Uyakhumbula Na?
Ngaba ukunandiphile ukufunda iinkupho zakutshanje zeMboniselo? Ngoko, khawubone ukuba uya kukwazi na ukuphendula le mibuzo ilandelayo:
◻ Ekubeni izithunywa zezulu ezingenantobelo ziye zaphoselwa eTartarus, oku kuye kwathetha ntoni kuzo? (2 Petros 2:4)
Azisenandawo kwintlangano kaYehova engcwele yaye ngoku zikhutshelwe ngaphandle ngokupheleleyo kukhanyiselo lobuthixo. Phofu ke, zisasebenza phantsi kolwalathiso lukaSathana yaye ziyaqhubeka zinxibelelana ngokusondeleyo nabantu, zizabalazela ukulawula amadoda, abafazi kwanabantwana. (ISityhilelo 12:12, 17)—4/15, iphepha 14.
◻ Kutheni kuyimfuneko nje ‘ukuthiya okubi’ emehlweni kaYehova? (INdumiso 97:10)
Abo bakuthiyileyo okubi abayi kufuna iindlela zokuzifica kuko. Kwelinye icala, abantu abangakuthiyiyo basenokurhoxa kuko ngokomzimba ngoxa engqondweni besenokunqwenela ukuba bebengangcamla kwizinto ezimbi.—4/15, iphepha 21.
◻ Kumzekeliso kaYesu weetalente, sisiphi isifundo esibalulekileyo kubo bonke abo bathi bangabalandeli bakaKristu? (Mateyu 25:14-30)
Bafanele basebenzele ukwandisa impahla yeNkosi yabo yasezulwini ngokuba nesabelo esizeleyo kumsebenzi wokushumayela. Kuphela kungokwenza oko abanokuthi baqiniseke ukuba baya kufumana ukunconywa nguYesu baze bafumane umvuzo. Ngaloo ndlela bayakuphepha ukulahlelwa ngaphandle ebumnyameni nokutshatyalaliswa ekugqibeleni.—5/1, iphepha 9.
◻ Wayethetha ukuthini uYesu xa waxelela abafundi bakhe ukuba bathandaze bathi: “Ungasingenisi ekulingweni”? (Mateyu 6:13)
La mazwi awamele achazwe njengathetha ukuba uYehova uyasihenda ukuba senze isono. Enyanisweni, endaweni yoko, sinokumcela uYehova ukuba angasivumeli ukuba sinikezele xa silingwa okanye sinyanzelelwa ukungamthobeli. Sinokumbongoza uBawo wethu ukuba akhokele ukunyathela kwethu ukuze singavelelwa sisilingo esinzima gqitha ukuba singamelana naso. (1 Korinte 10:13)—5/15, iphepha 19.
◻ Ngaba kufanelekile ngomKristu ukufumana isitofu somlinganiselo othile wegazi, njengeimmune globulin okanye ialbumin?
Esenza ngokuvumelana nomthetho kaThixo, amaKristu akalwamkeli utofelo-gazi olunezakhi zegazi eziziziintloko—isiyilelo-gazi, iiseli ezibomvu, iiseli ezimhlophe, okanye iiplatelets. Noko ke, wambi amaNgqina kaYehova, aye ngokuvunyelwa zizazela avakalelwa kukuba anako ukulwamkela utofelo lomlinganiselo omncinane weeprotini zesiyilelo-gazi. Okubangel’ umdla kukuba, zimbi zezi proteni ngokuqhelekileyo zisuka kwigazi lomfazi omithiyo ziye kwigazi elahlukileyo lemveku yakhe engekazalwa.—6/1, iphepha 30, 31.
◻ Kwafeza yiphi injongo ukuhlamba kukaYesu iinyawo zabafundi bakhe ngePasika yokugqibela engokwasemthethweni?
UYesu wayefundisa abafundi bakhe isifundo esingokuthobeka. Akukho namnye owayefanele afune indawo yokuqala, ecinga ukuba ubalulekile. Kunoko, bonke bafanele balandele umzekelo kaYesu baze bakulungele ukukhonzana ngokungenamkhethe, kungakhathaliseki ukuba umsebenzi lowo awuthandeki okanye uphantsi kangakanani na. (Yohane 13:12-17)—6/15, iphepha 9.
◻ Kungayiphi ingqiqo awathi amaYuda aseBhereya ‘azihlolisisa ngenyameko’ iZibhalo? (IZenzo 17:11)
Kwakungengenxa yokuba loo maBhereya ayemthandabuza uPawulos nesigidimi awayewaphathele sona, kodwa enza uhlolisiso lokungqina ukuba uYesu wayenguye uMesiya. Isibakala sokuba amaninzi awo akholwa sibonisa ukuba ayenentshukumisa elungileyo. (IZenzo 17:12)—6/15, iphepha 18.
◻ Yayiyintoni ‘incwadi yeeMfazwe zikaYehova’? (Numeri 21:14)
Le yayiyimbali ethembekileyo engeemfazwe uThixo awazilwela abantu bakhe. Kusenokwenzeka ukuba yaqalisa xa uAbraham woyisa abahlaseli abaxhobileyo beLizwe Ledinga njengoko kubhalwe kwiGenesis isahluko 14. Incopho ezukileyo yale ncwadi iya kuba ‘yimfazwe yaloo mini inkulu kaThixo uSomandla’ eArmagedon. (ISityhilelo 16:14, 16)—7/1, iphepha 20, 22.
◻ ILizwi likaThixo, iBhayibhile, lisinceda njani ukuba sinyamezele iintlungu?
IBhayibhile iyasixelela isizathu sokuba uYehova evumele iintlungu, yaye ikwasiqinisekisa ukuba iintlungu ziya kuphela kungekudala. (Roma 5:12; ISityhilelo 21:1-5)—7/15, iphepha 4, 5
◻ Abantu bakaThixo namhlanje ‘banokulubonakalisa njani njengezipili uzuko lukaYehova’? (2 Korinte 3:18)
Uzuko lukaThixo lukhanya ‘ngeendaba ezilungileyo zozuko ezingoKristu, ongumfanekiselo kaThixo.’ AmaNgqina kaYehova alubonakalisa olu zuko ngokuthetha ngozuko lukaYehova nangozuko loBukumkani bakhe obulawulwa nguNyana wakhe. (2 Korinte 4:4-6)—7/15, iphepha 15, 16.
◻ Umntu ufanele abhaptizwe nini?
Ubhaptizo linyathelo elimele lithatyathwe xa ubani enze uzahlulelo olupheleleyo, olungagogotye lutho nolungaxhomekekanga kwiimeko lokuzinikela kuYehova ngoKristu uYesu ukuba enze ukuthanda kukaThixo.—8/1, iphepha 14.