Imibuzo Evela Kubafundi
◼ Kwakutheni ukuze uYesu asungule iSikhumbuzo nabapostile kuphela kungekhona nabanye abafundi ababeya kungeniswa kumqophiso omtsha?
Kubonakala ngathi lo mbuzo usekelwe kwingcamango ephosakeleyo yokuba uYesu wahlanganisana nabapostile bakhe ngobo busuku ukuze baqalise iSidlo seNkosi Sangokuhlwa nebandla lamaKristu athanjisiweyo awayesele ekumnqophiso omtsha. Kunoko, ngoNisan 14, ngowama-33 C.E., ibandla lamaKristu lalingekasekwa, yaye uYesu wahlanganisana nabapostile bakhe ukuze baqhube isidlo saminyaka le sePasika yamaYuda.
Kambe ke, uYesu wayenabo abanye abafundi ngaphandle kwabapostile bakhe abaziwayo abali-12. Kunyaka ngaphambi kokufa kwakhe, wathumela abafundi abangama-70 kukhenketho lokushumayela. Emva kokuvuka kwakhe, “wabonwa ngaxesha linye ngabazalwana abangaphezu kwamakhulu amahlanu.” Yaye kwakukho abafundi ‘abangathi likhulu elinamanci amabini’ ababehlanganisene ngePentekoste. (1 Korinte 15:6; IZenzo 1:15, 16, 23; Luka 10:1-24) Kodwa makhe sicinge ngeqela elalinoYesu xa wayeqalisa isidlo saminyaka le esaziwa ngokuba siSidlo seNkosi Sangokuhlwa.
ULuka 22:7, 8 usithela thsuphe ngexesha, esithi: “Wafika ke umhla wezonka ezingenagwele, ekwakumele ukuthi ngawo kubingwe imvana yepasika. Wesusa [ethuma, NW] uPetros noYohane, wathi, Hambani niye kusilungisela ipasika, ukuze sidle.” Le ngxelo ihlabela mgama ize ithi: “Nothi kumninindlu, Uthi uMfundisi kuwe, Liphi na igumbi labahambi, apho ndingadlela khona ipasika nabafundi bam?” Ngoko ngobo busuku uYesu wayekunye nabali-12 ukuze enze umsitho wamaYuda. Wabaxela: “Asikuko nokuba ndinqwenile ukuyidla nani le pasika, ndingekabuva ubunzima.”—Luka 22:11, 15.
Ekuqalisweni kwayo eYiputa, iPasika yayingumsitho wentsapho. Eqalisa iPasika, uThixo waxelela uMoses ukuba kwakufanele kuxhelwe ixhwane kwindlu nganye. Ukuba intsapho yayincinane gqitha ukuba ingalitya lonke elo xhwane, kwakunokumenywa intsapho engabamelwane ukuze balidle bonke elo xhwane. Ngaloo ndlela, kusengqiqweni ukucinga ukuba ngePasika yowama-33 C.E., inkoliso yabafundi bakaYesu ngokuqhelekileyo babeya kuhlanganisana neentsapho zabo kwesi sidlo.
Kodwa uYesu ‘wayenqwenile’ ukuyidla iPasika yokugqibela engokomthetho, nobusuku bokugqibela ngaphambi kokufa kwakhe, nabona balandeli bakhe basondeleyo, ababehambe naye kwinkoliso yohambo lobulungiseleli bakhe. Ekuqukunjelweni kweso sidlo sePasika, uYesu wabaxelela ngomsitho omtsha ekwakufuneka uqhutywe ngabo bonke abalandeli bakhe kwixesha elizayo. Iwayini eyayiza kusetyenziswa kweso sidlo samaKristu sexesha elizayo yayiya kumela igazi ‘lomnqophiso omtsha’ owawuza kuthabathel’ indawo umnqophiso woMthetho.—Luka 22:20.
Noko ke, ngobusuku bukaNisan 14, ngowama-33 C.E., umnqophiso omtsha wawungekasebenzi, kuba idini elaliwenza ube ngowamkelekileyo ngokomthetho—uYesu—lalingekanikelwa. Umnqophiso woMthetho wawusasebenza. Wawungekabethelelwa emthini. Ngaphezu koko, kwakungayi kucaca de kube ngumhla wePentekoste ukuba umnqophiso omdala noSirayeli wokwemvelo uye wathatyathelwa indawo ngumnqophiso omtsha noSirayeli wokomoya.—Galati 6:16; Kolose 2:14.
Ngenxa yoko, apostile ababethembekile abali-11 okanye nabanye abafundi babengekho kumnqophiso omtsha ngobo busuku. Yaye uYesu wayengabonakalisi ukungabamkeli abanye abafundi bakhe ababengamaYuda ngokubayeka bahlanganisane neentsapho zabo ukukhumbuza iPasika.