Yibani Nombulelo—Ubukumkani BukaYehova ObungoMesiya Buyalawula
“Siyabulela kuwe, Nkosi, Thixo, Somandla, . . . kuba uwathabathile amandla akho amakhulu, waba ngukumkani.”—ISITYHILELO 11:17.
1. Wathini umongameli weWatch Tower Society emva kokhenketho lwakhe lwaseYurophu ngowe-1911?
EKUQALENI kowe-1911, umongameli weWatch Tower Society, uC. T. Russell, wanikela ungcelele lweentetho zeBhayibhile kwizixeko ezikhulu zaseYurophu. Ethetha ngolo khenketho, lo kaRussell wabhala okulandelayo kwiMboniselo (yesiNgesi), kaMeyi 15, 1911: “Siye samangaliswa kukufumanisa ukuba kuzo zonke iindawo kukho ubutyebi obuninzi . . . Abafundi boncwadi lwethu bayazi ukuba kangangeminyaka ethile besilindele ukuba esi Sizukulwana siphele ngexesha elinzima lenkathazo, kwaye silindele ukuba oku kwenzeke ngequbuliso nangamandla kungekudala emva ko-Oktobha, 1914, nto leyo ngokokuziqonda kwethu iZibhalo, ilixesha aya kuthi ngalo amaXesha eeNtlanga—ukunikelwa kokwexeshana kolawulo lomhlaba eziNtlangeni—aphele; ngoko ke, ilixesha lokuba ubukumkani bukaMesiya buqalise ukusebenzisa igunya labo.” Ngaba olu lindelo lwazalisekiswa?
2. Uxolo lwapheliswa njani ngowe-1914, yaye oku kwaba nayiphi imiphumo elusizi?
2 Ebudeni besiqingatha sokuqala sowe-1914, ihlabathi lalikhangeleka linqabisekile kwaye likhuselekile kwimfazwe. Kodwa ngequbuliso uxolo lwapheliswa ngummi waseSerbia ngokubulala indlalifa yetrone yaseOstriya ngoJuni 28, 1914. Kungekudala iOstriya neHungary zaya kulwa neSerbia. IRashiya yancedisa iSerbia, ngoko iJamani yaya kulwa neRashiya ngoAgasti 1. Yaza iJamani yaya kulwa neFransi ngoAgasti 3; iBritani nxamnye neJamani ngoAgasti 4; iMontenegro nxamnye neOstriya neHungary; ngoAgasti 7; iJapan nxamnye neJamani ngoAgasti 23; iOstriya neHungary nxamnye neBelgium ngoAgasti 28. Abaninzi babekholelwa kwelokuba kungekudala imfazwe yayiza kuphela. Endaweni yoko, yaguqukela ekubeni yeyona mfazwe imbi embalini ukuza kuthi ga ngelo xesha, amazwe ali-19 angakumbi angenelela kuphalazo-gazi lwazwenibanzi olwasuba ubomi bamajoni nobabantu abaqhelekileyo abali-13 000 000, lwashiya abangaphezu kwama-21 000 000 belimele abanye benzakele.
3, 4. Kwenzeka ntoni kwikomkhulu loMbutho ngentsasa yangoLwesihlanu, ngo-Oktobha 2, 1914?
3 Ngentsasa yangoLwesihlanu, ngo-Oktobha 2, 1914, lo kaRussell wenza isaziso kwabo babesebenza kwikomkhulu leWatch Tower Society eBrooklyn, eNew York esithi: “Amaxesha eeNtlanga aphelile; ookumkani bazo baphelelwe.” Oku kwamkelwa ngokuqhwatywa kwezandla ngehlombe yintsapho yaseBheteli, “indlu kaThixo.”
4 Ziziphi izizathu ezivakalayo uC. T. Russell namaqabane akhe ababenazo zokuvuya kangako ngaloo ntsasa kaOktobha? Livela phi ibinzana elithi “amaXesha eeNtlanga”? Bubuphi ubungqina obukhoyo bokuba amaXesha eeNtlanga aphela ngo-Oktobha 1914? Yaye kufanele kukuchaphazele njani oko?
IYerusalem NamaXesha EeNtlanga
5. Livela phi ibinzana elithi “amaXesha eeNtlanga”?
5 Igama elithi “amaXesha eeNtlanga,” okanye “amaxesha amisiweyo eentlanga,” livela kwisiprofeto esiphawulekayo sikaYesu esimayela nokutshatyalaliswa kweYerusalem. (Luka 21:5-36, King James Version) Kwiintsuku ezimbini ngaphambi kokuprofeta ngolu hlobo, uYesu wazibonakalisa kubemi baseYerusalem njengoMesiya wabo. Ngoxa ngokuthobekileyo wayekhwele e-esileni engena kweso sixeko, izihlwele zamaYuda zazimemeza ngoloyiso, zikhwaza kanye njengoko uZekariya 9:9 waxela kusengaphambili. Zamemeza ngezwi elikhulu zisithi: “Makabongwe lo Kumkani uzayo egameni leNkosi.”—Luka 19:28-40.
6, 7. Liliphi ityala legazi eloyikekayo abathi abemi belakwaYuda benkulungwane yokuqala bazizisela lona, yaye ngayiphi imiphumo?
6 Kodwa uYesu wayesazi ukuba kungekudala uluntu ngokubanzi lwaluza kukhukuliswa luze lumchase ngenxa yentiyo iinkokeli zonqulo zaseYerusalem ezazinayo ziphenjelelwa nguyise wazo, uMtyholi. (Genesis 3:15; Yohane 8:44) Kungekudala emva koko, ngoNisan 14, indimbane yamaYuda yaxokozela isithi uYesu makabulawe. Inkqangaza kwirhuluneli yamaRoma eyayimathidala ngoku yathi “Igazi lakhe malibe phezu kwethu, naphezu kwabantwana bethu.” (Mateyu 27:24, 25) Kunokuba bamamkele uYesu njengoKumkani onguMesiya, ababingeleli abakhulu bathi: “Thina asinakumkani ungenguye uKesare.” (Yohane 19:15) Waza ke uMesiya wokwenyaniso wabethelelwa kumthi wentuthumbo ukuba afe, emangalelwe ngobuxoki ngokuqhwaya isiphendu nxamnye neRoma nokunyelisa uThixo wamaYuda.—Marko 14:61-64; Luka 23:2; Yohane 18:36; 19:7.
7 Ngokuqinisekileyo ingqumbo kaThixo yayiza kubazela abemi belakwaYuda ngenxa yetyala labo legazi eloyikekayo. IYerusalem, netempile yayo entle, yayingasenakuqhubeka ibizwa ngokuba “ngumzi woKumkani omkhulu,” uYehova. (Mateyu 5:35; Luka 13:33-35) Kwiintsuku ezimbalwa ngaphambi kokufa kukaYesu, abafundi bakhe bazincoma izakhiwo zetempile yeso sixeko. Esabela koku, uYesu waxela kusengaphambili ukuba: “Ezi zinto nizibona nje, kuya kufika imihla ekungayi kusala litye phezu kwelitye, elingayi kuchithwa.”—Luka 21:5, 6.
8. Xa uYesu wanikela ‘umqondiso’ weziganeko ezikhokelela ekutshatyalalisweni kweYerusalem, yintoni enye eyayibandakanyekile?
8 Abafundi bakaYesu bothukile babuza: “Mfundisi, ziya kubakho nini na ke ezi zinto? Uya kuba yintoni na nomqondiso, xa ngaba ezi zinto ziza kubakho?” (Luka 21:7) Ephendula uYesu wazichaza ngokuchanileyo kusengaphambili iziganeko ezakhokelela ekutshatyalalisweni kweYerusalem, waza wongezelela la mazwi abalulekileyo: “NeYerusalem inyathelelwe phantsi ziintlanga, ade azaliseke amaxesha eentlanga.” (Luka 21:8-24) Ngaloo ndlela uYesu walatha kusengaphambili kokuthile okungaphaya kokutshatyalaliswa kweYerusalem—okuthile okwakumele kulinde de “azaliseke amaxesha eentlanga.” Ebhekisela ‘kumqondiso,’ uYesu wathi: “Xa nithe nazibona ezi zinto zisihla, yazini ukuba bukufuphi ubukumkani bukaThixo.” (Luka 21:31) Ngoko ke, umqondiso wawuza kuba nenzaliseko entlu-mbini. Inzaliseko yokuqala, okanye yomlinganiselo omncinane, yayiya kubonisa ukuba ‘ukuphanza kweYerusalem kusondele.’ (Luka 21:20) Inzaliseko yesibini nenkulu yayiya kubakho akuba ephelile amaXesha eeNtlanga, yaye yayiya kubonisa ukuba “bukufuphi ubukumkani bukaThixo.”—Thelekisa uMateyu 24:3.
IYerusalem Yasemhlabeni Ithatyathelwa Indawo Ngumzi Ophakamileyo
9. IYerusalem yasemhlabeni yalahlekelwa nini kukuma kwayo okukholekileyo, yaye iye yathatyathelwa indawo ngantoni?
9 Ngokuthi “neYerusalem inyathelwe phantsi ziintlanga, ade azaliseke amaxesha eentlanga,” ngaba uYesu wayethetha ukuba eso sixeko sasemhlabeni sasiya kuthi ekugqibeleni sibuyiselwe kwinkoliseko kaThixo? Akunjalo. Emva kokubulawa koNyana kaThixo oyintanda, iYerusalem yasemhlabeni yalahlekelwa kukuma kwayo okukhethekileyo ngonaphakade yaye iye yathatyathelwa indawo ngophakame ngakumbi ‘umzi woThixo ophilileyo, iYerusalem yasemazulwini.’—Hebhere 12:22; Mateyu 23:37, 38; 27:50, 51.
10. Lithetha ukuthini ibinzana elithi “iYerusalem yasemazulwini”?
10 Ibinzana elithi “iYerusalem yasemazulwini” lisetyenziswa eBhayibhileni ukuchaza uBukumkani basezulwini obungenakutshatyalaliswa abizelwe kubo amaKristu athanjisiweyo.a (Hebhere 11:10; 12:22, 28) Xa umpostile uPawulos wabhala oku, isixeko sasemhlabeni netempile yaso zazisaxatyiswe gqitha ngamaYuda. Ngenxa yoko, uPawulos wawakhumbuza amaKristu angamaHebhere esithi “apha asinamzi uhleliyo, singxamele lowo uza kuza.”—Hebhere 13:14.
Isizathu Sokuba Ibizwe Ngokuba YiYerusalem Yasezulwini
11. De kube lixesha lokulahlekelwa kwayo yinkoliseko kaYehova, iYerusalem yasemhlabeni yayimela ntoni?
11 Kangangexesha elide iYerusalem ibilikomkhulu lohlanga lakwaSirayeli, kusithiwa ookumkani bayo ‘bahlala etroneni kaYehova.’ (1 Kronike 29:23) Kwakhona, uYehova wenza umnqophiso noDavide wokuba ubukumkani babuya kuhlala kwintsapho yakhe ngonaphakade. Kanye njengokuba iidolophu ezingamakomkhulu zanamhlanje, njengeWashington, iMoscow, iCanberra nePitoli, zisetyenziswa ukuchaza oorhulumente bazo, ngoko iYerusalem isetyenziswa eBhayibhileni ukumela ubukumkani bukaDavide.—2 Samuweli 7:16; Luka 1:32.
12. Ibinzana elithi “amaXesha eeNtlanga” limele lisetyenziswe njani?
12 Umhlaba owawuphantsi kobukumkani bukaDavide wawungemkhulu kangako, kuphela wawufikelela kwimida eyayimiselwe nguThixo kuSirayeli wamandulo. Ngaloo ndlela iYerusalem yasemhlabeni kuphela yayifuzisela uBukumkani bokwenene obungoMesiya obabuya kulawula busezulwini buze bulawule umhlaba wonke. (INdumiso 2:2, 7, 8; Daniyeli 7:13, 14; 2 Timoti 4:18) Ngaloo ndlela, incwadi ethi The Time Is At Hand, eyapapashwa yiWatch Tower Society ngowe-1889, yachaza ngokucacileyo ukuba: “Ibinzana elithi ‘amaXesha eeNtlanga’ lasetyenziswa yiNkosi yethu ukuchaza ixesha lembali yomhlaba eliphakathi kokususwa koBukumkani bukaThixo bokomfuziselo, ubukumkani bakwaSirayeli (Hez. 21:25-27), nelokuvela nokumiselwa kobokwenene, uBukumkani bukaThixo bokwenyaniso.”
Amaxesha Eentlanga—Made Kangakanani?
13. Aqala nini amaXesha eeNtlanga, yaye kutheni uphendula ngolo hlobo?
13 Ubukumkani bukaThixo bokomfuziselo babhukuqwa ngukumkani waseBhabhiloni uNebhukadenetsare ngowama-607 B.C.E. Ngenyanga yesixhenxe yamaYuda, malunga naphakathi kuOktobha, eli lizwe laba yinkangala.b (2 Kumkani 25:8, 9, 22, 25, 26) Njengobungqina bokuba oku kwenzeka ngokuvunyelwa nguThixo, uYehova uThixo wenza ukuba uNebhukadenetsare aphuphe. Iphupha lakhe lalibandakanya umthi owagawulwayo waza wavunyelwa ukuba ukhule kwakhona emva kwethuba elilingana ‘namaxesha asixhenxe.’ Elo phupha lazaliseka okokuqala xa uNebhukadenetsare wabuyiselwa kwitrone yakhe emva kokuphambana okwethutyana.—Daniyeli 4:10-17, 28-36.
14. Nguwuphi umongo wephupha likaNebhukadenetsare?
14 Noko ke, umongo wephupha likaNebhukadenetsare wabonisa ukuba inzaliseko yalo eyintloko yayibandakanya ubukumkani bukaThixo bokomfuziselo, obo loo kumkani weeNtlanga wayevunyelwe ‘ukuba abugawule.’ Elo phupha laqukunjelwa ngamazwi abonisa le njongo: “Ngokokuze bazi abahleliyo, ukuba Osenyangweni unegunya ebukumkanini babantu, abunike lowo athanda ukumnika, amise ophantsi ebantwini phezu kwabo.”—Daniyeli 4:17.
15. UYesu wafaneleka njani ‘njengophantsi ebantwini’? (Mateyu 11:29)
15 Mnye kuphela umntu owafaneleka ngandlela zonke ukuba angabizwa ngokuba ‘ngophantsi ebantwini.’ Okuphela koNyana ozelwe nguThixo wazingqina engonjalo ngokuthi ngokuvumayo ashiye uzuko lwakhe lwasezulwini ukuze azalwe njengomntu, njengoYesu, owanyamezela okona kufa kulihlazo nokubuhlungu ezandleni zikaSathana. (Filipi 2:3, 5-11) Emva kokuvuselwa kwakhe kuzuko lwasezulwini, kwafuneka uYesu elinde de ithuba elilingana namaxesha asixhenxe olawulo lweentlanga liphele ngaphambi kokubekwa etroneni njengoKumkani onguMesiya phezu koluntu.—Hebhere 10:12, 13.
16. Incwadi yeSityhilelo iwanceda njani amaKristu akwazi ukubala ixesha lokuphela kwamaxesha asixhenxe?
16 Kodwa amaNgqina kaYehova abuqonda njani ubude bamaxesha asixhenxe? IBhayibhile ityhila ukuba “ixesha, namaxesha, nesiqingatha sexesha,” okanye amaxesha amathathu anesiqingatha, alingana nemihla eli-1 260. (ISityhilelo 12:6, 14) Ngoko ke, xa uliphinda kabini elo nani, okanye amaxesha asixhenxe, liya kufikelela kwimihla engama-2 520. Ngokusekelwe kulwalathiso olungokwesiprofeto lokuba “umhla ube ngumnyaka,” amaxesha asixhenxe ebeya kulingana neminyaka engama-2 520. (Numeri 14:34; Hezekile 4:6) Ngolu balo, amaXesha eeNtlanga, awaqala ngo-Oktobha 607 B.C.E., aphela kwiminyaka engama-2 520 kamva ngo-Oktobha 1914.
17. Sisiphi isaziso esivuyisayo esasimele sibhengezwe ngowe-1914?
17 Ngo-Oktobha 1914, uYehova uThixo wamisa uNyana wakhe oyintanda, iNkosi uYesu Kristu, etroneni eBukumkanini basezulwini. Ekugqibeleni, umbono weSityhilelo wompostile ongumKristu uYohane waqalisa ukuba yinyaniso, yaye sasinokwenziwa isaziso esithi: “Izikumkani zehlabathi zithe zaba zezeNkosi yethu [uYehova] nezikaKristu wayo. [UYehova] wayeya kuba ngukumkani kuse emaphakadeni asemaphakadeni.” (ISityhilelo 1:10; 4:1; 11:15) Hayi indlela ezizuke ngayo ezi ndaba nesizathu sokonwaba okukhulu kubo bonke abaziindlalifa nabangabalawulwa bobo Bukumkani!—ISityhilelo 11:17.
18. Kutheni iimeko ezilusizi ziye zathwaxa uluntu ukususela ngowe-1914?
18 Enyanisweni, kwinkoliso yoluntu, akukhange kubekho lonwabo lungako emhlabeni ukususela ngo-1914. Kodwa iimeko ezilusizi emhlabeni zibubungqina bokuba ulawulo lukaSathana seluza kuphela. Sikwazi njani oku? Incwadi yeSityhilelo yabonisa ukuba ukumiselwa koBukumkani bukaThixo kwakuya kuphumela kwimfazwe ezulwini. USathana needemon zakhe babeya kulahlelwa ngaphandle kwamazulu ize intshukumo yabo ipheleliselwe kummandla womhlaba wethu. Emva kokubona olu loyiso kumbono obuprofeti, uYohane weva ilizwi elikhulu lisithi: “Yibani nemihlali, nina mazulu, nani ninomnquba kuwo. Yeha, abo bawumiyo umhlaba nolwandle! Ngokuba uhlile weza kuni uMtyholi, enomsindo omkhulu, esazi nje ukuba ixesha analo lincinane.”—ISityhilelo 12:1-12.
19. Kutheni amaKristu okwenyaniso enombulelo kuba ephila ngeli xesha?
19 Iimeko eziya zisiba mbi ukususela ngo-1914 zibubungqina bokuba umbono kaYohane uye waba yinyaniso nokuba isiphelo sabo bonke abantu abangavumiyo ukuzithoba kulongamo lukaThixo sisondela ngokukhawuleza gqitha. (Luka 21:10, 11, 25-32) Hayi indlela ekuchulumancisa ngayo ukuphila kweli xesha lizukileyo laxa uYehova uThixo, uSomandla, eya kuzinzisa imbambano enkulu yolongamo lwakhe phezu komhlaba! Emva koko, umhlaba uya kuguqulelwa ekubeni yiParadisi entle, baze abantu abangamalungisa abaya kusinda benziwe bafezeke. Kwanabafileyo baya kuvuswa baze banikwe ithuba lokuzenza bafanelekele ubomi obungunaphakade.—ISityhilelo 20:1-3, 12, 13; 21:3-5.
Imfuneko Yokwenza Uhlengahlengiso Namhlanje
20. (a) Emhlabeni, ngoobani abangqineka bengabakhonzi bakaYehova bokwenyaniso ngaphambi kowe-1914? (b) Luluphi uhlengahlengiso ekucingeni amaKristu athembekileyo nathanjisiweyo aye akulungela ukulwenza?
20 Kangangeminyaka engama-38 ngaphambi kowe-1914, aBafundi beBhayibhile, njengoko amaNgqina kaYehova ayebizwa ngolo hlobo, balatha kuloo mhla njengonyaka waxa amaXesha eeNtlanga ayeya kuphela.c Obunjani bona ubungqina ukubalasela bokuba babengabakhonzi bokwenyaniso bakaYehova! Sekunjalo, njengabakhonzi bakaThixo benkulungwane yokuqala, nabo babenalo ulindelo oluphosakeleyo. Ngokomzekelo, babelindele ukuba inani elipheleleyo lamaKristu athanjisiweyo laliya kunyuselwa ezulwini ngo-Oktobha 1914. Babekwacinga nokuba imfazwe eyayiqale ngowe-1914 yayiya kukhokelela ngokuthe ngqo kwisiphelo sehlabathi likaSathana.
21. Luluphi uqeqesho amaKristu okwenyaniso abe namava alo ebudeni beMfazwe Yehlabathi I?
21 Noko ke, ngokuhamba kwexesha amaKristu athanjisiweyo aqonda ukuba kwakukho umsebenzi omninzi awayemele awenze emhlabeni. Ngenxa yokuthi gqolo kwawo enikela ubungqina esidlangalaleni ebudeni beMfazwe Yehlabathi 1, atshutshiswa ngokuqatha ngamagunya obupolitika, awayentyontyelwa ngabefundisi beNgqobhoko. (INdumiso 2:1-6) Umsebenzi wamaKristu okwenyaniso wadodotyaliswa kanobom ngoJuni 21, 1918, xa amalungu aphambili eWatch Tower Society eUnited States agwetywa iminyaka engama-20 entolongweni ngezityholo zobuxoki.
22, 23. (a) Aye enza ntoni amaKristu athembekileyo nathanjisiweyo ukususela ngowe-1919, yaye oku kuye kwabangela yiphi intsabelo entlu-mbini? (b) Yintoni eyafuziselwa yiYerusalem engathembekanga?
22 Ngequbuliso iMfazwe Yehlabathi I yaphela ngoNovemba 1918. Kwandula ke, ngoMatshi 25, 1919, amalungu eWatch Tower Society akhululwa entolongweni. Kamva avakaliswa engenatyala ngokupheleleyo. Kwavuleka ithuba elingalindelekanga loxolo kuloo maKristu athanjisiweyo athembekileyo, amathuba anjengalawo avulelekela abafundi bamandulo bakaKristu emva kokuba bomelezwe ngomoya oyingcwele ngowama-33 C.E.—IZenzo 2:17-21, 41.
23 Ukususela ngowe-1919, amaKristu athembekileyo nathanjisiweyo njengeqela aye ngenzondelelo awuthobela umyalelo obandakanyekileyo kumazwi kaYesu akuMateyu 24:14 athi: “Ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.” Ngokomphumo, phantse izigidi ezine zamaKristu ‘ezinye izimvu’ ziye zabunikela ubomi bazo ekukhonzeni uYehova ngokumanyeneyo nentsalela ethanjisiweyo. (Yohane 10:16) INgqobhoko, iphenjelelwa ngabefundisi bayo, iyaqhubeka isigatya isigidimi soBukumkani. Ukukhetha kwayo amacebo abantu ezobupolitika nokutshutshisa kwayo amaNgqina kaYehova kuyafana nempatho ebuhlungu uKristu awayifumana kubemi belakwaYuda ngenkulungwane yokuqala. Kanye njengokuba uYehova wayephumeza umgwebo wakhe kwiYerusalem, ngoko uya kwenjenjalo koko kwafanekiselwa yiYerusalem engathembekanga, oko kukuthi, iNgqobhoko. Yaye njengokuba isizukulwana esasivayo isigidimi sikaKristu somgwebo saphila sada sayibona intshabalaliso awayeyixele kusengaphambili, ngoko isizukulwana ebesikho ukususela ngowe-1914 “asisayi kudlula” ngaphambi kokuba ifike “imbandezelo enkulu” eyayixelwe kusengaphambili.—Mateyu 24:21, 22, 34.
24. Ukuze sisindele kwihlabathi likaThixo elitsha, yintoni esimele siyenze?
24 Simele senze ntoni ukuze sisinde kwimbandezelo enkulu size siphile ukudlulela kwihlabathi likaThixo elitsha? Kungakhathaliseki ukuba luluphi ulindelo oluphosakeleyo nabaphi na kuthi abaye banalo, sifanele sizilinde nxamnye nokulala ngakwimisebenzi yethu yobuKristu. (Habhakuki 2:3; 1 Tesalonika 5:1-6) Inani labo basenokuzikhumbula iziganeko zowe-1914 liyancipha ngokuncipha. Ngaloo ndlela, kufuneka siphaphe; ixesha liphelile. (Mateyu 24:42) Bonke abafuna ukusinda kwisiphelo sehlabathi likaSathana elingendawo bamele ngoku benze ngendlela ebonisa ukuvumelana nala mazwi aphefumlelweyo: “Siyabulela kuwe, Nkosi, Thixo, Somandla, . . . kuba uwathabathile amandla akho amakhulu, waba ngukumkani.”—ISityhilelo 11:17.
[Imibhalo esemazantsi]
a Bona IMboniselo kaSeptemba 1, 1983, iphepha 22.
b Ukuze ufumane inkcazelo engakumbi ngesizathu sokuba oku kube kuphawula ukuqala kwamaXesha eeNtlanga, bona incwadi ethi “Let Your Kingdom Come,” isahluko 14, epapashwe yiWatchtower Bible and Tract Society of New York, Inc.
c UC. T. Russell wabhala inqaku elinomxholo othi “AmaXesha eeNtlanga: Aphela Nini?,” elapapashwa kwiphephancwadi elithi Bible Examiner, ngo-Oktobha 1876. Kwiphepha 27, eli nqaku lathi: “Amaxesha asixhenxe aya kuphela ngowe-1914 A.D.”
Ubuya Kuphendula Njani?
◻ IYerusalem yamandulo yayimela ntoni, kodwa yalahlekelwa njani kukuma kwayo okubekekileyo?
◻ Aqala aza aphela nini amaXesha eeNtlanga, yaye ngayiphi imiphumo eyayixelwe kusengaphambili?
◻ Ukutshatyalaliswa kweYerusalem engathembekanga kwafuzisela ntoni kusengaphambili?
◻ Sazi njani ukuba imbandezelo enkulu isemnyango, yaye simele senze ntoni ukuze sisinde kuyo?
[Umfanekiso okwiphepha 16]
IYerusalem netempile eyayilapho zaphulukana nokuma kwazo okubekekileyo, kodwa uThixo waqhubeka emsikelela uNyana wakhe, onguMesiya, de athethe naye ngqo ngokusuka ezulwini