Lingoku Ixesha Lokufuna UYehova
“UYehova esemazulwini uqondele koonyana babantu, ukubona ukuba ukho na oqiqayo, oquqela kuThixo.”—INDUMISO 14:2.
1, 2. (a) Abaninzi bamjonga njani uThixo oyinyaniso, uYehova? (b) Sazi njani ukuba uYehova uyabazi obu budenge buthethwayo ngaye luluntu?
NAMHLANJE, uThixo wenyaniso, uYehova, uyagatywa ngabo bangabukholelwayo ubukho bakhe, ngabo bangakholelwayo kuye, ngabo banqula oothixo bobuxoki nazizigidi zabo bathi bayakholelwa kuThixo kodwa babe bemkhanyela ngemisebenzi yabo. (Tito 1:16) Abaninzi banenkolelo efanayo neyesithandi-bulumko somJamani senkulungwane ye-19 uNietzsche yokuba “uThixo ufile.” Ngaba uYehova akabazi obu budenge bungaka buthethwayo ngaye? Uyabazi, kuba waphefumlela uDavide ukuba abhale oku: “Sithi isidenge entliziyweni yaso, Akukho Thixo. Bonakalisile, balisikizi ngeentlondi zabo; akukho wenza okulungileyo.”—INdumiso 14:1.
2 UDavide wahlabela mgama wathi: “UYehova esemazulwini uqondele koonyana babantu, ukubona ukuba ukho na oqiqayo, oquqela kuThixo.” Ewe, iNkosi enguMongami iyababona abo bafuna ukuyazi nokuyikhonza. Ngaloo ndlela, ukuyifuna kwethu ngoku ngokunyanisekileyo kubalulekile. Kuya kuthetha enoba sifumana ubomi obungunaphakade okanye intshabalalo engunaphakade.—INdumiso 14:2; Mateyu 25:41, 46; Hebhere 11:6.
3. Yintoni esinethemba lokuba iza kwenzeka kwixesha elizayo?
3 Ngoko ke, sinokusibona isizathu sokuba kubaluleke kangaka ukuba sincede abanye bafune uYehova ngoku. Kusekho izigidi zabantu ezingekaze zidibane neNgqina likaYehova okanye ezingekaze zizive ‘iindaba ezilungileyo zobukumkani.’ Ukuba siya kuba sikhulu kangakanani na “isihlwele esikhulu” ngaphambi kokuba ifike “imbandezelo enkulu,” asazi. Kodwa ngokuqinisekileyo silindele ukuba abangakumbi bafune uYehova uThixo baze bamfumane ngaphambi kokuba bashiywe lixesha. Umbuzo ophakamayo ngulo, Yintoni esinokuyenza ukuze sincede abaninzi ngakumbi bamfumane uThixo?—Mateyu 24:14; ISityhilelo 7:9, 14.
4, 5. Kwiphulo labo lokufuna uThixo, abaninzi bakhetha ntoni?
4 Abantu abaninzi ehlabathini namhlanje bakwiphulo lokufuna, kodwa bafuna ntoni? Bambalwa kakhulu abamfuna ngokwenene uThixo omnye wokwenyaniso, uYehova. Abaninzi bakhetha uthixo ohambisana neminqweno yabo yobuqu. Kunjengokuba umphandi ngezimvo zabantu waseUnited States uGeorge Gallup, Omnci., wathi: “Eneneni akufumani mahluko ungako phakathi komntu ohamba icawa nongayihambiyo xa ujonga ukuqhatha, ukuphepha irhafu nokushinta, ikakhulu ngenxa yokuba unqulo lokuzonwabisa luxhaphakile.” Wongezelela athi: “Abaninzi bazenzela unqulo oluva bona nolubachwayitisayo . . . Omnye umntu walubiza ngokuthi lunqulo lukakhetha oyikhethayo.”
5 Abanye baya kuthi, “unqulo lwam lundilungele.” Kambe ke, enyanisweni umbuzo ufanele uthi, “Ngaba unqulo lwam lulungile kuThixo?” Enyanisweni, inkoliso yabantu abakwiNgqobhoko nakubuHindu yanelisekile kukuhlonela imifanekiso yayo eqingqiweyo nezithixo. Inkoliso yabo kufane kuthiwe bangamaKristu ikufumanisa kuyanele ukuhlonela uthixo onguBathathu Emnye ongenagama. Yaye ngaphezu kwama-900 ezigidi zamaSilamsi akholelwa kuAllah. Kwelinye icala, izigidi zabo bangakholelwayo kubukho bukaThixo zithi akukho Thixo.
Abo Bafuna Uncedo
6. Yintoni eye yafunyaniswa ngabafundi abaninzi beMboniselo?
6 Kodwa kuthekani ngabo kuthi balifunda rhoqo eli phephancwadi? Siye samfuna uThixo wokwenyaniso yaye simfumene. Siwangqine eyinyaniso amazwi kaYakobi 4:8: “Sondelani kuye uThixo, wosondela kuni.” Ngokunxulumana ngokukhutheleyo nebandla lamaKristu, siye sasondela kuThixo, yaye sizibonele ngokwethu indlela athe uYehova wasondela ngayo kuthi.—Yohane 6:44, 65.
7. Sazi njani ukuba kukho abantu abaninzi abasenomdla wokuza enyanisweni?
7 Phofu ke, siyazi ukuba kusekho abaninzi abakuvuyelayo ukunxulumana nabantu bakaYehova ngezihlandlo ezithile kodwa abangekalithabathi inyathelo elingqalileyo lokusondela kuYehova ngokuzahlulela nangokubhaptizwa. Sikwazi njani oku? Ngowe-1990 bebemalunga nezigidi ezilishumi abantu ababekho eSikhumbuzweni sokufa kukaYesu. Kodwa bangaphi abazivakalisa ngokukhutheleyo iindaba ezilungileyo zoBukumkani? Bangaphezulwana nje kwezigidi ezine. Oko kuthetha ukuba sinabantu abamalunga nezigidi ezithandathu abayithandayo inyaniso nabakunandiphayo ukunxulumana nathi kodwa abangekaqalisi ukuncomela intetho enyulu ngokuthi bashumayele iindaba ezilungileyo zoBukumkani. Ngokungathandabuzekiyo, ngamathuba athile abaninzi bayamthethela uYehova nolawulo lwakhe loBukumkani. Noko ke, abakazifanisi ngokucacileyo njengamaNgqina kaYehova. Nabo aba sifuna ukubanceda.—Zefaniya 3:9; Marko 13:10.
8, 9. (a) UYehova usikhuthaza ukuba senze ntoni? (b) Kutheni kungebobulumko nje ukutyeshela isiluleko sikaYehova?
8 Sifuna ukubakhuthaza aba ukuba babe ngamaNgqina kaYehova awonwabileyo nakhutheleyo ekwenzeni inxalenye yokugqibela yomsebenzi omkhulu ngoku owenziwa ehlabathini lonke. Ncedani niphawule isimemo sothando sikaYehova esikwiMizekeliso 1:23: “Nithe nabuyela ekohlwayeni kwam, niyabona, ndowumpompozisela kuni umoya wam, ndonazisa amazwi am.” (Thelekisa uYohane 4:14.) Hayi indlela ekukhuthaza ngayo ukwazi ukuba uYehova uya kusabela ukuba sithabatha amanyathelo angqalileyo okumela igama lakhe nonqulo lwakhe! Ngokuqinisekileyo, asifuni kuqukwa kwabo bachazwe kwiMizekeliso 1:24, 25: “Ngokuba ndinibizile, anavuma, ndolule isandla sam, akwabakho ukhathalayo; nesuka naliyeka necebo lam lonke, anavuma ndakunohlwaya.”
9 Abo basityeshelayo isiluleko sikaYehova sokuba bamfune ngoxa esenokufunyanwa yaye bakubekela amangomso ukwenza isigqibo de bayibone imbandezelo enkulu iqalisa baya kufumanisa ukuba balinde ithuba elide kakhulu. Ikhondo elinjalo beliya kubonisa ukuswela ukholo nobulumko lize libenze bangafanelwa yimfesane kaYehova.—2 Korinte 6:1, 2.
10. Kutheni ukungakhathali nokungabi namdla kuyingozi?
10 Ukubonisa imfuneko yenyathelo elikhawulezileyo, ngaba ubuya kulilandela icebiso elilungileyo likagqirha kuphela xa sele ungenwe yingqele emiphungeni? Okanye, kunoko, ngaba ubuya kulilandela xa uphawule iimpawu zokuqala zokugula? Ngoko usalinde ntoni ungazahluli nje kwihlabathi likaSathana eligulayo uze ume ngakuYehova namaNgqina akhe? Imiphumo yokungakhathali, ukungabi namdla, nokuzibetha ngoyaba izinto yenziwa icace kwiMizekeliso 1:26-29: “Nam ke ndonihleka ekusindekeni kwenu; ndogculela ekufikeni kokunkwantywiswa kwenu . . . Baya kwandula bandibize, ndingaphenduli, bandifune kwakusasa, bangandifumani; ngethuba lokuba bakuthiyile ukwazi, abakunyula ukoyika uYehova.” Masingafunyanwa ‘sifuna uYehova’ xa sele sishiywe lixesha!
11. Luluphi uncedo olufumanekayo kwabo bafuna ukukhonza uThixo?
11 Bambi abafunda eli phephancwadi kusenokuba basekwiphulo lokufuna uThixo wenyaniso. Siyakuvuyela ukuba nizingisa kwiphulo lenu. Ngamana ulwazi lwenu lweBhayibhile luya kunishukumisela ukuba nithabathe inyathelo elibhekele phaya nelingqalileyo lokuyimela ngokuqinileyo inyaniso. Qinisekiswani kukuba bandla ngalinye lamaNgqina kaYehova lihlala likulungele ukuninceda kwiphulo lenu.—Filipi 2:1-4.
Ixesha Lenzondelelo Nesenzo
12, 13. Kutheni kufuneka sithabathe inyathelo mayela nonqulo oluyinyaniso?
12 Kutheni kubalulekile ukuba sonke sithabathe inyathelo lokuzimisa ngakuYehova uThixo nonqulo lwakhe lokwenyaniso? Kungenxa yokuba iziganeko zehlabathi zifikelele encotsheni yazo. Iziganeko zembali zishiya amehlo. Ngoku asiloxesha lokuba mbaxa okanye lokuba dikidiki. UYesu ngokucacileyo wathi: “Lowo ungengakum uchasene nam, nalowo ungandibuthisiyo uyachithachitha.” Kwakhona wathi: “Kuba othe waneentloni ngam, nangawo amazwi am, uNyana woMntu woba neentloni ngaye lowo, xa athe weza esebuqaqawulini bakhe, nobukaYise, nobezithunywa ezingcwele.”—Mateyu 12:30; Luka 9:26.
13 Ngoku lixesha lenzondelelo nesenzo! Siyazi apho zikhokelela khona iziganeko zehlabathi, yaye iArmagedon isemnyango. Ngoko ke, kuhlatywa ikhwelo lokuba sifune uYehova ngoku ngaphambi kokuba ifike ‘imini yomsindo wakhe,’ ngoxa esenokufunyanwa. Xa ifikile imbandezelo enkulu, siya kuba sesishiywe lixesha.—Zefaniya 2:2, 3; Roma 13:11, 12; ISityhilelo 16:14, 16.
14. Ziziphi izizathu esinazo zokufuna uThixo?
14 Ngokwenene, lonke uluntu lufanele lufune inkoliseko kaThixo ngoku. Umpostile uPawulos wakuchaza kakuhle oku kwiZenzo 17:26-28: “Kanjalo [uThixo] wazenza ngagazi-nye zonke iintlanga zabantu, ukuze zime phezu kwawo wonke umhlaba, emisa amaxesha abekwe ngenxa engaphambili, nemida yokuma kwazo; ukuze bayifune iNkosi, ukuba kambe bangaphuthaphutha bayifumane, nakuba ingekude kuthi sonke ngabanye. Kuba kuyo sihleli, siyashukuma, sikho.” Elo binzana lokugqibela elithi, “kuba kuyo sihleli, siyashukuma, sikho,” lisibonisa isizathu esifanelekileyo sokufuna uThixo. Ngenxa yobubele bukaYehova obunothando siyaphila kulo mmandla mncinane womhlaba. Asifanele siyibulele kusini na iNkosi enguMongami wendalo iphela? Yaye ngaba asifanele siwubonakalise umbulelo wethu kuyo ngezenzo?—IZenzo 4:24.
15. (a) Umbhali-mbali uArnold Toynbee wavakalelwa kukuba iyintoni injongo yonqulo oluphambili? (b) Yintoni esimele siyenze ukuze sikwazi ukuzukisa uThixo?
15 Umbhali-mbali uArnold Toynbee wakha wabhala oku: “Injongo yokwenyaniso yonqulo oluphambili kukudlulisela iziluleko neenyaniso zokomoya ezingundoqo kwimfundiso yalo kwimiphefumlo emininzi kangangoko kunokwenzeka, ukuze ngamnye wale miphefumlo ube nokuphumeza indima eyintloko ebomini boMntu. Indima eyintloko ebomini boMntu kukuzukisa uThixo nokuziyolisa Ngaye ngonaphakade.” (An Historian’s Approach to Religion, iphepha 268-9) Ukuze sizukise uThixo, simele simfune kuqala size sizuze ulwazi oluchanileyo ngaye neenjongo zakhe. Ngaloo ndlela, isibhengezo sikaIsaya sifanelekile: “Funani uYehova esenokufunyanwa; mbizeni esekufuphi. Ongendawo makashiye indlela yakhe, indoda enobutshinga mayishiye iingcinga zayo, ibuyele kuYehova: woba nemfesane kuyo; ibuyele kuThixo wethu ngokuba woxolela ngokukhulu.”—Isaya 55:6, 7.
Luluphi Uncedo Olusebenzisekayo Esinokulunikela?
16. (a) Luluphi ucelomngeni olujamelene nebandla lamaKristu? (b) Yiyiphi indlela esebenzisekayo esinokunceda ngayo abanye bakhonze uYehova?
16 Izigidi zabantu abanomdla ezingekabi ngabavakalisi abakhutheleyo zizisa ucelomngeni kuthi sonke ngabanye. Yintoni esiyenzayo ngokoqobo njengabadala, izicaka zolungiselelo, oovulindlela nabavakalisi ekuncedeni abathandi benyaniso ukuba babe nenxaxheba ngokukhutheleyo kunye nathi kunqulo lokwenyaniso? Enye indlela yokunikela uncedo olusebenzisekayo apho luyimfuneko khona kukuya emakhayeni abo size sihambe nabo ukuya kwiintlanganiso kwiHolo yoBukumkani ukuze nabo banandiphe iingenelo zomoya kaYehova ngokuthe rhoqo. Isiluleko sikaPawulos kumaHebhere, kwisahluko 10, indinyana 24 neyama-25, singxamisekile namhlanje njengoko sasinjalo ngelo xesha: “Kanjalo masinyamekelane, ukuba silolane eluthandweni nasemisebenzini emihle; singakuhilizeli ukuhlanganisana kwethu, njengesiko labanye. Masivuselelane kube kokukhona, niyibona nje ukuba imini leyo iyasondela.” Sikhuthaza bonke abanqwenela ukufumana inkoliseko kaYehova ukuba banxulumane namaNgqina kaYehova rhoqo kwiHolo yawo yoBukumkani yasekuhlaleni.
17. Ukuba siza kunceda abafundi beBhayibhile benze inkqubela kwiphulo labo lokufuna uYehova, yiyiphi imibuzo ekufuneka iphendulwe?
17 Ukuba sifundisisa iBhayibhile nothile oza rhoqo kwiintlanganiso, ngaba sinokumnceda lowo afaneleke njengomvakalisi weendaba ezilungileyo? (Bona incwadi ethi Ukulungelelaniselwa Ukufeza Ubulungiseleli Bethu, iphepha 97-9.) Yaye akuba engumvakalisi ongabhaptizwanga, ngaba siyammema ukuba asipheleke rhoqo kumsebenzi wasesidlangalaleni wokushumayela nakwezinye zezifundo zethu namabuyelo? (Bona inkupho yeMboniselo kaDisemba 1, 1989, iphepha 31.) Ngamanye amazwi, bakuba abasebatsha abanjalo befaneleka, ngaba siyabakhuthaza ngokubavumela ukuba bazibonele eminye yemiphumo emihle yomsebenzi wethu wokushumayela?—Mateyu 28:19, 20.
UYehova Ukufanele Ukufunwa
18. UYehova uyibonise njani inceba yakhe kuluntu?
18 Ngenxa yedini lentlawulelo likaKristu Yesu, uYehova akazigcini izono zethu zexa elidluleyo nokumtyeshela ukuba siyaguquka size sibonakalise ukholo. Phawula amazwi kaDavide: “Akenzi kuthi ngokwezono zethu; akasiphathi ngokobugwenxa bethu; ngokuba injengokuphakama kwezulu phezu komhlaba, ukuba namandla, inceba yakhe kwabamoyikayo; kunjengokuba kude kwempumalanga entshonalanga, ukulukhwelelisa kwakhe kuthi ukreqo lwethu; kunjengokusikwa yimfesane koyise kubantwana, ukusikwa yimfesane kukaYehova kwabamoyikayo. Ngokuba uyakwazi yena ukubunjwa kwethu, ekhumbula ukuba siluthuli.”—INdumiso 103:10-14; Hebhere 10:10, 12-14.
19. Luluphi ukhuthazo olukhoyo kwabo baye bayishiya inyaniso?
19 Ngokwenyaniso uYehova unguThixo onesisa nenceba. Ukuba siza kuye ngokuzithoba nangokuguquka, uyaxolela aze alibale. Akasibambeli nqala ngonaphakade esigcinele ukuthuthunjiswa esihogweni somlilo ngenxa yazo. Kunjengokuba uYehova wathi: “Mna ndinguye ocima izikreqo zakho ngenxa yam, ndingazikhumbuli izono zakho.” Olunjani ukhuthazo oko okufanele kube lulo kwabo baye bayishiya inyaniso baza abalunanza ulwalamano lwabo noYehova! Nabo bayakhuthazwa ukuba bafune uYehova ngoku baze baphinde banxulumane ngokukhutheleyo kunye nabantu begama lakhe.—Isaya 43:25.
20, 21. (a) Nguwuphi umzekelo okhuthazayo esinawo kuYuda wamandulo? (b) Kwafuneka benze ntoni abemi bakwaYuda ukuze bafumane intsikelelo kaYehova?
20 Kule nkalo sinomzekelo okhuthazayo kaKumkani uAsa kwilizwe lamandulo lakwaYuda. Walubhangisa unqulo lobuxoki kubukumkani bakhe, kodwa kwabakho imizila esalayo yonqulo lobuhedeni. Ingxelo ekweyesi-2 yeziKronike 15, indinyana 2 ukusa kweye-4, isixelela oko umprofeti uAzariya wamkhumbuza kona uAsa: “UYehova unani ekubeni ninaye; ukuba nithe namquqela [namfuna, NW], nomfumana; ukuba nithe namshiya, wonishiya nani. AmaSirayeli ayenemihla emininzi engenaThixo wenyaniso . . . Ke athi ekubandezelekeni kwawo, akubuyela kuYehova, uThixo kaSirayeli, ukuba amquqele [amfune, NW], amfumana.”
21 UYehova akazange azifihle kuKumkani uAsa kodwa ‘wazenza wafumaneka.’ Wasabela njani lo kumkani kwesi sigidimi? Kwisahluko esifanayo, 2Kr 15 indinyana 8 neye-12 iyaphendula: “Wathi uAsa akuweva loo mazwi . . . , womelela, wazikhwelelisa zonke izinto ezinezothe ezweni lonke . . . wasihlaziya isibingelelo sikaYehova, esiphambi kweveranda kaYehova. [AmaYuda enza] umnqophiso wokumquqela [wokumfuna, NW] uYehova, uThixo wooyise, ngentliziyo yabo yonke, nangomphefumlo wabo wonke.” Ewe, amfuna ngokunyanisekileyo uYehova “ngentliziyo yabo yonke, nangomphefumlo wabo wonke.” Waba yintoni umphumo kolo hlanga? 2Kr 15 Indinyana 15 iyasixelela: “Asivuyela onke amaYuda isifungo eso; ngokuba afunga ngentliziyo yawo yonke amquqela [amfuna, NW] ngemvume yawo yonke, amfumana; uYehova wawaphumza ngenxa zonke.”
22. Yintoni esikhuthazayo ukuba sikhuthale ngoku kwinkonzo kaYehova?
22 Ngoku, ngaba oku akulokhuthazo lokuba sithabathe inyathelo elingqalileyo sonke ngokubhekisele kunqulo olunyulu lukaYehova? Siyazi ukuba kukho ithemba lokuba izigidi ezingakumbi ziza kuzukisa uYehova. Ngokungathandabuzekiyo abaninzi kuzo benza iinguqulelo kubomi babo ukuze buvisisane neemfuneko ezingokweZibhalo zokukhonza uYehova. Ukuqonda nokholo lwabanye luyakhula, bafuna uYehova, yaye kungekudala baya kushukunyiselwa ukwabelana ngentetho enyulu nabanye ngokudlulisela kubo ulwazi olunzulu lwenyaniso engoYehova noBukumkani bakhe. Yaye kutheni kubaluleke kangaka ukuba sonke sifune uYehova ngoku ngoxa esenokufunyanwa? Kungenxa yokuba ihlabathi elitsha alithembisileyo lisemnyango!—Isaya 65:17-25; Luka 21:29-33; Roma 10:13-15.
Uyakhumbula Na?
◻ Ngoobani ababonisa ukungamkha-thaleli uThixo wenyaniso, uYehova?
◻ Kungokufuthi ukusa kuwuphi umkhamo oluthi unqulo luchaphazele ihambo?
◻ Luluphi ulwando olungakumbi oluse-nokwenzeka kumaNgqina akhutheleyo?
◻ Kutheni ngoku ilixesha lenzondelelo nesenzo?
◻ Kutheni uYehova ekufanele ukufunwa?
[Umfanekiso okwiphepha 10]
Abaninzi abawathandayo amaNgqina kaYehova ababekho kwiSikhumbuzo basenokuba ngabakhonzi bakaThixo
Uziwo lweSikhumbuzo sowe-1990: 9 950 058
Incopho yabavakalisi yowe-1990: 4 017 213
[Umfanekiso okwiphepha 12]
Ngemihla kaKumkani uAsa, uhlanga lwabuyela kuYehova