Ubomi Nobulungiseleli BukaYesu

Abasebenzi Esidiliyeni

UYESU usandula nje ukugqiba ukuthi, “Baninzi abokuqala abaya kuba ngabokugqibela, nabokugqibela abaya kuba ngabokuqala.” Ngoku uzekelisa oku ngokubalisa ibali. Uqalisa esenjenje, “UBukumkani bamazulu bufana nomntu ongumninindlu, owaphuma ekuseni, waya kuqesha abasebenzi bokuya esidiliyeni sakhe.”

UYesu uqhubeka esithi: “Akuvumelana [umninindlu] nabasebenzi ngedenariyo ngemini, wabathuma esidiliyeni sakhe. Ephume malunga nelixa lesithathu wabona abanye bemi endaweni yembutho bengasebenzi. Wathi nakwabo, Hambani nani niye esidiliyeni, ndoninika okusukuba kufanelekile. Bahamba ke baya. Wabuya waphuma malunga nelixa lesithandathu nelesithoba, wenza kwangokunjalo. Ephumile ke malunga nelixa leshumi elinanye, wafumana abanye bemi bengasebenzi; athi kubo, Yini na ukuba nime apha imini iphela ningasebenzi? Bathi kuye, Akukho bani usiqeshileyo. Athi kubo, Hambani nani niye esidiliyeni.”

Umninindlu, okanye umnini wesidiliya, nguYehova uThixo, yaye isidiliya luhlanga lwakwaSirayeli. Abasebenzi abasesidiliyeni ngabantu abangeniswe kumnqophiso woMthetho; ngokukodwa bangaloo maYuda aphila kwimihla yabapostile. Isivumelwano somvuzo senziwe kuphela nabo basebenzi bemini yonke. Umvuzo uyidenariyo ngomsebenzi wemini yonke. Ekubeni ‘ilixa lesithathu’ iyintsimbi ye-9:00 kusasa, abo babizwe ngelixa lesithathu, lesithandathu, lesithoba neleshumi elinanye basebenza iiyure ezisithoba, ezintandathu, ezintathu nenye kuphela ngokulandelelana kwabo.

Abasebenzi abasebenza iiyure ezili-12, okanye imini ezeleyo, bamela iinkokeli zamaYuda ebezisoloko zixakekile ngalo lonke ixesha kwinkonzo yonqulo. Bona abafani nabafundi bakaYesu, abathe bona, phantse ubomi babo bonke, baqeshwa kwimisebenzi yokuloba okanye kweminye imisebenzi yengqesho. Kuphela kwaba sekupheleni kowama-29 C.E. awathi “umninindlu” wathuma uYesu Kristu ukuba ahlanganise aba ukuba babe ngabafundi bakhe. Ngaloo ndlela bathi baba “ngabokugqibela,” okanye baba ngabasebenzi besidiliya belixa leshumi elinanye.

Ekugqibeleni, imini yomsebenzi yokomfuziselo iyaphela ngokufa kukaYesu, yaye ixesha lokuhlawulwa kwabasebenzi liyafika. Umgaqo ongaqhelekanga wokuhlawulwa kwabokugqibela kuqala uyalandelwa, njengokuba kucaciswe kwathiwa: “Kwakuhlwa, uthi umninisidiliya egoseni lakhe, Babize abasebenzi, ubamkelise, uqala kwabokugqibela ude uye kwabokuqala. Bezile abo bebeqeshwe malunga nelixa leshumi elinanye, bamkela elowo idenariyo. Ke kaloku bakuza abokuqala, baba baya kwamkela into engaphezulu; nabo bamkela elowo idenariyo. Bayamkela ke, bamkrokrela umninindlu, besithi, Aba bokugqibela basebenze ilixa lalinye, usuke wabalinganisa nathi, thina sithwele ubunzima nobushushu bemini. Waphendula ke yena wathi komnye wabo, Wethu, andikoni; ubungavumelananga nam ngedenariyo yini na? Thabatha okwakho uhambe; ndithanda ukumnika lowo wokugqibela kwanjengoko ndikunike ngako. Akuvumelekile na ukuba ndenze endikuthandayo ngokukokwam? Iliso lakho likhohlakele na, ngokuba ndilungile mna?” Ekuqukumbeleni uYesu waphinda ingongoma eyayiphuhlisiwe ngaphambili, esithi: “Ngokunjalo abokugqibela baya kuba ngabokuqala, nabokuqala baya kuba ngabokugqibela.”

Ukwamkelwa kwedenariyo kwenzeka, kungekhona ngethuba lokufa kukaYesu, kodwa ngePentekoste yowama-33 C.E., xa uKristu, ‘oligosa,’ wathi wathulula umoya oyingcwele phezu kwabafundi bakhe. Aba bafundi bakaYesu babefana nabasebenzi ‘bokugqibela,’ okanye abelixa leshumi elinanye. Idenariyo ayizange imele isipho somoya oyingcwele ngokwawo.

Idenariyo yayikokuthile abafundi ababeza kukusebenzisa apha emhlabeni. Yayikokuthile okwakuthetha ubomi babo, ubomi babo obungunaphakade. Yayililungelo lokuba babe nguSirayeli wokomoya, othanjiselwe ukushumayela ngoBukumkani bukaThixo.

Ngokukhawuleza abo babeqeshwe kuqala bayiphawula into yokuba abafundi bakaYesu babehlawulwe, ibe bababona beyisebenzisa idenariyo yokomfuziselo. Kodwa babefuna okungaphezulu kunomoya oyingcwele namalungelo oBukumkani anxulumene nawo. Ukukrokra kwabo nokungakwamkeli kwabo oko kwaqandusela ngokuthi batshutshise abafundi bakaKristu, ‘abangabokugqibela’ kubasebenzi abasesidiliyeni.

Ngaba oko kuzaliseka okwenzeka kwinkulungwane yokuqala kuphela kwenzaliseko ekhoyo yomzekeliso kaYesu? Hayi, kuba abefundisi beNgqobhoko kule nkulungwane yama-20 baye, ngenxa yezikhundla neembopheleleko zabo, ‘bangabokuqala’ ukuba baqeshelwe ukusebenza kwisidiliya sikaThixo sokomfuziselo. Baye babajonga abashumayeli abazahluleleyo abanxulumene neWatch Tower Bible and Tract Society ‘njengabokugqibela’ ukuba banganaso nasiphi na isabelo esingokomthetho enkonzweni kaThixo. Kodwa, enyanisweni, aba ngaba kanye baye bajongelwa phantsi ngabefundisi abangabona abafumana idenariyo—imbeko yokukhonza njengoonozakuzaku boBukumkani basezulwini bukaThixo. Mateyu 19:30–20:16.

◆ Yintoni emelwa sisidiliya? Ngoobani abamelwa ngumnini wesidiliya nangabasebenzi beeyure ezili-12 nabeyure enye?

◆ Imini yomsebenzi yokomfuziselo yaphela nini, ibe intlawulo yenziwe nini?

◆ Ukuhlawulwa kwedenariyo kumela ntoni?