Ukusebenza Ngokunyaniseka NoYehova

“Thixo, undifundisile kwasebuncinaneni bam; unangoku ndiyayixela imisebenzi yakho ebalulekileyo.”—INDUMISO 71:17.

1. Kutheni sinokuthi umsebenzi usisipho esivela kuYehova?

UMSEBENZI sesinye sezipho uThixo aziphe umntu. Kubazali bethu bokuqala, uAdam noEva, uYehova wathi: “Niwuzalise umhlaba niweyise.” Eso yayisisabelo somsebenzi olucelomngeni kodwa ababenamandla okusiphumeza. Umgudu ongokwasemzimbeni nongokwasengqondweni owawufuneka wawuya kulwandisa uvuyo lwabo lokuphila, ngaphezulu lee kunolo lwezilwanyana ababehlala nazo kwikhaya labo lasemhlabeni.—Genesis 1:28.

2, 3. (a) Umsebenzi uye waba yintoni kwabaninzi namhlanje, yaye ngoba? (b) Liliphi ithuba elihle lokwenza umsebenzi okhethekileyo ekufuneka siliqwalasele?

² Kwanakwimeko yethu yokungafezeki, ‘umgudu’ ophumela ‘kokulungileyo’ ‘usisipho sikaThixo,’ njengoko indoda esisilumko uSolomon yabhalayo. (INtshumayeli 3:13) Kusafuneka ukuba umntu awasebenzise amandla akhe engqondo nawomzimba. Ukungasebenzi kuyadandathekisa. Ukanti, asinguwo wonke umsebenzi ohlaziyayo nekuyingenelo ukuwenza. Kwabaninzi, umsebenzi uyakruqula, uyinto nje eyimfuneko ukuze ubani aphile.

³ Noko ke, kukho umsebenzi ovuza ngokwenene esimenywa sonke ukuba nesabelo kuwo. Kodwa kukho abachasi abaninzi neengxaki ezininzi ezimele zoyiswe ngabo banenxaxheba kuwo. Kutheni kubalulekile nje ukuba siwufanelekele lo msebenzi? Sikwenza njani oko? Ngaphambi kokuba siyiphendule le mibuzo, makhe siqwalasele oku kuqala:

Ngubani Esimsebenzelayo?

4. Luhlobo olunjani lomsebenzi olwamzisela ulonwabo nolwaneliseko uYesu?

⁴ UYesu Kristu wathi: “Okwam ukudla kukuba ndenze ukuthanda kowandithumayo, ndiwufeze umsebenzi wakhe.” (Yohane 4:34) Ukusebenzela uYehova ngokunyaniseka kwamzisela uvuyo nolwaneliseko olukhulu uYesu. Kwenza ubomi bakhe baba nenjongo, ibe ekupheleni kobulungiseleli bakhe beminyaka emithathu enesiqingatha, ngokwenyaniso wayenokuthi kuYise wasezulwini: “Mna ndikuzukisile emhlabeni, ndiwufezile umsebenzi obundinikile ukuba ndiwenze.” (Yohane 17:4) Kanye njengokuba ukutya kokoqobo kuzimasa, kukwanjalo nangomsebenzi ngengqiqo yokomoya. UYesu wakubethelela oku ngesinye isihlandlo xa waluleka esithi: “Musani ukusebenzela ukudla okutshabalalayo; sebenzelani ukudla okuhlala kuse ebomini obungunaphakade.” (Yohane 6:27) Ngokwahlukileyo koko, umsebenzi ongeyomveliso ngokomoya ukhokelela kukatyo nasekufeni.

5. Ngubani owawuchasayo umsebenzi olungileyo awawenzayo uYesu, ibe ngoba?

⁵ “Ubawo uyasebenza kude kube ngoku, nam ndiyasebenza.” UYesu wawabhekisa la mazwi kumaYuda awayemgxeka ngenxa yokuba ngeSabatha waphilisa indoda eyayigula kangangeminyaka engama-38. (Yohane 5:5-17) Nangona uYesu wayesenza umsebenzi kaYehova, abachasi bonqulo babengavumi ukuyamkela loo nyaniso baza benza konke ababenokukwenza ukumthintela. Kwakutheni? Kwakungenxa yokuba babengaboyise, uSathana uMtyholi, lowo ubesoloko ewuchasile umsebenzi kaYehova. (Yohane 8:44) Ekubeni uSathana ‘enokuzimilisa okwesithunywa sokukhanya,’ esebenzisa ‘konke ukulukuhla kokungalungisi,’ kufuneka sibe nengqiqo yokomoya nengcinga ehluzekileyo ukuze siyiqonde oko ikuko imisebenzi yakhe. Kungenjalo, sisenokuzifumana sisenza okuchasene noYehova.—2 Korinte 11:14; 2 Tesalonika 2:9, 10.

Ukusebenza Kwabachasi

6. Kutheni abawexuki ‘bengabasebenzi abakhohlisayo’? Zekelisa.

⁶ Bambi, njengabawexuki abathile namhlanje, ngokunganyaniseki basebenza njengoothunywashe bakaSathana bokusingela phantsi ukholo lwabo basandul’ ukuba ngamalungu anxulumana nebandla lamaKristu. (2 Korinte 11:13) Kunokuba basebenzise nje iBhayibhile njengesiseko seemfundiso zokwenyaniso, bagxininisa ekuzameni ukubek’ ibala iNew World Translation of the Holy Scriptures, ngokungathi amaNgqina kaYehova ebexhomekeke ngokupheleleyo ekuxhasweni yiyo. Kodwa oku akunjalo. Kwinxalenye enkulu yale nkulungwane, amaNgqina ayesebenzisa ngokuyintloko iKing James Version, iDouay Version yamaRoma Katolika, okanye naziphi na iinguqulelo ezazifumaneka ngolwimi lwawo, ukufunda inyaniso engoYehova neenjongo zakhe. Ibe asebenzisa ezi nguqulelo zindala ekuvakaliseni inyaniso engemeko yabafi, ulwalamano oluphakathi koThixo noNyana wakhe nesizathu sokuba ingumhlambi omncinane kuphela oya ezulwini. Abantu abaqheleneyo nawo bayazi ukuba amaNgqina kaYehova ayaqhubeka esebenzisa iinguqulelo ezininzi zeBhayibhile kumsebenzi wawo wokushumayela. Noko ke, ukususela ngowe-1961, aye ngokongezelelekileyo anandipha ukusebenzisa iNew World Translation, nenguqulelo yayo ehlaziyiweyo, echanileyo nefundeka ngokulula.

7. (a) Kutheni uYesu ebakhanyela abaninzi abathi banokholo kuye? (b) Kutheni kubalulekile nje ukuphaphela isiluleko esikweyoku-1 kaYohane 4:1?

⁷ UYesu wathi wayeya kubakhanyela abaninzi abathi bayakholwa kuye. Wavuma ukuba babeya kuprofeta, bakhuphe iidemon baze ‘benze imisebenzi yamandla emininzi’ egameni lakhe. Sekunjalo, uyifanisa le misebenzi njengemisebenzi ‘echasene nomthetho.’ (Mateyu 7:21-23) Ngoba? Ngenxa yokuba abakwenzi ukuthanda kukaBawo wakhe wasezulwini yaye abanaxabiso kuYehova uThixo. Namhlanje le misebenzi ingaqhelekanga, nesenokude ibonakale imangalisa, inokuba isavela kumkhohlisi omkhulu, uSathana. Ebhala incwadi yakhe yokuqala eya kubo bonke kwiminyaka engaphezu kwama-60 emva kokufa nokuvuka kukaYesu, umpostile uYohane waluleka amaKristu ukuba ‘angakholwa ngoomoya bonke, abacikide oomoya ukuba bangabakaThixo na.’ Nathi kufuneka senze okufanayo.—1 Yohane 4:1.

Imisebenzi Engenamvuzo

8. Sifanele sivakalelwe njani ngemisebenzi yenyama?

⁸ Kwanokuba asibandakanyekanga kumsebenzi ongeyongenelo ngokomoya, imigudu yethu ililize ukuba iqhubeka isanelisa iminqweno yenyama enesono. Umpostile uPetros wathi lisanele ixesha elide esilichithele ‘ekwenzeni ukuthanda kweentlanga sihamba eburheletyweni, ezinkanukweni, ekutshisweni yiwayini, ezindywaleni, emithayini nasekukhonzeni izithixo.’ (1 Petros 4:3, 4) Kambe ke, oku akuthethi ukuba bonke abo bangamaKristu azahluleleyo babebandakanyeke kwizenzo ezinjalo, kuphela nje kubonisa ukuba isimo sengqondo sabo baye benjenjalo sifanele ukuba saguquka ngokukhawuleza njengoko umbono wabo wokomoya wawukhula. Ihlabathi liya kuthetha kakubi ngabo ngenxa yokuguquka kwabo; oko kumele kulindelwe. Ukanti bamele benze iinguqulelo ukuba baza kuba ngabasebenzi abanyanisekileyo enkonzweni kaYehova.—1 Korinte 6:9-11.

9. Yintoni esiyifundayo kumava eNgqina elaqalisa ukuqeqeshelwa ukuba yimvumi yeopera?

⁹ UYehova usinike izipho ezininzi ukuba sizinandiphe, phakathi kwazo kukho umculo. Noko ke, ekubeni “ihlabathi liphela lilele kongendawo,” uSathana uMtyholi, ngaba oku akuquki nomculo walo? (1 Yohane 5:19) Ewe, umculo unokuba sisabatha esichuliweyo, njengoko uSylvana wakufumanisayo oko. Waba nethuba elihle lokuqeqeshelwa ukuba yimvumi yeopera eFransi. Ucacisa athi: “Ndandisenawo umnqweno onamandla wokukhonza uYehova, ndandikunandipha ukuba nguvulindlela ongumncedani ibe ndandinethemba lokuzivisisanisa ezi zinto zimbini ebomini bam. Kodwa ingxaki yokuqala ekwafuneka ndijamelene nayo ekufikeleleni usukelo lwam yayikukuziphatha okubi ngokwesini. Ekuqaleni, izinxulumani zam zandijonga njengomntu ovalekileyo xa ndandingahambisani nentetho nehambo yazo yokuziphatha okubi ngokwesini. Kamva, imekobume eyonakeleyo yaqalisa ukungandixhalabisi kangako, indenza ukuba ndinyamezele izinto azithiyileyo uYehova. Omnye wabo babendiqeqesha waqhubeka endibongoza ukuba umculo ndiwenze ube lunqulo lwam, ibe ndafundiswa ukuba ndime ngokuzithemba eqongeni ndize ndizicingele njengobalaseleyo kunabo bonke. Konke oku kwandenza ndaziva ndingakhululekanga gqitha. Ekugqibeleni, kwafuneka ndilungiselele uvavanyo olukhethekileyo lwelizwe. Ndathandaza kuYehova ukuba andibonise ngokucacileyo indlela endimele ndihambe ngayo. Nangona ndandicule kakuhle yaye ndiziva ndinentembelo, andizange ndibe phakathi kwabo bakhethwayo. Kamva, ndasiqonda isizathu—iziphumo zagqitywa ngasese kusengaphambi kokuba kuqale ukhuphiswano. Kodwa waphendulwa ngokucacileyo umthandazo wam ndaza ndagqiba ekubeni ndiwushiye umculo weqonga weopera ndaya kufundisa umculo ekhaya.” Lo dade kamva watshata nomdala kwibandla lamaKristu, apho ngoku bakhonza bobabini ngokunyaniseka ukuhambisela phambili izilangazelelo zoBukumkani.

10. Sisiphi isigqibo ofikelela kuso ngokusuka kumazwi kaYesu akuYohane 3:19-21?

¹⁰ UYesu wathi: “Bonke abenza okubi, bayaluthiya ukhanyiso, bangezi elukhanyisweni, ukuze imisebenzi yabo ingohlwaywa.” Kwelinye icala, “lowo uyenzayo inyaniso uyeza elukhanyisweni, ukuze imisebenzi yakhe ibonakalaliswe; ngokuba isetyenzelwe kuThixo.” (Yohane 3:19-21) Enjani yona intsikelelo ekuyiyo ukusebenza ngokuvisisana nokuthanda nenjongo kaThixo! Kodwa ukuze sikwenze ngempumelelo oko, sifanele ngamaxesha onke sivumele imisebenzi yethu ukuba ihlolwe ngokwemilinganiselo yeLizwi likaThixo. Asize sibe badala gqitha ibe asize sishiywe lixesha ukuba senze inguqulelo kwindlela esiphila ngayo nokuba samkele isimemo sokuba sithabathe inkonzo exabisekileyo kaYehova.

Ukwenza “Imisebenzi Elungileyo” Namhlanje

11. Yintoni abaninzi abayisukelayo besithi “yimisebenzi elungileyo,” ibe kutheni inokukhokelela kukatyo nje?

¹¹ Umsebenzi oxabisekileyo namhlanje umele ubonakalise ukungxamiseka kwamaxesha ethu. Abantu abaninzi abanyanisekileyo bayakungqina oko yaye bazixakekise ngemisebenzi ngokufuthi ekuthiwa “yimisebenzi elungileyo,” eyenzelwa ingenelo yoluntu ngokubanzi okanye esinye isizathu ngokukhethekileyo. Ukanti, hayi indlela olukatyisa ngayo olu hlobo lomsebenzi! EBritani, iCAFOD (INgxowa-Mali YamaKatolika Yezophuculo Lwamazwe Aphesheya), inikela ingxelo ngephulo layo lokuphelisa indlala, yathi: “Kwiminyaka emithathu eyadlulayo . . . kwaqokelelwa izigidi [zeerandi] ukwenzela ukuphelisa indlala. Kwasindiswa amawaka abantu. Ngoku abo bantu basengozini kwakhona . . . Kodwa kutheni? Konakele phi?” Iqhubeka nengxelo yayo, iCAFOD Journal icacisa ukuba iingxaki ezisoloko zikho azizange ziconjululwe yaye “imali ebifuneka ngamandla ukwenzela ukuphucula imeko yoluntu iye yasetyenziselwa ukuxhasa ungquzulwano [imfazwe yamakhaya].” Ngokungathandabuzekiyo, uye waweva amazwi anjalo evakaliswa yimibutho ebandakanyeke kumsebenzi onjalo.

12. Sisiphi ekuphela kwesicombululo kwiingxaki ihlabathi elijamelene nazo namhlanje?

¹² Indlala yingxaki enkulu. Ukanti ngoobani ababonayo ukuba iintlekele zanamhla zendlala nemfazwe zizalisekisa isiprofeto sikaYesu Kristu, esalatha kwisiphelo sale nkqubo yezinto ikhoyo? (Mateyu 24:3, 7) Ngubani oye wapapasha ubungqina obunxibelelanisa ezi ziganeko nabakhweli bamahashe abane ababoniswe ngokucacileyo kwincwadi yeBhayibhile yeSityhilelo, isahluko 6? Ngokuvisisana noko, amaNgqina kaYehova aye akwenza oko kulo lindixesha. Ngoba? Ukuze abonise ukuba abantu abanakuze bazise nasiphi na isicombululo esihlala sihleli. Oku akuthethi ukuba amaKristu awazikhathalelanga iingxaki zehlabathi. Akunjalo kwaphela. Anovelwano yaye enza konke okusemandleni awo ukuthomalalisa ukubandezeleka. Sekunjalo, asijonga njengesiyinyaniso isibakala sokuba ngaphandle kokungenelela kukaThixo, iingxaki zehlabathi azinakuze ziconjululwe. Njengemeko yobuhlwempu, ezi ngxaki ziya kuhlala zikho lo gama uSathana esavunyelwe ukuba abe ngumlawuli weli hlabathi.—Marko 14:7; Yohane 12:31.

Owona Msebenzi Uxabiseke Gqitha

13. Nguwuphi owona msebenzi ungxamisekileyo namhlanje, ibe ngoobani abawenzayo?

¹³ Eyona mfuneko ingxamiseke ngokonakona namhlanje kukushumayela iindaba ezilungileyo zokuba uBukumkani bukaYehova uThixo buza kubathabathel’ indawo ngokukhawuleza bonke oorhulumente behlabathi buze buzise inkululeko ekukudala abantu aboyik’ uThixo beyilangazelela. (Daniyeli 2:44; Mateyu 24:14) UYesu Kristu wakwenza ukushumayela ngoBukumkani basezulwini kwayeyona njongo yakhe iphambili ebomini, nangona ukushumayela kwakhe kwakupheleliselwe kwilizwe lasePalestina. Namhlanje, lo msebenzi wokushumayela wenziwa zwenibanzi, kanye njengokuba uYesu wathi kwakuya kuba njalo. (Yohane 14:12; IZenzo 1:8) Ukuba nesabelo, kwanesincinane, kumsebenzi kaThixo, kulilungelo elingenakuthelekiswa nanto. Amadoda nabafazi, abakhulileyo nabaselula ngokufanayo, ababengazange bakuphuphe nokukuphupha ukuba ngabashumayeli beendaba ezilungileyo bayakhokela kumsebenzi wokushumayela owenziwa ngamaNgqina kaYehova namhlanje. NjengoNowa nentsapho yakhe, benza umsebenzi kaThixo ngokunyaniseka njengothumo Lwakhe, ibe ngoko ke bewenza ngamandla Akhe, ngaphambi kokupheliswa kwale nkqubo yezinto.—Filipi 4:13; Hebhere 11:7.

14. Ukushumayela kubusindisa njani ubomi yaye kwangaxeshanye kuyinkuselo njani?

¹⁴ Umsebenzi wokunikela ubungqina owenziwa ngamaNgqina kaYehova ebudeni bale mihla yokugqibela usindisa ubomi kwabo baphulaphulayo nakwabo benza ngokuvisisana neendaba ezilungileyo abazivayo. (Roma 10:11-15) Kwakhona uyinkuselo kwabo bashumayelayo. Ngokuba nomdla onyanisekileyo wokunceda abantu abaneengxaki ezinkulu kunezethu, kunokwenzeka singaxhalabi ngokugqithiseleyo ngeengxaki esinazo. Siyaqonda ukuba eli hlabathi elinemilinganiselo ewohlokayo beliya kuthanda ukuba senze ngokuvisisana neendlela zalo. Ngoko ukuzalisa iingqondo zethu ngeengcamango zikaThixo ebudeni bokushumayela kwethu kungaphezulu kunokuba kube kokomelez’ ukholo nje; kuyeyona nto sinomdla ngokuncamisileyo kuyo. Kunjengokuba elinye iNgqina lakubeka ngale ndlela oku: “Ukuba andizami ukubaguqula abantu endihlangana nabo, basenokundiguqula!”—Thelekisa eyesi-2 kaPetros 2:7-9.

Ukusebenza Nebandla

15. Ziziphi iimbopheleleko ezithe zinzi phezu kwabalusi abangaphantsi namhlanje, ibe amalungu ebandla angamadoda afanele avakalelwe njani ngenxa yoko kukweyoku-1 kuTimoti 3:1?

¹⁵ Xa abasandul’ ukuba nomdla besiza ebandleni, baba ngaphantsi kokunyanyekelwa nguMalusi Omkhulu, uYehova uThixo, noMalusi wakhe Olungileyo, uYesu Kristu. (INdumiso 23:1; Yohane 10:11) Aba Balusi basezulwini bamelwe apha emhlabeni ngabalusi bomhlambi abangaphantsi nabanyanisekileyo, amadoda amiselwe emabandleni. (1 Petros 5:2, 3) Ukuba kwisigxina esilolo hlobo kulilungelo elixabisekileyo kule mihla yokugqibela. Umsebenzi wabalusi ngumsebenzi onzima, oquka kungekuphela nje ukukhokela ekufundiseni ebandleni nasekushumayeleni kodwa kwanasekukhuseleni umhlambi kumarhamncwa okomoya nakwiinkqwithela zemeko-bume efana nesichotho yehlabathi esiphila kulo. Akukho msebenzi uxabiseke ngakumbi amalungu ebandla angamadoda anokuwuzabalazela kunalowo wokunceda ekunyamekeleni impilo-ntle yokomoya yamalungu ebandla lamaKristu elandayo.—1 Timoti 3:1; thelekisa uIsaya 32:1, 2.

16. Kungaziphi iindlela abathi abalusi abangamaKristu baphelelisane ngazo?

¹⁶ Noko ke, asimele silibale ukuba abalusi abanjalo bangabantu, banobuntu obahlukeneyo neentsilelo ezifana nezomhlambi uphela. Nangona omnye esenokubalasela kwinkalo ethile yokwalusa, izipho zabanye ziya kuba yingenelo ebandleni kwezinye iinkalo. Umsebenzi wabo njengabadala abangamaKristu uyaphelelisana ukomeleza ibandla. (1 Korinte 12:4, 5) Akumele nanini na kungene umoya wokhuphiswano phakathi kwabo. Bekunye basebenzela ukukhusela nokuhambisela phambili izilangazelelo zoBukumkani, ‘bephakamisa izandla ezingcwele’ ekuthandazeni kuYehova, befuna intsikelelo nokhokelo lwakhe kuko konke abakucebayo nakwizigqibo abafikelela kuzo.—1 Timoti 2:8.

17. (a) Yiyiphi imbopheleleko esinayo? (b) Ziziphi izinto ekufuneka siziphephe ukuba siza kuyiphumeza ngokufanelekileyo imbopheleleko yethu?

¹⁷ Umsebenzi wokushumayela ngoku uya uba ngongxamiseke ngakumbi njengoko isiphelo sobukhosi bukaSathana sisondela. Ekubeni sinenyaniso yeLizwi likaYehova uThixo, njengamaNgqina akhe, sinembopheleleko yokusasaza iindaba ezilungileyo ngalo lonke ithuba esinalo. Umsebenzi esinawo mninzi kakhulu ukuba ungasigcina sixakekile, ukuya kutsho esiphelweni. Singaze sizivumele ukuba sityekiswe sisimo sokuthanda iziyolo, esokuthanda ukuziyolisa ngokuziphatha okubi okanye sisindwe kukuthanda izinto eziphathekayo. Asifanele sizibandakanye kwindlela yokucinga yengqikelelo, sixambulisana ngamazwi, kuba oku kunokungqineka kungeyongenelo ibe kusidla ixesha. (2 Timoti 2:14; Tito 1:10; 3:9) Xa abafundi babuza uYesu besithi, “Nkosi, wobubuyisela ngeli xesha na ubukumkani kuSirayeli?” uYesu walathisela ukucinga kwabo kumsebenzi obalulekileyo owawukho, esithi: “[Niya kuba] ngamangqina am eYerusalem, kwanakulo lonke elakwaYuda nelaseSamariya, kude kuse nasekupheleni komhlaba.” Olo thumo lunabela ukuza kutsho kulo mhla.—IZenzo 1:6-8.

18. Kutheni ukusebenza noYehova kuvuza kangaka nje?

¹⁸ Ukusebenza noYehova, ukushumayela nebandla lakhe lazwenibanzi namhlanje, kuzisa ulonwabo, ulwaneliseko nenjongo yokwenene kubomi bethu. Lithuba elihle kuye ngamnye kubathandi bakaYehova lokuba abonakalise ukuzinikela nokunyaniseka kuye. Lo msebenzi awusayi kuphindwa kwiinkalo zawo ezininzi. Sinethemba elicacileyo lobomi obungunaphakade ngaphambili, ngamana singaqhubeka ngokunyaniseka ‘simkhonze uThixo, sinokuhlonela nokoyika,’ ukusa kwindumiso yakhe nosindiso lwethu.—Hebhere 12:28.

Ithini Impendulo Yakho?

◻ UYesu wafumana uvuyo nolwaneliseko kuwuphi umsebenzi?

◻ Ngoobani abawuchasileyo umsebenzi kaYehova, yaye ngoba?

◻ “Imisebenzi elungileyo” yehlabathi ithelekiseka njani nokushunyayelwa kweendaba ezilungileyo zoBukumkani bukaThixo?

[Umfanekiso okwiphepha 18]

UYesu wathuma abafundi bakhe ukuba bahambe baye kushumayela