IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w91 7/1 iphe. 20-23
  • ‘Ukuhlala Ndiyikhumbula Imini KaYehova’

No video available for this selection.

Sorry, there was an error loading the video.

  • ‘Ukuhlala Ndiyikhumbula Imini KaYehova’
  • IMboniselo Evakalisa UBukumkani BukaYehova—1991
  • Imixholwana
  • Amanqaku Afanayo
  • Inkonzo YaseBheteli
  • ISikolo Sobulungiseleli Sobuthixo
  • Ukuhambahamba
  • Ukufumana Iqabane
  • Ubungqina Bentsikelelo KaYehova
  • Ndisalinde Imini KaYehova
  • Ukuvakalisa Iindaba Ezilungileyo Engayeki (1942-1975)
    AmaNgqina KaYehova—Abavakalisi Bobukumkani BukaThixo
  • Inkonzo Yexesha Elizeleyo—Apho Iye Yandikhokelela Khona
    IMboniselo Evakalisa UBukumkani BukaYehova 2014
  • Ubomi Obutyebileyo Enkonzweni KaYehova
    IMboniselo Evakalisa UBukumkani BukaYehova—2001
  • Ubomi Bam Kwintlangano Eyalathiswa Ngumoya KaYehova
    IMboniselo Evakalisa UBukumkani BukaYehova—1988
Khangela Okunye
IMboniselo Evakalisa UBukumkani BukaYehova—1991
w91 7/1 iphe. 20-23

‘Ukuhlala Ndiyikhumbula Imini KaYehova’

NGOKUBALISWA NGULYLE REUSCH

KWAKUDALADALA, ubomi bentsapho yakowethu babusekelwe kwinkolelo eyomeleleyo yokuba kukho ihlabathi elitsha lobulungisa elizayo. Umama notata babedla ngokusifundela thina bantwana eBhayibhileni ‘ngamazulu amatsha nomhlaba omtsha’ nangokuba ‘inkomo nebhere ziya kudla ndawo-nye, ingonyama idle umququ njengenkomo, nomntwana aziqhube ezo zinto.’ Ekubeni oku babekwenza kube yinto yokwenene, ndandizithelekelela ndinguloo mntwana.—2 Petros 3:11-13; Isaya 11:6-9.

Ngeminyaka yee-1890 utatomkhulu, uAugust Reusch, wafunda iinyaniso ezisisiseko zeBhayibhile ngokubhalelana noCharles T. Russell. Wayeshumayela kakhulu kwimimandla engqonge ikhaya lakhe kummandla okuMntla-Ntshona weKhanada, ngoku oyiYorkton, eSaskatchewan. Wayedla ngokubaluleka oonyana bakhe athi: “Boonyana, mlumkeleni u-1914!” Ulweyiseko lokuba imini kaYehova yayisondele lwamfaka imvo yongxamiseko utata eyaqhubeka ubomi bakhe bonke yaye leyo iye yayindlela endiphila ngayo.

Umama notata babe bububele bumntwisiwe. Iqela elifundisisa iBhayibhile lebandla laseSaskatoon, eSaskatchewan, labaFundi beBhayibhile lalihlanganisana rhoqo ekhayeni lethu. Abalungiseleli abahambahambayo (ababebizwa ngokuba ngabahambi ngezonqulo) ngokufuthi babehlala ekhaya. Mna nomnakwethu, uVerne, nodade wethu, uVera, sasingenelwa ngokomoya. Isigidimi soBukumkani sasisoloko siyinto yokwenene yaye kwakukho nemfuneko engxamisekileyo yokuba sixelele abanye. (Mateyu 24:14) Ndandingazi ukuba kwiminyaka ezayo ndandiya kuchitha inxalenye enkulu yobomi bam ndiqhubeka nomsebenzi waba bahambi ngezonqulo ngokukhonza njengomveleli ohambahambayo wamaNgqina kaYehova.

Ngowe-1927, intsapho yakowethu yafudukela eBerkeley, eKhalifoniya. Ngoko, ngexesha lokudodobala kwezoqoqosho ngowe-1933, ndaphumelela kwisikolo samabanga aphakamileyo. Mna nomnakwethu, uVerne, sazigqala sinethamsanqa ukufumana umsebenzi kumzi-mveliso oseRichmond, eKhalifoniya, weNkampani yakwaFord eyenza iiNqwelo-mafutha. Noko ke, ngaminazana ithile ngentwasahlobo yowe-1935, ndacingisisa: ‘Ukuba ndimele ndisebenze nzima, kulunge ngakumbi ukuba ndisebenze nzima ndisebenzela into exabisekileyo.’ Ngaloo mini ndayeka emsebenzini, ndaza ngosuku olulandelayo ndabhala ndacela ifomu yesicelo sokukhonza eBheteli, ikomkhulu lehlabathi lamaNgqina kaYehova, eBrooklyn, eNew York. Ngemva kokuya kwindibano echulumancisayo eWashington, D.C., ngoJuni 1935, ndamkelwa kwinkonzo yaseBheteli.

Inkonzo YaseBheteli

UNathan Knorr, umphathi womzi-mveliso, wandinika umsebenzi wokunyamekela isakhiwo. Ndandingokuphela komntu owayesenza lo msebenzi. Njengomfana oneminyaka engama-20 ubudala, ndandiziva ndibaluleke ngokona kona. Ndandinokuya apho ndithanda khona kumzi-mveliso, yaye kungekho bani undibuzayo ukuba ndenza ntoni na. UMzalwana uKnorr wayeyixabisa indlela endandiwenza ngayo umsebenzi wam, kodwa waphawula ingxaki kwisimo sengqondo. Wathi ngcembe ezama ukundinceda ukuba ndihlakulele ukuzithoba.

Noko ke, kwathabatha ithutyana ngaphambi kokuba ndiqonde ukuba uMzalwan’ uKnorr wayezama ukundinceda. Ngoko ndangxengxeza ngesimo sengqondo endandinaso ndaza ndavakalisa uzimiselo lokuphucula. Eso yaba sisiqalo solwalamano olude nolusenyongweni noMzalwan’ uKnorr, owathi ngoJanuwari 1942 waba ngumongameli wesithathu weWatch Tower Society.

Ngaphandle kokwenza umsebenzi wokulungisa, ndafunda ukusebenzisa abaninzi koomatshini abakwisebe lokudibanisa iincwadi okanye ukuncedisa kubo. Ekuhambeni kwethuba ndenza umsebenzi waseofisini, ndibhala ndize ndithumele imiyalelo kuwo wonke umzi-mveliso. Intwasahlobo nehlobo lowe-1943 laba lixesha elixakeke nelichulumancisa ngokukodwa. Ihlabathi lalithe bhakaxa eMfazweni Yehlabathi II, yaye amaNgqina kaYehova ayenyamezela ukuphathwa kakubi, ukubanjwa nezigwebo zokuvalelwa entolongweni ngazo zonke iindidi zezityholo ezingekho sikweni. Ngowe-1940 iNkundla Ephakamileyo yaseUnited States yawisa isigqibo sokuba izikolo zazinokunyanzelisa ukuba abafundi bakhahlele indwe. Oku kwaphembelela ugonyamelo kumazwana angama-44 kwangama-48 ayekho ngoko. Abantwana bamaNgqina bagxothwa ezikolweni, abazali babanjwa yaye amahlokondiba awakhuphela ngaphandle kweedolophu amaNgqina. Abantu babedutyulwa, abanye babeqatywa itela baze bafakwe iintsiba.

Njengoko amaNgqina kaYehova ayeziphendulela ezinkundleni, imiqulu yeesamani, amaxwebhu asuka emagqwetheni neencwadi eziphuma kwicandelo elijongene nezomthetho loMbutho zazifikela kum ukuze zishicilelwe. Sonke sasebenza iiyure ezininzi zexesha elongezelelekileyo ukuze sikwazi ukufikelela amaxesha amisiweyo. Izigwebo ezawiswa yiNkundla Ephakamileyo ngoMeyi nangoJuni wowe-1943—xa kumatyala ali-13 ali-12 agwetywa ngokuvumelana namaNgqina kaYehova—ziyinxalenye yembali engokwasemthethweni. Ndinombulelo kuba ndiye ndazibonela indlela uYehova awayivula ngayo indlela yokuzikhusela nokuzimela ngokusemthethweni iindaba ezilungileyo.—Filipi 1:7.

ISikolo Sobulungiseleli Sobuthixo

Ngeendlela ezithile ngezo mini sasingawuxhobelanga kakuhle umsebenzi omkhulu oxelwe kusengaphambili kuMateyu 24:14, ongulo, ‘ukuvakalisa iindaba ezilungileyo zoBukumkani emhlabeni wonke ngaphambi kokufika kwesiphelo.’ UMzalwan’ uKnorr, njengomongameli woMbutho, wabona imfuneko yocwangciso lokufundisa. Kunye namanye amalungu entsapho yaseBheteli angamadoda, ndafumana isimemo sokubhalisa “KwiSikolo Semfundo Enenkqubela Yobulungiseleli Bobuthixo.” Esi sathi ekugqibeleni saba siSikolo Sobulungiseleli Sobuthixo, ebesisebenza kumabandla amaNgqina kaYehova ukususela ngowe-1943.

Sahlanganisana kwigumbi lokuhlanganisana lentsapho yaseBheteli ngengokuhlwa yangoMvulo, ngoFebruwari 16, 1942, waza uMzalwan’ uKnorr wanikela intetho yokuyala yokuqala. Umxholo wakhe wawusithi “Imibhalo-ngqangi yeBhayibhile.” UMzalwana uT. J. Sullivan wayengumveleli wesikolo yaye wasinika isiluleko ukusinceda siphucule. Ekuhambeni kwethuba ndanikwa esi sabelo somveleli wesikolo waseBheteli, endandisigqala njengelungelo elikhulu. Kodwa labuya lafika ixesha lokululekwa.

Ndandigxeke ngokugqithiseleyo kwaye ndingabonakalisanga ntlonelo ekululekeni umzalwana osel’ ekhulile, waza ke uMzalwan’ uKnorr ngokungafihlisi wandixelela oku: “Akukho mntu ukuthandayo oku kulisebenzisa kwakho kakubi igunya.” Akuba ewucacise kakuhle lo mbandela neendlebe zam zibomvu ngokwaneleyo, amehlo kaMzalwan’ uKnorr amakhulu agwangqa abonakalisa uncumo. Ngelizwi lobubele, wandifundela INdumiso 141:5: “Malindibethe ilungisa linenceba, lindohlwaye; ioli enjalo yentloko ayingeyali intloko yam.” Ndiye ndasisebenzisa izihlandlo ezininzi eso sibhalo xa kusiba yimbopheleleko yam ukunikela isiluleko sokulungisa abanye.

Ngaphambi kokuqalisa kweSikolo Sobulungiseleli Sobuthixo, bambalwa kuthi ababeba nethuba elininzi lokuthetha esidlangalaleni. Akuba efile uMzalwan’ uRutherford, uMzalwan’ uKnorr wasebenza nzima ezama ukuphucula ubuchule bakhe bokuthetha. Igumbi lam laseBheteli lalingaphantsi kwelakhe ngqo, yaye ndandinokumva eqhelisela intetho yakhe. Izihlandlo ezininzi, wayeyifunda ngokuvakalayo intetho yesidlangalala ethi “Uxolo—Ngaba Lunokuhlala Luhleli?” ngaphambi kokuba ayinikele kwindibano eyayiseCleveland ngowe-1942.

Ukuhambahamba

Emva kokukhonza iminyaka eli-13 eBheteli, uMzalwan’ uKnorr wandabela ukuya kukhonza entsimini njengomveleli wesithili. Xa wayendichazela ngesabelo sam esitsha, wathi: “Lyle, nali ithuba lakho lokuzibonela ngawakho amehlo indlela uYehova aqhubana ngayo nabantu bakhe.” Ndicinga ngoku yaye ndiphethe iisutikeyisi ezimbini, ndaqalisa umsebenzi wam njengomveleli ohambahambayo ngoMeyi 15, 1948. Ngaphambi kokuqalisa umsebenzi wasesithilini, ndakhonza njengomveleli wesiphaluka iinyanga ezimbalwa.

Ibandla lokuqala endalityelelayo yayilibandla elincinane nelisemaphandleni eWaseca, eMinnesota. Ndandibhalele uDick Cain, isicaka sebandla (njengoko umveleli owongamelayo wayesaziwa ngoko), kusengaphambili ukuze andikhawulele kuloliwe. Wayenguvulindlela okhethekileyo, yaye ukucutha iindleko, wayesandul’ ukuphuma kwindlu awayeyiqeshile, awayehlala kuyo ebusika, ehlala kwindlu yakhe yasehlotyeni, intente. Noko ke, eMinnesota akukho sehlotyeni ncam ngoMeyi! Ngobo busuku, ndixhaxha ententeni, ndazibuza enoba babundifanele na obu bomi. Ndahlaselwa yingqele ngamandla kangangeeveki eziliqela, kodwa ndaphila.

Ebudeni baloo minyaka yokuqala xa ndandityelela amabandla neziphaluka ezahlukahlukeneyo, ndandihlala emizini yabazalwana yaye ndingunothwal’ impahlana. Ndahlala kuzo zonke iindidi zeendawo zokuhlala, kuquka ukulala phantsi kwigumbi lokuphekela, kwizingqengqelo zegumbi lokuphumla, kumagumbi aphantsi kophahla ashushu nangenamoya. Maxa wambi ndandihlala kumakhaya ekukho kuwo ilungu lentsapho elizichasileyo iinkolelo zethu. EWisconsin indoda engakholwayo yandijamela iveki yonke njengoko ndandingena ndiphuma. Xa ngobunye ubusuku yafika ekhaya inxilile, ndaza ndayiva igrogrisa “ngokumdubula laa nantsika,” ndagqiba kwelokuba yayilixesha lokuba ndihambe. Kodwa amava angathandekiyo ayengemaninzi yaye ayesinonga nje kuphela isabelo sam. Ayeyinto nje yokuhlekwa kamva.

Ukufumana Iqabane

Ndisakhumbula kakuhle. Kwindibano yesiphaluka eTiffin, eOhio, ndadibana nenenekazi elihle, elinamehlo agwangqa neliselula, uLeona Ehrman, elalisuka eFort Wayne, eIndiana. Naye wayekhuliselwe kukholo lwamaKristu yaye wayenguvulindlela othembekileyo kangangeminyaka eliqela. Ngenxa yokuba ndandisoloko ndisendleleni akuzange kube lula ukuthandana, kodwa sasibhalelana. Kwandula ke, ngowe-1952, ndambuza, “Ngaba uyavuma?” waza wathi, “Ewe, ndiyavuma!” saza ke senjenjalo. Satshata. Siye sabuzwa ngokufuthi isizathu sokuba singazinzi size sibe nekhaya nentsapho, kodwa sithi sinayo intsapho—abantakwethu, oodade, oobawo noomama kumazwana angama-44 esiye sakhonza kuwo.—Marko 10:29, 30.

Abanye baye babuza, ‘Ngaba anizange khe nidinwe nize nifune ukuyeka?’ Ewe, ngaphezu kwesihlandlo esinye. Kodwa njengokuba sisobabini, xa omnye edinwa, omnye uyamphakamisa. Ngasihlandlo sithile ndade ndabhalela umnakwethu, uVerne, ndimbuza ukuba akunakwenzeka na ukuba ndisebenze naye kwishishini lakhe lokupeyinta. Waphendula wathi kudala ekulangazelela oko ngenxa yendlela esasingumtya nethunga ngayo ekukhuleni kwethu. Noko ke, wandiluleka ukuba ndisicingisise nzulu isigqibo sam. Ndaza ke ndakhumbula amazwi uMzalwan’ uKnorr awayesoloko elilisela ngawo kwintsapho yaseBheteli: “Akungomgudu ukuyeka; kufuneka inkalipho nengqibelelo ukuze uhlale kwisabelo sakho.” Elo yayiselicebiso elilungileyo.

Akukho mveleli uhambahambayo utshatileyo unokunamathela ithuba elide kangaka kwisabelo sakhe ngaphandle komfazi onyanisekileyo nonenkxaso, njengokuba uLeona eye wanjalo kum. Ubuntu bakhe bobubele nobothando nesimo sengqondo sodlamko ngamaxesha onke emabandleni buye bamenza wathandwa ngabaninzi. Andize ndidinwe kukumxelela indlela endimthanda ngayo. Ndiqinisekile, oko kuyamnceda ukuba naye anamathele emsebenzini.

Ubungqina Bentsikelelo KaYehova

Umsebenzi oyintloko womveleli wesithili usezindibanweni zesiphaluka, apho aba ngusihlalo veki nganye, anikele intetho yesidlangalala aze abe ngumveleli wesikolo. Intsikelelo kaYehova kweli lungiselelo ibonakala kwisibakala sokuba kwiindibano zesiphaluka ezingamakhulu endiye ndazivelela, akukho nanye engazanga iqhubeke. Liyinyaniso elokuba, ezinye zaziphazanyiswa, kodwa akukho nanye eyakhe yarhoxiswa.

EWooster, eOhio, ngentwasahlobo yowe-1950, njengoko ndandibiza ingoma yokuqukumbela yocwangciso lwangokuhlwa ngoMgqibelo, kwahlanganisana ihlokondiba labachasi abangaphezu kwewaka ngaphandle kweholo indibano eyayikuyo. Eli hlokondiba lalize neebhokisi zamaqanda abolileyo ukuze lisigibisele ngawo xa siphuma. Ngoko sayijonga le meko saza saqhubeka nocwangciso ngeengoma, amava, neentetho ezazingalungiselelwanga kwangaphambili zeBhayibhile. AmaNgqina angaphezu kwama-800 awayekho ahlala ezolile nangomonde.

Ngeye-2:00 a.m., ingqele yayiqhaqhazelisa amazinyo. Ngokungathi silungiselela ukuphuma abalindi baphuma nemibhobho yokucima umlilo baza bahlamba amaqanda awayophukele kwindledlana engaphambili. Ihlokondiba lahlanganisana kwakhona, liphuma kwindawo yooduladula efudumeleyo ekufutshane. Kodwa oko kwakusenziwa ngabalindi kwakukukuphazamisa nje, yaye sabakhulula abaphulaphuli baphuma ngokuzolileyo ngomnyango ongasemva. Bonke bafika bekhuselekile kwiinqwelo-mafutha zabo. Nakwezinye iindibano zaseOhio, eCanton, eDefiance naseChillicothe amahlokondiba aphazamisa. Kodwa ugonyamelo lwamahlokondiba lwaluphela, njengoko izigqibo ezivumelana nathi ezaziwiswa yiNkundla Ephakamileyo yaseUnited States zathi zabachaphazela abangenamthetho.

Ekuhambeni kwexesha iingxaki zempilo zabangela utshintsho lwayimfuneko. Ngoko phakathi kwiminyaka yee-1970, ngobubele uMbutho wandabela ukuba ngumveleli wesiphaluka kummandla osemzantsi Khalifoniya apho amabandla asondeleleneyo yaye neendawo zokunyamekela iimpilo zifumaneka ngokukhawuleza. Ngoxa imisebenzi yomveleli wesithili ibandakanya ukuhamba kakhulu nokunyamekela nokuvelela iziphaluka ezininzi, imisebenzi yomveleli wesiphaluka ibandakanya ukulungiselela iindibano zesiphaluka nokwaba nokuhlola iinxalenye zocwangciso. Ukongezelela, kumele kulungiselelwe iZikolo Zenkonzo Zobuvulindlela zize ziqhutywe. Ngoko umsebenzi wokuba ngumveleli ohambahambayo, enoba ngowesithili okanye ngowesiphaluka, yindlela yobomi yexesha elizeleyo nenomvuzo.

Ndisalinde Imini KaYehova

Kwakudaladala ngaphezu kweminyaka engama-70 edluleyo, bendisoloko ndinemvo yongxamiseko. Ngokokucinga kwam, iArmagedon ibisoloko ingomsomnye. (ISityhilelo 16:14, 16) Ngokufanayo notata, noyise ngaphambi kwakhe, ubomi bam ndiye ndabuphila njengoko umpostile wabongozayo, “nihlale nikukhumbula ukufika kwemini kaYehova.” Ihlabathi elitsha elithenjisiweyo bendisoloko ndilijonga ‘njengelokwenene nangona lingabonwa.’—2 Petros 3:11, 12, NW; Hebhere 11:1, NW.

Olu lindelo lwabethelelwa kum ukususela ebusaneni luza kuzaliseka kungekudala. “Ithokazi lenkomo nemazi yebhere ziya kudla utyani ndawonye,” “ingonyama idle umququ njengenkomo,” aze ‘umntwana aziqhube ezo zinto.’ (Isaya 11:6-9) Amadinga afudumez’ intliziyo anjalo aqinisekiswa ngamazwi kaYesu kuYohane akwiSityhilelo 21:5: “Lowo uhleli phezu kwetrone wathi, Uyabona, izinto zonke ndizenza ntsha. Athi kum, Bhala; ngokuba lawo ngamazwi ayinyaniso, athembekileyo.”

[Picture of Lyle and Leona Reusch on page 23]

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share