Ubomi Nobulungiseleli BukaYesu

UYesu Ufundisa EYeriko

KUNGEKUDALA uYesu nezihlwele ahamba nazo ufika eYeriko, esisixeko esikumgama omalunga nohambo lwemini ukusuka eYerusalem. Kuyabonakala ukuba iYeriko izizixeko ezibini, esidala samaYuda simalunga nekhilomitha enesiqingatha ukusuka kwesitsha samaRoma. Njengokuba izihlwele ziphuma kwisixeko esidala zisondela kwesitsha, abangqibi ababini abaziimfama beva ingxokozelo. Omnye wabo kuthiwa nguBhartimeyu.

Bathe bakuva ukuba nguYesu lo udlulayo, uBhartimeyu neqabane lakhe baqalisa ukudanduluka besithi: “Senzele inceba, Nkosi, nyana kaDavide.” Xa isihlwele sibakhalimela ukuba bathi tu, kwaba kukhona badanduluka ngamandla besithi: “Senzele inceba, Nkosi, nyana kaDavide.”

Esiva oku kuphazamisayo, uYesu uyema. Ucela abo bakunye naye ukuba babize abo bakhwazayo. Aba baya kubangqibi abaziimfama baze bathi komnye wabo: “Yomelela, suk’ ume; uyakubiza.” Inemincili ngokungenakuzibamba, le mfama iziphosa kude iingubo zokwaleka, ime ngeenyawo, ize iye kuYesu.

UYesu ubuza la madoda mabini ukuba: “Ninga ndinganenzela ntoni na?”

Ayambongoza esithi kuye: “Nkosi, ukuba kuvulwe amehlo ethu.”

Esikwe yimfesane, uYesu uchukumisa amehlo awo. Ngokwengxelo kaMarko, uYesu uthi kwenye yawo: “Hamba uhambe; ukholo lwakho lukusindisile.” Kwaoko abangqibi abaziimfama bayabona, yaye ngokungathandabuzekiyo bobabini baqalisa ukumzukisa uThixo. Xa bonke abantu bekubona oko kwenzekileyo, nabo bayamzukisa uThixo. Bengaphozisanga maseko, uBhartimeyu neqabane lakhe baqalisa ukulandela uYesu.

Njengokuba uYesu enqumla eYeriko, kukho isihlwele esikhulu. Wonke umntu ufuna ukubona lo mntu uphilise la madoda aziimfama. Abantu bayatyhudisa ukuza kuYesu bevela macala onke, ibe ngenxa yoko, bambi abanakumbona nangetshengele. Phakathi kwaba kukho uZakeyu, intloko yababuthi berhafu eYeriko nakwimimandla eyijikelezileyo. Mfutshane gqitha ukuba abone oko kuqhubekayo.

Ngoko uZakeyu ugidima ngaphambili aze akhwele kumthi womthombe osecaleni kwendlela uYesu ahamba ngayo. Ekule ndawo iphakamileyo, unokubona kakuhle yonke into. Njengokuba izihlwele zisondela, uYesu ukhwaza osemthini esithi: “Zakeyu, khawuleza uhle; kuba namhlanje ndimelwe kukuhlala endlwini yakho.”

UZakeyu uyehla emthini evuya aze akhawuleze ukubuyela ekhaya ukuze alungiselele undwendwe lwakhe olubekekileyo. Kodwa xa abantu bekubona oko kwenzekayo, bonke baqalisa ukumbombozela. Bakugqala kuyinto engafanelekanga ngoYesu ukuba abe lundwendwe lwendoda elolo hlobo. Kaloku, uZakeyu waba sisityebi ngokuthi ngokunganyaniseki afune imali ngegunya kumsebenzi wakhe wokuqokelela irhafu.

Abantu abaninzi bayalandela, yaye xa uYesu engena kwikhaya likaZakeyu, bakhalaza besithi: “Ungene waya kulala kwindoda engumoni.” Kanti uYesu ubona inguquko enokubakho apha kuZakeyu. Ibe uYesu akadaniswa koko, kuba uZakeyu uyaphakama aze avakalise oku: “Uyabona, isiqingatha sempahla yam, Nkosi, ndisinika amahlwempu; nokuba ndidle into kabani ngokumtyhola, ndimbuyisela kane.”

UZakeyu ungqina ukunyaniseka kwenguquko yakhe ngokuthi anikele ngesiqingatha sempahla yakhe kumahlwempu aze esinye isiqingatha asisebenzisele ukubuyisela ezo ebezifumene ngobuqhetseba. Kubonakala ukuba unokubala kwiingxelo zakhe zerhafu ukuba kanye kungakanani oko akutyala abantu. Ngoko ke wenza isithembiso sokwenza imbuyiselo ephindwe kane, esenza ngokuvisisana nomthetho kaThixo othi: ‘Xa umntu athe weba igusha, makadliwe izimvu zibe ne ngemvu leyo.’

UYesu uyakholiswa yindlela uZakeyu athembisa ukwakhlukana ngayo nempahla yakhe, kuba udanduluka athi: “Namhlanje kufike usindiso kule ndlu, ngokokuba naye engunyana ka-Abraham; kuba uNyana womntu weza kufuna nokusindisa oko kulahlekileyo.”

Kutshanje, uYesu ebekhe wazekelisa imeko ‘yoko kulahlekileyo’ kwibali lakhe elingonyana wolahleko. Ngoku sinomzekelo wobomi bokwenene ongalowo ulahlekileyo oye wafunyanwa. Nakubeni iinkokeli zonqulo nabo bazilandelayo bembombozela yaye bekhalaza ngokunikela kukaYesu ingqalelo kubantu abanjengoZakeyu, uYesu uyaqhubeka ebafuna aze ababuyisele aba nyana baka-Abraham balahlekileyo. Mateyu 20:29-34; Marko 10:46-52; Luka 18:35–19:10; Eksodus 22:1.

◆ Kubonakala ngathi uYesu udibana phi nabangqibi abaziimfama, yaye ubenzela ntoni?

◆ Ungubani uZakeyu, ibe kutheni le nto ekhwela emthini?

◆ UZakeyu uyingqina njani inguquko yakhe?

◆ Sisiphi isifundo esinokusifunda kwindlela uYesu amphatha ngayo uZakeyu?