Thembela Ngamandla Avela KuThixo
Iimbalasane ZeyesiBini KuTimoti
UYEHOVA unika abakhonzi bakhe amandla okunyamezela izilingo neentshutshiso. Yaye hayi indlela uTimoti namanye amaKristu ababewafuna ngayo amandla avela kuThixo! IRoma yatsha ngowama-64 C.E., yaye kurhanelwa ukuba yatshiswa nguMlawuli uNero. Ukuzikhusela, ityala walibeka kumaKristu, ibe oku kwakhokelela kwintshutshiso. Kusenokwenzeka ukuba ngelo xesha (malunga nowama-65 C.E.), kwakhona umpostile uPawulos wavalelwa entolongweni eRoma. Nangona wayejamelene nokufa, wandula ke wabhala incwadi yakhe yesibini eya kuTimoti.
Incwadi kaPawulos eya kuTimoti yamenza wakulungela ukuxhathisa abawexuki aze ahlale eqinile naxa ejamelene nentshutshiso. Yamkhuthaza ukuba aqhubeke esenza inkqubela ngokomoya yaza yamxelela ngemeko kaPawulos entolongweni. Le ncwadi ikwanceda abo bayifundayo ukuba bathembele ngamandla avela kuThixo.
Nyamezela Ububi Uze Ufundise Ngobulali
UThixo usinika amandla okunyamezela intshutshiso njengabavakalisi beendaba ezilungileyo. (2Ti 1:1-18) UPawulos akazange amlibale uTimoti emithandazweni yakhe, yaye wayekhumbula ukholo lwakhe olungenakuhanahanisa. UThixo wayenike uTimoti ‘kungekhona umoya wobugwala, kodwa owamandla, owothando, nowesidima.’ Ngoko wayengamele abe nazintloni ngokunikela ubungqina nokunyamezela ububi ngenxa yeendaba ezilungileyo. Wakwabongozwa ukuba ‘awubambe umzekelo wamazwi aphilileyo’ awaweva kuPawulos, kanye njengokuba sifanele sibambelele ngokungqongqo kwinyaniso yokwenene yobuKristu nangona abanye besenokuyishiya.
Izinto uPawulos awazifundisayo zazimele zidluliselwe kumadoda athembekileyo awayeya kufundisa abanye. (2:1-26) UTimoti wabongozwa ukuba abe ngumphumi mkhosi ofanelekileyo kaKristu, athembeke ekunyamezeleni ububi. UPawulos wanyamezela ubunzima bokukhonxwa entolongweni ngenxa yokushumayela iindaba ezilungileyo. Wakhuthaza uTimoti ukuba akukhuthalele ukuzimisa phambi koThixo engumsebenzi ocikidekileyo, ezinxwema kwiintetho ezingento ezikuhlambelayo oko kungcwele. Yaye waxelelwa ukuba umkhonzi weNkosi umele afundise abanye enobulali.
Livakalise Ilizwi
Ubani wayeya kufuna amandla avela kuThixo ukuze ajamelane nemihla yokugqibela aze alondoloze inyaniso yeBhayibhile. (3:1-17) Phakathi kwabantu abangahloneli Thixo kwakuya kuvela amadoda ‘awayeya kuhlala efunda, angaze phofu abe nako ukufika ekuyazini inyaniso.’ Abanjalo ‘abangendawo nosiyazi, babeya kuhambela phambili ebubini, belahlekisa, ‘belahlekiswa.’ Noko ke, uTimoti wayemele ‘eme ezintweni awayezifundile.’ Nathi sifanele senjenjalo, sisazi ukuba ‘sonke isibhalo siphefumlelwe nguThixo, sikwancedela ukufundisa, ukohlwaya, ukululeka, ukuqeqesha okusebulungiseni, ukuze umntu kaThixo afaneleke, exhobele wonke umsebenzi olungileyo.’
Kwafuneka uTimoti abaxhathise abawexuki aze abufeze ubulungiseleli bakhe. (4:1-22) Wayeya kukwenza oko ‘ngokulivakalisa ilizwi’ nangokuzingisa ukwenjenjalo. Oku kwakubalulekile, ekubeni ibandla lalijamelene ‘namathuba axakileyo’ kuba abathile babefundisa imfundiso yobuxoki. KwanamaNgqina kaYehova abambelela kwiLizwi likaThixo ngoku, ezingisa ukulifundisa ebandleni nakubantu abangaphandle, kwanangamathuba axakileyo. UPawulos ‘wayelugcinile ukholo,’ nangona abathile bamshiyayo. Kodwa ‘inkosi yamomeleza, ukuze ngaye uvakaliso lweendaba ezilungileyo luzaliseke.’ Ngamana nathi singathembela ngamandla avela kuThixo size siqhubeke sishumayela iindaba ezilungileyo.
[Ibhokisi/Umfanekiso okwiphepha 31]
Umphumi-Mkhosi Olungileyo: UPawulos wabongoza uTimoti: “Bunyamezele ububi, njengomphumi-mkhosi olungileyo kaKristu Yesu. Akukho namnye uthi, ephuma umkhosi, azibhijele ngemicimbi yobu bomi; ukuze amkholise lowo umnyulele ukuphuma umkhosi.” (2 Timoti 2:3, 4) Umphumi-mkhosi womRoma ohamba ngeenyawo ‘wayenyamezela ububi’ xa ethwele izixhobo ezinzima, izembe, ingobozi, ukudla kweentsuku ezintathu nezinye izinto. (INcwadi 3 kaJosephus ethi Wars of the Jews, isahluko 5) Wayengangeneleli kwimicimbi yorhwebo, kuba oko kwakungayi kumkholisa umphathi wakhe, ibe iindleko zakhe zazigutyungelwa. Ngokufanayo, umKristu unyamezela izilingo ngenxa yokuba ‘ngumphumi-mkhosi olungileyo kaKristu.’ Nangona esenokuba nomsebenzi wempangelo ukuze aphumeze iimbopheleleko ezingokweZibhalo, umele angakuvumeli ukubandakanyeka okungeyomfuneko kwizinto eziphathekayo kumenze ayeke kumlo wokomoya. (1 Tesalonika 2:9) Xa enikela ubungqina kwindlu ngendlu, usebenzisa “ikrele lomoya, elililizwi likaThixo,” ibe unceda ukukhulula abantu kulahlekiso olungokonqulo. (Efese 6:11-17; Yohane 8:31, 32) Ekubeni ubomi busesichengeni, ngamana bonke abaphumi-mkhosi abangamaKristu bangaqhubeka bekholisa uYesu Kristu noYehova uThixo ngale ndlela.