Lungiselela Ukusindela Kwihlabathi Elitsha
“Khumbulani umkaLote.”—LUKA 17:32.
1. Nguwuphi umzekelo ongokwembali ongentlangulo yobuthixo isifundo sethu esiwubalaselisayo namhlanje, ibe sinokungenelwa njani kuwo?
EMVA kokuchaza indlela uYehova awamhlangula ngayo ngokumangalisayo uNowa nentsapho yakhe, umpostile uPetros wabonisa omnye umzekelo ongokwembali. Watsalela ingqalelo ekusindisweni kukaLote owayelilungisa xa iSodom neGomora zatshiswayo zaluthuthu, njengoko sifunda kweyesi-2 kaPetros 2:6-8. Ezo nkcukacha zalondolozelwa ingenelo yethu. (Roma 15:4) Ukucinga nzulu ngoko kwenzekayo mayela noko kuhlangulwa kunokusinceda ukuba sikufanelekele ukulondolozelwa kwihlabathi elitsha likaThixo.
Indlela Esisabela Ngayo Kwindlela Yobomi Yehlabathi
2. Sisiphi isimo sokuziphatha esasiseSodom naseGomora esakhokelela ekutshatyalalisweni kwezo zixeko nguThixo?
2 Kwakutheni ukuze ezo zixeko nabemi bazo batshatyalaliswe? Umpostile uPetros ukhankanya ukuzifica ‘kuburheletyo obungenammiselo.’ (2 Petros 2:7) Njengoko oko kuboniswa kukusetyenziswa kwegama lesiGrike ekuye kwaguqulelwa kulo ibinzana elisetyenzisiweyo, abantu baseSodom naseGomora bazifica esonweni ngokokude bangabonakalisi ntlonelo ngokupheleleyo kwanokuwudela umthetho negunya. UYuda 7 uthi ‘benza kakhulu umbulo baza bemka belandela nyama yimbi.’ Ukuba lihlazo kwehambo yabo kwabonakala xa amadoda aseGomora, “ethabathela kumfana esa kwixhego, bonke abantu bevela nasekupheleni kwawo,” awurhangqayo umzi kaLote aza afuna ngegunya ukuba akhuphele iindwendwe zakhe kumadoda aseSodom ukuze anelise iminqweno yawo egqwethekileyo. Ibe ankqangaza emqalekisa uLote ngenxa yokwala kwakhe ukuwavumela ukuba enze ezo zinto zingamanyala.—Genesis 13:13; 19:4, 5, 9.
3. (a) Kwenzeka njani ukuba uLote nentsapho yakhe bahlale kummandla owawonakele ngolo hlobo njengeSodom? (b) Wasabela njani uLote kwindlela yokuziphatha evakalala yabantu baseSodom?
3 Ngaphambi koko uLote wayefudukele kummandla okufutshane naseSodom kuba wawungumhlaba ovumayo kwizinto eziphathekayo. Ekuhambeni kwexesha, wafudukela kanye phakathi kweso sixeko. (Genesis 13:8-12; 14:12; 19:1) Kodwa wayezichasile izenzo ezilihlazo zabantu beso sixeko, ibe loo madoda amgqala njengowahlukileyo kuwo, ngokucacileyo ngenxa yokuba uLote nentsapho yakhe babengenanxaxheba kubomi babo bemicimbi yasentlalweni. Kunjengokuba eyesi-2 kaPetros 2:7, 8 isithi: “ULote . . . owacatshukiswa kukuhamba eburheletyweni kwabangenammiselo; kuba laye, ngokubona nangokuva, ilungisa elo lihleli phakathi kwabo imihla ngemihla, liwuthuthumbisa umphefumlo walo olungisayo ngemisebenzi yabo echasene nomthetho.” Ezo meko zabangela izilingo eziqatha kuLote kuba, njengendoda eyayililungisa, wayicekisa ihambo enjalo.
4. (a) Kungaziphi iindlela ezithi iimeko zanamhlanje zifane nezo zeSodom yamandulo? (b) Ukuba sifana noLote owayelilungisa, sisabela njani kwiimeko ezikhoyo ezonakeleleyo?
4 Nakumhla wethu, umgangatho wokuziphatha webutho labantu uye wehla kakhulu. Kumazwe amaninzi, abangakumbi nangakumbi babandakanyeka kwiintlobano zesini ngaphambi komtshato okanye ngaphandle komtshato. Kwanabantu abaninzi abaselula abasesikolweni babandakanyeke ngokunzulu kule ndlela yobomi, ibe bagculela abo bangabatheleliyo kuyo. Amafanasini awazifihli nakancinane ibe ngokuphandle ehla enyuka kwizitrato zezixeko ezikhulu efuna ukuba abonwe. Abefundisi baye balithelela eli qela lamafanasini. Ngokusesikweni, zimbalwa iicawa ezimisela njengabefundisi amafanasini nabenzi bobuhenyu abaziwayo. Ukanti, ngokwenyaniso, njengoko iingxelo zeendaba ziye zakubonisa ngokuphindaphindiweyo oku, akunto inzima nakancinane ukufumana amafanasini, abenzi bobuhenyu, nabakrexezi kwizintlu zabefundisi. Enyanisweni, zimbi iinkokeli zonqulo ziye zafuduselwa kwezinye izixeko okanye zide zanyanzelelwa ukuba ziyeke kwizikhundla zazo ngenxa yokuziphatha okulihlazo ngokwesini. Abathandi bobulungisa abahambisani nobungendawo obunjalo; ‘bakuthiyile okungendawo.’ (Roma 12:9) Baba buhlungu ngokukhethekileyo xa ihambo yabantu abathi bakhonza uThixo isizisa ugculelo egameni lakhe ize ibangele ukuba abantu abangenalwazi bacezele kude elunqulweni besithi lungamasikizi.—Roma 2:24.
5. Nguwuphi umbuzo esiwuphendulelwa kukutshabalalisa kukaYehova iSodom neGomora?
5 Unyaka emva komnye le meko iya isiba mbi. Ngaba iya kuze iphele? Ewe, iza kuphela! Oko kwenziwa nguYehova kwiSodom nakwiGomora yamandulo kubonisa ngokucacileyo ukuba, ngexesha lakhe elimisiweyo, uya kuphumeza umgwebo. Uya kubatshabalalisa ngokupheleleyo abangendawo, kodwa uya kubahlangula abakhonzi bakhe abanyanisekileyo.
Ngubani Okanye Yintoni Eza Kuqala Ebomini?
6. (a) Sisiphi isifundo esisexesheni esisifumana kwingxelo engabafana ababeza kutshata neentombi zikaLote? (b) Isimo sengqondo sabo babeza kuba ngamaqabane eentombi zikaLote saba luvavanyo njani kuzo?
6 Kuya kusindiswa kuphela abo babonakalisa ukuhlonela uThixo ngokwenyaniso. Mayela nale meko, qwalasela oko kwathethwa zizithunywa zikaYehova kuLote ngaphambi kokuba iSodom neGomora zitshatyalaliswe. “Usenabani na apha? Umyeni, noonyana bakho, neentombi zakho, nabo bonke onabo kulo mzi, bakhuphe kule ndawo; ngokuba siya kuyonakalisa le ndawo.” Ngoko ke uLote wathetha nabafana ababeza kuzeka iintombi zakhe. Wababongoza ngokuphindaphindiweyo esithi: “Sukani, niphume kule ndawo; ngokuba uYehova uya kuwonakalisa lo mzi.” Ulwalamano ababenalo nentsapho kaLote lwabavulela ithuba elikhethekileyo lokuhlangulwa, kodwa bona ngokwabo kwakufuneka benze okuthile. Kwafuneka bezingqine ngokucacileyo ukuba babemthobela uYehova. Kunoko emehlweni abo, uLote “usuke waba njengohlekisayo.” (Genesis 19:12-14) Unokuyithelekelela indlela ezavakalelwa ngayo iintombi zikaLote xa zeva okwakwenzekile. Kwavavanywa ukunyaniseka kwazo kuThixo.
7, 8. (a) Xa izithunywa zezulu zabongoza uLote ukuba asabe nentsapho yakhe, wasabela njani, ibe kutheni oku kwakungebobulumko nje? (b) Ukuze bahlangulwe, yintoni ebalulekileyo eyayifanele yenziwe nguLote nentsapho yakhe?
7 Ngentsasa elandelayo ngesifingo, izithunywa zezulu zamngxamisa uLote. Zathi: “Vuka, thabatha umkakho, neentombi zakho zombini, aba banokufumaneka, hleze ubhebhethwe ngobugwenxa balo mzi.” Kodwa “wazilazila.” (Genesis 19:15, 16) Kwakutheni? Yintoni le yayimbambile? Ngaba yayizizinto eziphathekayo awayenazo apho eSodom—zinto ezo kwindawo yokuqala ezazimtsalele ukuba abe kuloo mmandla? Ukuba wayenamathele kwezo zinto ngewatshatyalaliswayo neSodom.
8 Zinovelwano ngabo, izithunywa zezulu zababamba ngezandla abo babekwintsapho yakhe zaza zangxama ukuphuma nabo kweso sixeko. Bakuba bengaphandle kwaso, isithunywa sikaYehova sayalela: “Zisindise ngenxa yomphefumlo wakho. Musa ukubheka emva kwakho, musa ukuma kuwo wonke lo mmandla; zisindise ngokuya entabeni, hleze ubhebhethwe.” ULote wayesathandabuza. Ekugqibeleni, emva kokuba evunyelwe ukuba wayenokuya kwenye indawo eyayingekude apho, yena nentsapho yakhe basaba. (Genesis 19:17-22) Kwakumele kungalityaziswa konke konke; intobelo yayibalulekile.
9, 10. (a) Kutheni le nto ukuba kunye nendoda yakhe kwakunganele ekuqinisekiseni ukusindiswa komkaLote? (b) Xa umfazi kaLote wabulawayo, luluphi uvavanyo olungakumbi awayejamelene nalo uLote neentombi zakhe?
9 Noko ke, ukuhlangulwa kwabo kwakungaphelelanga nje ekubeni basabe eSodom. IGenesis 19:23-25 isixelela oku: “Ilanga lalise liphumile phezu kwehlabathi, ukufika kukaLote eTsohare. Wanisa ke uYehova phezu kweSodom neGomora isulfure nomlilo ophuma kuYehova emazulwini; wayibhukuqa loo mizi, nawo wonke loo mmandla, nabo bonke abemi baloo mizi, nesihlumo somhlaba.” Kodwa wayephi umkaLote?
10 Wayesabe nendoda yakhe. Phofu ke, ngaba wayevumelana ngokupheleleyo noko yayikwenza? Akukho nto ibonisa ukuba wayevumelana nangayiphi na indlela nokuziphatha okubi kwaseSodom. Kodwa ngaba uthando awayenalo ngoThixo lwalomelele ngakumbi kunendlela awayelithanda ngayo ikhaya lakhe nezinto zakhe eziphathekayo awayenazo apho? (Thelekisa uLuka 17:31, 32.) Wathi akuba phantsi kweemeko ezinzima, oko kwakusentliziyweni yakhe kwatyhileka. Kuyabonakala ukuba babesele bekufutshane eTsohare, mhlawumbi kungemgama ungakanani ukuba bangene esixekweni, xa wathi ngokungathobeli wajika waza wakhangela ngasemva. Ibe kunjengokuba ingxelo yeBhayibhile isithi, “waba yintsika yetyuwa.” (Genesis 19:26) Ngoku uLote neentombi zakhe babejongene novavanyo olungakumbi lokunyaniseka kwabo. Ngaba uthando lukaLote ngomkakhe owayefile okanye iimvakalelo iintombi ezazinazo ngonina ofileyo zazomelele ngakumbi kunendlela ababemthanda ngayo uYehova, owayebangele le ntlekele? Ngaba babeza kuqhubeka bemthobela uThixo nakubeni uthile owayesondele gqitha kubo wazingqina enganyanisekanga kuye? Ekubeni babekholose ngokupheleleyo ngoYehova, abazange bakhangele ngasemva.
11. Sifunde ntoni apha ngenkululeko uYehova ayizisayo?
11 Ewe, uYehova uyakwazi ukuhlangula abantu abahlonela uThixo kwizilingo. Uyakwazi ukuhlangula zonke iintsapho ezimanyeneyo kunqulo olunyulu; kwakhona uyakwazi nokuhlangula abantu ngabanye. Xa bemthanda ngokwenyaniso, ubonakalisa ulwazelelo olukhulu ekuqhubaneni kwakhe nabo. “Uyakwazi yena ukubunjwa kwethu, ekhumbula ukuba siluthuli.” (INdumiso 103:13, 14) Kodwa indlela ahlangula ngayo isebenza kuphela kwabo bantu bahlonela uThixo, abo bazinikele ngokwenene, abo ukuthobela kwabo bakubonakalisa ngokunyanisekileyo.
Amalungiselelo Othando Eyona Nkululeko Inkulu
12. Ngawaphi amalungiselelo othando uYehova awayeza kuwenza ngaphambi kokuzisa inkululeko esiyilindele ngolangazelelo olungako?
12 Ngoko wakwenzayo ngemihla kaNowa nekaLote, uYehova akazange abushenxise bonke ubungendawo ngonaphakade. Kunjengokuba isibhalo sisithi, kuphela nje wamisela umzekelo wezinto eziza kwenzeka. Ngaphambi kokuba ezo zinto zenzeke, uYehova wayecinga okungakumbi awayenenjongo yokukwenzela ingenelo yabantu abamthandayo. Wayeza kuthumela uNyana wakhe okuphela kwamzeleyo, uYesu Kristu, emhlabeni. Apha, uYesu wayeza kususa ugculelo kwigama likaThixo ngokubonakalisa uhlobo lokuzinikela kuThixo awayenako ukulubonakalisa nawayemele alubonakalise uAdam njengomntu ofezekileyo; kodwa uYesu wayeza kukwenza oko phantsi kweemeko ezinzima gqitha. UYesu wayeza kuncama ubomi bakhe bobuntu obufezekileyo njengedini ukuze inzala ka-Adam ebonakalisa ukholo ikuzuze oko uAdam wakulahlayo. Wayeya kwandula ke uThixo anyule ‘umhlambi omncinane’ wabantu abanyanisekileyo ukuze wabelane noKristu kuBukumkani bakhe basezulwini, ibe kwakuya kuhlanganiswa “isihlwele esikhulu” siphuma kuzo zonke iintlanga ukuze sakhe isiseko sebutho elitsha labantu. (Luka 12:32; ISityhilelo 7:9) Kwakuba kufeziwe oko, uThixo wayeza kwenza isenzo sokuhlangula esizukileyo nto leyo eyabonakaliswa kwangaphambili ziziganeko ezinxulumene noNogumbe nokutshatyalaliswa kweSodom neGomora.
Isizathu Sokuba Kubalulekile Ukuthabatha Inyathelo Elikhawulezileyo Ngoku
13, 14. Yintoni esinokuyifunda kwisibakala sokuba uPetros wasebenzisa intshabalalo yabantu abangahloneli Thixo ngemihla kaLote nekaNowa njengemizekelo?
13 Abafundi beLizwi likaThixo bayazi ukuba kangangezihlandlo ezininzi uYehova uye wenza izenzo zokuhlangula abakhonzi bakhe. Noko ke, amaxesha amaninzi iBhayibhile ayithi, ‘Njengoko kwakunjalo ngelo xesha, ngoko kuya kuba njalo nangexesha lobukho boNyana womntu.’ Kwakutheni ukuze umpostile uPetros, ephefumlelwe ngomoya oyingcwele, le nto wakhetha imizekelo emibini kuphela? Yintoni eyayikhethekile koko kwenzeka ngemihla kaLote nekaNowa?
14 Eyona mbonakaliso iphawulekayo ifumaneka kuYuda 7, apho sifunda ukuba “iSodom neGomora, nayo yonke imizi engakuyo . . . ibekwe ekuhleni ukuba ibe ngumqondiso, iviswa ubetho lomlilo ongunaphakade.” Ewe, abo boni babonakele kulo mizi batshatyalaliswa ngonaphakade, njengoko kuya kuba njalo kanye ngokutshatyalaliswa kwabangendawo ekupheleni kwenkqubo ekhoyo yezinto. (Mateyu 25:46) Ngokukwanjalo kubhekiselwa kuMkhukula womhla kaNowa kwizicatshulwa ezixubusha ngemigwebo kanaphakade. (2 Petros 2:4, 5, 9-12; 3:5-7) Ngoko ngokutshatyalaliswa kwabantu abangahloneli Thixo ngemihla kaLote nekaNowa, uYehova wabonisa ukuba uya kubahlangula abakhonzi bakhe ngokutshabalalisa ngonaphakade abo baqhelisela ukungalungisi.—2 Tesalonika 1:6-10.
15. (a) Sisiphi isilumkiso esingxamisekileyo esinikelwa kwabo babandakanyeka kuqheliselo olungendawo? (b) Kutheni le nto okusesikweni kuya kuphunyezwa kubo bonke abo bazingisayo ekwenzeni ukungalungisi?
15 Ukutshabalala kwabangendawo akumyolisi uYehova, ibe nabakhonzi bakhe abayoliswa kuko. Esebenzisa amaNgqina akhe, uYehova ubongoza abantu esithi: “Buyani, buyani ezindleleni zenu ezimbi! Yini na ukuba nide nife?” (Hezekile 33:11) Sekunjalo, xa abantu bengabonakalisi mnqweno wokusiphulaphula esi sibongozo sothando kodwa bezingisa kwindlela yabo yobomi bokuzingca, ukuhlonela kukaYehova igama lakhe elingcwele nokuthanda kwakhe abakhonzi bakhe abanyanisekileyo ababandezelekayo kukuphathwa kakubi ngabantu abangahloneli Thixo kufuna ukuba yena aphumeze okusesikweni.
16. (a) Kutheni sinokuba nentembelo yokuba inkululeko eyaxelwa kwangaphambili isemnyango? (b) Siya kusindiswa entwenini sisiya kusindiselwa phi?
16 Lisondele ixesha lokuba uThixo azise inkululeko! Isimo sengqondo neziganeko uYesu awazixelayo kwangaphambili njengezingumqondiso wobukho bakhe nowokuqosheliswa kwale nkqubo yezinto zibonwa nanguthathatha. Iimbalasane zaloo mqondiso okwesihlandlo sokuqala zabonakala ngaphezu kwethuba leminyaka engama-75 edluleyo, ibe uYesu wathi “esi sizukulwana” asisayi kudlula ngaphambi kokuba umgwebo kaThixo ufike phezu kweli hlabathi lingahloneli Thixo. Xa uYehova efikelele kwisigqibo sokuba isigidimi soBukumkani siye savakaliswa ukusa kumlinganiselo owaneleyo kulo lonke elimiweyo ukuze sibe bubungqina kuzo zonke iintlanga, siya kwandula ke sifike isiphelo seli hlabathi lingendawo, ibe ke kunye neso siphelo iya kufika inkululeko yabantu abahlonela uThixo. (Mateyu 24:3-34; Luka 21:28-33) Baya kukhululwa entwenini? Kwizilingo ekuye kwafuneka batyhubele kuzo ezandleni zabangendawo, nakwiimeko eziye zathi imihla ngemihla zaba ngumthombo wengcinezelo kubo njengabathandi bobulungisa. Kwakhona iya kuba yinkululeko ekhokelela kwihlabathi elitsha apho ukugula nokufa kuya kuba zizinto zexesha elidluleyo.
Uncedo LukaThixo Lokuba Sikhululwe
17. (a) Nguwuphi umbuzo obalulekileyo esifanele sizibuze wona? (b) Sinokubunikela njani ubungqina bokuba, njengoNowa, sishukunyiswa ‘kukoyika uThixo’?
17 Umbuzo thina ngokwabantu ngabanye ekufuneka siwuqwalasele ngothi, ‘Ngaba ndililungele elo nyathelo liza kuthatyathwa nguThixo?’ Ukuba sikholose ngeziqu zethu okanye ngengqiqo yokuba thina singamalungisa, asililungelanga. Kodwa ukuba, njengoNowa, sishukunyiswa ‘kukoyika uThixo,’ ngoko siya kuba sisabela ngokholo kulwalathiso uYehova alunikelayo kuthi, ibe oku kuya kukhokelela kwinkululeko yethu.—Hebhere 11:7.
18. Kutheni le nto ukufunda kwethu intlonelo yokwenyaniso ngegunya lobuthixo kuyinxalenye ebalulekileyo yokulungiselela kwethu ukusindela kwihlabathi elitsha?
18 Ibachaza kakuhle abo banandipha inkuselo uYehova ayinikelayo kwanangeli thuba, INdumiso 91:1, 2 ithi: “Ohleli esitheni lOsenyangweni, azilalise emthunzini kaSomandla, uthi kuYehova, Hlathi lam, Mboniselo yam, Thixo wam, endikholose ngaye!” Apha kuthethwa ngeqela labantu abakhuselwe nguThixo njengamantshontsho afihlwe phantsi kweempiko ezinamandla zentaka engumzali. Bakholose ngokupheleleyo ngoYehova. Bayavuma ukuba ungOsenyangweni, unguSomandla. Ngenxa yoko, bayalihlonela igunya lolawulo lobuThixo baze bazithobe kulo, enoba lelabazali okanye ‘lelomkhonzi othembekileyo noqondayo.’ (Mateyu 24:45-47) Ngaba senjenjalo thina njengabantu ngabanye? NjengoNowa, ngaba sifunda ukwenza ‘konke uYehova asiwisela umthetho ngako, yaye ngaba sizenza izinto ngokwendlela yakhe? (Genesis 6:22) Ukuba kunjalo, siyasabela kwindlela uYehova afuna ukuba sizilungiselele ngayo ukuze sifumane inkululeko ekhokelela kwihlabathi lakhe elitsha lobulungisa.
19. (a) Iyintoni intliziyo yethu yokomfuziselo, ibe kutheni kubalulekile ukuba siyinikele ingqalelo? (IMizekeliso 4:23) (b) Sinokungenelwa njani kumzekelo kaLote ngokuphathelele indlela esisabela ngayo kwizirhintyelo zehlabathi?
19 Oko kuzilungiselela kukwabandakanya ukunikela ingqalelo kwintliziyo yethu yokomfuziselo. “Umcikidi weentliziyo nguYehova.” (IMizekeliso 17:3) Uyasinceda siqonde ukuba okubalulekileyo asikuko oko sibonakala sikuko ngaphandle, kunoko, ngumntu wangaphakathi, intliziyo. Ngoxa singazifici kwizenzo zogonyamelo nasekuziphatheni okubi njengehlabathi elisingqongileyo, kufuneka sizilinde singarhintyelwa okanye sonwatyiswe zezi zinto. NjengoLote, sifanele sizive sibandezelekile bubukho bezenzo ezinjalo zokuchasa umthetho. Abo bakuthiyileyo okubi abayi kufuna iindlela zokuzifica kuko; ukanti, abantu abangakuthiyiyo oko basenokurhoxa kuko ngokomzimba ngoxa engqondweni benokunqwenela ukuba babe nokukungcamla. “Bathandi bakaYehova, kuthiyeni okubi.”—INdumiso 97:10.
20. (a) Kungaziphi iindlela ethi iBhayibhile isilumkise nxamnye nokuphila ubomi bokuthanda izinto eziphathekayo? (b) Sinokwazi njani ukuba izifundo ezibalulekileyo zeBhayibhile ezingokuthanda izinto eziphathekayo ziye zangena kwintliziyo yethu?
20 Ngokunothando uYehova usifundisa ukuba singaphephi nje kuphela ihambo yokuziphatha okubi kodwa kwanendlela yokuphila ubomi bokuthanda izinto eziphathekayo. ILizwi lakhe liyaluleka lisithi: ‘Yanelani ke yinto edliwayo neyambathwayo.’ (1 Timoti 6:8) UNowa noonyana bakhe kwafuneka ukuba bashiye amakhaya abo xa besiya emkhombeni. Kwakhona uLote nentsapho yakhe kwafuneka ukuba bashiye ikhaya neempahla zabo ukuze basindise ubomi babo. Ziziphi ke thina izinto esizithandayo? “Khumbulani umkaLote.” (Luka 17:32) UYesu wabongoza esithi: “Funani ke tanci ubukumkani bukaThixo nobulungisa bakhe.” (Mateyu 6:33) Ngaba siyakwenza oko? Ukuba imilinganiselo kaYehova yobulungisa iyasikhokela yaye ukuba ukuvakalisa iindaba ezilungileyo zoBukumkani bakhe kuyinto yokuqala esiyixhalabeleyo ebomini bethu, ngoko ke ngokwenene siyasabela ekulungiseleleni abantu ukuze bafumane inkululeko ekhokelela kwihlabathi lakhe elitsha.
21. Kutheni sinokukulindela ngokufanelekileyo ukuba idinga likaYehova lenkululeko liya kuzaliseka kungekudala?
21 Ebhekisa kubantu abahlonela uThixo ababeza kubona ukuzalisekiswa komqondiso wobukho bakhe esemandleni oBukumkani, uYesu wathi: “Sukani nime, niziphakamise iintloko zenu, ngenxa yokuba iyasondela inkululeko yenu.” (Luka 21:28) Ngaba uye wawubona loo mqondiso njengokuba uye wabonakala ngokweenkcukacha zonke? Ngoko ke yiba nentembelo yokuba ukuzalisekiswa kwedinga likaYehova lenkululeko kusemnyango! Yeyiseka ngokupheleleyo kukuba “iyakwazi iNkosi ukubahlangula ekuhendweni abahlonela uThixo.”—2 Petros 2:9.
Ufunde Ntoni?
◻ NjengoLote, sifanele sisabele njani kwindlela yehlabathi yokuphila?
◻ Luluphi uvavanyo awajamelana nalo uLote nentsapho yakhe kwanaxa babesaba eSodom?
◻ Imizekelo esetyenziswe nguPetros ikubethelela njani ukungxamiseka kokuma ngokuqinileyo ngakwicala likaYehova ngoku?
◻ Elungiselela ukuhlangula abantu bakhe, ziziphi izifundo ezibalulekileyo uYehova azifundisayo?
[Umfanekiso okwiphepha 18]
UThixo ubakhusele abantu bakhe njengamantshontsho entaka phantsi kwamaphiko awomeleleyo omzali wawo