Oko Simele Sikwenze Ukuze Sisindiswe

KUTHENI sifuna ukusindiswa nje? Kungenxa yokuba thina sonke siva ubunzima ngenxa yemiphumo eyintlekele yesono: ukungafezeki, iintlungu, ukugula, usizi nokufa ekugqibeleni. Umpostile uPawulos wakucacisa ukuba oku kubangelwe kukuba usolusapho wethu uAdam wavukela umthetho kaThixo. UPawulos wabhala: “Isono sangena ngamntu mnye [uAdam] ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke, ekubeni bonke bonayo.” (Roma 5:12) Kutheni le nto isono sika-Adam sabangela ukuba ukufa kubatyhutyhe bonke abantu? Ngokwenene, oku kwaba ngenxa yokusebenza kwezinto ngendlela yendalo.

Xa uAdam wonayo, ngokuvisisana nomthetho kaThixo wagwetyelwa ukufa. Oku kwakulungile ibe kuyimfuneko. Kwakulungile, ngenxa yokuba ubomi abulilo ilungelo kodwa busisipho esivela kuThixo. Ngokona ngabom, uAdam waphulukana nazo zonke izinto awayenokuzifumana ngenxa yeso sipho. (Roma 6:23) Ukugwetyelwa kuka-Adam ukufa kwakuyimfuneko ngenxa yokuba akukho nto engagqibelelanga enokuvunyelwa ukuba isinde ize ingcolise indalo ngokungenasiphelo. Ngaloo ndlela, xa uAdam wonayo, waqalisa ukufa waza akabi saba nabo ubomi obugqibeleleyo nobungenasono ukuze abudlulisele kubantwana bakhe njengelifa. Kuphela wayenokubanika ubomi obudyojwe kukungafezeki nasisono.—Roma 8:18-21.

Noko ke, asifanele silibale ukuba kuphela kungenxa yobabalo lukaThixo le nto sikwanokuphila eli thutyana siliphilayo namhlanje. (Yobhi 14:1) UThixo wayenganyanzelekanga ukuba avumele uAdam noEva babe nabantwana ngaphambi kokuba bafe. Wabavumela ukuba benjenjalo ukuze angqine ukuba abanye abantu abangafezekanga babeya kuluxhasa ulongamo lukaThixo ngokugcina ingqibelelo yabo kuye. Kwakhona, uThixo wakuvumela oku, ngenxa yokuba wayesazi ukuba ekugqibeleni wayeza kuyihlawulela, okanye ayisindise, imbewu enentsabelo yabo bavukeli bokuqala, uAdam noEva. Njani?

Ilungiselelo Losindiso

UYehova uThixo wayengenakuthi ngokulula akutyeshele ukugweba kwakhe ngobulungisa. Akanakuthi ngokuzithandela asilibale isono sokuqala sika-Adam noko kuye kongezelelwa luluntu kuso ukususela ngoko. Ukuba uThixo ebeza kuyityeshela imithetho yakhe elungileyo, oku bekuya kuthi kuyisingele phantsi intlonelo yayo yonke inkqubo yakhe yokusesikweni nentembelo kuyo. Khawuthelekelele isimbonono ebesiya kuviwa ukuba, ngenxa yengcinga ethile evele ngelo xesha, umgwebi ongumntu athi nje ngokuzithandela avumele isaphuli-mthetho sikhululeke singohlwaywanga. Noko ke, umgwebi onovelwano unokuthi ngokufanelekileyo alungiselele intlawulo emiswe ngokwasemthethweni ukuze abathile abakulungeleyo ukuyihlawula bahlawulele loo mntu unetyala. Phofu ke oku, koko uThixo asenzele kona.

UYehova wenza ilungiselelo lokuba uNyana wakhe, uYesu Kristu, anikele ngobomi bakhe bobuntu obufezekileyo esikhundleni sobomi obufezekileyo obalahlwa nguAdam. UYesu ngokukhululekileyo wamkela isohlwayo sezono zethu—ukufa. (Isaya 53:4, 5; Yohane 10:17, 18) IBhayibhile ithi: ‘UNyana woMntu weza . . . kuncama ubomi bakhe, bube yintlawulelo yokukhulula abaninzi.’ (Mateyu 20:28; 1 Timoti 2:6) Akukho bani ongomnye owayenokukwenza oku. UYesu wayekhethekile kuba wazalwa engenasono waza wahlala efezekile, engumntu ongenasono de kwayimini yokufa kwakhe. (Hebhere 7:26; 1 Petros 2:22) Ukuhlala kwakhe ethembekile de kwasekufeni kwenza kwabanokwenzeka ngaye ukuba ahlawule intlawulo emiswe ngumthetho yokusikhulula kwizono zethu.

Noko ke, khumbula ukuba uThixo, uMgwebi Ophakamileyo, akanyanzelekanga ukuba akhulule wonk’ ubani. Ubomi bobuntu obugqibeleleyo uYesu awabuncamayo ubugqala njengentlawulelo yetyala esimtyala lona ngenxa yesono. Kodwa uYehova uThixo akayi kuyisebenzisa le ntlawulelo kuboni abangaguqukiyo, abangenaluxabiso nabona ngabom. Kunokuba ngandlel’ ithile kuxolelwe abantu bonke okanye kusindiswe indalo iphela, iBhayibhile ichaza ngeemeko esimele sihlangabezane nazo ukuze sisindiswe kwimiphumo yesono esisizuze ilifa.

Izinto Ekufuneka Sizenzile Ukuze Sisindiswe

Ngoko ke, yintoni efunekayo ukuze sisindiswe? Into eyintloko efunekayo yileyo umpostile uPawulos wayichazela umgcini wamabanjwa waseFilipi: “Kholwa kuyo iNkosi uYesu Kristu, wosindiswa.” (IZenzo 16:31) Ukulivuma ngokusuk’ entliziyweni igazi likaYesu elaphalalayo kuyinto engundoqo ukuze sisindiswe. Ibe luya kuthetha ntoni usindiso kuthi? UYesu wayibonisa impendulo xa wathi: “Ndizinika ubomi obungunaphakade; azisayi kutshabalala naphakade.” (Yohane 10:28) Kwabaninzi, usindiso luya kuthetha ubomi obungunaphakade kumhlaba oyiparadisi obuyiselwe kwiimeko ezifezekileyo. (INdumiso 37:10, 11; ISityhilelo 21:3, 4) Phofu ke, ‘kumhlambi omncinane,’ luya kuthetha ukulawula noYesu kuBukumkani basezulwini.—Luka 12:32; ISityhilelo 5:9, 10; 20:4.

Bambi bathi ukukholwa nje kuYesu kwanele. Elinye iphecana elingokonqulo lithi, “Kukho nje into enye ekufuneka yenziwe nguye nabani na ukuze aye ezulwini. Loo nto ikukuba, amkele uYesu Kristu njengoMsindisi wakhe wobuqu, azinikele Kuye njengeNkosi, aze Amvume ngokuphandle njengonjalo phambi kwehlabathi.” Ngaloo ndlela, abaninzi bakholelwa kukuba, ukusuka nje ngequbuliso uguquke ngokweemvakalelo, kuphela kwento efunekayo ukuze sifumane ubomi obungunaphakade. Noko ke, ukunikela ingqalelo kuphela kwinto enye ebalulekileyo neyimfuneko ukuze usindiswe uze utyeshele ezinye kufana nokufunda isiqendu esinye esibalulekileyo kwisivumelwano uze utyeshele konke okunye.

Oku kucaca ngakumbi xa siphulaphula kumagqabaza abanye ababekade becinga ukuba ukuthi banokholo kuYesu kwakukuphela kwento eyayifuneka ukuze ubani asindiswe. UBernice uthi: “Ndakhula ndihamba iCawa yaseBrethren, kodwa ndaqalisa ukuzibuza ukuba siyintoni isizathu sokuba, ukuba ubomi obungunaphakade buxhomekeke kuYesu ngokupheleleyo, yena ngokwakhe athi: ‘Bubo ke obu ubomi obungunaphakade ukuba mabakwazi, wena ukuphela koThixo oyinyaniso, naye uYesu Kristu omthumileyo.’”—Yohane 17:3.

Kangangeminyaka esithoba uNorman wayeyisekile kukuba wayesindisiwe. Kodwa ke wabona ukuba kwakufuneka okungakumbi kunokuchaza iimvakalelo zokuba uYesu Kristu wayenguMsindisi wakhe. Uthi, “Ndabona ngokusuka eBhayibhileni ukuba kwakunganelanga nje ukuvuma kuThixo ukuba singaboni yaye sifuna usindiso. Kwakhona kufuneka senze imisebenzi ebonisa inguquko.”—Mateyu 3:8; IZenzo 3:19.

Ewe, ukukholwa kuYesu kubalulekile ukuze sisindiswe, kodwa kufuneka okungakumbi. UYesu wathetha ngabanye ababesithi banokholo kuye nababesenza ‘imisebenzi yamandla amakhulu’ egameni lakhe. Kodwa akazange abazi. Kwakutheni? Kwakungenxa yokuba ‘babengabenzi bokuchasene nomthetho’ nokuba babengazange bakwenze ukuthanda kukaYise. (Mateyu 7:15-23) Umfundi uYakobi usikhumbuza ngemfuneko yokuba ‘sibe ngabenzi belizwi, singabi ngabaphulaphuli kuphela, sizikhohlisa ngengqiqo yobuxoki.’ Wakwathi: “Wena uyakholwa ukuba uThixo mnye; uyatyapha; nazo iidemon ziyakholwa, zibe namanwele. . . . Ukholo, ingekho imisebenzi, lufile nalo.”—Yakobi 1:22, NW; Yak 2:19, 26.

Noko ke, bambi baphikisa ngelokuba abo basindiswe ngokwenene bayazenza kakade ezi zinto. Kodwa ngaba ngokwenene bayazenza? UDenis, ‘owamkela uYesu’ xa wayeyinkwenkwana eselula, uthi: “Abantu ‘abasindisiweyo’ endibaziyo abavakalelwa kukuba kukho imfuneko yokuhlolisisa iZibhalo ngenxa yokuba bacinga ukuba sele benako konke okufunekayo ukuze basindiswe.” Eneneni, imisebenzi yohanahaniso nengeyoyabukristu yabaninzi abazibanga besindisiwe iye yawuhlazisa wonke lo mbandela wosindiso.

Sekunjalo, uninzi lume ngelokuba iZibhalo zithi: “Lowo ukholwayo kuNyana, unobomi obungunaphakade.” (Yohane 3:36) Ngoko ke, bagqiba ngelithi wakuba uyamkele iNkosi uYesu Kristu njengoMsindisi wakho buqu, akunakuze uphinde ulahleke. Intetho yabo eqhelekileyo ithi “wakuba usindisiwe, uya kusoloko usindisiwe.” Kodwa ngaba ngokwenene oko koko kuthethwa ziZibhalo? Ukuze siphendule lo mbuzo, sifanele siqwalasele yonke into ethethwa yiBhayibhile ngalo mbandela. Asiyi kufuna ‘ukuzikhohlisa ngengqiqo yobuxoki’ ngokufunda kuphela iinxalenye ezikhethiweyo zeLizwi likaThixo.

Ngaba “Wakuba Usindisiwe, Uya Kusoloko Usindisiwe”?

Phawula isilumkiso esiphefumlelweyo somfundi uYuda. Wabhala: “Zintanda, ndikukhuthalele ngenyameko yonke nje ukunibhalela ngalo usindiso esidlelana ngalo, kwafuneka ukuba ndinibhalele, ndinivuselele, ukuba niluzamele ukholo abalunikelwayo kwakanye abangcwele.” (Yuda 3) Kwakutheni ukuze uYuda abhale oku? Kungenxa yokuba wayesazi ukuba amaKristu athile ayenokuthi sekunjalo aphulukane ‘nosindiso adlelana ngalo.’ Waqhubela phambili esithi: “Ndinga ke ndinganikhumbuza . . . ukuba iNkosi [“uYehova,” NW], yakuba ibasindisile abantu [amaSirayeli] emhlabeni waseYiputa, yathi ngokwesibini yabatshabalalisa abo bangakholwanga.”—Yuda 5.

Isilumkiso sikaYuda besiya kuba sesingekho ngqiqweni ukuba amaKristu ayengazange ajamelane nengozi efanayo naleyo yaloo maSirayeli. UYuda wayengathandabuzi ixabiso ledini likaYesu. Elo dini liye lasisindisa kwisono sika-Adam, ibe uYesu uya kubakhusela abo bakholwayo kuye. Akukho bani unokubahlula kuye. Kodwa sinokuphulukana nale nkuselo. Njani? Ngokwenza oko kwenziwa ngamaSirayeli amaninzi awasindiswayo eYiputa. Sinokuthi ngabom sikhethe ukungamthobeli uThixo.—Duteronomi 30:19, 20.

Khawuthelekelele usindiswe kwinqaba etshayo. Cinga ngendlela obuya kuziva ukhululeke ngayo ukuba ubukhutshwe ngokukhuselekileyo kweso sakhiwo aze umhlanguli lowo athi: “Ukhuselekile ngoku.” Ewe, ubuya kube usindiswe ekufeni okuqinisekileyo. Kodwa yintoni ebiya kwenzeka ukuba ubuye wagqiba ekubuyeleni kweso sakhiwo ngenxa yobudenge? Ubomi bakho bebuya kuba sengozini kwakhona.

AmaKristu akwimeko yokusindiswa. Anethemba lobomi obungunaphakade kuba akwimeko yokuba ngakholekileyo phambi koThixo. Njengeqela, ukusindiswa kwawo kwisono sika-Adam nakuyo yonke imiphumo yaso kuqinisekile. Kodwa ngokobuqu aya kusindiselwa kubomi obungunaphakade kuphela ukuba ayaqhubeka ebambelela kwizinto zonke uThixo azifunayo. UYesu wakugxininisa oku xa wazifanisa nomdiliya waza abafundi bakhe wabafanisa namasebe aloo mdiliya. Wathi: “Amasebe onke akum angathwali siqhamo, [uThixo] uyawasusa . . . Ukuba umntu uthe akahlala kum, ulahlelwa phandle njengesebe, ome; baze abantu bawabuthe, bawaphose emlilweni, atshiswe.” (Yohane 15:2, 6; Hebhere 6:4-6) Abo balahlekelwa lukholo kuYesu bakwalahlekelwa bubomi obungunaphakade.

“Onyamezeleyo . . . Uya Kusindiswa”

Ewe, kukho izinto ezahlukeneyo ezibandakanyekileyo ukuze sisindiswe. Simele singenise ulwazi oluchanileyo ngeenjongo zikaThixo nendlela yakhe yokusindisa. Emva koko simele sibe nokholo kwiMbangi eyiNtloko yosindiso, uYesu Kristu, size senze ukuthanda kukaThixo ubomi bethu bonke. (Yohane 3:16; Tito 2:14) Usindiso luyinto eqinisekileyo kwabo balandela eli khondo. Kodwa lubandakanya ukunyamezela de kuse ekupheleni kobu bomi bethu bangoku okanye kuse ekupheleni kwale nkqubo yezinto. Kuphela ‘ngulowo unyamezeleyo kwade kwasekupheleni, oya kusindiswa.’—Mateyu 24:13.

Kunye nabanye ababesendlwini yakhe, umgcini wamabanjwa waseFilipi wasamkela isigidimi sosindiso esasishunyayelwa nguPawulos noSilas. “Ngaloo yure . . . wabhaptizwa kunye nosapho lwakhe kwangoko.” (IZenzo 16:33, TE) Ngokufanayo sinokwenza eso senzo sihle. Ngaloo ndlela, siya kungenela ulwalamano olusondeleyo nolusikelelweyo noYehova uThixo noNyana wakhe, uYesu Kristu, size sibe nentembelo epheleleyo kumalungiselelo kaThixo osindiso. Umgcini wamabanjwa waseFilipi “wagcoba nendlu yakhe yonke, kuba ekholwa kuThixo.” (IZenzo 16:34) Kwakhona ikhondo elinjalo liya kubangela ukuba nathi ‘sigcobe kakhulu.’

[Umfanekiso okwiphepha 7]

Yintoni ebiya kwenzeka ukuba ubuya kubuyela kwisakhiwo esitshayo emva kokuba usindisiwe?