Yenza Izinto Zonke Ngenxa Yeendaba Ezilungileyo
“Oko ke ndakwenza ngenxa yeendaba ezilungileyo, ukuze ndibe lidlelane nabo ngazo.”—1 KORINTE 9:23.
1. Luluphi uphawu lwemfuza esinalo thina sonke, kodwa uThixo uye walungiselela isiseko santoni?
NANGONA sahlukile kwabanye ngeendlela ezahlukahlukeneyo, sonke sinophawu lwemfuza olufanayo. Ngelifa esalizuza kuAdam, sazalwa singaboni abangazaniyo noThixo Osenyangweni, uYehova. (Roma 5:12; Kolose 1:21) Kunjengokuba umpostile ongumKristu uPawulos wabhala oku: “Bonile bonke, basilela eluzukweni lukaThixo.” (Roma 3:23) Ngoko ke, ukuze basindiswe, abantu bazo zonke izizwe neentlanga kufuneka bexolelaniswe noThixo. Ibe hayi indlela esiba nombulelo ngayo kuba, ngothando nenceba engenakuthelekiswa nanto, uYehova uye walungiselela isiseko sokuxolelaniswa kunye naye!
2. (a) Bubuphi ubulungiseleli obaphathiswa amaKristu athanjisiweyo? (b) Sinokufunda ngokusuka kumzekelo kabani, ibe ngoba? (1 Korinte 11:1)
2 Kwiinkulungwane ezilishumi elinesithoba ezadlulayo, amangqina athanjisiweyo kaYehova ayephathiswe “ulungiselelo loxolelaniso.” UPawulos wathi: “Siyanikhunga ngenxa kaKristu, manixolelaniswe naye uThixo.” (2 Korinte 5:18-20) Lo mpostile wabufeza enasiphi isimo sengqondo obu bulungiseleli? Wathi: “Kuba ndikhululekile nje kubo bonke, ndizikhonzisile kubo bonke, ukuze ndibazuze abona baninzi.” (1 Korinte 9:19) Ngokungathandabuzekiyo, uPawulos wenza umgudu wenkathalo ukuze anikele isigidimi sakhe ngendlela ephumelelayo, kuba wakwathi: “Oko ke ndakwenza ngenxa yeendaba ezilungileyo, ukuze ndibe lidlelane nabo ngazo.” (1 Korinte 9:23) Ngoko, sinokufunda ntoni kumzekelo kaPawulos?
Ukunceda AmaYuda Athobekileyo
3. Kwabonakaliswa njani ukukulungela kukaPawulos ukwenza zonke izinto ngenxa yeendaba ezilungileyo ngokuphathelele uTimoti namaYuda?
3 Imvelaphi kaPawulos yobuYuda nokukulungela kwakhe ukwenza zonke izinto ngenxa yeendaba ezilungileyo kwamxhobisela ukuba ancede amaYuda athobekileyo ukuba amkele uYesu njengoMesiya. Ngokomzekelo, khawuqwalasele oko umpostile wakwenzayo xa wakhetha uTimoti njengeqabane lakhe kumsebenzi wokuhambahamba. UTimoti, owayenobawo ongumGrike, wayengalukanga njengoko babenjalo abantwana abangamakhwenkwe bamaYuda. (Levetikus 12:2, 3) UPawulos wayesazi ukuba amaYuda ayenokukhubeka ukuba umfana ongalukanga wayengazama ukuwanceda ukuba axolelaniswe noThixo. Ngoko ke, yintoni awayenzayo uPawulos, ukuze amaYuda aneentliziyo ezinyanisekileyo angabi nakuthinteleka ekwamkeleni uYesu? “Wamthabatha [uTimoti] wamalùsa, ngenxa yamaYuda.” Oku wakwenza nakubeni ulwaluko lwalungeyonto iyimfuneko ukuze umntu abe ngumKristu.—IZenzo 16:1-3.
4. Ngokutsho kweyoku-1 yabaseKorinte 9:20 yayiyintoni injongo kaPawulos?
4 Ngoko kwakungenxa yokuba uPawulos wayesenza zonke izinto ngenxa yeendaba ezilungileyo xa wabonakalisa inkxalabo enothando ngamaYuda angoowabo. Wabhala oku: “KumaYuda ndaba njengomYuda, ukuze ndiwazuze amaYuda; kwabo baphantsi komthetho ndaba njengophantsi komthetho, [nangona mna ndingekho phantsi komthetho, NW], ukuze ndibazuze abaphantsi komthetho.” (1 Korinte 9:20) Ewe, njengoko kuboniswe kwimeko kaTimoti, uPawulos wenza konke okusemandleleni akhe ukuze azuze amaYuda, ewanceda ukuba abe ngamaKristu. Kodwa ngaba wenza okufanayo nakwabeeNtlanga?
Ukufuna Iindlela Zokuzuza AbeeNtlanga
5. UPawulos washumayela koobani eKorinte, yaye waba yintoni umphumo?
5 Akuba uPawulos efikile kwisixeko saseKorinte malunga nekwindla lowama-50 C.E., veki nganye wanikela iintetho kwindlu yesikhungu kubaphulaphuli ababengamaYuda nababengamaGrike aguqukele kunqulo lwamaYuda. Kodwa ukushumayela kwakhe ngenzondelelo kwaxhokonxa inkcaso enkulu kangangokuba waxelela abo babemchasa oku: “Igazi lenu malibe phezu kwentloko yenu; ndihlambulukile mna; kuthabathela kweli xesha, ndiya kuya kwiintlanga.” UYehova wasisikelela esi senzo, kuba “nento eninzi yamaKorinte yakuva yakholwa, yabhaptizwa” njengamaKristu. Eneneni, embonweni, iNkosi yabongoza uPawulos ukuba anamathele kweso sabelo, imxelela oku: “Ndinabantu abaninzi kulo mzi.”—IZenzo 18:1-10.
6. Yintoni eyaqhubela uPawulos ekubeni abe nomdla kwabo babenemvelaphi eyahlukileyo kweyakhe?
6 Umnqweno wokwenene kaPawulos wokufuna ukuzuza abeeNtlanga ukuze baguqukele kubuKristu wamqhubela ekubeni abe nomdla kwanakubantu ababenemvelaphi eyayahluke kwaphela kweyakhe. “Kwabo [beeNtlanga] bangenamthetho, ndaba njengongenamthetho ndingenguye phofu ongenamthetho kuThixo, ndingosemthethweni kuKristu, ukuze ndibazuze abangenamthetho.” (1 Korinte 9:21) Ziziphi iindlela awazisebenzisayo uPawulos ukuze azuze abeeNtlanga?
7. Ngokubhekisele kulwaluko, kutheni le nto imeko kaTito yayahlukile kwekaTimoti?
7 Xa uPawulos waya eYerusalem malunga nowama-49 C.E. ukuze abekho kwintlanganiso ebalulekileyo yequmrhu elilawulayo lebandla lamaKristu, wayephelekwe ngumfundi ongumGrike uTito. Kubazalwana ababehlanganisene, uPawulos wanikela ingxelo engomsebenzi wakhe wokushumayela phakathi kwabantu beeNtlanga, ibe kamva wabhala oku: “NoTito lo, ubenam, nangona ebengumGrike, akanyanzelwanga ukuba aluke.” (Galati 2:1-3) Ngokungafaniyo noTimoti, ngokuyintloko uTito wayebufeza ubulungiseleli bakhe kubantu beentlanga abangalukanga. Ngenxa yoko, imbambano engolwaluko ayizange iphakame kwimeko yakhe.—2 Korinte 8:6, 16-18, 23; 12:18; Tito 1:4, 5.
8. UPawulos wabunikela njani ubungqina eAtene?
8 Enikela ubungqina eAtene, kwakhona uPawulos wabonakalisa ukuba wayezenza izinto zonke ngenxa yeendaba ezilungileyo. Enikel’ ingqalelo kwindlela ababecinga ngayo abemi besixeko esilikomkhulu laseGrisi, wabaxelela ngoThixo ababengamazi waza wacaphula iimbongi zabo uAratus noCleanthes, abathi: “Kuba nathi siyinzala yakhe.” Ngaloo ndlela lo mpostile wafuna ukunceda abaphulaphuli bakhe ukuze baqonde ukuba ‘babengafanele bacinge ukuba ubuthixo obu bufana nento eqingqwe ngobungcibi nangengcinga yomntu.’ Ngaphezu koko, uPawulos waqiqa ngale ndlela: “Loo maxesha ke ngoko okungazi, uThixo wawayeka ngabom; kungoku uyala abantu bonke ezindaweni zonke ukuba baguquke.” Wayalathisela ngokuphumelelayo ingqalelo ‘kwiNkosi yezulu nomhlaba,’ uYehova. Ibe waba yintoni umphumo? “Amadoda athile anamathele kuye, akholwa.” (IZenzo 17:22-34) Ewe, iindlela zikaPawulos zaziphumelela!
9. Kungayiphi indlela awathi uPawulos ‘waba ngongenamandla kwabangenamandla,’ ibe ngoba?
9 UPawulos wathi, “Kwabo bangenamandla, ndaba njengongenamandla, ukuze ndibazuze abangenamandla.” (1 Korinte 9:22a) Nangona intetho yakhe yayinamandla, umpostile wazicingela izazela ezibuthathaka zamaYuda nabeeNtlanga abathile ebandleni. Wabongoza amaKristu aseRoma wathi: “Lowo ke uswele amandla elukholweni, mamkeleni, kodwa ke kungabi ngokucalula zicamango.” Endaweni yokuba ngabagwebayo, uPawulos wathi: “Masisukele izinto zoxolo, nezinto zokwakhana.” (Roma 14:1, 13, 19) Waluleka wathi: “Thina, ke bomeleleyo sifanele ukukuthwala ukuswela amandla kwabangomeleleyo, singazikholisi.” (Roma 15:1) Eyiphaphele imbopheleleko awayenayo yokuhlengahlengisa indlela yokuthetha neyokwenza izinto ukuze ancede abanye, wabhala oku: “Kubo bonke ndesuka ndaba ziinto zonke.”—1 Korinte 9:22b; Galati 3:28.
Phucula Ubuchule Bakho Bokushumayela
10. Sinokumxelisa njani uPawulos namhlanje?
10 Namhlanje kufuneka amaNgqina kaYehova exelise uPawulos njengoko wayexelisa uKristu. (1 Korinte 11:1) Umpostile wayengumshumayeli onobuchule owayenomoya wobuvangeli basemazweni. Oku kusenokuba njalo nakuthi, nangona iimeko zethu zisenokungasivumeli ukuba sikhonze kummandla wasemzini. NjengoPawulos, simele ‘senze zonke izinto ngenxa yeendaba ezilungileyo, ukuze sidlelane ngazo nabanye.’ (1 Korinte 9:23) Kodwa yintoni enokuphucula ubuchule bethu njengabashumayeli boBukumkani nabenzi babafundi?—Mateyu 28:19, 20.
11. Njengomlungiseleli, kutheni ufanele uhlakulele ukuba ngophaphileyo?
11 Sebenzela ukuhlakulela ukuba ngophaphileyo. Ngokuba ngophaphileyo, unokufunda okuninzi okuya kukunceda uhlengahlengise intshumayelo yakho yeendaba ezilungileyo kubaninimzi ngabanye. Ngokomzekelo, ukuba unikela ubungqina kubemi basedolophini, phawula enoba kukho amaqhaga eengcango, izinto zokuhombisa ezisekelwe kunqulo, nentetho ethile ekumaphepha ancanyathiselwe ezifestileni. Ezi zinto zinokukunceda ukuba unikele ubungqina obunokuchukumisa iintliziyo zabantu abahlala kuloo makhaya. Ngokuqinisekileyo uPawulos wayengumntu ophaphileyo. EAtene wasebenzisa isibingelelo ekwakubhalwe kuso “Kongaziwayo uThixo” njengembalasane enye yobungqina obuphumelelayo awabunikelayo ngokuphathelele “uThixo yena, owenza ihlabathi nento zonke ezikulo.” (IZenzo 17:22-25) Nawe unokwenza okufanayo kubulungiseleli bakho.
12. Ukusebenzisa ingqiqo kunayiphi indima kubulungiseleli bethu?
12 Sebenzisa ingqiqo kubulungiseleli. Musa ukudinyazwa yintsabelo yomntu yokuqala yokuba madol’ anzima ekukuvuleleni ucango aze athethe nawe. Endaweni yokuba uzive utyhafile ngenxa yokujanyelwa kakubi, bonakalisa ububele uze usebenzise ingqiqo. Zama ukuhlengahlengisa indlela obunikela ngayo ubungqina ngokweemeko. Kwanangokwenza umthandazo omfutshane ngaphakathi, usenokukwazi ukuthetha into eya kuchukumisa intliziyo yaloo mntu.—Thelekisa uNehemiya 2:4-6.
13. Sinokukubonakalisa njani ukuba nolwazelelelo kwabo sinikela ubungqina kubo?
13 Yiba nolwazelelelo. Kule nkalo, kunokwenziwa izinto ezahlukahlukeneyo ngenxa yeendaba ezilungileyo. Ngokomzekelo, ukuba nolwazelelelo kuya kukuthintela ekubeni ugcine abantu abakhulileyo okanye abagulayo bemi emnyango kangangexesha elide. Usenokucebisa ukuba uthethe nabo ngaphakathi endlwini, apho banokuziva bekhululeke ngakumbi. Okanye usenokugqiba ekubeni phantsi kweemeko ezithile kunokuba kokulungileyo ukulwenza lufutshane utyelelo lwakho. Nakweyiphi na imeko, yiba nolwazelelelo. Bonisa ukuba unenkathalo!—Mateyu 9:35, 36.
14. Xa sinikela ubungqina, sinokubenza njani abaphulaphuli bakhululeke?
14 Thetha ngendlela ebenza bakhululeke abaphulaphuli bakho. Qalisa ukunikela kwakho ubungqina ngombuliso wobuhlobo owamkelekileyo kummandla okuwo. (Mateyu 10:12) Khumbula ukuba kunokwenzeka ukuba bakoyike baze bacinge okuthile ngawe. Thetha ngendlela ebonakalisa ubulumko nenobuhlobo bokwenene. Oku kuya kunceda ekuqinisekiseni abaninimzi ukuba ulapho ngenjongo yokubanceda kungekhona ngeenjongo ezizezinye.
15. Kutheni le nto ufanele uzazise ngokucacileyo ucacise nesizathu sokuba utyelele kwelo khaya?
15 Kufuneka abaninimzi bazi ukuba ngubani na obatyeleleyo nesizathu soko. Ngoko ke, zazise ngokucacileyo. Kwimimandla ethile, ngokungakumbi eAfrika naseAsiya, abantu banomdla gqitha kubahambi ngokokude balangazelele ukwazi ukuba: Ungubani? Uhlala phi? Utshatile? Unayo na intsapho? Ukuze ufake isandla kuyolo olubakho ngesi sihlandlo, ngokwesiko kuye kunyanzeleke ukuba uphendule le mibuzo ngaphambi kokuba ucacise injongo yotyelelo lwakho. Musa ukukujonga ukwamkelwa ngaloo ndlela njengokungeyomfuneko, kodwa sebenzisa elo thuba ekumfundeni umntu lowo uze uzabalazele ukumjonga ngendlela yokumhlonela.
16. Inokunceda njani imibuzo efanelekileyo ekugcineni umnini-mzi ekhululekile ukuba ancokole?
16 Sebenzisa imibuzo efanelekileyo ukuze umgcine umninimzi ekhululekile ukuba ancokole. Nangona inkangeleko yobuso isenokutyhila okuthile, kufuneka iqondwe indlela acinga navakalelwa ngayo. Ngokuvisisana noko, usenokuthi ngobuchule ubuze imibuzo eya kuqhubela umninimzi ekubeni avakalise iimbono neemvakalelo zakhe ezinzulu. Ukuzekelisa: Elinye inenekazi elingenamntwana elalizithanda gqitha izilwanyana lathetha oku ngotyelelo lwenenekazi elithile eliliNgqina: “Into endiyikhumbulayo ngobuso balo obunoncumo kukuba laliseluxolweni. Ndaba nomdla kulo. Eli nenekazi landibuza eyona nto yayindixhalabisa kakhulu mayela neemeko ezikhoyo emhlabeni. Ndathi ndandikhathazwa yindlela umntu aziphatha ngayo izilwanyana, ibe landibonisa uIsaya 11:6-9 othetha ngokuhlala kwezilwanyana eluxolweni lokwenyaniso. Ndafuna ukwazi okungakumbi.”
17. Kutheni ufanele ube ngophaphileyo ekuphulaphuleni amagqabaza omninimzi angeemeko zakhe?
17 Yiba ngophaphileyo ekuphulaphuleni oko kusenokuthethwa ngumninimzi malunga neemeko zakhe, ngokungakumbi kwintsimi egutyungelwa ngokufuthi. Ngale ndlela, kwanasebudeni bencoko emfutshane, mhlawumbi uya kufunda into ethile ephawulekayo ngomntu lowo. Emva kokuyishiya indlu, bhala ngokufutshane loo nkcazelo kwiphetshana lengxelo yendlu ngendlu. Kodwa kuthekani ukuba umninimzi ubuza umbuzo ongenakuwuphendula? Yandula ke wenze uphando kwiimpapasho zeWatch Tower Society ukuze ufumane eyona ndlela ilunge ngakumbi yokwabelana nomntu lowo ngeendaba ezilungileyo xa uphinda umtyelela.
Umzekelo Wabavangeli Basemazweni
18. Yintoni enokufundwa ngabavangeli basemazweni nangabanye kuPawulos?
18 Phakathi kwabo benza zonke izinto ngenxa yeendaba ezilungileyo kukho abavangeli basemazweni abaqeqeshwe kwiSikolo SeBhayibhile SeWatchtower saseGiliyadi. Banokufunda okuthile kuPawulos, owayenomoya omhle wobuvangeli basemazweni. Ngokomzekelo, akazange afune ukuba ngunobangela wemiqobo eyayinokuthintela amaYuda nabeeNtlanga ekwamkeleni inyaniso. Ngoko ke, lo mpostile wayekulumkele oko wayekutya ibe wawaluleka amaKristu aseKorinte ukuze aphaphele ukuba ukusebenzisa inkululeko awayenayo yokutya ukutya okuthile kungabakhubekisi abanye. (1 Korinte 8:8, 9) KwiNew Century Bible, uNjingalwazi F. F. Bruce wathi: “Kuzo zonke izinto ezilukhetho (njengokutya okwakuyimbambano [kweyoku-1 yabaseKorinte] isahluko 8), [uPawulos] wayesenza ngokuvisisana namasiko abo wayenabo ngelo xesha, ukuze angabeki mqobo kwindlela ‘yokubazuza’ ngevangeli.” (Roma 14:21) Ngokufanayo, abavangeli basemazweni abangamaNgqina kaYehova abazami kuguqula amasiko abantu kwiindawo ababelwe kuzo, nangona abasebatsha bencedwa ngokomoya ukuze benze uhlengahlengiso oluyimfuneko ekukholiseni uThixo.—Roma 12:1, 2.
19. Ekwenzeni abafundi, luluphi uhlengahlengiso olusenokuba yimfuneko (a) kwabo bakumsebenzi wobuvangeli basemazweni? (b) kubo bonke abavakalisi boBukumkani?
19 Abo baqalisa kwizabelo zabo njengabavangeli basemazweni kufuneka bafunde ngeenkqubo namasiko abantu. La ngamava axhobisayo yaye anokubanceda abavangeli basemazwemi ukuba babe ngabaphumelela ngakumbi kumsebenzi wabo wokushumayela. Enyanisweni, ukuze baphephe ukukhubekisa abanye, kusenokufuneka benze uhlengahlengiso oluthile kwimibandela enjengokunxiba nokuzilungisa. Ngokomzekelo, xa omnye udade ongumvangeli wasemazweni wayeqala ukufika eNtshona Afrika, wafumanisa ukuba indlela awayezisebenzisa ngayo izinto zokuthambisa yayinokumfanisa ngokulula namabhinqa awayeziphethe vakalala kuloo mmandla. Ngoko ke, ukuze abanye bangazithandabuzi iintshukumisa zakhe, wayiguqula ngokukhawuleza indlela awayezisebenzisa ngayo izithambiso. Kambe ke, onke amaNgqina kaYehova afanele abe ngalungeleleneyo ekunxibeni nasekuzilungiseni ukuze ancede abanye ngokomoya. Ngokuqinisekileyo amaKristu, alulekwa ukuba ‘angabeki sikhubekiso phambi komzalwana’ nokuba aphuthume izinto zokwakhana nabanye, awafuni kukhubekisa nabani na ongomnye.—Roma 14:13, 19.
20. (a) Lilonke, yintoni eya kusinceda ekubeni ‘senze zonke izinto ngenxa yeendaba ezilungileyo’? (b) Yiyiphi imibuzo eseza kuphendulwa?
20 Ukuphumelela njengabavakalisi boBukumkani kuxhomekeke ngokuyintloko kwintsikelelo kaYehova. (1 Korinte 3:6, 7) Kanti, kukwafuneka senze umgudu othile. Ngoko yiba ngophaphileyo, njengoko uPawulos wayenjalo kubulungiseleli bakhe. Sebenzisa ingqiqo, yiba nolwazelelelo, benze abaninimzi bakhululeke, uze usebenzise imibuzo efanelekileyo eya kubagcina bekhululekile ukuba bancokole nawe. Zenze ulungele amasiko asenokubonakala engaqhelekanga kodwa angekho nxamnye nezibhalo. Ewe, ‘masenze zonke izinto ngenxa yeendaba ezilungileyo, ukuze sabelane nabanye ngazo.’ (1 Korinte 9:23) Kodwa kwenzeka ntoni xa abathile sele beyinxalenye yabazalwana bethu abangamaKristu? Sibaphatha njani bona?
Unokuphendula Njani?
◻ Yintoni awayenzayo uPawulos ukuze ancede amaYuda abe ngamaKristu?
◻ UPawulos wasebenzisa ziphi iindlela ukuze azuze abeeNtlanga?
◻ Ziziphi ezinye iindlela zokuphucula ubuchule bethu bokushumayela?
◻ Nguwuphi umzekelo uPawulos awawumisela abavangeli basemazweni nabanye abavakalisi boBukumkani?