Iindawo Ezithile Zelizwe Ledinga
Ngaba Uza Kufunda Kumaxesha Onyaka?
UYEHOVA wakha wathi: ‘Ngayo yonke imihla yehlabathi, akuyi kuphela ukuhlwayela nokuvuna, ihlobo nobusika.’ (Genesis 8:22) Ngaloo ndlela wabethelela ukubaluleka kwamaxesha okulima.
Wazi ntoni ngamaxesha onyaka nokunxulumana kwawo nezolimo? Nokuba uhlala esixekweni okanye akulimi, ufanele ufunde ngamaxesha onyaka nemisebenzi yezolimo yakwaSirayeli. Ngoba? Kuba okukhona usazi ngezi zinto, kokukhona uya kuliqonda kakuhle ngakumbi iLizwi likaThixo.
Abalimi balima umhlaba, bahlwayele imbewu, baze bavune yaye babhule isivuno sabo. Kodwa ukuze sikuqonde ngokucace ngakumbi oko iBhayibhile ikutshoyo, sifanele sazi okungakumbi, kuquka nexesha loo misebenzi eyayisenziwa ngalo. Ngokomzekelo thabatha ukulima, njengoko sibona kusenziwa kumageduka angasentla kwindawo eyayisakuba lelakwaYuda.a Ucinga ukuba lo mfanekiso wathatyathwa ngayiphi inyanga? Ukwazi ixesha ekulinywa ngalo kwindawo okuyo kusenokukulahlekisa. Ixesha lokulima kuMntla Ikhweyita alifani neloMzantsi Ikhweyita; liyahluka nakwiindawo ezikumphakamo ongafaniyo yaye likwalawulwa nalixesha leemvula.
Oku kusenokuyichaphazela indlela ozijonga ngayo iziganeko eziseBhayibhileni. Usenokufunda ngokunyula kukaEliya ilandela lakhe: “Wafumana uElisha, unyana kaShafati, elima; kukho ishumi elinesibini leedyokhwe phambi kwakhe.” (1 Kumkani 19:19) Ucinga ukuba oku kwenzeka ngayiphi inyanga, yaye usenokuba wawukhangeleka njani umhlaba? Yaye kuYohane 4:35, uYesu wathi: “Anitsho na nina ukuthi, Iinyanga zisene, kuze kufike ukuvuna? . . . Waphakamiseni amehlo enu, niwakhangele amasimi; ngokuba aselemhlophe ukuba kuvunwe.” Nangona wachaza ixesha elithe ngqo, uyaqonda ukuba kwakunini?
Isicangca sinikela ushwankathelo olubalaseleyo lwamaxesha onyaka nemisebenzi yezolimo kwiLizwe Ledinga. Izazinge ezingaphandle zibonisa iinyanga zekhalenda engokonqulo yamaYuda.b Xa uthelekisa ezi neenyanga zethu, uya kuphawula ukuhambisana kwazo, njengoko uNisan (okanye, uAbib) ehambisana nokuphela kukaMatshi nokuqala kuka-Aprili. Inxalenye elandelayo xa usiya ngasembindini ibonisa ixesha lokuvuthwa kwesivuno, nto leyo ekunceda uqonde ixesha lokwenziwa kwemisebenzi ethile yezolimo, njengokuvuna nokubhula. Umbindi wesicangca ukuvumela uthelekise ukuguquguquka kwemozulu ebudeni bonyaka.
Sebenzisa esi sicangca ukwandisa ukuqonda noxabiso lwakho ngeengxelo eziseBhayibhileni, njengemizekelo emibini esele ikhankanyiwe.
UElisha wayexakeke ngumsebenzi omkhulu wokulima xa wafumana ubizo lokuba ngumprofeti. Kusenokuba eli xesha nguTishri (Septemba-Oktobha), xa ubushushu obugqithiseleyo behlobo sele budlule. Iimvula zokuqala sele ziqalisile ukuvundisa umhlaba, ukuze ulungele ukulinywa, kuze kulandele ukuhlwayela.
Yaye uYesu wawathetha nini amazwi akuYohane 4:35? Kwakusele iinyanga ezine ngaphambi kokuvuna. Phawula ukuba ukuvunwa kwerhasi kwakuqalisa ngoNisan (Matshi-Aprili), malunga nexesha lePasika. Bala ke iinyanga ezine ubuye umva. Oko kuya kukufikisa kuChislev (Novemba-Disemba). Iimvula zazisanda, kusondela ixesha leemvula ezinamandla ngakumbi nemozulu ebanda ngakumbi. Ngoko ngokucacileyo uYesu wayethetha ngokuvuna kokomfuziselo xa wathi: “Waphakamiseni amehlo enu, niwakhangele amasimi; ngokuba selemhlophe ukuba kuvunwe.”
Ngezantsi kukho imibuzo onokuyisebenzisa kufundisiso lwakho lobuqu okanye uyisebenzise kwixesha lofundisiso oluyolisayo kunye nentsapho yakho:
▪ Kwimimandla engqonge iYeriko iflakisi yayivunwa ngenyanga ka-Adar; ngenxa yoko, iinkcukacha ezikuYoshuwa 2:6 nakwesesi–3:15 zikungqina njani ukuchana kweBhayibhile?—Yoshuwa 4:19; 5:11.
▪ Ukubhula kwakulandela ukuvunwa kokudla okuziinkozo, ngoko isithembiso esikwiLevitikus 26:5 sibonisa njani ukuba kwakuza kubakho indyebo?
▪ Eyesi-2 kaSamuweli 21:10 ibonisa njani ukuba uRitspa wabalinda ithuba elide ngokugqithiseleyo oonyana bakhe ababini, ababexatyelwe ukuze kususwe ityala legazi kubantu bakaThixo?
▪ Kwakutheni ukuze iindudumo nemvula ekhankanywe kweyoku-1 kaSamuweli 12:17 ithatyathwe njengempendulo evela kuThixo?—IMizekeliso 26:1.
▪ Sisiphi isizathu uRute awayenaso sokugqiba kwelokuba impatho awayifumana kuBhohazi yayingengomdla nje wokwexeshana?—Rute 1:22; 2:23.
Kutheni ungagcini esi sicangca kwindawo onokusifumana lula kuyo ukwenzela ufundisiso lwakho lweBhayibhile?
UCHISLEV UNISAN
25 Umthendeleko Wokuhlaziywa 14 IPasika
Kwetempile 15-21 Izonka Ezingenagwele
16 Umnikelo wentlahlela
UIYYAR UADAR
14 IPasika Yamva 14, 15 iPurim
USIVAN UTISHRI
6 Umthendeleko Weeveki 1 Ukuvuthela isigodlo
(IPentekoste) 10 Umhla Wokucamagusha
15-21 Umthendeleko Weminquba
22 Ingqungquthela
[Imibhalo esemazantsi]
a Bona kwaneKhalenda YamaNgqina KaYehova Yowe-1990.
b Inyanga eyongezelelekileyo, okanye efakelweyo (uVeadar) yayisongezelelwa izihlandlo ezisixhenxe ebudeni beminyaka eli-19.
[Umzobo/Imifanekiso ekwiphepha 17]
(Ukuba ufuna inkcazelo ehlahlelwe kakuhle, yiya kwimpapasho)
UNISAN (UABIB)
UMatshi-UAprili
Irhasi
UIYYAR (UZIV)
UAprili-UMeyi
Ingqolowa
USIVAN
UMeyi-UJuni
Amakhiwane Okuqala
UTAMMUZ
UJuni-UJulayi
Iidiliya Ezintsha
UAB
UJulayi-UAgasti
Iziqhamo Zasehlotyeni
UELUL
UAugasti-USeptemba
Iidatilisi, Iidiliya, Amakhiwane
UTISHRI (UETHANIM)
USeptemba-UOktobha
Ukulima
UHESHVAN (UBUL)
UOktoba-UNovemba
Iminquma
UCHISLEV
UNovemba-UDisemba
Imihlambi Ebusika
UTEBETH
UDisemba-UJanuwari
Ukukhula Kohlaza
USHEBAT
UJanuwari-UFebruwari
Ukutyatyamba Kom-amangile
UADAR
UFebruwari-UMatshi
Isitrasi
UVEADAR
UMatshi
[Inkcazelo Ngomfanekiso okwiphepha 16]
Pictorial Archive (Near Eastern History) Est.
[Inkcazelo Ngemifanekiso ekwiphepha 17]
Garo Nalbandian
Pictorial Archive (Near Eastern History) Est.