Iindawo Ezithile Zelizwe Ledinga

Ukusuka ETabhore Ukuya Eloyisweni!

KHAWUZITHELEKELELE ukwinqaba ethile ukhangele ezantsi kwindawo ekwenzeka kuyo iziganeko zembali! Enyanisweni unokuzibona izinto ezingokwembali ziqhubeka.

Indawo ekuthethwe ngayo eBhayibhileni iMegido isenokukufanelekela ngeyona ndlela ukuba yile ndawo icaciswe ngolo hlobo, kuba yayimi phakathi kweendlela ezibalulekileyo eyorhwebo neyomkhosi. Ukanti, ngaphesheya kweNtlambo yaseYizereli kukho iNtaba iTabhore, ekhangelele ezantsi iNdlela yoLwandle (Via Maris), indlela eyaziwayo eya kwizixeko zommandla otyebileyo ophakathi kweNyoba yakwaPersi noLwandle iMeditera.a

Ukuba ujonga iTabhore uyivelele kuwo onke amacala, ngokuqinisekileyo uya kuchukumiseka. (Thelekisa uYeremiya 46:18.) ITabhore ibalasele ngendlela eyahlukileyo xa ithelekiswa neendawo eziyingqongileyo, ubungqukuva bayo bubonakala nxa zonke. Ilivelele ithafa elithe tyaba phambi kwayo ngasemazantsi alo ekukho iNtlambo echumayo yaseYizereli, edibanisa unxweme neNtlambo yeYordan.

Umi kwincochoyi endindeke ngobunono yeTabhore, unokukhangela emazantsi ngakwisixeko saseYizereli, esisenokukukhumbuza ngokuphalisa ngomsindo kukaYehu esiya kwibhotwe lika-Ahabhi nangesiphelo esilihlazo sikaIzebhele. (1 Kumkani 21:1; 2 Kumkani 9:16-33) Kufutshane ubona iMegido. Xa ukhangele ngasentshona unokuyibona iNtaba iKarmele, apho uEliya wenza uvavanyo ngomlilo. (1 Kumkani isahluko 18) Ukule ncochoyi yeTabhore ukwanokubona apho umlambo iKishon uqukuqelela khona usingise elwandle, yaye iNazarete ikumgama oziikhilomitha ezisibhozo ngakwintshona yomntla-ntshona kwiinduli zeGalili esezantsi.

Kodwa ukukhankanywa kweTabhore kukukhumbuza yiphi ingxelo yeBhayibhile? Kusenokuba yileyo kaDebhora noBharaki. Ngemihla yabo, amaKanan awayelawulwa nguKumkani uYabhin waseHatsore awacinezela kangangeminyaka engama-20 amaSirayeli. Wandula ke umprofetikazi uDebhora washukumisela uBharaki esenzweni. Naye waxhokonxa amaSirayeli angamawaka alishumi, ngokuyintloko awesizwe samaNafetali nesamaZebhulon eGalili, waza wawahlanganisela eTabhore. Ayengaxhobanga ngokwaneleyo, kuba kwakungekho ngweletshetshe namkhonto kwaSirayeli.—ABagwebi 5:7-17.

Umkhosi owoyikekayo wabahlangabeza ukuza kulwa nabo. Umthetheli mkhosi kaYabhin uSisera weza namajoni amaKanan awayexhobe ef’ amacala kwiNtlambo yaseYizereli. Bamele ukuba babefana ngandlel’ ithile nendoda exhobileyo eboniswe kumfanekiso oqingqiweyo waseYiputa okrolwe eludongeni oboniswe kwiphepha elilandelayo, ngasentla ekunene. Izixhobo zemfazwe zaseYiputa zazinokufana okuthile nezo zazisetyenziswa eKanan, kuquka neyona nxalenye yoyikisayo yezixhobo zikaSisera—iinqwelo zokulwa ezingama-900!

Ezo nqwelo zokulwa zamaKanan zazinokuba ngamaqonga okudubula ahambayo. Umqhubi usenokuba wayeyisongela esinqeni sakhe imikhala ukuze izandla zakhe zikwazi ukuphatha izixhobo. Okanye wayesenokumilisel’ ingqondo kwihashe lakhe elihlaselayo ngoxa iqabane lisebenzisa izixhobo. Ezo nqwelo zokulwa zazineerhengqa zentsimbi embindini wamavili azo. Kumadoda kaBharaki awayekhangele ezantsi ekwiTabhore, ezo nqwelo zihlanganisiweyo zimele ukuba zazikhangeleka zingenakunqandwa, zingenakoyiswa kangangendlela ezazisoyikisa ngayo.

Ukanti, uYehova wayethembise uBharaki oku: “Ndomtsalela kuwe emlanjaneni waseKishon uSisera . . . neenqwelo zakhe zokulwa, nengxokolo yakhe.” Ngexesha elifanelekileyo, amaSirayeli akhaliphileyo ehla ecaleni leTabhore.—ABagwebi 4:1-14.

Okuxabiseke ngakumbi kunengenelo nje eyayimangalisa luncedo amaSirayeli awalufumana kuThixo wawo onamandla osezulwini. Kamva uDebhora wavuma esithi: “Zalwa ezulwini, zalwa iinkwenkwezi emendweni yazo noSisera. Umlanjana waseKishon wabakhukulisa . . . Nyathela ngamandla, mphefumlo wam.” (ABagwebi 5:20, 21) Ewe, nangona loo maSirayeli angaxhobanga ngokwaneleyo kodwa akhaliphileyo athi awasukela amaKanan awayexhobe ef’ amacala, nguThixo owabangela uloyiso lokwenene. Ngesiquphe wabangela umkhukula onamandla kwintsele yomlambo eyomileyo, ezichithachitha ezo nqwelo zokulwa zoyikekayo.

Ngezantsi ubona inxalenye yomlambo iKishon. Ngexesha leemvula, unokutyekezela amanzi kwiindonga zawo uze uguqulele lo mmandla ekubeni ngumgxobhozo. Yiba nombono weenqwelo zokulwa zamaKanan zizama ukuwelela ngaphaya kodaka olunjalo. Loo manzi anamandla awakhukulisa amanye amajoni awayesaba okanye iinqwelo zawo zokulwa, okanye akhukulisa kokubini amajoni nezo nqwelo. Uloyiso lwamaSirayeli lwakwafikela noMthetheli-mkhosi uSisera, owayeyishiyile inqwelo yakhe yokulwa, ebabelekile abasicatyana esaba kwelo thafa ledabi. Emva kokuba ethe waphambukela ententeni yomfazi ogama linguYaheli, lo mfazi waxhakamfula elo thuba esithi ndibonwa yintoni waza waluqengq’ ugodo olo tshaba.—ABagwebi 4:17-22.

Ngaloo ndlela, incopho ebalulekileyo neyoloyiso kwimbali yakwaSirayeli yatyhilwa phambi koDebhora nabo nabaphi na abanye ekusenokuba babebukele besencotsheni yeNtaba iTabhore.

[Umbhalo osemazantsi]

[Inkcazelo Ngomfanekiso okwiphepha 16]

Pictorial Archive (Near Eastern History) Est.

[Inkcazelo Ngemifanekiso ekwiphepha 17]

Pictorial Archive (Near Eastern History) Est.

Pictorial Archive (Near Eastern History) Est.

Pictorial Archive (Near Eastern History) Est.