Imibuzo Evela Kubafundi
◼ UYobhi 33:24 uthetha ‘ngentlawulelo, NW’ efunyanelwa uYobhi, emnceda ukuba aphephe ukufa. Ngubani owayeza kuba yiloo ntlawulelo kaYobhi?
Kwakungekho dini lantlawulelo elingumntu elanikelwa ngenxa kaYobhi emva phayaa ngelo xesha, kodwa uThixo wasicamagushela okanye wasixolela isiphoso sikaYobhi.
USathana wabangela ukuba uYobhi ehlelwe ziinkathazo ezininzi, kuquka ‘amathumba amabi athabathela entendeni yonyawo lwakhe, ase elukakayini lwakhe.’ Imeko kaYobhi yayimbi kakhulu kangangokuba umfazi wakhe wambongoza ukuba ‘amlahle uThixo aze afe.’ KwanoYobhi wacinga nzulu enoba ukufa kwakungeyona nto ilungileyo kunokuva iintlungu okunjalo kusini na.—Yobhi 2:7-9; 3:11.
Xa kwabonakala ukuba uYobhi wayesenokufa, uElihu wayihlola imeko kaYobhi emaxongo waza wabeka isiseko sethemba, esithi: “Iyadleka inyama yakhe, ingabonakali . . . Uyasondela ke esihogweni umphefumlo wakhe, nobomi bakhe kubabulali. Ukuba ke kuthe kwakho isithunywa sezulu esimlamlelayo, noko sisinye ewakeni, sokumxelela umntu okumfaneleyo: wombabala, athi, Mkhulule, angehli aye esihogweni, kuba ndilufumene ucamagusho [intlawulelo, NW]. Isuka ibe nentlahla inyama yakhe.”—Yobhi 33:21-25.
Siyazi ukuba uYesu Kristu wanikela ngobomi bakhe bobuntu obufezekileyo njengentlawulelo yokukhulula uluntu olungafezekanga. Idini lakhe lalingana noko kwalahlwa nguAdam, lihlawula ixabiso elifunekayo ukukhulula uluntu esonweni. (Roma 5:12-19; 1 Timoti 2:5, 6) Noko ke, alisetyenziswa ngale ndlela kuphela igama elithi “intlawulelo” eBhayibhileni. Igama lesiHebhere elifunyanwa kuYobhi 33:24 ngokusisiseko lithetha “ukugubungela.” (Eksodus 25:17, NW) Xa uThixo wayeqhubana noSirayeli wamandulo, wayenelungiselelo lokugubungela, okanye lokucamagushela izono—amadini awayegubungela isono, elungisa izinto phakathi kwabantu noThixo.—Eksodus 29:36; Levitikus 16:11, 15, 16; 17:11.
Noko ke, ngaphambilana, uThixo wayekulungele ukwamkela amadini njengembonakaliso yombulelo okanye yokucela uxolo nenkoliseko. (Genesis 4:3, 4; 8:20, 21; 12:7; 31:54) UYobhi wayekuqonda ukubaluleka kwamadini anjalo. Sifunda oku: “Wavuka kusasa, wanyusa amadini anyukayo ngokwenani labo bonke [oonyana bakhe] bephela; kuba uYobhi ebesithi, Mhlawumbi oonyana bam bangaba bonile, bamlahla uThixo entliziyweni yabo. Ubesenjenjalo ke uYobhi loo mihla yonke.” (Yobhi 1:5) Ekubeni wazama ukukholisa uThixo yaye ngokucacileyo enomoya wokuthobeka, amadini akhe ayexabisekile emehlweni kaThixo.—INdumiso 32:1, 2; 51:17.
Kodwa kamva uYobhi wahlaselwa sisigulo esabonakala sibusongela ubomi bakhe. Wayekwanembono ephosakeleyo ngobulungisa bakhe, ngoko wayefuna ukulungiswa, nto leyo awayenzayo uElihu. (Yobhi 32:6; 33:8-12; 35:2-4) UElihu wathi kwakungafuneki ukuba uYobhi aqhubeke ekwimeko elusizi de ase ekufeni nasesihogweni (eSheol, okanye kwingcwaba eliqhelekileyo). Ukuba uYobhi wayenokuguquka, “intlawulelo” yayinokufumaneka.—Yobhi 33:24-28.
Asimele sicinge ukuba ngokuthetha ‘ngentlawulelo’ uElihu wayethetha ngomntu owayeya kufela uYobhi emva phayaa. Mayela namadini abanquli bokwenyaniso ababeqhele ukuwanikela, uhlobo lwentlawulelo uElihu awayelucebisa kwimeko kaYobhi kusenokuba yayilidini lesilwanyana. Okubangel’ umdla kukuba, kamva uThixo waxelela oku amaqabane amathathu kaYobhi agxekayo: “[Nimele] nizinyusele idini elinyukayo, uYobhi umkhonzi wam anithandazele.” (Yobhi 42:8) Lungakhathaliseki uhlobo lwentlawulelo, ingongoma eyintloko kaElihu yayikukuba sasinokugutyungelwa isiphoso sikaYobhi aze angenelwe ngokusuka koko.
Oko koko kwenzekayo. UYobhi ‘waguquka eseluthulini naseluthuthwini.’ Emva koko kwenzeka ntoni? “UYehova wakubuyisa ukuthinjwa kukaYobhi . . . Wakongeza uYehova konke awayenako uYobhi, kwada kwaphindwa kabini . . . Emveni koko, uYobhi wadla ubomi iminyaka elikhulu elinamanci mane, wabona oonyana bakhe, noonyana boonyana bakhe, izizukulwana zazine.” Kuyavunywa ukuba, loo ntlawulelo ayizange imkhulule uYobhi esonweni, ngoko ekuhambeni kwexesha wafa. Kanti, ukongezelelwa kobomi bakhe kwangqina ukuba, ngokunomphumo, ‘inyama yakhe yaba nentlahla, wabuyela emihleni yobudodana bakhe.’—Yobhi 33:25; 42:6, 10-17.
Ezo ntsikelelo ezafumaneka ngokusetyenziswa kwentlawulelo ngomlinganiselo othile kuYobhi ziba yimbonakaliso yangaphambili yeentsikelelo eziyintabalala eziya kufunyanwa luluntu olukholwayo kwihlabathi elitsha. Ngelo xesha, ingenelo epheleleyo yedini lentlawulelo likaYesu iya kube ifumaneka, isusa ngonaphakade imiphumo ebulalayo yesono nokungafezeki. Esinjani sona isizathu esiya kuba naso ‘sokuduma,’ njengoko uElihu wakhankanyayo!—Yobhi 33:26.