Ngaba Ukulunga KukaThixo Kuyakutsala?
NGABA unomhlobo osenyongweni? Ukuba kunjalo, ngaba wakhe wacinga ngento eyakutsalela kuloo mntu? Ngaba yimbonakalo yakhe yangaphandle? Ngaba sisibakala sokuba naninomdla kwizinto ezifanayo? Okanye ngaba yayiziimpawu ezinzulu ngakumbi, ezinjengobubele okanye ubulumko? Ukuba uphawu olwaqinisa ubuhlobo benu yaba lolokulunga, ngoko ngenene ninolwalamano olungenakulinganiswa nanto. Ukulunga kokwenene namhlanje kufumaneka manqaphanqapha njengoko, ubukhulu becala, abantu ‘bengakuthandi ukulunga.’—2 Timoti 3:3.
KumKristu, olona lwalamano lubalulekileyo ebomini asilulo olo analo nomnye umntu kodwa lolo analo noThixo. Ngoko xa ucinga ngolu lwalamano, ngaba wakhe wakuqwalasela oku: ‘Ziziphi iimpawu zikaThixo ezinditsalela kakhulu Kuye?’
Iimpawu ZikaThixo Eziziintloko
Enyanisweni, iBhayibhile ichaza iimpawu ezininzi ezibalaseleyo zikaThixo. Ngokuqhelekileyo ezine ezibalaseliswayo luthando lwakhe, ukuba sesikweni kwakhe, ubulumko bakhe, nokuba nguSomandla kwakhe. (Duteronomi 32:4; Yobhi 12:13; INdumiso 147:5; 1 Yohane 4:8) Ukuba bekuya kufuneka sikhethe phakathi kwezi mpawu zine zibalaseleyo, mhlawumbi besiya kuthi luthando lukaThixo olwasitsala kakhulu. Noko ke, okunxulunyaniswa kakhulu nothando lwakhe kukulunga kwakhe okungaphaya kokuqonda. Ababhali beBhayibhile babhala besebenzisa ulwimi lobuciko malunga nolu phawu, ibe ukulunga okunjalo kunokwenza abantu batsaleleke kulwalamano olunentsingiselo noluyolisayo noMdali wabo.
Ngokomzekelo, ekupheleni kwenkulungwane yesithandathu Ngaphambi kweXesha Eliqhelekileyo, umprofeti uZekariya wadanduluka wathi ngoYehova: “Kungakanani na ukulunga kwabo, bungakanani na ubuhle babo!” (Zekariya 9:17) Kwiminyaka emininzi ngaphambi koZekariya, ngokufanayo uIsaya wadumisa uThixo xa wabhala wenjenje: “Ndiya kukhankanya iinceba zikaYehova; . . . nokulunga kwakhe okukhulu kwindlu kaSirayeli.”—Isaya 63:7.
Kwiinkulungwane ezintathu ngaphambilana, uKumkani uDavide wayebhale ngendlela echukumisa kakhulu ngokulunga kukaThixo. UDavide wabhala ngento ayaziyo, ekubeni wayenandipha oku kulunga kubo bonke ubomi bakhe. UThixo wabonakalisa ukulunga ngeyona ndlela ingathethekiyo kuDavide, ngokukodwa emva kwezono zakhe ezinzulu kakhulu mayela noBhashebha nendoda yakhe u-Uriya, xa uThixo wamenzela inceba. (2 Samuweli 12:9, 13) KwiNdumiso 31:19, uDavide wavakalisa oku ebonakalisa uxabiso: “Hayi, ubukhulu bokulunga kwakho, obuqwebele abakoyikayo.”
Ngaba nawe ubonakalisa uxabiso ngokulunga kukaThixo njengokuba kanye benjenjalo abo banquli bamandulo? Ukuba kunjalo, uya kunandipha ‘uxolo lokwenene lukaThixo olugqithisele kuko konke ukuqonda,’ ibe uya kushukunyiswa ngokunzulu ukuba wenze ukuthanda kukaThixo ngamaxesha onke. (Filipi 4:7) Ngoku makhe siqwalasele ngokufutshane oko kuqukwa kukulunga kukaThixo nendlela okumangalisa ngayo ngokomlinganiselo okusebenza ngawo. Ngokuqinisekileyo oku kuya kulwenza nzulu uxabiso esinalo ngoBawo wethu wasezulwini.