Sinokusabela Njani Ngokungazingci Kuthando LukaThixo?
“Ukuba wenjenjalo uThixo ukusithanda, nathi sifanele ukuthandana.”—1 YOHANE 4:11.
1, 2. Yintoni efunekayo kuthi ukuze sikwazi ukusabela ngokungazingci kwiimbonakaliso zothando lukaThixo?
UYEHOVA uluthando lumntwisiwe. Enyanisweni, kwinqaku elandulelayo, sizibonile iindlela ezininzi alubonakalisa ngazo ngokwenene uthando lwakhe. Kwakhona siye saphawula nendlela uMoses, uDavide noYesu Kristu abasabela ngayo ngokungazingci kwezo mbonakaliso zothando. Akafanele na ngamnye wamaNgqina kaYehova afune ukwenza okufanayo? Kufanele kube njalo!
2 Yintoni efunekayo ukuze sikwazi ukusabela ngokungazingci kwiimbonakaliso zothando lukaThixo? Phakathi kwezinye izinto, simele simbeke kwindawo yokuqala kubomi bethu, simthande ngentliziyo, ngomphefumlo, ngengqondo nangamandla ethu ephela. (Marko 12:29, 30) Oko kuthetha ukuba ngowayame ngoThixo, ube nolwalamano olusondeleyo nolobuqu noYehova. Ngaba sinomnqweno wokuthetha noBawo wethu osemazulwini emthandazweni? Ngaba sithandaza rhoqo yaye siyazingisa emthandazweni? Okanye ngaba singxamela ukuyigqiba imithandazo yethu, side ngamaxesha athile sixakeke kakhulu ukuba singathandaza? (Roma 12:12; 1 Tesalonika 5:17) Ngaba ingqalelo siyalathisela kuYehova, simnika yena nentlangano yakhe uzuko ngoko sisenokuba sikufezile? (1 Korinte 3:7; 4:7) Enyanisweni, ngaba sivakalelwa njengomdumisi? Ngokubhekisele kuThixo, wathi: “Ndikudumisa kasixhenxe ngemini.”—INdumiso 119:164.
3. Xa sineembutho zokuzonwabisa, sisenokubonisa njani ukuba sisabela ngokungazingci kuthando lukaThixo?
3 Ukuba sisabela ngokungazingci kuthando lukaThixo okanye asenzi njalo oko kusenokubonakaliswa naxa sineembutho zokuzonwabisa. Ngaba incoko yethu isekelwa kwimicimbi yasentlalweni okanye kwizinto zokomoya? Oku akuthethi ukuba sifanele sibe nofundisiso lweBhayibhile ngalo lonke ixesha sihlanganisana namaKristu angoowethu. Kodwa ngokuqinisekileyo sisenokufumana izinto ezithile zokomoya ezibangel’ umdla esinokuziquka kwincoko yethu. Kuthekani ngokubalisa amava asentsimini, ukuxubusha ngombhalo esiwuthandayo eBhayibhileni, ukubalisa ngendlela esayifumana ngayo inyaniso, okanye ukucaphula ubungqina benyameko enothando nentsikelelo kaThixo?
4. Sifanele siyijonge njani imibandela ukuba siye asalifumana ilungelo elithile lenkonzo?
4 Enye imeko esenokutyhila ubungakanani boxabiso lwethu ngothando lukaThixo kuxa singafumani malungelo enkonzo athile kwintlangano kaYehova. Sisabela njani? Ukuba ngokuyintloko sixhalabele ukuzukisa uYehova, siya kuvuma ukuba ngokunokwenzeka uThixo uya kuzukiswa kakuhle ngokufanayo nguye nabani na onikwe elo lungelo lenkonzo. (Thelekisa uLuka 9:48.) Kodwa ukuba sizixhalabise ngokungafanelekanga ngokulungelwa kwethu okanye ngegama lethu, siya kudimazeka ukuba siye satyeshelwa, njengokuba sisenokucinga njalo. Sifanele sikhumbule ukuba uYehova uyasithanda yaye usenokuba uyazi ukuba ngelo thuba asinako ukubuthwala ubunzima bembopheleleko ethile engokobuthixo. Usenokuba usisikelela ngokutyebileyo ngezinye iindlela, yaye iimbonakaliso ezinjalo zothando lwakhe zifanele zisincede sihlale silungelelene ngokomoya.—IMizekeliso 10:22.
Ukuthanda Ubulungisa, Ukuthiya Okuchasene Nomthetho
5. Iimbonakaliso zothando lukaThixo zifanele zibe nawuphi umphumo kwihambo yethu?
5 Iimbonakaliso zothando lukaThixo kuthi zifanele zisishukumisele ukuxelisa uKristu ekuthandeni ubulungisa nokuthiya okuchasene nomthetho. (Hebhere 1:9) Enyanisweni, asinakukwenza ngokugqibeleleyo oku, njengoko uYesu wenzayo. Kanti, sinokukwenza usukelo lwethu ukuba sibe ngcwele, sinyaniseke yaye sithobele umthetho kangangoko kunokwenzeka kwimeko yethu yokungafezeki. Ukuze senze oku, asimele nje siphelele ekuthandeni ubulungisa nezinto ezilungileyo kodwa sikwafanele sihlakulele ukuyithiya, ukuyenyanya nokuyicekisa into engendawo. Kunjengokuba umpostile uPawulos wakuchaza oku ngolu hlobo: “Kuthiyeni okungendawo, namathelani kokulungileyo.” (Roma 12:9) ‘Ukuthiya’ ligama elinamandla, elithetha “ukuyicaphukela into ngokugqithiseleyo.”—Webster’s New Collegiate Dictionary.
6. Yintoni eya kusinceda sizilinde nxamnye nokulingwa lihlabathi, yinyama yethu enesono nanguMtyholi?
6 Yintoni eya kusinceda sizilinde nxamnye nokulingwa lihlabathi, yinyama yethu enesono nanguMtyholi? Kukunyaniseka kuYehova uThixo. Usibongoza esithi: “Yiba nobulumko, nyana wam, uyivuyise intliziyo yam; ukuze ndimphendule ngezwi ondingcikivayo.” (IMizekeliso 27:11) Ewe, ukunyaniseka kuYehova kuya kusishukumisela ukuba sithabathe ikhondo lobulumko lokuthiya oko akuthiyileyo. Ngokubhekele phaya, kungakhathaliseki ukuba ukwaphula omnye wemithetho kaThixo kusenokubonakala kuyolisa okanye kuchulumancisa kangakanani na, simele sihlale sizixelela ukuba ukwenza oko akunangenelo nje kwaphela. (Galati 6:7, 8) Intliziyo yomntu inenkohliso, ulahlekiso, inkqatho, kanye njengokuba sikhunjuzwa kuYeremiya 17:9. Intliziyo yomKristu ithanda izinto ezilungileyo, ezintle nezinyulu. Kodwa ngamathuba athile utyekelo lwesono luye luyityekisele ekubeni inqwenele kwanokubi. Njengeentliziyo zamaSirayeli awayenqula uYehova aza sekunjalo azigcina “iziganga zawo” zonqulo lwezithixo, ngoko intliziyo yethu isenokuba nokuzingca nenkohliso. (1 Kumkani 22:43; Duteronomi 12:2) Intliziyo yethu engafezekanga isenokuzama ukufuna izingxengxezo ukuze isibeke endleleni yezilingo. Isenokuzama ukubusingela phantsi ubunzulu besenzo esiphosakeleyo esihendelwa kuso. Okanye intliziyo yethu isenokuzama ukuseyisela kwelokuba nasiphi na isohlwayo siya kuba sesomzuzwana nje.
7. Kutheni simele sizilinde nxamnye nokulangazelela okubi?
7 Ngenxa yoxabiso ngothando lukaThixo, simele sizilinde nxamnye nokulangazelela okubi, njengokutyekela ekucingeni ngokuziphatha okubi ngokwesini, enoba asitshatanga okanye sitshatile. Amathuba ngamathuba, okwaqala kunjengokudlala ngothando okungenabungozi kwaye kwaphumela ekubeni amaKristu amabini abandakanyeke ngokunzulu ngokweemvakalelo kangangokuba enza okusisono aza asuswa kubudlelane. Kwanabadala, abafanele babe ngabangenakumangaleleka kumhlambi, baye basilela kule mibandela!—Thelekisa eyoku-1 yooKumkani 15:4, 5.
8. Nguwuphi umzekelo osisilumkiso umpostile uPawulos asinika wona, yaye isenokuzekeliswa njani ingxaki enjalo?
8 Khawucinge ngompostile uPawulos, owayesikelelwe ngemibono namandla angaphezu kwawomntu nangesipho sokuphefumlelwa nguThixo. Ukuze aphumelele kumzabalazo wakhe nxamnye notyekelo lwesono, kwafuneka awuqobe—ewe awuthibe ngamandla—umzimba wakhe. Ngaba ke thina sifanele saneliseke kukwenza umzamo ongaphantsi kwalowo? (Roma 7:15-25; 1 Korinte 9:27) Kufana nokuba besikwiphenyane elincinane eliqhutywa ngamaphini kumlambo oqukuqela ngesantya esiphezulu yaye sitsalelwa ngakwiingxangxasi zawo. Ukuze siphephe intlekele, simele senze umzamo omkhulu wokubhexa sinyuse umsinga onamandla. Sisenokubonakala singenzi nkqubela ingako, kodwa ukuba nje siyaqhubeka sizibhokoxa ngamandla, asisayi kuwela ngaphaya kweengxangxasi size sife. Ngokuqinisekileyo, iimbonakaliso zothando lukaYehova uThixo kuthi zifanele zisibangele ukuba sizibhokoxe ngamandla yaye sinyaniseke kuye ngokuthiya okuchasene nomthetho nokuthanda ubulungisa.
Bonisa Uthando Lobuzalwana
9. Sisiphi isiluleko umpostile uYohane asinikelayo esingokuthanda abazalwana bethu?
9 Iimbonakaliso zothando lukaThixo zikwafanele zisishukumisele ukuba sithande abazalwana bethu njengokuba uYesu Kristu ethanda abafundi bakhe. (Yohane 13:1) Ngokufanelekileyo, umpostile uYohane uthi: “Uthando lulapha, ingekukuba samthandayo uThixo thina, ikukuba wasithandayo yena, wamthuma uNyana wakhe ukuba abe sisicamagushelo sezono zethu. Zintanda, ukuba wenjenjalo uThixo ukusithanda, nathi sifanele ukuthandana.” (1 Yohane 4:10, 11) Enyanisweni, uYesu wathi indlela abanokufaniswa ngayo abalandeli bakhe bokwenyaniso kungokubonisa uthando omnye komnye.—Yohane 13:34, 35.
10, 11. Ziziphi ezinye zeendlela esinokulubonakalisa ngazo uthando lobuzalwana?
10 Siyazi ukuba amaKristu afanele abonise uthando lobuzalwana. Kodwa akuyonto ingafanelekanga ukuzikhumbuza ngeendlela ezahlukahlukeneyo esinokulubonakalisa ngazo olu thando lobuKristu omnye komnye. Uthando olunjalo luya kusinceda sizityeshele iiyantlukwano ezingokobuhlanga, ngokobuzwe, ngokwemfundo, ngokwempucuko nangokomgangatho wezoqoqosho. Ngaphezu koko, uthando lobuzalwana luya kusishukumisela ukuba sihlanganisane kwiintlanganiso. Ukuba sibathanda ngokwenyaniso abazalwana bethu, asiyi kuvumela imozulu engentle okanye ukungaziva mnandi okungephi ngokwasemzimbeni kusibandeze uvuyo lokunxulumana nabo nokwabelana ngokhuthazo. (Roma 1:11, 12) Ngaphezu koko, uthando lobuzalwana luya kusenza sizilungiselele kakuhle iintlanganiso zethu size sibe nenxaxheba ngokukhutheleyo kuzo ukuze silolane eluthandweni nasemisebenzini emihle.—Hebhere 10:23-25.
11 Kuthekani ngokunceda abazalwana bethu kubulungiseleli basentsimini? Kuye kwaphawulwa ukuba ngokufuthi abadala nezicaka zolungiselelo babandakanyeka kubulungiseleli bendlu ngendlu behamba kunye okanye ingulowo ezihambela yedwa ngoxa bebenokuthi, ngokuceba okungephi, bameme abavakalisi boBukumkani abafuna uncedo babapheleke kubulungiseleli. Ukubonisa uthando ngale ndlela kuya kwenza inkonzo yasentsimini yabadala nezicaka zolungiselelo ibe yenomvuzo ngokuphindaphindiweyo. Yaye kuthekani ngokuhamba nomvakalisi osemtsha ukuya kwisifundo seBhayibhile sekhaya?—Roma 15:1, 2.
12. Sifanele siyiqonde njani eyoku-1 kaYohane 3:16-18?
12 Kwakhona uthando luya kusibangela sincede abazalwana bethu abasenokuba baswele ngokwenene kwizinto eziphathekayo. Umpostile uYohane wabhala oku: “Ngale nto silwazile uthando, kuba yena wasincamela ubomi bakhe; nathi ke sifanele ukubancamela abazalwana ubomi bethu. Osukuba ke enayo impilo yeli hlabathi, aze ambone umzalwana wakhe eswele, azivalele iimfesane zakhe kuye, luthini na ukuhlala uthando lukaThixo ngaphakathi kwakhe? Bantwanana bam, masingathandi ngazwi nangamlomo; masithande ngezenzo nangenyaniso.” (1 Yohane 3:16-18) Ngoku sisenokuba asicelwa ukuba sincame imiphefumlo yethu ngenxa yabo, kodwa maxa wambi ayavela amathuba okubonakalisa uthando kubo ngezinye iindlela, kungekhona ngelizwi nangolwimi kuphela kodwa kwanangezenzo. Akukho nto iphosakeleyo ekuthandeni abazalwana bethu ngelizwi, kodwa asifuni kulusikela umda uthando lwethu koku xa beswele izinto eziphathekayo. Amazwi kaYesu athi “ukupha kunoyolo ngaphezu kokuphiwa” ayasebenza nasekunikeleni uncedo lokuphathekayo.—IZenzo 20:35.
13. (a) Ziziphi ezinye zeenyaniso ezisisiseko esizifundileyo ngoncedo lwentlangano kaYehova ebonakalayo? (b) Yiyiphi ingongoma ebalulekileyo eyaphuhliswa nguCharles Taze Russell?
13 Sinethuba lokubonisa uthando ngabazalwana bethu abakhokelayo ebandleni okanye mayela nentlangano kaYehova ebonakalayo yazwenibanzi. Oku kuquka ukunyaniseka ‘kumkhonzi othembekileyo noqondayo.’ (Mateyu 24:45-47) Masisivume isibakala sokuba kungakhathaliseki ukuba sasiyifunde kangakanani na iBhayibhile, sasingenakuze sizifundise inyaniso. Ngesasingazange sayifumanisa inyaniso ephathelele uYehova, iinjongo neempawu zakhe, intsingiselo nokubaluleka kwegama lakhe, uBukumkani, intlawulo kaYesu nomahluko phakathi kwentlangano kaThixo nekaSathana, nesizathu sokuba uThixo evumele ubungendawo. Kunjengokuba umongameli wokuqala weWatch Tower Society, uCharles Taze Russell, ngowe-1914 wabhala wathi: “Asingobantu basikelelekileyo nabonwabileyo na? Akathembekanga kusini na uThixo wethu? Ukuba nabani na wazi okunye okulunge ngakumbi, makakuthabathe. Ukuba nabani na wenu uya kuze afumane okuthile okulunge ngakumbi, sithemba ukuba uya kusixelela. Asazi nto ilunge ngakumbi okanye iphantse yalunga kunoko sikufumeneyo eLizwini likaThixo. . . . Akukho lulwimi okanye nto yakubhala enokuluchaza uxolo, uvuyo nentsikelelo eye yeziswa entliziyweni nasebomini bethu lulwazi olucacileyo loThixo oyinyaniso. INgxelo engoBulumko, ukuba Sesikweni, aMandla noThando lukaThixo iyanelisa ngokupheleleyo iminqweno yengqondo yethu neyentliziyo yethu. Asifuni kumbi. Akukho nto yimbi inokunqwenelwa kunokufuna ukuyiqonda ngokucace ngakumbi le ngxelo imangalisa kangaka.” (IMboniselo [yesiNgesi], kaDisemba 15, 1914, iphepha 377-8) Hayi indlela ayinyaniso ngayo loo mazwi abhalwe ngobuchule!
Ukulungiselela Abo Bangaphandle
14. Iimbonakaliso zothando lukaThixo zifanele zisishukumisele ukwenza ntoni ngokubhekiselele kwabo bangaphandle?
14 Iimbonakaliso zothando lukaThixo esiye sazinandipha zifanele zisishukumisele ekuboniseni uthando ngommelwane kwabo bangaphandle ebandleni. Sinokukwenza njani oku? Iimeko zisenokufunisa ukuba sibancede abamelwane bethu ngezinto eziphathekayo. Kodwa, okubaluleke ngakumbi, sinokubonisa uthando ngommelwane ngokudlulisela kwabanye iindaba ezilungileyo zoBukumkani bukaThixo nokunceda abathandi bobulungisa babe ngabafundi bakaYesu Kristu. Ngaba siba nesabelo rhoqo kobu bulungiseleli basesidlangalaleni, okanye siyabutyeshela? Ngaba buye baba yinkonzo nje yokudlulisela usana kunina? Okanye ngaba sishukunyiswa ngokwenene luthando lommelwane? Ngaba sibonakalisa uvelwano? Ngaba sinomonde, silindela ukuba abantu basabele? Ngaba siyabakhuthaza abaninimzi ukuba bathethe? Ewe, kunokuba sithethe sodwa, masivumele uthando ngommelwane lusishukumisele ukuba siphulaphule size sibe neengxubusho zeBhayibhile ezinomvuzo nabantu esidibana nabo kubulungiseleli bethu.
15. (a) Kutheni igama elithi “ubungqina obungacwangciswanga” lilungile kunelithi “ubungqina bequbuliso”? (b) Kutheni simele siwasebenzise amathuba okunikela ubungqina ngokungacwangciswanga?
15 Ngaba siwaphaphele ngokwaneleyo amathuba esinokuwasebenzisa okunikela ubungqina ngokungacwangciswanga? Kufanele kuphawulwe ukuba oku asikokunikela nje ubungqina ngequbuliso, umsebenzi ongacetywanga okanye ongabalulekanga kuyaphi. Ubungqina obungacwangciswanga bubaluleke kakhulu, yaye uthando ngabantu abangoowethu luya kusishukumisela ukwenza amathuba okuba nesabelo kubo. Hayi indlela ubungqina obunjalo ngokufuthi obuba nemiphumo emihle ngayo! Ngokomzekelo, ngoxa wayekwindibano yamaNgqina kaYehova emntla Itali, umzalwana waya kwindawo yokukhanda iinqwelo-mafutha ukuze atshintshe isibane sesithuthi. Ngoxa wayelindile, wanikela ubungqina kwabo babekufutshane naye waza wabanika izimemo ebamemela kwintetho yeBhayibhile yesidlangalala ngeCawa. Kwindibano yezizwe ngezizwe eRome kunyaka olandelayo, umzalwana angazange akwazi ukumkhumbula wambulisa ngobubele. Wayengubani lo mzalwana? Kaloku, wayengomnye waloo madoda awayedlulisele kuwo isimemo kwindawo yokukhanda iinqwelo-mafutha ngonyaka odluleyo! Le ndoda yaya kuphulaphula intetho yesidlangalala yaza yabhalisa igama layo ukuze iqhutyelwe isifundo seBhayibhile. Ngoku yona nomfazi wayo bangamaNgqina azahluleleyo kaYehova. Akukho mathandabuzo ngelokuba ukunikela ubungqina obungacwangciswanga kusenokuba nomvuzo omkhulu!
Qhubeka Usabela Kuthando LukaThixo
16. Yiyiphi imibuzo esimele sizibuze yona?
16 UYehova uye wanesisa ngokwenene ekubonakaliseni uthando ngezidalwa zakhe. Njengoko sesiphawulile, iZibhalo zisinika imizekelo emihle yabo basabela ngokungazingci kwiimbonakaliso zothando lukaThixo. Ngokufanelekileyo, umdumisi ophefumlelweyo wathi: “Mabayibulele kuYehova inceba yakhe, nemisebenzi yakhe ebalulekileyo koonyana babantu.” (INdumiso 107:8, 15, 21, 31) Ngaba silwamkelela ilize ubabalo lukaThixo? Kwanga singangaze sikwenze oko! (2 Korinte 6:1) Ngoko ngamnye wethu makazibuze oku: ‘Ngaba ndizixabisa ngokwenene iimbonakaliso zothando lukaThixo endisele ndizinandiphile yaye ngolweyiseko ndithemba ukunandipha ezingakumbi kwikamva? Ngaba zindishukumisela ukumthanda uYehova ngentliziyo, ngomphefumlo, ngengqondo nangamandla am ephela? Ngaba ndayame ngoThixo ngokwenyaniso? Ngaba ndiyabuthanda ubulungisa yaye ndikuthiyile okuchasene nomthetho? Ngaba ndibonakalisa uthando lobuzalwana? Yaye ndizama ukuhamba emanyathelweni kaYesu ngokusondele kangakanani ngobulungiseleli bam?’
17. Uya kuba yintoni umphumo ukuba sisabela ngokungazingci kwiimbonakaliso zothando lukaThixo?
17 Enyanisweni, kukho iindlela ezininzi zokubonakalisa umbulelo ongazenzisiyo ngazo zonke iimbonakaliso zothando lukaThixo esiye sanamava azo. Ngokuwasebenzisa ngokupheleleyo amathuba okubonakalisa uxabiso olunjalo, siya kwenza intliziyo yoBawo wethu osemazulwini ivuye, sibe yintsikelelo kwabanye, size sifumane uvuyo, uxolo nolwaneliseko. Kwanga ke ngoko singaqhubeka sisabela ngokungazingci kwiimbonakaliso zothando lukaThixo.
Ubuya Kuphendula Njani?
◻ Yintoni efunekayo ukuze sisabele ngokungazingci kuthando lukaThixo?
◻ Sinokuzilinda njani nxamnye nezilingo?
◻ Ziziphi ezinye zeendlela zokubonisa uthando lobuzalwana?
◻ Iimbonakaliso zothando lukaYehova zifanele zisishukumisele ukuba senze ntoni kubamelwane bethu?
[Umfanekiso okwiphepha 17]
Simele silwe nxamnye nezinto ezilutyekelo lwesono ukuze siphephe intlekele
[Umfanekiso okwiphepha 18]
Abadala babonisa uthando lobuzalwana ngokuhamba nabanye kubulungiseleli boBukumkani
[Umfanekiso okwiphepha 19]
UCharles Taze Russell, umongameli wokuqala weWatch Tower Society, watsalel’ ingqalelo kuxolo, uvuyo nentsikelelo nto ezo ezinokubangelwa nguThixo kuphela