Ubomi Nobulungiseleli BukaYesu

KuLwandle LwaseGalili

NGOKU abapostile babuyela eGalili, njengoko ngaphambilana uYesu ebebayalele ukuba benjenjalo. Kodwa abaqinisekanga ngoko bafanele bakwenze apho. Emva kwethutyana, uPetros uxelela uTomas, uNataniyeli, uYakobi nomzalwana wakhe uYohane nabanye abapostile ababini ukuba: “Ndiya kubambisa iintlanzi.”

Aba bathandathu baphendula bathi, “Nathi siyaya nawe.”

Ubusuku bonke, ababambisi nto. Noko ke, njengoko kuqalisa ukukhanya, uYesu uyabonakala elunxwemeni, kodwa abapostile abaqondi ukuba nguYesu. Uyakhwaza: “Bantwana, aninanto idliwayo na?”

Bengaphesheya bayaphendula bekhwaza bathi: “Hayi.”

Uthi, “Wuphoseni umnatha ngecala lasekunene lomkhombe, nofumana.” Yaye bakwenjenjalo, abakwazi kuwutsala umnatha wabo ngenxa yenkitha yeentlanzi. UYohane uyakhwaza: “YiNkosi.” UPetros ubhinqa ingubo yakhe yokwaleka, aziphose elwandle, aze adade malunga neemitha ezingamashumi asithoba ukuya elunxwemeni. Abanye abapostile bayalandela besiza ngomkhonjana, betsala umnatha ozele ziintlanzi.

Xa befika elunxwemeni, kukho umlilo wamalahle, kukho nentlanzi eyosiweyo, yaye kukwakho nesonka. UYesu uthi, “Zisani kwezo ntlanzi nizibambise ngokunje.” UPetros ukhwela kumkhonjana aze atsalele umnatha ngaphandle. Uzele ziintlanzi ezinkulu ezili-153!

UYesu uyabamema athi, “Yizani nomule.”

Akukho namnye unobuganga bokumbuza athi, “Ungubani na?” ngenxa yokuba bayazi ukuba nguYesu. Esi sisihlandlo sesixhenxe ebonakala emva kokuvuswa kwakhe, yaye kokwesithathu ebonakala kubapostile njengeqela. Ngoku ulungiselela isidlo sakusasa, enika ngamnye kubo isonka nentlanzi.

Xa begqiba ukutya, mhlawumbi uYesu esalatha kwiintlanzi ezininzi abazibambisileyo ubuza uPetros: “Simon kaYona, uyandithanda na ngaphezu [kwezi, NW]?” Mhlawumbi uthetha ukuba, Ngaba unamathele kwishishini lokuloba ngaphezu komsebenzi endikulungiselele ukuba uwenze?

UPetros uphendula athi, “Uyazi wena ukuba ndiyakuthanda.”

UYesu uphendula athi, “Dlisa amatakane am.”

Kwakhona, okwesihlandlo sesibini, uyabuza: “Simon kaYona, uyandithanda na?”

UPetros uphendula athi: “Ewe, Nkosi, uyazi wena ukuba ndiyakuthanda.”

Kwakhona uYesu umyalela athi, “Yalusa izimvu zam.”

Aze ke, okwesihlandlo sesithathu, ambuze: “Simon kaYona, uyandithanda na?”

Ngoku uPetros ubuhlungu. Kusenokuba uyazibuza enoba uYesu unamathandabuzo kusini na ngokunyaniseka kwakhe. Ngapha koko, xa kutshanje uYesu ebesenkundleni kuthethwa ityala elichaphazela ubomi bakhe, uPetros uye wamkhanyela ukuba uyamazi kangangezihlandlo ezithathu. Ngoko uPetros uthi: “Nkosi, uyazazi izinto zonke wena; uyaqonda wena ukuba ndiyakuthanda.”

UYesu ke okwesihlandlo sesithathu uyamyalela, “Dlisa izimvu zam.”

Ngaloo ndlela uYesu usebenzisa uPetros ukuze abethelele nakwabanye umsebenzi afuna ukuba bawenze. Kungekudala uza kuwushiya umhlaba, yaye ufuna ukuba bakhokele ekubeni ngabalungiseleli babo baya kungeniswa kwisibaya sikaThixo.

Kanye njengokuba uYesu wabanjwayo waza wagwetyelwa ukufa ngenxa yokuba wenza umsebenzi awayewuthunywe nguThixo, ngoku utyhila ukuba, uPetros uya kuba namava afanayo. UYesu umxelela oku: “Oko ubusemtsha ubuzibhinqisa ngokwakho, uhambe apho uthanda khona; kodwa xa uthe waluphala, uya kuzolula izandla zakho, ubhinqiswe ngomnye, akuse apho ungathandiyo.” Phezu kwako nje ukufa kokufel’ ukholo okulindele uPetros, uYesu umbongoza esithi: “Ndilandele.”

Akuba ejikile, uPetros ubona uYohane aze abuze: “Nkosi, lo woba yini na?”

UYesu uphendula athi: “Ukuba ndithi ndithande ukuba yena ahlale ndide ndifike, iyini na loo nto kuwe? Landela mna wena.”

Abafundi abaninzi bacinga ukuba la mazwi kaYesu athetha ukuba umpostile uYohane wayengasayi kuze afe. Noko ke, njengoko umpostile uYohane kamva wacacisayo, uYesu akazange athi wayengayi kufa, kodwa uYesu wasuka nje wathi: “Ukuba ndithi ndithande ukuba yena ahlale ndide ndifike, iyini na loo nto kuwe?” Yohane 21:1-25; Mateyu 26:32; 28:7, 10.

◆ Yintoni ebonisa ukuba abapostile abaqinisekanga ngoko bafanele bakwenze eGalili?

◆ Abapostile bamqonda njani uYesu kuLwandle lwaseGalili?

◆ Ngoku uYesu ubonakele izihlandlo ezingaphi ukususela ekuvusweni kwakhe?

◆ UYesu ukubethelela njani oko afuna abapostile bakwenze?

◆ UYesu uyibonisa njani indlela aya kufa ngayo uPetros?

◆ Ngawaphi amazwi awathethwa nguYesu ngoYohane awathi aqondwa phosakeleyo ngabafundi abaninzi?