Abavakalisi BoBukumkani Bayabalisa
◻ Umpostile uYohane wathi: “Masingathandi ngamazwi nangamlomo; masithande ngezenzo nangenyaniso.” (1 Yohane 3:18) UYesu wathi ‘sifanele simthande ummelwane wethu ngoko sizithanda ngako.’ (Mateyu 22:39) Ukubonakalisa uthando ngezenzo kubalaselisa inyaniso, njengoko amava alandelayo aseBritani ebonisa.
Xa uPauline watyelela unina, owayenesifo esiqatha sokuqinelwa yimithambo, kwakungazange kukhe kubekho omnye umntu apho. Kodwa ngesi sihlandlo, njengoko wangenayo endlwini, weva umatshini wokuhlamba impahla usebenza nomntu othile kumgangatho ophezulu esebenzisa umatshini wokutshayela. Wabuza kunina, “Kuqhubeka ntoni, ngubani okhoyo?” Unina wamcacisela ukuba kuye kwafika amaNgqina kaYehova, aze ayibona ingxaki akuyo, aze athi vu ukuze ancedise. Emva kokwenza umsebenzi wasendlwini nokumlungiselela isidlo, ahlala phantsi aze athi kuye: “Sele ulungile?” UPauline wabuza, “Ulungele ntoni?” Unina wachaza ukuba waye wavuma ukufundisisa iBhayibhile. UPauline wathandabuza ukuhlala, kodwa njengoko wayesuka kude, wabuza enoba kwakulungile na ukuba naye abathelele kwesi sifundo. Wasinandipha kangangokuba walungiselela ukuba afike kwangolo suku veki nganye ukuze akwazi ukubakho rhoqo. Ekugqibeleni, wakhatshwa ngumhlobo wakhe, yaye ngoku bobabini babhaptiziwe. Umphumo wesi sifundo sokuqala waba kukuba, amalungu alishumi ale ntsapho ngoku angamaNgqina kaYehova! Ewe, yiba luncedo “ngezenzo”!
Umfundisi ENew Guinea Uyasabela Kwinyaniso
◻ Ngomhla kaYesu bambi abefundisi bayamkela imfundiso kaYesu. Nanamhlanje abafundisi abaneentliziyo ezinyanisekileyo benjenjalo, njengoko kuboniswa ngamava avela kummandla oneentaba waseNew Guinea, nangokutsho kwengxelo yomveleli wesiphaluka. Uyabalisa: “Umfana othile ofundileyo, umfundisi wasePentekoste, wayesakha indlu encinane yecawa kufuphi gqitha neHolo YoBukumkani. Umzalwana othile kwelo bandla wanikela ubungqina kuye, yaye wayebonakala enobuhlobo. Kungekudala emva koku, ndatyelela kwelo bandla ndaza ndahlala nomzalwana kumganyana ongasezantsi kwindlu yalo mfundisi. Ngobusuku bokuqala ndifikile, lo mfana weza apho sihlala khona ephethe iBhayibhile yakhe, neqela elikhulu lebandla lakhe. Bonke babefuna ukuva isigidimi soBukumkani. Wabuza imibuzo emininzi, yaye saba nengxubusho emnandi kwade kwasebusuku. Busuku ngabunye kutyelelo lwam, yena nabanye abanomdla babesiza befuna ukuphendulelwa imibuzo yabo engakumbi. Ndammemela kwindibano yesiphaluka eyayiza kuba kwiveki elandelayo, yaye weza ehamba nomzalwana owayeqale ukunikela ubungqina kuye. Le ndoda yaqhubeka nesifundo sayo seBhayibhile, iye yayishiya iCawa yasePentekoste, yaye ngoku ingumvakalisi othe rhoqo weendaba ezilungileyo.”
Enyanisweni, kukuthanda kukaThixo ukuba “bangasindiswa bonke abantu, bafikelele ekuyazini inyaniso.”—1 Timoti 2:4.