“Nathengwa Ngexabiso”

“Nathengwa ngexabiso. Mzukiseni ke uThixo ngomzimba wenu.”—1 KORINTE 6:20.

1, 2. (a) Yintoni eyavulela ‘indlela esikhupha ekufeni’? (b) Kwafuneka kwenziwe ntoni ukuze idini likaKristu lisebenze ngokusemthethweni, njengoko lalifuziselwe yintoni ngaphambili?

UMDUMISI wathi: “Yena uThixo kuthi nguThixo wosindiso, kokukaYehova, iNkosi yethu, ukukhupha ekufeni.” (INdumiso 68:20) Idini likaYesu Kristu lavula loo ndlela. Kodwa ukuze elo dini lifaneleke ngokwasemthethweni, kwafuneka ukuba uKristu abonakale ngokwakhe ebusweni bukaThixo.

² Oku kwakufanekiselwe kwangaphambili ngeMini Yocamagushelo xa umbingeleli omkhulu wayengena kwiNgcwele kaNgcwele. (Levitikus 16:12-15) Umpostile uPawulos wabhala esithi: “Ke yena uKristu, efike wangumbingeleli omkhulu . . . wangena kwaba kanye kweyona ngcwele, kungengalo negazi leebhokhwe nelamathole, kungegazi elilelakhe; wafumana inkululo engunaphakade ngokusihlawulela. Kuba uKristu akangenanga kweyona ngcwele inokwenziwa ngezandla, engumfuziselo weyenyaniso; ungene kuwo amazulu ngokwawo, ukuba abonakale ngoku ebusweni bukaThixo ngenxa yethu.”—Hebhere 9:11, 12, 24.

Amandla Egazi

3. (a) Abakhonzi kaYehova baligqala njani igazi, yaye ngoba? (b) Yintoni ebonisa ukuba igazi linamandla angokwasemthethweni okucamagushela izono?

³ Yiyiphi indima igazi likaKristu elinayo ekusindisweni kwethu? Ukususela kumhla kaNowa, abakhonzi bokwenyaniso baye baligqala igazi njengelingcwele. (Genesis 9:4-6) Igazi linendima ebalulekileyo ebomini, kuba iBhayibhile ithi “umphefumlo [okanye ubomi] wenyama usegazini wona.” (Levitikus 17:11) Ngoko ngokoMthetho kaMoses kwakufuneka ukuba xa kusenziwa idini ngesilwanyana, igazi laso liphalazelwe phambi koYehova. Maxa wambi igazi lalibekwa phezu kweempondo ezisesibingelelweni. Ngokucacileyo, amandla okucamagusha edini ayesegazini laso. (Levitikus 8:15; 9:9) “Ngokomthetho ndingade ndithi, zonke izinto ziphantse ukuba zihlanjululwe ngegazi; kungaphalalanga gazi, akubikho kuxolelwa.”—Hebhere 9:22.

4. (a) Yiyiphi injongo eyaphunyezwayo ngemiqathango kaThixo yokusetyenziswa kwegazi? (b) Yintoni eyayibalulekile ngendlela uYesu awabulawa ngayo?

⁴ Ngoko, akumangalisi ukuba phantsi koMthetho, nakuphi na ukusetyenziswa kakubi kwegazi kwakuhamba nesohlwayo sokufa! (Levitikus 17:10) Sonke siyazi ukuba xa into yenziwe yanqaba, okanye kukho imiqathango engqongqo yokusetyenziswa kwayo, ixabiso layo liyanyuka. Ukuthintela kukaYehova ukusetyenziswa kwalo bekuya kuqinisekisa ukuba igazi beliya kugqalwa, lingeyonto nje enexabiso eliqhelekileyo, kodwa exabisekileyo. (IZenzo 15:29; Hebhere 10:29) Oku kwakuvisisana nenjongo ebalulekileyo igazi likaKristu elaliya kuba nayo. Ngokufanelekileyo, wafa ngendlela eyabangela ukuba igazi lakhe liphalazwe. Ngaloo ndlela, kwakucacile ukuba uKristu akazange kuphela anikele nje ngomzimba wakhe wenyama kodwa wanikela nangomphefumlo wakhe, wanikela ngobomi bakhe njengomntu ofezekileyo! (Isaya 53:12) UKristu akazange alahlekelwe lilungelo elingokwasemthethweni lobomi ngenxa yokungafezeki, ngoko igazi lakhe elaphalalayo lalinexabiso eliphakamileyo yaye lalinokunikelwa kuThixo ukuze kucanyagushelwe izono zoluntu.

5. (a) Yintoni uKristu awayisa ezulwini, yaye ngoba? (b) Kwabonakala njani ukuba uThixo ulamkele idini likaKristu?

⁵ UKristu wayengenako ukuthabathela ezulwini igazi lakhe lokoqobo. (1 Korinte 15:50) Kunoko, wathabatha oko kwafuziselwa ligazi: ixabiso elingokwasemthethweni lobomi bakhe bobuntu obenziwe idini. Emi phambi koThixo, wayenokunikela ngobo bomi ukuba bube yintlawulelo yokukhulula uluntu olunesono. Ukulamkela kukaYehova elo dini kwacaca ngePentekoste yowama-33 C.E., xa umoya oyingcwele wehlela phezu kwabafundi abali-120 eYerusalem. (IZenzo 2:1-4) Ngokungathi kunjalo, ngoku uhlanga lwabantu lwalulolukaKristu ngokuluthenga. (Galati 3:13; 4:5; 2 Petros 2:1) Ngenxa yoko, iingenelo zentlawulelo zazinokuthululelwa ebantwini.

Abokuqala Ukungenelwa Kwintlawulelo

6. Ngawaphi amalungiselelo uThixo awenzileyo okusetyenziswa kweengenelo zentlawulelo kaKristu?

⁶ Noko ke, oku kwakungathethi ukuba uluntu lwaluza kufumana imfezeko emzimbeni ngephanyazo, kuba ingapheliswanga imeko yoluntu enesono, kwakungenakwenzeka ukuba abantu bafezeke ngokwasemzimbeni. (Roma 7:18-24) Imeko yokuba nesono yayiza kupheliswa njani yaye nini? Ekuqaleni uThixo walungiselela ukuba ‘ababingeleli basezulwini abali-144 000 ababingelela kuye uThixo wethu balawule njengookumkani phezu komhlaba’ kunye noKristu Yesu. (ISityhilelo 5:9, 10; 7:4; 14:1-3) Ngokusetyenziswa kwabo iingenelo zentlawulelo ziya kudluliselwa ngokuthe ngcembe eluntwini ebudeni bexesha leminyaka eliwaka.—1 Korinte 15:24-26; ISityhilelo 21:3, 4.

7. (a) Uyintoni umnqophiso omtsha, ngoobani ababandakanyekileyo kuwo, yaye uphumeza yiphi injongo? (b) Kwakutheni ukuze kufuneke kufe othile ukuze umnqophiso omtsha usebenze, yaye yiyiphi indima igazi likaKristu elinayo?

⁷ Ukuze oku kwenzeke, ookumkani abangababingeleli abali-144 000 “bathengwa bephuma ebantwini.” (ISityhilelo 14:4) Oku kuphunyezwa ngokusetyenziswa ‘komnqophiso omtsha.’ Lo mnqophiso mtsha usisivumelwano esiphakathi koYehova uThixo noSirayeli wokomoya kaThixo sokuba amalungu akhe abe ngookumkani nababingeleli. (Yeremiya 31:31-34; Galati 6:16; Hebhere 8:6-13; 1 Petros 2:9) Kanti, unokwenziwa njani umnqophiso phakathi koThixo nomntu ongafezekanga? UPawulos ucacisa esithi: “Kuba apho kukhoyo umnqophiso womyoleli [phakathi koThixo nomntu ongafezekanga], kufuneka ukuba kucace ukufa kwalowo unqophisileyo. Kuba umnqophiso uqiniseka bakuba befile, ekubeni ungaze ube namandla xenikweni asadla ubomi lowo unqophisileyo.”—Hebhere 9:16, 17.

8, 9. Intlawulelo ihlobene njani nomnqophiso omtsha?

⁸ Ngenxa yoko, idini lentlawulelo liyimfuneko kumnqophiso omtsha, uYesu anguMlamleli wawo. UPawulos wabhala: “Mnye uThixo, mnye nomlamli phakathi koThixo nabantu, umntu, uKristu Yesu, lowo wazinikelayo ukuba abe yintlawulelo elingana nabo bonke—ubungqina ke obo bokungqinwa ngamaxesha angawabo.” (1 Timoti 2:5, 6, NW) Loo mazwi asebenza ngokukhethekileyo kwi-144 000, owenziwe nalo umnqophiso omtsha.

⁹ Xa uThixo wenza umnqophiso noSirayeli wokwenyama, awuzange usebenze ngokusemthethweni de kwaphalazwa igazi lesilwanyana ngokwenziwa kwedini. (Hebhere 9:18-21) Ngokufanayo, ukuze umnqophiso omtsha usebenze, kwafuneka ukuba uKristu aphalaze ‘igazi lomnqophiso.’ (Mateyu 26:28; Luka 22:20) Ekubeni uKristu esebenza njengoMbingeleli Omkhulu ‘nomlamli womnqophiso omtsha,’ uThixo usebenzisa ixabiso legazi likaYesu kwabo bangeniswa kumnqophiso omtsha, ngokwasemthethweni ebenza babe ngabantu abangamalungisa. (Hebhere 9:15; Roma 3:24; 8:1, 2) Unokwandula ke uThixo abafake kumnqophiso omtsha ukuze babe ngookumkani abangababingeleli! NjengoMlamleli noMbingeleli wabo Omkhulu, uYesu ubanceda ukuba balondoloze ukuma okucocekileyo phambi koThixo.—Hebhere 2:16; 1 Yohane 2:1, 2.

Ukuhlanganiswa Kwezinto Ezisemhlabeni

10, 11. (a) Intlawulelo inabela njani ukudlulela ngaphaya kwamaKristu athanjisiweyo? (b) Ngoobani isihlwele esikhulu, yaye banokuma okunjani phambi koThixo?

¹⁰ Ngaba ngamaKristu athanjisiweyo kuphela anokukhululwa ngentlawulelo, exolelwa izono zawo? Akunjalo, uThixo ubuyisela zonke ezinye izinto kuye ngokuzixolelanisa kunye naye ngegazi elaphalalayo emthini wentuthumbo, njengoko eyabaseKolose 1:14, 20 ibonisa. Oku kuquka izinto ezisezulwini (abali-144 000) ndawonye nezinto ezisemhlabeni. Izinto ezisemhlabeni ngabo banethemba lokuphila emhlabeni, abantu abaya kunandipha ubomi obufezekileyo kumhlaba oyiParadisi. Ingakumbi ukususela ngowe-1935 kuye kwenziwa umgudu onamandla ukuhlanganisa abanjalo. ISityhilelo 7:9-17 sibachaza aba ‘njengesihlwele esikhulu’ esixhomekeke kuThixo nakwiMvana ukuze sisindiswe. Aba basafuna ukusinda ‘kwimbandezelo enkulu’ baze bakhokelelwe kwimithombo yamanzi obomi,’ kuba ISityhilelo 20:5 sibonisa ukuba abo banjalo baya kufumana ukuphila okupheleleyo, ubomi bobuntu obufezekileyo, ekupheleni koLawulo lukaKristu Lweminyaka Eliwaka. Abo ke bathi ngelo xesha baluphumelele uvavanyo lokugqibela bekwimeko yobuntu efezekileyo baya kuvakaliswa bengamalungisa afumana ubomi obungunaphakade emhlabeni.—ISityhilelo 20:7, 8.

¹¹ Sekunjalo, njengesenzo esiyingabula-zigcawu, isihlwele esikhulu sele ‘sizihlambile iingubo zaso ezinde, sazenza mhlophe egazini leMvana.’ (ISityhilelo 7:14) UKristu akasebenzi njengoMlamleli womnqophiso omtsha kuso, kanti siyangenelwa kulo mnqophiso ngokusebenza koBukumkani bukaThixo. Noko ke, uKristu usasebenza njengoMbingeleli Omkhulu kuso, anokuthi, esebenzisa yena uYehova adlulise kuso intlawulelo kwaye yinto leyo ayenzayo kangangokuba ngoku banokuvakaliswa bengamalungisa azizihlobo zikaThixo. (Thelekisa uYakobi 2:23.) Ebudeni beMinyaka Eliwaka, ngokuthe ngcembe ‘siya kukhululwa ebukhobokeni bokonakala, [de ekugqibeleni] sisingiswe enkululekweni yozuko lwabantwana bakaThxo.’—Roma 8:21.

12. Liliphi ilungiselelo uThixo awaqhubana ngalo namadoda athembekileyo amaxesha angaphambi kwawobuKristu?

¹² Ngokuphathelele ukuma kwabo phambi koThixo, kunokubonakala ukuba abo besihlwele esikhulu bahluka kancinane kubakhonzi bamaxesha angaphambi kobuKristu. Noko ke, uThixo wayeqhubana naba bakhonzi bamaxesha angaphambi kobuKristu ecinga ngelungiselelo lentlawulelo ezayo. (Roma 3:25, 26) Baye bazixolelwa izono zabo okwexeshana. (INdumiso 32:1, 2) Kunokuba aphelise kubo ‘isazela sesono,’ amadini ezilwanyana aye ‘abakhumbuza ngesono.’—Hebhere 10:1-3.

13. Ziziphi iingenelo esinazo thina ezingazange zifunyanwe ngabakhonzi bakaThixo bamaxesha angaphambi kwawobuKristu?

¹³ Oku kwahlukile kumaKristu okwenyaniso namhlanje. Akhonza ngesizinzi sentlawulelo ehlawuliweyo! NgoMbingeleli wawo Omkhulu, ‘asondela enokungafihlisi kuyo itrone yobabalo.’ (Hebhere 4:14-16) Ukuxolelaniswa noThixo asinto ekuthenjwe ukuba iza kwenzeka kwixesha elizayo kodwa kuyinto eyenzeka ngoku! (2 Korinte 5:20) Xa athe ona, anokuxolelwa ngokwenene. (Efese 1:7) Enyanisweni anesazela esicocekileyo. (Hebhere 9:9; 10:22; 1 Petros 3:21) Ezi ntsikelelo zikukungcamla nje kusengaphambili inkululeko yabantwana bakaThixo eza kuzuzwa ngabakhonzi bakaYehova kwixesha elizayo!

Ubunzulu Bobulumko Nothando LukaThixo

14, 15. Intlawulelo ibubalaselisa njani ubunzulu bobulumko bukaYehova, kuquka ubulungisa nothando lwakhe?

¹⁴ Esinjani sona isipho ukumangalisa uYehova asinike sona ngentlawulelo! Kulula ukusiqonda, kanti sikhulu ngokwaneleyo ukuba sisibangele sibe noloyiko ngobulumko obukhulu obusetyenzisiweyo. Ukuzihlolisisa kwethu iindlela esebenza ngazo intlawulelo kuphela nje kuye kwabetha phezulu. Kanti, sivumelana nompostile uPawulos ngokudanduluka sisithi: “Hayi, ubunzulu bobutyebi nobobulumko nobokwazi kukaThixo! Asikuko nokuba ayiphengululeki imigwebo yakhe, azilandeki iindlela zakhe!” (Roma 11:33) Ubulumko bukaYehova buboniswa kukuba uye wakwazi ukuhlangula uluntu nokuthethelela ulongamo lwakhe. Ngentlawulelo, ‘bubonakalisiwe ubulungisa bukaThixo, uThixo wamisa uKristu ukuba abe sisicamagushelo ngegazi lakhe ngako ukukholwa.’—Roma 3:21-26.

¹⁵ UYehova akanakugxekwa ngokuxolela izono ezenziwa kwixesha elidluleyo ngabakhonzi bamaxesha angaphambi kobuKristu. Ngaphezu koko, akanakugxekwa uYehova ngokuvakalisa amalungisa athanjisiweyo njengoonyana bakhe okanye isihlwele esikhulu njengezihlobo zakhe. (Roma 8:33) Ngelahleko enkulu kuye, uThixo ubenyaniseke, okanye ethe tye, ngokugqibeleleyo kwiinkqubano zakhe, elingqina libubuxoki ngokupheleleyo ibango likaSathana lokuba uYehova ungumlawuli ongekho sesikweni! Uthando lukaThixo lokungazingci ngezidalwa zakhe luye ngokufanayo lwabonakalaliswa ngaphandle kwamathandabuzo.—Roma 5:8-11.

16. (a) Intlawulelo iye yayizinzisa ngayiphi indlela imbambano yengqibelelo yabakhonzi bakaThixo? (b) Intlawulelo isinika njani isiseko sokuba nokholo kwihlabathi elitsha nelizayo lobulungisa?

¹⁶ Kwakhona indlela eyalungiselelwa ngayo intlawulelo iye yazinzisa iimbambano ezibandakanya ukugcin’ ingqibelelo kwabakhonzi bakaThixo. Kukodwa nje ukuthobela kukaYesu kwakuphumeza oko. (IMizekeliso 27:11; Roma 5:18, 19) Kodwa ukongezelela koko kukho ikhondo lobomi bamaKristu ali-144 000 athe, phezu kwayo nje inkcaso kaSathana, ahlala ethembekile de kwasekufeni! (ISityhilelo 2:10) Intlawulelo yenza kube nokwenzeka ukuba aba bavuzwe ngokungafi—ubomi obungenakupheliswa! (1 Korinte 15:53; Hebhere 7:16) Oku kuyawaphuthisa amabango kaSathana okuba abakhonzi bakaThixo abathembekanga! Kwakhona intlawulelo iye yasinika isizinzi esomeleleyo sokuba nokholo kumadinga kaThixo. Sinokuba nombono wendlela yosindiso “esekwe ngokwasemthethweni” ngedini lentlawulelo. (Hebhere 8:6, NW) Ngaloo ndlela sinokuqiniseka ukuba liyeza ihlabathi elitsha!—Hebhere 6:16-19.

Ungasileli Ekufumaneni Intshukumisa Yalo

17. (a) Abanye babonisa njani ukuba baye bayiphosa injongo yentlawulelo? (b) Yintoni enokusishukumisela ukuba sihlale sicocekile ngokuziphatha?

¹⁷ Ukuze singenelwe kwintlawulelo, kufuneka ukuba ubani angenise ulwazi, abe nokholo aze aphile ngemilinganiselo yeBhayibhile. (Yohane 3:16; 17:3) Noko ke, ngokwentelekiso bambalwa abakulungeleyo ukwenjenjalo. (Mateyu 7:13, 14) Kwanaphakathi kwamaKristu okwenyaniso, bambi ‘basenokulwamkela ubabalo lukaThixo baze basilele ekufumaneni intshukumisa yalo.’ (2 Korinte 6:1, NW) Ngokomzekelo, kwiminyaka edluleyo amawaka-waka aye asuswa kubudlelane ngenxa yokuziphatha okubi ngokwesini. Hayi indlela ekudanisa ngayo oku xa sicinga ngoko uYehova noKristu basenzele kona! Ngaba uxabiso ngentlawulelo alufanele lushukumisele ubani ukuba akuphephe ‘ukukulibala ukuhlanjululwa kwezono zakhe zakudala’? (2 Petros 1:9) Ngoko, kufanelekile ukuba uPawulos akhumbuze amaKristu esithi: “Nathengwa ngexabiso. Mzukiseni ke uThixo ngomzimba wenu.” (1 Korinte 6:20) Ukukukhumbula oku kusinika intshukumisa enamandla yokuhlala sicocekile ngokokuziphatha!—1 Petros 1:14-19.

18. UmKristu owela esonweni esinzulu unokungenelwa njani kwintlawulelo?

¹⁸ Kuthekani ukuba ubani sele ewele kwisono esinzulu? Ufanele asebenzise ilungelo lokuxolelwa intlawulelo elenza libe nokufumaneka, esamkela uncedo oluvela kubaveleli abanothando. (Yakobi 5:14, 15) Kwanokuba kufuneka uqeqesho oluqatha, umKristu oguqukayo akafanele anikezele xa elungiswa ngolo hlobo. (Hebhere 12:5) Sinesi siqinisekiso simangalisayo siseBhayibhileni sithi: “Ukuba sithi sizivume izono zethu, uthembekile, ulilungisa, ukuba asixolele izono zethu, asihlambulule kuko konke ukungalungisi.”—1 Yohane 1:9.

19. UmKristu unokuba nayiphi imbono ngehambo embi awayebandakanyeke kuyo ngaphambi kokuba afunde inyaniso?

¹⁹ Maxa wambi amaKristu adimazeka ngokungeyomfuneko ngenxa yehambo embi yexesha elidluleyo. Omnye umzalwana odimazekileyo wabhala esithi: “Ngaphambi kokuba ndifumane inyaniso, mna nomfazi wam saba nesifo samalungu esini. Maxa wambi siba nemvakalelo yokungacoceki, ngokungathi ‘asifaneleki’ kwintlangano kaYehova ecocekileyo.” Kuyavunywa ukuba, kwanasemva kokuba ngamaKristu, bambi basenokutsala nzima ngenxa yeempazamo zexesha elidluleyo. (Galati 6:7) Sekunjalo, asikho isizathu sokuziva ungacocekanga emehlweni kaYehova ukuba ubani uye waguquka. “Igazi likaKristu” linako “ukusihlambulula isazela [sethu] emisebenzini efileyo.”—Hebhere 9:14.

20. Ukuba nokholo kwintlawulelo kunokumkhulula njani umKristu kwimvakalelo engeyomfuneko yokuziva enetyala?

²⁰ Ewe, ukuba nokholo kwintlawulelo kunokuba luncedo ukusikhulula kwingcinezelo yokuziva unetyala ngokungeyomfuneko. Omnye udade oselula wavuma esithi: “Bendisoloko ndithwaxwa ngumkhwa ongacocekanga wokuphulula amaphambili ngaphezu kweminyaka eli-11 ngoku. Ndaphantse ndalinikel’ umva ibandla ngesinye isihlandlo, ndivakalelwa kukuba uYehova akanakuze avumele umntu olizothe ngolu hlobo ukuba angcolise ibandla lakhe.” Noko ke, simele sikhumbule ukuba uYehova “ulungile yaye ukulungele ukuxolela” ukuba sithi nje ngokuzimisela konke silwe nokungalungisi, singanikezeli kuko!—INdumiso 86:5, NW.

21. Intlawulelo ifanele iyichaphazele njani indlela esibagqala ngayo abo basonayo?

²¹ Intlawulelo ifanele iyichaphazele indlela esiqhubana ngayo nabanye. Ngokomzekelo, usabela njani xa woniwe ngumKristu onguwenu? Ngaba kulula ngawe ukuba ubonise ukuxolela okunjengokukaKristu? (Luka 17:3, 4) Ngaba ‘unemfesane kakhulu, ubaxolela [abanye], njengokuba naye uThixo wakuxolelayo ekuKristu’? (Efese 4:32) Okanye ngaba utyekele ekubeni ube nenqala okanye ingqumbo? Ngokuqinisekileyo oko bekuya kuba kukusilela ukufumana intshukumisa yentlawulelo.—Mateyu 6:15.

22, 23. (a) Intlawulelo ifanele ibe nawuphi umphumo kusukelo lwethu nakwindlela esiphila ngayo? (b) Sisiphi isigqibo onke amaKristu afanele afikelele kuso ngokuphathelele intlawulelo?

²² Ekugqibeleni, ukuba noxabiso ngentlawulelo kufanele kube nomphumo omhle kusukelo lwethu nakwindlela esiphila ngayo. UPawulos wathi: “Nathengwa ngexabiso; musani ukuba ngamakhoboka abantu.” (1 Korinte 7:23) Ngaba iimfuno ezingokoqoqosho—indlu, umsebenzi wengqesho, ukudla, impahla yokunxiba—zisezizinto osekele kuzo ubomi bakho? Okanye ngaba ufuna uBukumkani tanci, usiba nokholo kwidinga likaThixo lokuba uya kukunyamekela? (Mateyu 6:25-33) Ngaba ufanele ube likhoboka lomqeshi wakho kodwa usilele ukuzibekela ixesha elaneleyo lemicimbi yolawulo lobuthixo? Khumbula ukuba uKristu “wazinikela ngenxa yethu, ukuze . . . azihlambululele abantu abangabakhe, abazondelela imisebenzi emihle.”—Tito 2:14; 2 Korinte 5:15.

²³ “[Siyabulela] kuThixo ngoYesu Kristu” ngenxa yesipho sakhe esikhulu—intlawulelo! (Roma 7:25) Ngamana singangaze siyiphose injongo yentlawulelo kodwa siyivumele ukuba ibe ngamandla ayintshukumisa yokwenene ebomini bethu. Ngeengcinga, ngamazwi nangezenzo, ngamana singasoloko simzukisa uThixo, ngombulelo sikhumbula ukuba sathengwa ngexabiso.

Imibuzo Yempinda

◻ Kutheni igazi ligqalwa njengelingcwele, yaye igazi likaKristu lasiwa njani phambi koYehova ezulwini?

◻ Igazi likaKristu laba nayiphi indima ekumiseleni umnqophiso omtsha?

◻ Intsalela nesihlwele esikhulu singenelwa njani kwintlawulelo?

◻ Sinokubonisa njani ukuba asisilelanga ekuyifumaneni intshukumisa yentlawulelo?

[Umfanekiso okwiphepha 16]

Amandla edini okucamagushela asegazini lalo

[Umfanekiso okwiphepha 17]

Umntu okuxabisayo ukuxolela kukaThixo ukulungele ukubaxolela abanye