Khumbula UMdali Wakho Ozukileyo Ebutsheni Bakho

“ULUTSHA olunganelisekanga: Isibakala Kubomi Bezizwe Ngezizwe.” Wawufundeka ngaloo ndlela umxholo ophambili wenqaku elikwiThe Star yaseRhawutini, eMzantsi Afrika. Amagqabaza ngomfanekiso owawupheleka elo nqaku ayefundeka ngolu hlobo: “Ngenxa yezihlwele ezikhulu zolutsha ngoku ezijamelene namathuba alinganiselweyo naye ancitshiswa ngokungakumbi kukuphela komsebenzi okukho kulo lonke ihlabathi, ukunganeliseki kolutsha olusezixekweni ezikhulu kuye kwaba sisibakala esicacileyo sobomi bezizwe ngezizwe. Kwizidubedube zaseMiami, eSan Salvador, eManagua, eTeheran naseKapa kwakukho inkalo efanayo—kwimeko nganye ababengabokuqala ukubulala nokubulawa yayilulutsha.”

Oku kwapapashwa kwiminyaka elishumi eyadlulayo, ibe iimeko ziye zambi ngakumbi ukususela ngoko. Kutheni kukho ukunganeliseki okunjalo kubantu abaselula kulo lonke ihlabathi? Ukungazinzi okukhulayo kwale nkqubo yezinto ngokuqinisekileyo kungunobangela. Ukungaqeshwa kuye kwafikelela kwimilinganiselo ephakamileyo. Ibe ngenxa yokuwohloka okukhawulezayo kobomi bentsapho, luluphi unqabiseko abantu abaselula abanokulufumana? Akumangalisi ukuba bambi kubo baye baliqalekisa ihlabathi abangenako ukulilawula. Ngaba oku akubangelwa kukuba beswele ithemba eliqinisekileyo abanokwakhela kulo ubomi babo?

Ubani ebesenokulindela ukuba iinkonzo zehlabathi zilinikele ithemba elinjalo. Ukanti, omnye osemtsha wabhala oku: “Ndididekile ngokwenene. . . . Ndinabahlobo abaninzi, abangamalungu eecawa ezininzi ezahlukeneyo, ibe bayafana nje nam. Ndididekile ngokwenene kangangokuba andiyazi eyona nto endinokuba sayikholelwa. Nceda, ngaba kukho cebiso unokulinikela?” Liliphi icebiso obunokulinika umntu oselula ololo hlobo?

Ulutsha olunamathela ngokusondeleyo eLizwini likaThixo nakwibandla lamaKristu okwenyaniso luyasinda ekudidekeni okunjalo nakubuhlungu bentliziyo. Nangona inkoliso yabantu abaselula ingenalo ithemba eliqinisekileyo ngekamva, ulutsha olungamaKristu lukholosa ngoYehova uThixo nangeLizwi lakhe lenyaniso eliqinisekileyo. Ngenxa yoko, lunethemba lokusinda kwisiphelo sale nkqubo yezinto lunethemba lobomi obungunaphakade. Emva koko, kumhlaba ocociweyo kuko konke okungekho sesikweni nobungendawo, luya kubumba inxalenye yesiseko ‘somhlaba omtsha’ “apho kumi ubulungisa.” (2 Petros 3:13; Yohane 17:3) Ukuze amathemba azukileyo alolo hlobo abe ngawokwenene, abantu abaselula bayabongozwa ukuba ‘bakhumbule uMdali wabo Ozukileyo.’ (INtshumayeli 12:1, NW) Ibe elona cebiso lihle banokunikwa lona kukuba babe yinxalenye yebandla lamaKristu baze baqhubeke ngokupheleleyo benjalo. Kutheni oku kumele kube kunjalo nje?

Inkoliso yenu nina bantu baselula abakwibandla lamaKristu ninabazali abakholwayo abanithandayo nabaninyamekelayo. Bandla ngalinye linabadala balo abamiselweyo, abanomdla ngokukhethekileyo kwimpilontle yenu yokomoya. Uncedo nenyameko elolo hlobo ayifanele ithatyathwe lula. Inyaniso ephuma eLizwini likaThixo, kunye nolwalathiso lolawulo lobuthixo, ezo zinto ziya kuninika unqabiseko, ziya kunikhulula kudandatheko zize zininike ithemba eliqinisekileyo lekamva. Konke oku kuya kuninceda ukuba ‘nibe nokholo nesazela esilungileyo’ nize nibambelele kwithemba elinjengeankile yokukhusela umkhombe ekubeni ungantlitheki kulwandle olunoqhwithela.—1 Timoti 1:18, 19; thelekisa amaHebhere 6:19.

Ziphephe Izihendo Zehlabathi

Phezu kwazo nje iintsikelelo ezininzi nina baselula enizinandiphayo kwibandla lamaKristu, utyekelo lwabanye lukukulandela iindlela zehlabathi. Kufana nokungathi bavakalelwa kukuba baswele okuthile okuxabisekileyo okunokufunyanwa kuphela kwihlabathi elingaphandle kwebandla lamaKristu. Kodwa ngaba ihlabathi ngokwenene linako nakuphi na okuxabisekileyo elinokukunika umntu?

Emva kokuchitha ngaphezu kwama-40 eminyaka kubulungiseleli bexesha elizeleyo, omnye wabakhonzi bakaThixo uchaza athi: “Ekuphela kwenxalenye yobomi bam endizisolayo ngayo lithuba endaliphila ngaphambi kokuba ndibe senyanisweni. Ngelo xesha ndandiyinxalenye yehlabathi. Ndandiphilela nje ihlabathi. Xa ndafikelela kwiminyaka eli-18 ubudala ndaza ndakhangela emva kubomi bam, ndaqonda ukuba bulilize. Kwakungekho njongo, kungekho ntsingiselo ebomini bam. Iziyolo zehlabathi endandicinga ukuba ndiyazinandipha ngokwenene zandizisela kuphela unxunguphalo nosizi. Ndaqalisa ukuphanda ngenyaniso. Ndayifumana ndaza kunyaka kamva ndangenela inkonzo yexesha elizeleyo. Ndandingenamali, kuphela ndinonyaka wamava enyanisweni nokholo lokuba uYehova wayeya kundixhasa. Ngoku xa ndikhangela emva kubomi bam, isibini kwisithathu sabo endibuchithele kwinkonzo yexesha elizeleyo, ndonwabe ngokugqithiseleyo. Andinakuze ndinikele ngoko ndiye ndakuzuza ngokukhonza uYehova ngako nakuphi na ihlabathi elikunikelayo.” Eneneni, oku kuphindaphinda iimvakalelo zamawaka amaNgqina kaYehova.

Ngoko kutheni ulangazelela izinto amanye amaKristu aye azishiya ngasemva? Kutheni unqwenela izinto zehlabathi eliya entshabalalweni? (1 Yohane 2:15-17) Njengomntu oselula, mhlawumbi uvakalelwa kukuba ukukhonza uYehova kunemiqathango engqongqo yaye kuya kukubangela ukuba uphoswe lulonwabo ihlabathi elilunikelayo. Kodwa ngaba kububulumko ukubajonga abazali bakho nabadala njengabangqongqo gqitha xa befuna ukukunceda ukuba ukholise uYehova uze uzuze ubomi obungunaphakade?

Ukuba umama othuma umntwana wakhe kwivenkile yasekuhlaleni umkhumbuza ukuba eme aze akhangele macala omabini ngaphambi kokunqumla isitrato, ngaba ubuya kumgqala njengongqongqo ngokugqithiseleyo? Kunoko, ngaba akazami ngokunothando ukukhusela umntwana wakhe? Kuthekani ukuba umntwana uye akasinanza isilumkiso waza wagilwa yinqwelo-mafutha yambulala? Ngaba ubusaya kuvakalelwa kukuba umama ebengqongqo gqitha? Kaloku, ubuya kucinga ukuba ubefanele athabathe amanyathelo angakumbi okukhusela ubomi bomntwana wakhe! Ngokufanayo, amazwi okukhumbuza aphuma eLizwini likaThixo nakwintlangano yakhe anikelwa ngothando, kungekhona njengemiqathango kodwa njengenkuselo.

Ukukhulela kwikhaya lamaKristu akwanele ukukwenza ukwazi ukuxhathisa iingcinezelo zeli hlabathi. Kwakhona kufuneka weyiseke ngokobuqu yinyaniso yeLizwi likaThixo. Ulweyiseko lobuqu olunjalo nothando ngoMdali ezo zinto ziyila isiseko sokwahlulela ubomi bakho kuThixo. Olu lweyiseko lukwayimfuneko ukuze lukuncede ukwazi ukumela ukholo lwakho phambi kwabanye. (1 Petros 3:15) Ukukhokelwa liLizwi likaThixo kusisiseko sobomi obunempumelelo. (Yoshuwa 1:8; INdumiso 119:9) Kodwa ukuze uphumelele ebomini, kwakhona ufuna uqeqesho olulungileyo.

Ukunikela Uqeqesho Olungqalileyo

Ngokuqinisekileyo, nina bazali abangamaKristu beniya kuvuya kukubona abantwana benu beyimela ngokuqinileyo inyaniso baze bahlale bemanyene nani kunqulo oluyinyaniso. Ngokuyintloko kuyimbopheleleko katata ukukhulisa abantwana “ekuqeqesheni nasekululekeni kweNkosi.” (Efese 6:4) Kodwa ngaba unokuyibona imimandla apho kufuneka uphucule khona ekubaqeqesheni? Ngaba uchitha ixesha elaneleyo nabantwana bakho? Ngaba nenza izinto njengentsapho? Ngaba ninandipha ukuzihlaziya okuhle ninonke?

Musani ukulibala ukuba ukumisela umzekelo omhle kunempembelelo enamandla ebantwaneni benu. Ukuba nifuna bayithabathe ngokunzulu inyaniso, nani nikwafanele niyijonge ngaloo ndlela. (3 Yohane 2-4) Ibe ukuba nifuna bakhulise intlonelo enzulu ngentlangano kaYehova nabadala, ngoko ke nifanele ngalo lonke ixesha nibonakalise isimo esihle esinjalo nina ngokwenu.

Nangona ukuqeqeshwa kwabantwana kungumsebenzi wabazali ngokuyintloko, abadala nabo banembopheleleko ngakwabo baselula abasebandleni. Ekunyamekeleni umhlambi kaThixo, kwakhona abaveleli kufuneka baluse amatakane. (1 Petros 5:1-3) Onjani wona ukuba mhle umzekelo uYehova aye wawumisela ekunyamekeleni ngokunothando nkqu nabo baselula! (Isaya 40:11) Ekusabeleni kumzekelo wakhe, abelusi abangaphantsi abangamaKristu kwakhona baya kufuna ukubonakalisa umdla ofudumeleyo, onothando kubantu abaselula baze babenze bazive beyinxalenye yebandla. Lumbi ulutsha luye lwavakalisa umnqweno wokuba abadala bathethe nalo ngokufuthi ngakumbi baze baluncede kubulungiseleli basentsimini.

Ukuqeqesha umntu oselula kuthetha okungakumbi kunokumnika nje ulwazi lweZibhalo olungokwasengqondweni. Ngokusuka entliziyweni yakhe, umele akuthiye oko uThixo akuthiyileyo aze athande oko uThixo akuthandayo. (Amos 5:14, 15) Ukuba uza kukhumbula uMdali ebutsheni bakhe, kufuneka eqeqeshwe ngokweZibhalo ekuhambeni ngendlela kaYehova yobulungisa. (IMizekeliso 22:6; 2 Timoti 3:16) Abazali abafanele balubandeze uqeqesho olufunekayo. Bambi abazali abafuna ukugcina ubuhlobo nabantwana babo batyekele ngazo zonke iindlela ekubeni bakubethe ngoyaba okuphosakeleyo, bekuthabatha lula ubunzulu bako. Baphenjelelwa sisimo sehlabathi sikavula-zibhuqe. Kodwa ngumzali onothando onikela ingqalelo kwiingxelo zokuba umntwana wakhe akaziphathanga kakuhle aze anikele uqeqesho olufunekayo. (IMizekeliso 13:24) Ngokwenene, nguwuphi umzali ongumKristu ofuna ukugcina ubuhlobo obusekelwe kwisimo sikavula-zibhuqe kodwa alahlekelwe ngumntwana wakhe ngenxa yokuswela uqeqesho olufanelekileyo?—IMizekeliso 22:15.

Yiba Nenjongo Ebomini

UYehova uThixo wasenza ngendlela yokuba sifumane olona vuyo lukhulu nolwaneliseko ekumkhonzeni. Cingani ngezinto ezininzi nina baselula eninokuzihlakulela. Malunga nesiqingatha sabemi behlabathi sinama-20 eminyaka ubudala nangaphantsi. Aba bantu baselula bantyumpantyumpeka kulwandle loluntu. Ngoxa bengenalo ithemba, nina lutsha olungamaKristu ninethemba eliqinisekileyo nokuthile okuxabisekileyo eninokwabelana nabo ngako. Ngehambo yenu entle yobuKristu nangenzondelelo eninayo ngenkonzo kaYehova, nisenokubatsalela enyanisweni abaninzi. Ngaloo ndlela ninokubanceda bathelele kwindlela esa ebomini.

Luluphi usukelo oluxabiseke ngakumbi eninokuba nalo kungekuko ukunikela ngobomi benu kwinkonzo kaYehova uThixo? Ngaba niye nacinga ngokuthabatha umsebenzi wokushumayela osindisa ubomi, ixesha elizeleyo? Mhlawumbi ninokuba nesabelo ekusasazeni iindaba ezilungileyo njengoovulindlela, okanye ninokukhonza kwenye yeeofisi zamasebe eWatch Tower Society apho uncwadi lweBhayibhile luveliswa khona. Kwanokuba akunakukwenza oko, ngaba ukunqula uYehova akumele ukwenze eyona nto iphambili ebomini bakho, ngaloo ndlela ukhumbula uMdali wakho Ozukileyo? Ninomsebenzi oxabisekileyo eninokuwenza. Ngoko ke, kude kube sekupheleni kwale nkqubo yezinto, zimiseleni ukuba ‘niphuphume umsebenzi weNkosi.’—1 Korinte 15:58.

Ngoko ke tyhalelani phambili nina maKristu aselula. Khumbulani uMdali wenu Ozukileyo ngoku, yaye uya kunilondoloza xa ephelisa le nkqubo ingahloneli Thixo. Ewe, uYehova uya kunikhusela ngelo xesha aze anisikelele ngekamva elingenasiphelo nelizukileyo.