqingqiweyo iya kwenziwa imbuqe. Abanquli bezithixo baya kuba “njengexhalanga [njengokhozi, NW]” yaye baya kuthinjwa.—1:1-16.

Kwabanyanisekileyo, uYehova ungqineka enguThixo wethemba. Oozwilakhe abanobutshinga abanjengamasela nabaphangi bayagwetywa. Baya kufikelwa yintlekele. Ukanti kwenziwa idinga lokubuyiselwa ‘kwamasalela akwaSirayeli.’ UYehova uthi: “Ndiya kubenza babe banye, njengempahla emfutshane yaseBhotsera.”—2:1-13.

UYehova ulindele ukuba kuqheliselwe okusesikweni ngabo bathwele imbopheleleko phakathi kwabantu bakhe. Kwiinkokeli ezigagamelayo zakwaSirayeli, kwathiwa: “Asikokwenu na ukukwazi okusesikweni? nina, bathiyi bokulungileyo, bathandi bobubi; nina bahlinzi bolusu lwabantu, nenyama yabo emathanjeni abo.” UMika, ‘ngomoya kaYehova, nowokusesikweni nowobugorha,’ wavakalisa imigwebo kaThixo eyayinxamnye nazo. Uthi, iinkokeli ezingekho sikweni, zigweba ngenxa yezicengo, ababingeleli bayayala ngenxa yomvuzo yaye abaprofeti bavumisa ngenxa yemali. Ngoko ke, iYerusalem ‘iya kuba yimiwewe.’—3:1-12.

Isigidimi Sethemba

Unqulo oluyinyaniso luya kuqheliselwa kumhlaba wonke. UMika uxela kwangaphambili ukuba “ekupheleni kwemihla,” abantu bezizwe ezininzi baya kufundiswa iindlela zikaYehova. UThixo uya kugweba, ibe akuyi kuphinda kubekho mfazwe. Abanquli bokwenyaniso baya ‘kuhamba egameni likaYehova uThixo wabo ngonaphakade.’ Phezu kwako nje ukuvalwa komsebenzi nentlungu, abantu bakhe baya kuhlangulwa esandleni seentshaba zabo.—4:1-13.

Sinokuba nentembelo kuMhlanguli othenjisiweyo kaThixo. Umlawuli ovela eBhetelehem uya kwalusa enamandla kaYehova. ‘Ukuhlangulwa kuma-Asiriya’ kuxelwe ngenx’ engaphambili. Intsalela yabanquli bokwenyaniso iya kuba njengombethe ohlaziyayo namathontsi emvula yaye zonke iintlobo zonqulo lobuxoki nezobudemon ziya kunyothulwa.—5:1-15.

Okusesikweni KukaYehova Kuya Kwesamela

UYehova ulindele ukuba abantu bakhe baphile ngokwemilinganiselo yakhe efanelekileyo neyobulungisa. Yintoni ayenzileyo efanele unqulo olufikelwe ziinkxwaleko? Uye wabenzela izinto ezilungileyo abantu bakhe. ‘Akubizayo uYehova kubo, kukuthi benze okusesikweni, bathande inceba, bahambe noThixo wabo ngokuthozamileyo.’ Ukuba bayaqhubeka kwizenzo zabo ezingendawo zogonyamelo, banokulindela kuphela umgwebo wakhe oqatha.—6:1-16.

Sifanele sikholose ngokusesikweni nangenceba kaYehova. Kwanamalungu entsapho aya kuba ziintshaba. Kodwa uMika uthi: “Ndiya kulindela kuThixo wokusindiswa kwam; uya kundiva uThixo wam.” Umprofeti ukholose ngokusesikweni kukaYehova, esazi ukuba uThixo “akawugcini unaphakade umsindo wakhe; kuba yena uthanda ukwenza   inceba.”—7:1-20

Izifundo zanamhlanje: UYehova ulindele ukuba abantu bakhe baqhelisele okusesikweni. Ngenxa yoko ngokubhekisele kwizinto ezenziwa kwezoshishino, umKristu umele azibuze oku: “Ndoqaqamba na ndinesikali sokungendawo, ndinengxowa yamatye enkohliso?” (6:11) Kule mihla yokugqibela, bonke abantu bakaYehova bamele bafak’ isandla kumanyano lwentlangano yakhe yasemhlabeni baze bamkele imfundiso ngeendlela zakhe zoxolo. Sifanele senze konke esinokukwenza ukuphakamisa igama likaYehova nokubalaselisa unqulo oluyinyaniso.—2:12; 4:1-4.

[Ibhokisi ekwiphepha 14]

UKUHLOLISISWA KWEENDINYANA ZEBHAYIBHILE

○ 1:16—KwaSirayeli, inkqayi yayinxulunyaniswa nosizi, ukuzila nokuba sentlungwini. (Isaya 3:24-26; 15:2, 3; Yeremiya 47:5) Zimbi iintlanga ezingakholwayo zazisenza uqheliselo lokucheba inkqayi ngexesha losizi lokufa kwesalamane. Ngoxa ukungabi nanwele ngemvelo kwakungajongwa njengokungacocekanga phantsi koMthetho, amaSirayeli ayengazichebi iintloko zawo xa ezilile kuba ‘ayengabantu abangcwele kuYehova.’ (Duteronomi 14:1, 2) Noko ke, uMika waxelela uSirayeli noYuda ukuba bachebe ngenxa yekhondo labo elibi lokunqula izithixo elabenza abakufanelekela ukuba ngabantu abangcwele laza lenza ukuba bona nenzala yabo bafanelekela ukuthinjwa. Igama lesiHebhere apha eliguqulelwe ngokuthi ‘ixhalanga [ukhozi, NW]’ lisenokubhekisela kwintaka efana nexhalanga, enoboya obumhlophe obuntsakantsaka entloko. Nangona lingelulo olo didi lwamakhozi, lijongwa njengolwentsapho enye.

○ 2:12—Loo mazwi ayazaliseka namhlanje kuSirayeli wokomoya. (Galati 6:16) Ingakumbi ukususela ngowe-1919 ukusa phambili, yenziwa yacaca kwintsalela ethanjisiweyo indlela yokubaleka ekuthinjweni kwayo lunqulo lweBhabhiloni Enkulu. (ISityhilelo 18:2) Njengokuba uMika waxela ngenx’ engaphambili, bahlanganiswa ‘njengempahla emfutshane yaseBhotsera, njengomhlambi edlelweni lawo.’ Njengoko iye yathelelwa ‘sisihlwele esikhulu’ ‘sezinye izimvu,’ ukususela ngowe-1935 eneneni baye baba ‘ngabaxokozelayo ngokuba baninzi kwabantu.’—ISityhilelo 7:9; Yohane 10:16.

○ 3:1-3—Kukho umahluko okhwankqisayo phakathi kukaYehova, onguMalusi onobubele, neenkokeli ezikhohlakeleyo zabantu bakhe bamandulo ngomhla kaMika. Ezi zawa phantsi kumsebenzi wazo wokukhusela umhlambi ngokuqhelisela okusesikweni. Zathi ngokukhohlakeleyo zazixhaphaza izimvu zokomfuziselo kungekuphela nje ngokuzikhohlisa kodwa ‘kwanangokobula ulusu lwazo’—njengeengcuka. Abalusi abangendawo ababenzeli okusesikweni abantu, babacudisela ‘kwizenzo zamagazi.’ (3:10) Ngokugwenxwa kokusesikweni, kwizigwebo abo babechanabekile baqhathwa ngezindlu zabo nangendlela yokuziphilisa.—2:2; thelekisa uHezekile 34:1-5.

○ 4:3—Ezi ‘zizwe zininzi’ ‘neentlanga ezinamandla’ azizi kuchazwa njengezizwe nolawulo lobupolitika. Endaweni yoko, aba ngabantu abathile abaphuma kuzo zonke izizwe, abantu abahlukanayo nobuhlanga baza baphethukela kwinkonzo emanyeneyo kwintaba kaYehova yonqulo oluyinyaniso. (Isaya 2:2-4, NW) UYehova ‘uyagweba aze alungise imicimbi’ ngendlela yokomoya nabo bakholwayo abamele uBukumkani bukaThixo. Aba bantu ‘besihlwele esikhulu’ bazivisisanisa nemigwebo engokobuthixo, bekhanda amakrele abo abe ngamakhuba baze ngaloo ndlela baphile ngoxolo namaNgqina kaYehova angoowabo.

○ 5:2—IBhetelehem-efrata ngokunokwenzeka yabizwa ngolo hlobo kuba kwakukho iidolophu ezimbini ezazibizwa ngokuba yiBhetelehem. UMika uchaza ngenye ekwaYuda, emazantsi nje eYerusalem. Enye idolophu yayisemantla, kwaZebhulon. (Yoshuwa 19:10, 15) ‘IEfrata’ yayiligama lokuqala leBhetelehem eyayikwelakwaYuda okanye kummandla owawuyingqongile. (Genesis 48:7; Rute 4:11) Iinkcazelo ezinjalo ezineenkcukacha zingqina ubunyaniso bamadinga kaThixo abuprofeti ngokubhekisele kuMesiya.

○ 6:8—UMika wayengakudeleli ukubaluleka kwamadini okucamagushela izono kodwa wayebalaselisa okwakuxabiseke ngokwenene emehlweni kaYehova. (Thelekisa iDuteronomi 10:12.) Ukuze amadini amkeleke kuYehova, umoni wayefanele abonise uphawu lokusesikweni, ukuthanda inceba nokuthozama. Namhlanje, uYehova ufuna okufanayo enkonzweni yethu.—1 Korinte 13:4-8.

○ 7:4—Umthole nothango lomnga zizityalo ezinokutsala impahla zize zikrazule inyama. Apha uMika wayechaza ukonakala okungokuziphatha kohlanga kumhla wakhe. Ngoko ngokucacileyo wayethetha ukuba kwanabo balunge ngakumbi kumaSirayeli aneenkani babesenzakalisa okomthole okanye uthango lomnga kuye nabani na osondela kakhulu kubo.

[Umfanekiso okwiphepha 15]

UMika wayixela kwangaphambili indawo awayeza kuzalelwa kuyo uYesu