‘Yimani Niqinile’—Ningakhubeki

EYONA mbambano inkulu olujamelene nayo uluntu namhlanje yileyo yolongamo lwendalo iphela. UYehova uyasimema ukuba sithabath’ icala size sibe ngabaqukiweyo kuloo mbandela ngokuzithoba kuKumkani wakhe amnyulileyo, uKristu Yesu. Kukho imfuneko engxamisekileyo yokusabela kwisimemo sakhe, ibe kwiminyaka emihlanu nje edluleyo, abantu abangaphezu kwesigidi baye benjenjalo. Kodwa aba baye bafumanisa ukuba kubandakanyeke okungakumbi ekuthabathen’ icala kunesigqibo nje sangaphambili sokukhonza uYehova. Simele sahlulele ubomi bethu bonke. Ngaba siya kukulondoloza ukuma kwethu xa kuvela ubunzima? Okanye ngaba siya kuthi ngokuthe ngcembe sibe buthathaka, emva kokuba sithe kuqala saba ‘ngabemi ngokuqinileyo’?—1 Korinte 16:13; Hebhere 2:1.

Ukuba ulifumanise lingelula ikhondo lobuKristu, zithuthuzele ngolwazi lokuba oku kwakunjalo ngoYesu Kristu. Ewe, kwanoNyana kaThixo okuphela kwamzeleyo kwafuneka ukuba athandazele amandla ukuze alondoloze ukuma kwakhe, ngokukodwa ngethuba laxa kwakusondela uvavanyo lwakhe olukhulu. Yiba nombono wakhe ekumyezo waseGetsemane, ethandaza ngokunzulu esithi: “Abha, Bawo, zonke izinto zinokwenzeka kuwe; yigqithise kum le ndebe; noko ke makungabi kokuthandwa ndim, makube kokuthandwa nguwe.” (Marko 14:36) Wayesazi ukuba oko wayeza kujongana nako ngaphambili kwakunzima. Wayesazi ngokukhethekileyo ukuba igama likaYise laliya kuchaphazeleka. Ngenxa yoko, ekuphela kwendoda eyayifezekile eyayiphila emhlabeni yayingenazintloni zokucela uncedo.

Xa sivelelwa bubunzima, sinomthombo wamandla okwamnye nalowo uYesu wayenawo. Sinokuthandazela uncedo lukaYehova ukuze singakhubeki okanye siwe. Kodwa luluphi uhlobo lweengozi ezinokusenza sikhubeke? Ukuzazi ezi kwanokuzilungiselela kusengaphambili mhlawumbi kusenokusinceda ukuze sikuphephe ukukhubeka.

Intshutshiso Inokusikhubekisa

IBhayibhile iyalumkisa: “Bonke ke abathanda ukuhlala ngokuhlonela uThixo kuKristu Yesu baya kutshutshiswa.” (2 Timoti 3:12) Intshutshiso inokusibangela ukuba sikhubeke, ibe iza ngeendlela ezininzi. (Marko 4:17) Isenokuba kukuvalwa komsebenzi ngokusemthethweni—inokuzisa ingozi yokuvalelwa kwanokufa—ugonyamelo lwamahlokondiba, inkcaso yemihla ngemihla elusingela phantsi ukholo eyenziwa liqabane elizimisele ukuchasa, okanye ukugculelwa ngokuzingisileyo ngabantwana ofunda nabo esikolweni.

Kunzima ukuyinyamezela intshutshiso, kodwa siyalunyukiswa ukuba iya kwenzeka ngandlel’ ithile. Ngenxa yoko, sinokulomeleza ukholo lwethu ngoku size sifunde ukuthembela kumandla kaYehova ukuze xa eli xesha lifika, sinyamezele ngenxa yaloo mandla. (1 Petros 4:13, 14; 5:6-11) Noko ke, izinto ezikhubekisayo ngokufuthi zizezichulwe ngaphezu kwentlaselo embi yentshutshiso.

Ukudana Kunokulwenza Buthathaka Ukholo

Ngubani ongayikhumbuliyo imvakalelo yokutyumk’ intliziyo esasiba nayo xa sasingabantwana yaye siziva sidanisiwe. Ngaba uyalikhumbula ixesha laxa uTata wathembisa intsapho ngolonwabo olukhethekileyo waza ngoko ngenxa yesizathu esithile wayiguqula ingqondo yakhe? Okanye ixesha laxa wayeza kunisa kwindawo yokugcina izilwanyana kwaza kwathi ngomzuzu wokugqibela kwafuneka ekurhoxisile oko? Enjani yona indlela owawudane ngayo!

NamaKristu akhulileyo anokuphoxeka, ibe oku kuye kwiimeko ezininzi kwakhokelela kwintlekele engokomoya. Bambi babeka ithemba labo kumhla othile ababeqinisekile ukuba yayiya kufika ngawo iArmagedon. Xa kungazange kwenzeke nto ngaloo mini, baziva bedanile. Abanye baphoxeka xa ilungelo ebabenethemba lalo lingazange liphumelele. Ngaphezu koko, abantu basenokukudanisa. Enye intombazana eneminyaka eli-18 ubudala yaxelela abazali bayo indlela eyayidane ngayo ngenxa yehambo yabanye abafana abasebandleni—nokusilela kwabazali babo ukubaqeqesha—kangangokuba yayingasafuni kuba nanto yakwenza nenyaniso.

Ngoxa ukudana kuqondakala kuzo zonke ezi meko, ngaba abo baziva bedanile bafanele bakhubeke ukusa kwinqanaba lokuqhawula ulwalamano lwabo noYehova? Khawuthelekelele indlela awadana ngayo uYesu xa abapostile bakhe bazingisayo ekuphikisaneni ngelokuba ngubani na owayeza kuba ngoyena mkhulu phakathi kwabo, ngaloo ndlela bebonakalisa isimo sengqondo sokuziphakamisa. (Luka 9:46; 22:24) Kwakhona, khawuthelekelele indlela awadana ngayo uYobhi xa amaqabane akhe amathathu awayefanele amncede amjikelayo aza aqalisa ukuthandabuza ukuthembeka kwakhe! (Yobhi 22:5-10) Ukanti, uYesu noYobhi abazange bakhubeke.

Bonke abantu babuthathaka, ngoko bekuya kuba yinto engekho ngqiqweni ukuvumela iintsilelo zabanye zichaphazele ulwalamano lwethu noYehova. (INdumiso 51:5) Ukungafezeki kwabathile akufanele kusenze singawuboni umsebenzi omangalisayo owenziwa nguYehova njengoko ehlanganisa “zonke izinto kuye uKristu.” (Efese 1:9, 10) Khumbula ukuba ngabantu abangafezekanga, nabawileyo njengathi aba uYehova abahlanganisayo, abantu abafuna ukuqeqeshwa nokusulungekiswa ukuze bakhule. (INdumiso 130:3) Utshaba lwethu asingomzalwana wethu ongumKristu nongafezekanga kodwa nguSathana, ofuna ukusiqwenga ukuba unako. Akayi kuphumelela ukuba ‘siyamchasa, sizimasekile elukholweni.’ (1 Petros 5:8, 9) Ukuba sinokholo olunjalo, asiyi “kudaniswa.”—Roma 9:33.

Ukuzigweba Kunokutshabalalisa

Bambi baye balahlekana nolwalamano lwabo noYehova uThixo ngenxa yemvakalelo yokungabi nto yanto. Bebuqonda ubuthathaka neentsilelo zabo, bafikelela kwisigqibo sokuba uYehova akayi kuze ayamkele inkonzo yabo. Bavakalelwa kukuba kukukuhanahanisa nje ngobani ofana nabo ukuzibanga engomnye wamaNgqina kaYehova. Ngaba wakha wazohlwaya ngokuqatha ngolo hlobo? Ukuba kunjalo, ufanele uzilwe iimvakalelo ezinjalo.

Ngaba uziva ungafanelekanga ukuba ungakhonza uYehova? Ngoko zibuze, ‘Ngubani olifanelekeleyo eli lungelo likhulu kangaka?’ Onke amaKristu anomlo ohlala uqhubeka nxamnye nokungafezeki kwawo. Kwanompostile uPawulos wakhalaza esithi: “Kuthi, ndifuna ukukwenza okuhle, kusuke kubekho okubi kum.” (Roma 7:21) Ngaba uPawulos wayengumhanahanisi ngenxa yokuba maxa wambi wayesenza izinto ezazingafanelekanga? Akunjalo. Umhanahanisi nguthile owenza ngathi ukoko angekuko. Ukuba siyazama ukukwenza oko kulungileyo kodwa sisilele ngezihlandlo ezithile ngenxa yoko sikuko, ngaba oko kukuzenza ngathi sikokuthile? Oko akunjalo kwaphela.

IBhayibhile isiyalela ukuba ‘sambathe ubuntu obutsha.’ (Efese 4:24) Ngoko, ngaba oko kuthetha ukuba, siyahlukana nayo yonke imizila yobuntu obudala? Nakanye. Kwincwadi yakhe eyayisiya kwabaseKolose, uPawulos wathi ubuntu obutsha ‘kukwenziwa mtsha’ ngolwazi oluchanileyo. (Kolose 3:9, 10) Ibinzana elithi ‘ukwenziwa mtsha’ lithetha isenzo esiqhubekayo. Ngoko ukuguqula iimpawu zethu zobuntu kuyinkqubo eqhubekayo. Ngoko, alimangalisi elokuba, ngazihlandlo zithile sifumanisa iziphako kuthi.

Kakade ke, oku akuthethi ukubunciphisa ubunzulu besono, kungathethi ukuba sinokuziyekela esilingweni ngaphandle kokulwa, sicinga ukuba uYehova uya kuthi ngokuzenzekelayo asixolele. Kodwa kuyasinceda ukuba singazihlabi amadlala ngokungekho ngqiqweni. Ibe kusenza simthande ngokungakumbi uYehova kuba walungiselela idini lentlawulelo likaKristu ukuze simkhonze phezu kwaso nje isono esingokwemvelo esasizuz’ ilifa.

Umpostile uYohane wanikela imbono elungeleleneyo ngalo mbandela xa wathi: “Ndinibhalela ezi zinto, ukuze ningoni.” Wandula ke walek’ umsundulu ngokungqalileyo esithi: “Ukuba kukho othe wona [ngenxa yokungafezeki kwabantu], sinoMthetheleli kuye uYise, uYesu Kristu ilungisa.” (1 Yohane 2:1) Kunokuba ngabazigweba ngokugqithiseleyo, ukuqonda okulolu hlobo ngemeko yethu noncedo uYehova alunikelayo kukhokelela ekuphindeni amazwi kaPawulos athi: “Ndiyabulela kuThixo ngoYesu Kristu, iNkosi yethu.”—Roma 7:25.

Musa Ukuhlala Ukhubekile

UYesu wanikela isilumkiso esingqongqo kuye nabani na osenokuba ngunobangela wokukhubeka esithi: “Othe wakhubekisa noko amnye waba bancinane bakholwayo kum, ebelungelwe kanye kukuba anxitywe ilitye lokusila entanyeni, antywiliselwe enzulwini yolwandle.” (Mateyu 18:6) Kodwa kuthekani ngalowo ukhutyekisiweyo? Ukuba sikhutyekiswe nguthile okanye yimeko ethile, ngaba sifanele sizithethelele ngokuthi “Phofu, asilotyala lam, ngoko andisayi kuphinda ndimkhonze uYehova?”

Khawucinge ngalo mzekeliso. Ngaba wakha watyibilika emkhenkceni okanye wakhubeka kuba unyathele kakubi? Mhlawumbi le ngozi yakuqubula. Kuyaqondakala ukuba wazifumanisa uthe tywaa phantsi. Kodwa yintoni owayenzayo ngokulandelayo? Ngaba wathi: “Asilotyala lam ukuba ndilale apha. Lityala lomkhenkce [okanye lokunyathela kakubi]. Ngoko andiyi kuphakama kwakhona”? Kunokwenzeka ukuba, waphakam’ ungxamile waza washenxa kulo mbono ubangel’ iintloni.

Ngaba bekungayi kuba njalo ngemicimbi yokomoya? Ukuba sikhutyekiswe yimeko ethile okanye ngamaKristu angoowethu, leyo yingxaki enzulu efanele iconjululwe. Noko ke, ukuba sihlala sikhubekile, sizingisa ekubekeni ityala kuthile ongomnye ngenxa yengxaki yethu, ngaba akuyonyaniso ukuba imeko yethu iya isiba lityala lethu ngokungakumbi?

Okuvuyisayo kukuba, ukuba sikhutyekisiwe, abadala nabathile abakhulileyo ebandleni bakulungele ngeyona ndlela ukusinceda. (Galati 6:1) Ibe uYehova uyabomeleza abo banqwenela ukumkhonza phezu kwabo nje ubunzima. (Filipi 4:13) Ngoko sifanele sisoloko sikulungele ukucela uncedo ukuba kubonakala ngathi nto ithile iza kuphazamisana nokummela kwethu ngokuqinileyo uYehova noBukumkani bakhe. Ngoko asisayi kumenza uSathana abe ngowoyisileyo ngokukhutyekiswa nangokuhlala phantsi.

Umi Phi?

Suku ngalunye, abakhonzi abazahluleleyo bakaThixo bajamelana neembambano ezivavanya ukuzinikela kwabo kuYehova. Kungakhathaliseki ukuba baza kujamelana nantoni na, bamele beme beqinile baze babalelwe kwicala loKumkani kaYehova onguMesiya. Abalawuli abanamandla beli hlabathi baye balwa “nxamnye noYehova noMthanjiswa wakhe.” Elinjani lona ilungelo esinalo lokumela yena!—INdumiso 2:2, NW.

Noko ke, asinako ukuzimela ngokwethu nxamnye nempembelelo yale nkqubo yehlabathi liphela, ngoko sithuthuzelwa lidinga likaYesu lokuba uya kuba nebandla lakhe “kude kube sekuphelisweni kwephakade eli.” (Mateyu 28:20) Uya kusixhasa. Ukongezelela, uncedo olukhulu silufumana xa sibambelela ngokusondeleyo kuYehova size sifune inkxaso evela kuye. Ukubhenela eLizwini lakhe kunokusomeleza. Xa sisenokuziva singenako ukunyamezela, INdumiso 55:22 isimema ukuba ‘siwulahlele kuYehova umthwalo wethu; yena wosizimasa; akayi kuliyekela ilungisa lishukunyiswe naphadake.’ Ewe, iBhayibhile iyababongoza bonke abantu bakaThixo ukuba ‘beme elukholweni’—baze bangakhubeki.—1 Korinte 16:13.