Iindawo Ezithile Zelizwe Ledinga

INazarete—Ikhaya Lomprofeti

“BATHI ke abantu, Lo nguYesu, umprofeti ongowaseNazarete yelaseGalili” Ewe, kwanasebudeni bobulungiseleli bukaYesu, ukukhankanywa nje kwakhe kwakukhumbuza ngesixeko esidumileyo ngoku esiyiNazarete. Ngaloo ndlela, abo babesiza kumbamba abazange bathi bafuna uYesu kodwa bathi ‘uYesu umNazarete.’—Mateyu 21:11; 26:71; Yohane 18:3-5; IZenzo 26:9.

Umfanekiso ongasentla ubonisa oko uya kukufumana xa utyelela iNazarete namhlanje. Inkulu ngakumbi kunaxa isithunywa seza “emzini welaseGalili ogama liyiNazarete” ukuza kuxelela uMariya ukuba wayeya kuzala uNyana kaThixo. (Luka 1:26-33) Emva apho, iNazarete yayibufana nedolophana eboniswe kwiphepha elilandelayo, iingxande zazihlanganiswe kwindawo elithambeka. Kunokwenzeka ukuba uYosefu noMariya babehlala kwikhaya elifana nezi zindlu. Kodwa ngaphambi nje kokuba uMariya azale, kwafuneka baye kumazantsi elaseBhetelehem, ibe kulapho wazalelwa khona uYesu. Kamva basabela eYiputa ukuze bakhusele umntwana kumacebo kaHerode okuzama ukumbulala. Emva koko, “babuyela kwelaseGalili emzini wabo iNazarete.”—Luka 2:4, 39; Mateyu 2:13-23.

Ngaloo ndlela uYesu wakhulela kungekhona kwindawo exakekileyo njengeYerusalem okanye iTibheriya, koko kwindawo epholileyo. INazarete yayikwingingqi ejikelezwe ziinduli zoMzantsi welaseGalili, apho ukutya okuziinkozo, iidiliya, iziqhamo zomnquma namakhiwane zazichuma khona. Yayisoloko iba namaxesha ehlobo aphole kamnandi, sekunjalo, amaxesha asebusika ayengaqhaqhazelisi mazinyo njengakuMntla welaseGalili.

UYosefu wamxhasa umfazi wakhe, oonyana, neentombi zakhe ngokusebenza njengomchweli, mhlawumbi enendawo yokusebenzela efana nale siyibona kwiNazarete yanamhlanje. Kusenokuba wayesenza imiqadi yophahla neengcango zomthi ukwenzela izindlu zasedolophini, okanye iitafile, izitulo, nenye ifanishala eyenziwe ngomthi. Siyazi ukuba uYesu waqwalasela waza wafunda, kuba naye wabizwa ‘njengomchweli.’ (Marko 6:3; Mateyu 13:55, TE) Umsebenzi wezolimo kufutshane naseNazarete kusenokwenzeka ukuba wavula amanye amathuba omsebenzi. Mhlawumbi uYesu wenza idyokhwe efana nale ibonwa kwezi zilwanyana. Ngeli thuba, uYosefu usenokuba wayesebenzisa izixhobo zakhe ukwenza amakhuba okanye izileyi zokuvuna ukuba zirhuqwe ngale dyokhwe.—2 Samuweli 24:22; Isaya 44:13.

Njengomfana, ngokunokwenzeka ukuba uYesu wayehambahamba kummandla ojikeleze iNazarete, ‘njengaseKana yelaseGalili,’ oziikhilomitha ezili-13 ngasemantla, apho wathi kamva wenza ummangaliso wakhe wokuqala. (Yohane 2:1-12) Ehamba kangangeekhilomitha ezili-10 kumzantsi-mpuma ukuya kwiThafa laseYizereli nangakwinduli yakwaMore, uYesu wayenokufikelela kwisixeko saseNayin, esibonakala kwiphepha 17.a (ABagwebi 6:33; 7:1) Khumbula ukuba ebudeni bohambo lwakhe lokuqala lokushumayela, uYesu wahlangana nomkhoko wabantu owawusiya kungcwaba kufutshane naseNayin. Esikwa yimfesane, wamvusa unyana womhlolokazi.—Luka 7:11-16.

INazarete yayingemanga nakuyo nayiphi na yezona ndlela ezinkulu nezisebenzisekayo ezazinqumla kwelo lizwe, sekunjalo kwakulula ngayo ukuba ifikelele kwezo ndlela. Oku unokukubona kwiqweqwe elingaphandle leKhalenda YamaNgqina KaYehova Yowe-1990, nayo enomfanekiso omkhudlwana weNazarete yanamhlanje. Indlela esuka empuma eya entshona enqumla kwiThafa laseYizereli idibanisa izibuko laseAkho, okanye iTolimayi, noLwandle lwaseGalili neThafa laseYordan. Ukunqumla apho kukho indlela esuka emazantsi eDamasko neyehla iye emazantsi ityhubela elaseSamariya ukuya eYerusalem.

INazarete yayinendlu yayo yesikhungu, ibe ekuqalekeni kobulungiseleli bakhe, uYesu wangena apho “ngokwesiko lakhe.” Wafunda kwincwadi kaIsaya 61:1, 2, eyibhekisela kuye. Babeza kusabela njani abantu bale dolophu, bambi ababembonile ekhulela phambi kwabo yaye basenokuba bade bahlawula okuthile ngomsebenzi wakhe wokuchwela? Baba lugcwabevu ngumsindo baza bazama ukumphosa eliweni, kodwa uYesu wasaba. (Luka 4:16-30) Ngokucacileyo, udumo loko wakwenzayo kamva eNayin nakwezinye iindawo lwafikelela eNazarete, kuba wathi akubuyela waza wafundisa kwindlu yesikhungu yasekuhlaleni, akukho namnye owathetha ngokumbulala. Sekunjalo, ‘akenzanga misebenzi mininzi yamandla khona apho,’ kuba abo babemazela eNazarete abazange bakholelwe kuye njengomprofeti.—Mateyu 13:53-58.

UMarko unikela ingxelo engendlela uYesu awasabela ngayo esithi: “Umprofeti akasweli mbeko, kungaba kukowabo, nakwizizalwana zakhe, nakokwabo.” Olunjani usizi ukuba oku kube kwakunjalo ngabaninzi eNazarete. Sekunjalo, sinokucinga ngeso sixeko njengekhaya loMprofeti esikhetha ukumzukisa.—Marko 6:4.

[Umbhalo osemazantsi]

[Inkcazelo Ngomfanekiso okwiphepha 16]

Pictorial Archive (Near Eastern History) Est.