Ukuqonda Isizathu Sokuba UMesiya Wayemele Afike
“Simfumene uMesiya.”—YOHANE 1:41.
1. Sisiphi isibhengezo esimangalisayo esibhalwe eBhayibhileni, yaye senziwa nini?
UMYUDA othile ogama linguAndreya wenza esi sibhengezo simangalisayo singasentla kumzalwana wakhe ngaphezu kweminyaka eli-1 950 eyadlulayo. Ngaba uyayiva indlela achwayite ngayo kumazwi akhe, awabhalwa ngumpostile uYohane ongumKristu? Loo nyaka ungenakulibaleka wachazwa ngokungqalileyo ngumbhali-mbali ongumKristu, uLuka, ‘njengomnyaka weshumi elinantlanu wokulawula kukaTibheriyo Kesare.’ Unyaka we-15 kaTibheriyo, ukususela kwixesha awamiselwa ngalo njengomlawuli waseRoma, waqalisa ngoSeptemba 28 C.E. waza waphela ngoSeptemba 29 C.E.—Luka 3:1-3, 21, 22; Yohane 1:32-35, 41.
2. Isiprofeto sikaDaniyeli sawubalaselisa njani unyaka wama-29 C.E.?
2 Unyaka wokubonakala kukaMesiya wawuchazwe ngokuchanileyo kusengaphambili. Iminyaka engama-483 yayidlule ukususela kwixesha lokuba ukumkani wasePersi uArtashashta wanikela umyalelo wokuba ibuye yakhiwe iYerusalem, nto leyo eyenzeka ngomnyaka wama-20 wolawulo lwakhe, ngowama-455 B.C.E.a (Nehemiya 2:1-8) Umprofeti uDaniyeli wakuxela kusengaphambili “ukuba, kuthabathela ekuphumeni kwelizwi lokuba ibuyiswe yakhiwe iYerusalem, kuse kumthanjiswa oyinganga, ziiveki ezisixhenxe; ziiveki ezimashumi mathandathu anambini.” (Daniyeli 9:25) Ngaloo ndlela, ixesha leeveki ezisi-7 + 62 = 69 ezingokwesiprofeto laliya kwahlula ezi ziganeko zibini zibalulekileyo. Iiveki ezingamashumi amathandathu anesithoba zokoqobo zilingana neentsuku ezingama-483. Ngokomgaqo wesiprofeto wokuba “usuku lube ngumnyaka,” uMesiya wayeya kubonakala kwiminyaka engama-483 kamva, ngowama-29 C.E.—Hezekile 4:6.
3. (a) Sithetha ukuthini isibizo esithi “uMesiya”? (b) Ziziphi iziprofeto uMesiya ekwafuneka ezizalisekisile?
3 Ngokufanelekileyo, ngonyaka wama-29 C.E., ‘abantu babelinde’ uMesiya. (Luka 3:1, 15) Isibizo esithi “uMesiya” ngesiGrike sinentsingiselo efanayo nokuthi “uKristu” omabini athetha “uMthanjiswa.” (Yohane 1:41) Umbuzo owawubangel’ umdla phakathi kwamaYuda amaninzi wawukukuba, ‘Ngubani uYehova uThixo awayeya kumthambisa njengokumkani ukuba alawule kungekuphela nje uSirayeli kodwa uluntu lonke?’ Ngesiprofeto, ukhetho lwaluza kwenziwa kuphela kwinzala yonyana womzukulwana ka-Abraham uYuda. Ngaphezu koko, uMesiya wayeza kuba yindlalifa yetrone yokumkani wakwaYuda uDavide yaye wayeza kuzalelwa eBhetelehem apho wazalelwa khona uDavide.—Genesis 17:5, 6; 49:10; INdumiso 132:11; Daniyeli 7:13, 14; Mika 5:2; Yohane 7:42.
Ukufaniswa Okungenakuphazanywa
4, 5. (a) Kwenzeka ntoni ngonyaka obalulekileyo wama-29 C.E.? (b) Kungayiphi indlela engenakuphazanywa awathi lowo ukhethwe njengoMesiya wafaniswa ngayo?
4 Ngaloo nyaka ubalulekileyo, wama-29 C.E., naku okwenzekayo: “Lafika ilizwi likaThixo kuYohane, unyana kaZekariya, entlango. Weza kuwo wonke ummandla waseYordan, evakalisa ubhaptizo lwenguquko ukuze kuxolelwe izono.” (Luka 3:2, 3) Ubulungiseleli bukaYohane babulungiselela amaYuda aguqukayo ukuba amkele ukufika okwakusondele kukaMesiya. Ngaphezu koko, uYohane wafumana umqondiso ovela kuYehova. Wayemele akhangele lowo ‘[awayeya] kuthi abone umoya usihla uhlale phezu kwakhe.’—Yohane 1:33.
5 Emva kokubhaptiza uYesu waseNazarete, uYohane wakubona oku kuthanjiswa kungenakuphazanywa. UYesu akazange athanjiswe ngeoli, njengoko wathanjiswa njalo uyisemkhulu wasemhlabeni uDavide, kodwa ngomoya oyingcwele kaYehova uThixo. (1 Samuweli 16:13; IZenzo 10:38) Kwangaxeshanye, ilizwi likaThixo lathi: “Lo nguNyana wam oyintanda, endikholisiweyo nguye.” (Mateyu 3:16, 17) Kunjengokuba uYohane kamva wangqinayo: “Ndimbonile uMoya, esihla njengehobe, ephuma ezulwini, wahlala phezu kwakhe. Nam ndibonile, ndingqinile, ukuba lo nguye uNyana kaThixo.”—Yohane 1:32, 34.
6. Nguwuphi umzekelo omhle uAndreya noYohane abasimisela wona?
6 Ngaloo mazwi, uYohane uMbhaptizi ngokuthembeka wabazisa abafundi bakhe kuYesu, ekwambiza ngokuthi “iMvana kaThixo, ethwala isuse isono sehlabathi.” (Yohane 1:29) Abafundi ababini bakhawuleza ukusabela. Emva kokuchitha usuku olunye bekunye noYesu, babeyiseke ngokupheleleyo. Igama lomnye lalinguAndreya, owathi ngolangazelelo wafuna umzalwana wakhe, uSimon Petros. Omnye umfundi kucingelwa ukuba yayinguYohane unyana kaZebhedi, owaba ngoyena mpostile uthandwayo nguYesu. Emva kokunikela ubungqina ngoYesu phantse iminyaka engama-70, lo Yohane washukunyiselwa ukubhala inkcazelo engasentla ukuze kungenelwe thina. Ngaba umzekelo wakhe nalowo ka-Andreya uyayichukumisa intliziyo yakho? Ngaba unolangazelelo olunjengolo bona nabanye ‘abapostile beMvana’ babenalo ngokuvakalisa iinyaniso ezichukumisayo ezingoMesiya?—ISityhilelo 1:9; 21:14; Yohane 1:35-41; IZenzo 5:40-42.
Uthanjiswe NjengoKumkani NoMbingeleli Omkhulu
7. Kutheni uYesu wayengenakukhonza njengombingeleli kwitempile yaseYerusalem?
7 Ekubeni ngokuzalwa wayengowohlanga lwamaYuda, uYesu “wazalelwa phantsi komthetho.” (Galati 4:4) Ngoko ke, ekubeni engowesizwe sakwaYuda, wayengenakukhonza njengombingeleli kwitempile kaYehova yokomfuziselo, ababingeleli bayo ababeyinzala ka-Aron wohlanga lwabaLevi. Umpostile uPawulos wakhumbuza amaKristu angoowabo oku, “iNkosi yethu iphume kwesikaYuda isizwe, eso angathethanga nto ngaso uMoses ngobubingeleli.”—Hebhere 7:14.
8. Itempile kaYehova yasemhlabeni yafanekisela ntoni?
8 Umpostile uYohane wabhala oku: “Lowo ulukhanyiso lwenene olukhanyisela wonke umntu, wayesiza ehlabathini.” (Yohane 1:6-9, TE) Ngokubhaptizwa kukaYesu, kwafana nokungathi kwabakho itempile enkulu yokomoya, ekubeni ngoku kwakukho umbingeleli omkhulu wokomoya owayenokukhulula uluntu kubukhoboka behlabathi likaSathana lobumnyama obungokomoya.—Hebhere 8:1-5; 9:24.
9, 10. (a) Ayethetha ukuthini amazwi kaYesu athi, “Akuthandanga mbingelelo, namnikelo wakudla,” nathi “Undilungisele umzimba”? (b) UYesu ngokobuqu wavakalelwa njani ngoku?
9 UYesu wayethandaza ngexesha lokubhaptizwa kwakhe. IBhayibhile ithetha ngamanye amazwi akhe abalulekileyo, njengokuba kamva ecatshulwa ngumpostile uPawulos ngokuthi: “Akuthandanga mbingelelo, namnikelo wakudla, ke undilungisele umzimba; amadini atshiswayo kuphele, nangawesono, akukholiswanga ngawo. Ndaza ndathi, Yabona, ndiyeza (Encwadini esongwayo kubhalwe ngam), ndiza kwenza ukuthanda kwakho, Thixo.”—Hebhere 10:5-7; Luka 3:21.
10 Ngaloo ndlela, uYesu wasisebenzisa kuye isiprofeto esikwiNdumiso 40:6-8, esayixela kusengaphambili injongo kaThixo yokuphelisa imibingelelo yezilwanyana eyayinikelwa ngababingeleli besizwe sika-Aron kwitempile yaseYerusalem. UYehova ‘wayengakholiswa’ yiloo mibingelelo, ekubeni yayiyeyokomfuziselo kuphela yaye ingenako ukucamagushela ngokupheleleyo izono zabantu. Ngenxa yoko, uYehova wamlungiselela uYesu umzimba ofezekileyo womntu ukuze abingelele ngawo. UThixo wafudusela ubomi boNyana wakhe wasezulwini kwisizalo sentombi enyulu yomYuda. Ngaloo ndlela uYesu wazalwa engangcoliswanga sisono sika-Adam. Wayengunyana ofezekileyo kaThixo, obomi bakhe babunokucamagushela isono soluntu. (Luka 1:30-35) Njengoko iNdumiso 40:8 yaxela kusengaphambili, kwakungumnqweno kaYesu osuk’ entliziyweni ukwenza ukuthanda kukaYise. “Esithe, ngokuthanda kwakhe, sangcwaliswa ngokusondezwa komzimba kaYesu Kristu, kwaba kanye.”—Hebhere 10:10, 11.
11. Sisiphi isiprofeto ukufa kukaMesiya okwasizalisekisayo, yaye ‘kwayiphelisa njani imibingelelo’?
11 Umbingelelo wobomi bobuntu bukaYesu wayiphelisa kwaba kanye imfuneko yamadini awongezelelekileyo kwitempile yokomfuziselo eYerusalem. Ngaphezu koko, wafa ngoMhla wePasika yowama-33 C.E. Oko kwakusemva kweminyaka emalunga nemithathu enesiqingatha ebhaptiziwe. Iminyaka emithathu enesiqingatha ibiya kulingana nesiqingatha seveki engokwesiprofeto. (Numeri 14:34) Ngoko izinto zenzeka kanye njengoko uDaniyeli wayezixele kusengaphambili ngokuphathelele ukunqunyulwa kukaMesiya esithi: “Ngesiqingatha seveki iphelise imibingelelo neminikelo yokudla.” (Daniyeli 9:26, 27) Nangona ububingeleli bokomfuziselo eYerusalem babusebenza de itempile yatshatyalaliswa ngowama-70 C.E., imibingelelo ababingeleli ababeyinikela ebudeni baloo minyaka yayingasenaxabiso, ekubeni yayithatyathelwe indawo lidini likaYesu elongamileyo.—Mateyu 23:37, 38.
12. Ububingeleli bukaYesu babubalasele ngayiphi indlela kunobo buka-Aron?
12 UAron waba ngowokuqala kulandelelwano olude lwababingeleli abakhulu bakwaSirayeli. Emva kokuthanjiswa kwakhe ngeoli engcwele, kwafuneka alinde kwintente yokuhlangana iintsuku ezisixhenxe ngaphambi kokunikwa igunya lokukhonza njengombingeleli omkhulu. (Levitikus 8:12, 33) Ngokufanayo, uYesu walinda ithuba elithile ngaphambi kokunikwa igunya lokuba ngumlamleli woluntu. Elo thuba lalisusela kwixesha lokuthanjiswa kwakhe njengoMbingeleli Omkhulu ukusa kuvuko lwakhe. Ngokwahlukileyo kuAron, akuyomfuneko ukuba uNyana kaThixo ongenakufa abe nelandela. Yaye ukhonza njengoMbingeleli noKumkani “ngokohlobo lukaMelkitsedeke.”—INdumiso 110:1-4; Genesis 14:18-20; Hebhere 6:20; 7:1-3, 11-17, 23-25.
13. (a) Yiyiphi imbopheleleko enzima eyayiphezu kwababingeleli abakhulu bakwaSirayeli? (b) UYesu Kristu uye wayithwala njani imbopheleleko enkulu ngakumbi?
13 KuSirayeli wamandulo, imbopheleleko eyintloko yokufundisa ngokuchanileyo ngonqulo yayiphezu kombingeleli omkhulu. (Levitikus 10:8-11; Malaki 2:7) Ngokuvisisana noko uYesu wazisa ngeemfuno zikaYehova zobulungisa kubo bonke abafuna ukubudla ilifa uBukumkani nobomi obungunaphakade. (Mateyu 6:9, 10, 33; 7:28, 29; 11:12; 25:34, 46) Xa wayesendlwini yesikhungu eNazarete, uYesu wafunda waza wasisebenzisa kuye isiprofeto esithi: “UMoya weNkosi uphezu kwam, ethe ngenxa yoko yandithambisela ukushumayela iindaba ezilungileyo.” Wandula ke, emva kokuchitha ithuba eKapernahum, wathi: “Ndimelwe kukuba ndizishumayele iindaba ezilungileyo zobukumkani bukaThixo nakweminye imizi, ngokuba ndithunywe oko.” (Luka 4:18, 19, 43; Isaya 61:1, 2) UYesu waqeqesha kwanama-70 abalandeli bakhe ukuba andise lo msebenzi wokuvakaliswa koBukumkani, yaye waxela kusengaphambili ukuba babeya kwenza imisebenzi emikhulu kunaleyo yena wayenzayo. (Luka 10:1-9; Yohane 14:12) Oku kwaba sisiseko sephulo lazwenibanzi lokusasazwa kwemfundiso engokweBhayibhile uYesu awayeya kulalathisa ngokusebenzisa ‘umkhonzi othembekileyo,’ obunjwa ngabalandeli bakhe abathanjisiweyo.—Mateyu 24:45-47; 28:19, 20.
Umthetheleli Oyintloko Wolongamo LukaYehova
14. (a) Sisiphi isizathu esasibangela ukuba umbingeleli omkhulu wakwaSirayeli angene minyaka le kwiNgcwele kaNgcwele ngoMhla Wocamagushelo? (b) Yintoni eyayifanekiselwa sisiqhumiso?
14 Esona sizathu sibalulekileyo sokuza koNyana kaThixo emhlabeni sasingekokusindisa uluntu. Kunoko, sasikukuzinzisa iimbambano ezigculelayo ezaphakanyiswa nguSathana ngokubhekisele kulongamo lukaYehova. Sinokuzuza ukuqonda koku ngokuqwalasela uMhla Wocamagushelo owawusenziwa kwaSirayeli minyaka le, xa kwakufuneka umbingeleli omkhulu wokomfuziselo angene kwiNgcwele kaNgcwele izihlandlo eziliqela. Okokuqala wayengena enesiqhumiso, esasigalelwa kugcedevu lwamalahle avuthayo. (Levitikus 16:12-16) Oko kwakufanekisela kakuhle oko uMbingeleli Omkhulu wokoqobo wayeza kukwenza emhlabeni ngaphambi kokunyukela ezulwini ukuya kuvela phambi koYehova enexabiso ledini lobomi bakhe bobuntu.b (Hebhere 9:24) Njengoko kuboniswe ngokusetyenziswa kwesiqhumiso, ikhondo likaYesu lokuthembeka laliphawulwa yimithandazo yokunyaniseka, inzondelelo epheleleyo ngonqulo lokwenyaniso, nothando olunzulu ngoYehova. (INdumiso 141:2; Marko 1:35; Yohane 2:13-17; 12:27, 28; 14:30, 31; Hebhere 5:7) UYesu waphumelela ukugcina ingqibelelo engenabala ngoxa wayejamelene nezilingo ezichuliweyo, ukungcikivwa, nentshutshiso eqatha eyayiziswa kuye nguSathana nabameli bakhe.—IMizekeliso 27:11; Mateyu 22:15-18; Marko 14:60-65; 15:16-32; Luka 4:13, 29; Yohane 8:44, 59.
15. Sinokuwubonakalisa njani umbulelo wethu kuYehova ngokusinika umbingeleli omkhulu obalasele ngolo hlobo? (Hebhere 10:21-26)
15 Ngokuthethelela ulongamo lukaYehova, uYesu wavuzwa ngokuvuselwa kubomi bokungafi ezulwini. Hayi indlela esifanele sibe nombulelo ngayo kuYehova ngokusinika uMbingeleli Omkhulu obalasele ngolo hlobo! “Ngoko, sinombingeleli omkhulu nje ocande emazulwini, uYesu ke, uNyana kaThixo, masilubambe uvumo lwethu.” (Hebhere 4:14) Ngaba kungumnqweno wakho onyanisekileyo ukulandela umzekelo kaYesu wengqibelelo, kungakhathaliseki ukuba uMtyholi wenza ntoni na? Ukuba kunjalo, unokuqiniseka ngokufumana uncedo, yaye unokuphumelela. Oko kunjalo kuba olona ncedo lulunge ngakumbi luyafumaneka. “Kuba asinambingeleli mkhulu ungenako ukuvelana nezilwelwe zethu; ke, sinowahendwayo ngeento zonke, ngokokufana nathi, engenasono. Masisondele ke ngoko sinokungafihlisi kuyo itrone yobabalo, ukuze samkeliswe inceba, sifumane ubabalo lokusiza ngexesha elililo.”—Hebhere 4:15, 16; 5:7-10; Filipi 4:13; 1 Yohane 2:1, 2.
Imfuneko Yokulungiswa
16. Luluphi ulindelo abafundi bakaMesiya bokuqala ababenalo ngokuphathelele ulawulo loBukumkani bakhe?
16 UAndreya noYohane bakhawuleza ukumqonda uMesiya oyinyaniso, kodwa bona nabanye abafundi bamandulo kwakusekuninzi ekwakufuneka bekufundile. (Yohane 16:12, 13) NjengamaYuda amaninzi onqulo ngelo xesha, babenethemba lokuba uBukumkani obungoMesiya babuya kuqalisa ukulawula ngelo xesha nokuba babuya kukhulula uhlanga lwakwaSirayeli nekomkhulu lalo, iYerusalem, kulawulo lweentlanga. (Luka 2:38; 3:15; 19:11; 23:51; 24:21) Kanti, oko ngekwakuluzisele ziphi iintsikelelo ezihlala zihleli uluntu olunesono?
17, 18. Kwakutheni ukuze uYesu enze umzekeliso ‘womntu othile olinene’?
17 Ukuze ashenxise isono nokufa kubalawulwa boBukumkani bakhe bexesha elizayo, kwakubalulekile ngoMesiya ukuba anqunyulwe kuqala njengemvana yedini. (Yohane 1:29; Isaya 53:7, 12) Xa uYesu waxela kusengaphambili indlela oku okwakuya kwenzeka ngayo nendlela awayeya kuvuswa ngayo, uPetros wasabela ngokuthi: “Makube camagu kuwe, Nkosi; oko akuyi kukha kubekho kuwe.” (Mateyu 16:21, 22) Phofu ke, uYesu wayesazi ukuba abafundi bakhe “babengayiqondi into ayithethayo.”—Marko 9:31, 32, TE; thelekisa uMateyu 17:22, 23.
18 Kuhambo lwakhe lokugqibela lokuya eYerusalem, uYesu wacacisa ngakumbi. (Mateyu 20:18, 19) Wabonisa kwanengenelo enkulu ukufa kwakhe okwakuya kuyizisa, esithi: ‘UNyana womntu weza kuncama ubomi bakhe bube yintlawulelo yokukhulula abaninzi.’ (Mateyu 20:28) Ulindelo oluphosakeleyo lwabathintela abafundi bakhe ukuba bangakuqondi oku. ULuka ubhala oku: “Ebekufuphi eYerusalem, nangokuba babesiba ubukumkani bukaThixo buza kubonakala kwangoko.” Ukuhlengahlengisa ukucinga kwabo, uYesu wenza umzekeliso awathi kuwo wazifanisa ‘nomntu othile olinene’ ekwafuneka kuqala ahambele “ezweni elikude, eya kuzamkelela ubukumkani.” (Luka 19:11, 12) Elo ‘lizwe’ lalibhekisela kwizulu, awathi uYesu wenyukela kulo emva kokufa nokuvuswa kwakhe.
19. (a) Luluphi ulindelo oluphosakeleyo abafundi bakaYesu abaluvakalisayo emva kokuvuka kwakhe? (b) Yiyiphi inguqulelo eyenzekayo kulwalamano lukaThixo nabantu ngePentekoste yowama-33 C.E.? (Hebhere 8:7-9, 13)
19 Noko ke, ngaphambi nje kokunyuka kukaYesu, abafundi bakhe babuza: “Nkosi wobubuyisela ngeli xesha na uBukumkani kuSirayeli?” (IZenzo 1:6) Ngaba uYesu wabagxeka ngenxa yokuba bebuze oku? Hayi, wabacacisela ukuba lalingekafiki ixesha nokuba babemele bazixakekise ngomsebenzi obalulekileyo wokunikela ubungqina obungoMesiya wokwenyaniso. (IZenzo 1:7, 8) Ulwalamano lomnqophiso uThixo awayenalo noSirayeli wokwenyama lwaluza kuphela kungekudala. Ngoko ke, uBukumkani obungoMesiya bexesha elizayo babungayi kubuyiselwa kolo hlanga lungathembekanga lwasemhlabeni. UYesu wabaxelela oku abachasi bakhe abangamaYuda: “Ubukumkani bukaThixo buya kususwa kuni, bunikwe uhlanga oluzivelisayo iziqhamo zabo.” (Mateyu 21:43) Kwiintsuku ezilishumi emva kokuba uYesu enyukele ezulwini, olo hlanga lwazalwa. Umoya oyingcwele wathululelwa phezu kwabafundi bakaYesu abali-120, yaye ngaloo ndlela bathanjiswa ukuba babe ‘ngabangcwele bakaThixo’ ‘nabo baziindlalifa kunye noKristu’ kuBukumkani obungoMesiya obuzayo.—Daniyeli 7:13, 14, 18; Roma 1:7; 8:1, 16, 17; IZenzo 2:1-4; Galati 6:15, 16.
20. Phezu kwalo nje ulindelo oluphosakeleyo, enza ntoni amaKristu athembekileyo enkulungwane yokuqala?
20 Kwanangemva kokuthanjiswa kwawo, amaKristu enkulungwane yokuqala ayenolindelo oluphosakeleyo. (2 Tesalonika 2:1, 2) Kodwa endaweni yokuba anganeliseki aze arhoxe, ngokuthobeka akwamkela ukulungiswa. Enikwe amandla ngomoya oyingcwele kaThixo, ngovuyo amkela isabelo sokunikela ubungqina ‘nokwenza abafundi kubantu bazo zonke iintlanga.’—Mateyu 28:19, 20; IZenzo 1:8; Kolose 1:23.
21. Yiyiphi imibuzo eza kuqwalaselwa kwinqaku lethu elilandelayo?
21 Kuthekani ngenkulungwane yethu yama-20? Ngaba abakhonzi bakaYehova banamhlanje bebekuphaphele ukumiselwa koBukumkani bukaYehova obungoMesiya? Yaye njengabakhonzi abangoowabo benkulungwane yokuqala, ngaba kuye kwafuneka ulindelo lwabo lulungisiwe ngandlela ithile?
[Imibhalo esemazantsi]
a IThe Encyclopedia Americana kwakunye neGreat Soviet Encyclopedia ziyavuma ukuba ulawulo lukaArtashashta lwaphela ngowama-424 B.C.E. Lwaluqale nini? Ngowama-474 B.C.E. Ukuxhasa oku, omnye umbhalo owafunyanwa ngokumbiwa kwezinto zakudala kuthiwa wabhalwa kumnyaka wama-50 ka-Artashashta; omnye ubonisa ukuba ilandela lakhe laqala ukulawula ngomnyaka wama-51 wokulawula kwakhe. Xa sibala sibuyele umva iminyaka engama-50 epheleleyo ukususela ngowama-424 B.C.E., sifikelela kunyaka wama-474 B.C.E. njengowokuqalisa kolawulo lwakhe. Ngoko ke, umnyaka wama-20 ka-Artashashta, xa umyalelo wakhutshwayo, ubuya kuba yiminyaka eli-19 epheleleyo yolawulo lwakhe, oko kukuthi, owama-455 B.C.E. Ukuze ufumane iinkcukacha ezingakumbi, bona i-Insight on the Scriptures, Umqulu 2, iphepha 616, epapashwe yiWatchtower Bible and Tract Society of New York, Inc.
b Bona IMboniselo kaSeptemba 15, 1974, iphepha 428.
Ubuya Kuphendula Njani?
◻ Sithetha ukuthini isibizo esithi “uMesiya”?
◻ Sisiphi isiganeko esibalulekileyo esenzekayo ngonyaka wama-29 C.E.?
◻ Yiyiphi indlela uMesiya ‘awaphelisa ngayo imibingelelo ngesiqingatha seveki’?
◻ Ukususela ekuthanjisweni kwakhe, yiyiphi imbopheleleko uYesu athe wayithwala?
◻ Yayiyintoni injongo eyintloko yokuza kukaMesiya okokuqala, yaye oku kufanele kusichaphazele njani thina?
[Umfanekiso okwiphepha 13]
Ukungena kokuqala kombingeleli omkhulu kwiNgcwele kaNgcwele kwakufanekisela into ethile ebaluleke ngakumbi kunokusindiswa koluntu