Ukuguqula Utyekelo Lomntu Olungokwemvelo

“ABANTU abaphili ngokulwa ububi kuphela, baphila ngeenjongo eziqinisekileyo, zomntu ngamnye nezabo bonke,” satsho njalo isithandi-bulumko uMhlekazi uIsaiah Berlin. Kodwa bangaphi abanokufumana “iinjongo eziqinisekileyo” ezinjalo? Ngokufuthi kuyimvelo yomntu ukutsaleleka kwizinto ezidodobalisayo nezitshabalalisayo.

Ngokomzekelo, eBritani ulwaphulo-mthetho logonyamelo luntinge kangange-11 ekhulwini. Inkulumbuso yaseBritani ithi: “Umsebenzi wethu kukuzama ukufumana izinyanzelo ukuze impucuko enkulu ihambele phambili.” Kodwa ngaba imithetho nengcinezelo yezobupolitika, nangona zineenjongo ezintle, zinako ukuguqula ngokwenene utyekelo lwabantu lokwenza oko kungalunganga? Isibakala sokuba ukuchas’ umthetho kukho nesokuba kuyanda phezu kwayo nje imithetho emisiweyo, naphezu kwako nje ukunyanzelwa komthetho okungqongqo, sibonwa nanguthathatha. Into engaphezu kokunyanzeliswa okusemthethweni iyafuneka. Kufuneka inguqulelo kutyekelo lomntu olungokwemvelo.

IBhayibhile, inembono echanileyo nesengqiqweni ngobomi, ichaza iimpawu ezimbi zabantu. Ngokomzekelo, umpostile uPawulos wabhalela amaKristu angoowabo eGalati ‘ngezenzo zokuziphatha okubi, ezingcolileyo nezingamanyala. Abantu baba ziintshaba yaye bayalwa; baba nekhwele, intiyo yaye banomona, bayanxila, babutha ezindywaleni, yaye benza nezinye izinto ezinjengezo.’ NgokweToday’s English Version, ecatshulwe apha, zonke ezi zenzo zihlazisayo ‘zenziwa lutyekelo lomntu olungokwemvelo.’—Galati 5:19-21.

Intsusa Yeengxaki

Noko ke, iToday’s English Version yinguqulelo engalawulwa yimigaqo engqongqo yaye ke ibinzana elithi “oko kwenziwa lutyekelo lomntu olungokwemvelo” kukuchaza nje oko uPawulos wakuthethayo ngokwenene. Igama lesiGrike elasetyenziswa nguPawulos, usarx, lithetha “inyama,” kungekhona “utyekelo lomntu olungokwemvelo.” Ngenxa yesi sizathu, iinguqulelo eziguqulela ngokoqobo apha zithetha ‘ngemisebenzi yenyama’ ukugqithisela ibinzana likaPawulos ngokuchanileyo kulwimi lwethu lwezi mini.a

Ingxelo yeBhayibhile yokungena kwesono ebantwini icacile yaye ilula—enyanisweni, ilula kangangokuba abaninzi bakhetha ukungayikholelwa. Nantsi indlela ayichaza ngayo uPawulos: “Isono sangena ngamntu mnye ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke, ekubeni bonke bonayo.” (Roma 5:12) Apha uPawulos ubhekisela kwiGenesis, incwadi yokuqala yeBhayibhile, nasekudalweni komntu wokuqala, uAdam, nomfazi wakhe, uEva. Ukungathobeli kwabo kwangabom kwaziwa kakuhle. Ngenxa yako, bagwetywelwa ukufa. Inzala yabo yakuzuz’ ilifa ukungafezeki kwabo yaza ngokunjalo yafa. Ngoko ke, “bonile bonke, basilelela eluzukweni lukaThixo.” Ngenxa yesi sizathu sisisiseko, eyona nto inokuthethwa ngotyekelo lomntu olungokwemvelo namhla kukuba lungumfanekiso ongacacanga woko lwalukuko xa uThixo wadala umntu wafezeka ekuqaleni.—Roma 3:23; Genesis, isahluko 2 nese-3.

Utyekelo Lomntu Olungokwemvelo Oluguquliweyo!

Noko ke, kuyinto enokwenzeka ukuzoyisa ezona mpawu zininzi nezimbi kutyekelo lomntu olungokwemvelo. Eneneni, iBhayibhile ithi sinokuluguqula uhlobo lwabantu esilulo ngokuthi siguqule ubuntu bethu. Njani? Ngoncedo lomoya oyingcwele kaThixo.—Roma 8:9.

Kwincwadi yakhe eya kumaKristu angoowabo eKolose, uPawulos wakubeka oku ngolu hlobo: “Hlubani ubuntu obudala kunye nezenzo zabo, nize nambathe ubuntu obutsha, obuthi ngokwazi okuchanileyo buhlaziywe ngokomfanekiselo waLowo wabudalayo.” Phakathi kwezenzo zobuntu obudala, udwelisa ezinye zeempawu ezishukumisela abantu ekubeni batyekele koko kutshabalalisayo: inkanuko embi, ingqumbo, umsindo nolunya.—Kolose 3:5-10, NW.

Ebhalela amaKristu ase-Efese okufanayo, uPawulos kwakhona ukhankanya imfuneko yokwambatha ‘umntu omtsha,’ lowo abaxelela ukuba ‘uthe ngokukaThixo wadalelwa ebulungiseni, nasebungcweleni benyaniso.’ Uqhubela phambili ingxubusho yakhe ngokuthi: “Mabukhweleliswe kuni bonke ubukrakra, nomsindo, nengqumbo, nengcolo, nonyeliso, ndawonye nolunya lonke. Ke nina yibani nobubele omnye komnye, nibe nemfesane kakhulu.”—Efese 4:24, 31, 32.

Ngaba amazwi kaPawulos asengqiqweni? Ngaba bunokuguqulwa ngokwenene ubuntu? Kaloku, ubungqina bubonisa ukuba loo maKristu okuqala azenza iinguqulelo ezinkulu kubomi bawo. Njengeqela labantu, ayahlukile kwihlabathi elaliwangqongile. UJustin Martyr, umbhali-mbali wamaxesha okuqala kobuKristu, wabhala oku: “Thina bantu babethiyene yaye sitshabalalisana, ibe, ngenxa yokwahlukahlukana kwezimilo, singakufuni ukuhlala nabantu besizwe esahlukileyo, ngoku, ukususela ekubonakaleni kukaKristu, siphila ngokuqhubana kakuhle nabo, size sizithandazele iintshaba zethu, yaye sizabalazela ukweyisela abo basithiye ngaphandle kwesizathu ukuba baphile ngokuvisisana nemithetho egqibeleleyo kaKristu.”

Kuthekani ngemeko yanamhlanje? Ngaba kuseyinto enokwenzeka ukwenza iinguqulelo ezinkulu kuhlobo umntu alulo? Ewe! Imizekelo emininzi ibonisa ukuba iinguqulelo ezinkulu eziphawulekayo zisenzeka. Lo ulandelayo ngomnye nje wayo.

UStephen wakhulela kwelinye lamaziko ezorhwebo aseNgilani. Uyise wayengakholelwa kubukho bukaThixo. Kubudala be-12 leminyaka, uStephen wagwetywa iminyaka emithathu kwisikolo sokuguqula isimilo. Wavuma ukuba unetyala kwizityholo ezingama-64 zokuqhekeza! Kungekudala waphelelwa yintlonelo yalo naliphi igunya, yaye njengoko wayekhula, amatyala akhe aya esiba makhulu ngokuba makhulu. Ayequka ukuqhatha, ukunxila nehambo embi nokuhlasela amapolisa, ibe ngenxa yeli tyala lokugqibela uStephen wathunyelwa entolongweni. Waba ngumntu onobundlobongela kakhulu. “Akukho lwaphulo-mthetho umntu ongahloneli Thixo angasoze angalwenzi ukuba uneentswelo ezinkulu kakhulu,” watsho njalo.

Yintoni eyayinokuguqula isaphuli-mthetho esinjalo ukuqaqadeka? Ekugqibeleni uStephen walwamkela uncedo oluvela kumntakwabo owathi waba ngomnye wamaNgqina kaYehova. Emva kokuba efunde iBhayibhile kangangexesha elifutshane, uStephen waqalisa ukwambatha ‘ubuntu obutsha.’ Iinguqulelo awazenzayo zaziphawuleka ngokwenene. Ngoku, kwiminyaka emihlanu kamva, unandipha umtshato owonwabisayo yaye ulilungu elinembopheleleko lebandla lamaNgqina kaYehova, apho akhonza njengesicaka solungiselelo.

Ngoko uhlobo umntu alulo lunokuguqulwa kwiimeko zabantu ngabanye. Kodwa ngaba ubuthathaka babantu bukuphela kwesizathu ‘sokuyibuyisa umva impucuko’ namhlanje?

“Umtyholi Okhankanywe ESibhalweni”

Umpostile uPawulos wabhala isiprofeto esiphawulekayo ngokunxulumene nale ‘mihla yokugqibela.’ Amazwi akhe afumaneka kwibhokisi engasentla. Phawula ukuba ukwanda kobundlobongela nobungendawo kubangela ukuba kubekho “amaxesha anomngcipheko.” Ngaba utyekelo lomntu olungokwemvelo lungunozala wako konke oku?—2 Timoti 3:1.

Akunjalo, kukho enye into, amandla obubi asongelayo asebenzisa ngobuqhophololo ubuthathaka bomntu. Kanye njengoko abantu bekufumanisa kunzima ukukholelwa ekubeni umntu unesono asizuze ilifa, ngokukwanjalo bayifumanisa ingakholeleki nje kwaphela into yokuba kukho amandla awongamileyo kunomntu afuna ukumsebenzisa kakubi. Kodwa iBhayibhile ithi amandla anjalo akho: uSathana uMtyholi.

Igama elithi “uMtyholi” (elithetha, “umhlebi”) libonakala izihlandlo ezingama-33 eBhayibhileni, yaye elithi “uSathana” (elithetha, “umchasi”) livela izihlandlo ezingama-52. Inkoliso yezi mbekiselo inokuthanani kwanalo mntu mnye wokomoya ongendawo. Noko ke, abanye bayabukhanyela ubukho bukaSathana, bekhetha ukuthi: “Ukutyekela komntu okungokwemvelo esonweni ngumtyholi okhankanywe eSibhalweni.”b Noko ke, okubangel’ umdla kukuba, kwingxelo kaYobhi, umkhonzi othembekileyo kaYehova, umbhalo wesiHebhere usebenzisa ibinzana elithi has·Sa·tanʹ, uSathana (“the Satan,” ngesiNgesi), yaye kuLuka 4:2 sifunda ukuba yayinguMtyholi (“the Devil,” ngesiNgesi) (ngesiGrike, ho di·aʹbo·los) owalinga uYesu. (Yobhi 1:6) Kuzo zozibini ezi zihlandlo, kubhekiselwa kumntu othile ngokomgaqo-ntetho. Utyekelo lomntu olungokwemvelo alungeni ndawo.

Umpostile uPawulos wongezelela ekuqondeni kwethu indlela uSathana anamandla ngayo xa, ebhalela abase-Efese, ethetha ‘ngeziphatha-hlabathi zobumnyama nemikhosi yomoya abakhohlakeleyo kwezasezulwini iindawo.’ (Efese 6:12) Zikunye noSathana uMtyholi, ezo ‘ziphatha-hlabathi’ ziidemon, izidalwa zokomoya ezingendawo nezingabonakaliyo. ‘Zilahlekisa elimiweyo liphela,’ zisebenzisa kakubi ubuthathaka bomntu ukusa kowona mlinganiselo mkhulu zinokuwufikelela. (ISityhilelo 12:9) Kungenxa yesi sizathu le nto uPawulos ebongoza ngamandla umKristu ngamnye ukuba ‘amise abuchase ubuqhinga bukaMtyholi.’ Ungunobangela oyintloko wokonakala kobuntu esikubona kusingqongile.—Efese 6:11.

Ukubuyiselwa

UPetros, owayephila ngexesha likaPawulos, usiqinisekisa ukuba uSathana needemon zakhe abazi kubakho ngonaphakade ukuze bakhathaze uluntu. Uthi: “Thina ke ngokwedinga lakhe silinde elitsha izulu, nomtsha umhlaba, apho kumi ubulungisa.” (2 Petros 3:13) Eneneni, kungekudala ngoku, zonke iintlobo zobubi ezakha zabonwa azisayi kuba yinxalenye yomntu. USathana needemon zakhe baza kutshatyalaliswa. (Roma 16:20; ISityhilelo 20:1-3) Eneneni, ngoko utyekelo lomntu olungokwemvelo luya kubonakalisa ‘uzuko lukaThixo,’ ubomi obungunaphakade bulithemba eliqinisekileyo lentsapho engabantu.—Roma 3:23.

Umongameli waseMerika uThomas Jefferson wema ngelithi, “Bendisoloko ndisithi yaye ndiya kusoloko ndisithi, ukufundisisa ngenyameko uMqulu Ongcwele kuya kwenza abemi abalunge ngakumbi . . . IBhayibhile yenza abona bantu balungileyo ehlabathini.” Njengoko sibonile, uhlobo lwabantu esilulo lunokuguqulwa ukuba isigidimi esinamandla seBhayibhile sisinika ithuba lokuphembelela ubomi bethu. (Roma 12:2) Sinokukhetha ukuzabalazela ukuzuza oko kubekekileyo nokokuhlonela uThixo. Yaye ukusomeleza emgudwini wethu wokuphucula, sinokukhetha ukunxulumana nabo bakufuna ngokunyanisekileyo ukwenza okufanayo. (Hebhere 10:24, 25) AmaNgqina kaYehova akulungele ukukunceda ngazo zonke iindlela anazo. Kutheni ungaqhagamshelani nawo nje ngoku!

[Imibhalo esemazantsi]

[Ibhokisi ekwiphepha 6]

‘IMIHLA YOKUGQIBELA’—Inkcazelo YeBhayibhile

“Ke, kwazi oku, ukuba ngemihla yokugqibela kuya kufika amaxesha anomngcipheko. Kuba abantu baya kuba ngabazithandayo, abathandi bemali, abaqhankqalazi, abakratshi, abanyelisi, abangeva bazali, abangabuleliyo, abangengcwele, abangenabubele, abangenatarhu, abatyholi, abangenakuzeyisa, izibhoja, abangenakuthanda kulunga, abancethezi, izityhuthutyhuthu, abathiwe lwale likratshi, abathandi beziyolo kunokuba bathande uThixo; benokumila kokuhlonela uThixo, ukanti bayawakhanyela amandla ako. Kwabo ke khwebuka.”—2 Timoti 3:1-5.

[Umfanekiso okwiphepha 7]

Kungekudala, utyekelo lomntu olungokwemvelo luya kubonakalisa uzuko lukaThixo ngokupheleleyo