Ukubonakalisa “Konke Ukulunga”
“Isiqhamo sokukhanya sikuko konke ukulunga.”—EFESE 5:9, NW.
1, 2. Ngawaphi amaqela amabini ebekho ukususela kumaxesha amandulo, yaye zahluke njani iimeko zawo namhlanje?
EMVA kwemvukelo yase-Eden, kwiminyaka enokuba ngamawaka amathandathu eyadlulayo, yaye kwakhona emva koMkhukula womhla kaNowa, abantu bahlukana bangamaqela amabini, okanye iintlangano, enye yayibunjwa ngabo babezabalazela ukukhonza uYehova, enye ngabo babelandela uSathana. Ngaba ezi ntlangano zisekho? Ngokuqinisekileyo zisekho! Umprofeti uIsaya wakhankanya la maqela mabini waza waxela kusengaphambili imeko yawo kumhla wethu esithi: “Uyabona, ubumnyama buwugubungele umhlaba, isithokothoko sizigubungele izizwe; ke kuwe uYehova uthe chapha, ubuqaqawuli bakhe bubonakele phezu kwakho.”—Isaya 60:1, 2.
2 Ewe, umahluko phakathi kwezi ntlangano zimbini mkhulu njengalowo uphakathi kobumnyama nokukhanya. Yaye kanye njengokuba ilitha lokukhanya liya kutsala umntu olahleke ebumnyameni, ngokufanayo ukukhanya okuvela kuYehova okukhanya kweli hlabathi lisebumnyameni kuye kwatsala izigidi zabantu abantliziyo zilungileyo ukuba beze kwintlangano kaThixo. Kunjengokuba uIsaya wahlabela mgama wathi: “Ziya kuhamba iintlanga [ezinye izimvu] zize ekukhanyeni kwakho, ookumkani [iindlalifa zoBukumkani ezithanjisiweyo] beze ebumhlotsheni bokuthi chapha kwakho.”—Isaya 60:3.
3. AmaKristu abubonakalisa njani ubuqaqawuli bukaYehova?
3 Abantu bakaYehova babubonakalisa njani ubuqaqawuli bukaYehova? Phakathi kwezinye iindlela, bashumayela iindaba ezilungileyo zoBukumkani bukaThixo basezulwini obumiselweyo. (Marko 13:10) Kodwa ngaphezu koko, baxelisa uYehova, umzekelo ophambili wokulunga, yaye ngaloo ndlela ngehambo yabo batsalela abalulamileyo ekukhanyeni. (Efese 5:1) UPawulos wathi: “Naye nifudula nibubumnyama, ke ngoku nikukukhanya, niseNkosini nje; hambani ke ngokwabantwana bokukhanya.” Waza wahlabela mgama wathi: “Isiqhamo sokukhanya sikuko konke ukulunga nobulungisa nenyaniso. Nicikida ukuba yintoni na ekholekileyo kakuhle kwiNkosi; kanjalo musani ukuba nabudlelane ngemisebenzi yobumnyama engenasiqhamo.” (Efese 5:8-11, NW) Wayethetha ukuthini uPawulos ngokuthi “konke ukulunga”?
4. Kuyintoni ukulunga, yaye kubonwa njani kumKristu?
4 Njengoko inqaku lethu elandulelayo libonisile, ukulunga kuluphawu lokubalasela ngemikhwa emihle, ukuba ngolungileyo. UYesu wathi nguYehova kuphela olunge ngokupheleleyo. (Marko 10:18) Sekunjalo, umKristu unokumxelisa uYehova ngokuhlakulela ukulunga okusisiqhamo somoya. (Galati 5:22) Igqabaza ngegama elithi a·ga·thosʹ, igama lesiGrike elithetha “ukulunga,” iVine’s Expository Dictionary of Old and New Testament Words ithi, “lichaza into elunge ngokusisiseko okanye ngendlela eyenziwe ngayo, into ezisa imiphumo eyingenelo.” Ngoko ke umKristu ohlakulela ukulunga uya kuba ngolungileyo yaye uya kwenza okulungileyo. (Thelekisa iDuteronomi 12:28.) Kwakhona uya kuziphepha izinto ezichasene nokulunga, ‘imisebenzi yobumnyama engenasiqhamo.’ Iindlela ezahlukahlukeneyo umKristu anokukubonakalisa ngazo ukulunga zikuko “konke ukulunga” uPawulos awakukhankanyayo. Ziziphi ezinye zezi?
“Yenza Okulungileyo”
5. Luluphi olunye uhlobo lokulunga, yaye kutheni umKristu efanele aluhlakulele?
5 Kwincwadi yakhe eya kwabaseRoma uPawulos wabhekisela kwenye yezi. Ethetha ngokuzithoba ‘kumagunya awongamileyo,’ wathi: “Unga akungeloyiki na ke igunya? Yenza okulungileyo, wodunyiswa kwalilo.” “Okulungileyo” abhekisela kuko kukuthobela imithetho nemigaqo yamagunya ehlabathi. Kutheni umKristu efanele azithobe kuwo? Ukuze aphephe ungquzulwano olungeyomfuneko namagunya, ngaloo ndlela ezibeka esichengeni sokohlwaywa yaye—okubaluleke ngakumbi—ukuze alondoloze isazela esicocekileyo phambi koThixo. (Roma 13:1-7) Ngoxa ngokuyintloko elondoloza ukuzithoba kwakhe kuYehova, umKristu ‘uyambeka ukumkani,’ engawavukeli amagunya uYehova uThixo awavumeleyo ukuba abekho. (1 Petros 2:13-17) Ngale ndlela, amaKristu angabamelwane abalungileyo, abemi abalungileyo nemizekelo elungileyo.
Ukuba Nolwazelelelo Ngabanye
6. (a) Yiyiphi enye inkalo yokulunga? (b) Ngoobani ekuthiwa eBhayibhileni sifanele sibe nolwazelelelo kubo?
6 Ukulunga kukaYehova kubonakaliswa ngokulungiselela kwakhe bonke abemi bomhlaba “imvula evela ezulwini, namaxesha aneendyebo.” Oku kuphumela ‘ekwaneleni kukudla nayimihlali’ yaye kumbonisa enguThixo onolwazelelelo ngokwenene. (IZenzo 14:17) Kule nkalo sinokumxelisa ngokubonakalisa ulwazelelelo kwabanye ngeendlela ezincinane nezinkulu. Sinokukubonakalisa koobani, ngokukhethekileyo? UPawulos ubhekisela kubadala ngokukhethekileyo, “ababulalekayo phakathi kwenu, abanongamelayo eNkosini, abanilulekayo.” Ubongoza amaKristu ukuba ‘ababeke ngokugqithiseleyo kakhulu ukubathanda [ukubazelelela, NW], ngenxa yomsebenzi wabo.’ (1 Tesalonika 5:12, 13) Sinokukwenza njani oku? Ngokusebenzisana ngokupheleleyo nabo—ngokomzekelo, ngokuba nesabelo kumsebenzi oyimfuneko kwiHolo yoBukumkani. Nangona ngalo lonke ixesha siziva sikhululekile ukuya kubadala ukuze sifumane uncedo xa silufuna, asifanele sifune okungaphaya kwamandla abo ngokungekho ngqiqweni. Kunoko, ngazo zonke iindlela esikwazi ngazo, sizama ukuwunciphisa umthwalo waba balusi basebenza nzima, inkoliso yabo eneembopheleleko zentsapho ukongezelela kwimisebenzi yabo yebandla.
7. Sinokulubonakalisa njani ulwazelelelo ngabakhulileyo?
7 Abakhulileyo nabo bayalufuna ulwazelelelo lwethu. Umyalelo ocacileyo woMthetho kaMoses wawusithi: “Suka ume ebusweni bengwevu, ububeke ubuso bexhego [ube nolwazelelelo, NW], umoyike uThixo wakho: ndinguYehova.” (Levitikus 19:32) Lunokubonakaliswa njani olu lwazelelelo? Abaselula ngokuzithandela basenokubanceda ngokuya kubathengela izinto okanye ngokubenzela eminye imisetyenzana. Abadala ngolwazelelelo basenokuhlolisisa enoba kukho abakhulileyo abafuna uncedo lokuza ezintlanganisweni. Ezindibanweni, abantu abaselula nabasenamandla basenokukuphepha ukutyhiliza abantu abadala abacothayo bezama ukudlula ngokungenamonde, yaye basenokuba nomonde ukuba umntu okhulileyo uyalibazisa ukuhlala phantsi okanye ukuthabatha ukudla
8. Sinokulubonakalisa njani ulwazelelelo kwelinye iqela elichazwe ngokukhethekileyo eBhayibhileni?
8 Umdumisi ukhankanya elinye iqela elifuna ukuboniswa ulwazelelelo esithi: “Hayi, uyolo lwalowo unyamekela [wazelelela] ihlwempu!” (INdumiso 41:1) Kusenokuba lula ukuba nolwazelelelo kwababalaseleyo okanye abazizityebi, kodwa kuthekani ngabaphantsi okanye abangamahlwempu? Umbhali weBhayibhile uYakobi wabonisa ukuba ukubonisa ulwazelelelo ngokufanayo kwaba luvavanyo lobulungisa bethu nothando lobuKristu. Ngamana singaluphumelela olu vavanyo ngokubacingela abantu bonke zingakhathaliseki iimeko zabo.—Filipi 2:3, 4; Yakobi 2:2-4, 8, 9.
“Yibani Nenceba”
9, 10. Kutheni amaKristu efanele abe nenceba, yaye olu hlobo lokulunga lunokubonakaliswa njani?
9 Olunye uhlobo lokubonakalisa ukulunga lubonwa kweminye yemizekeliso kaYesu. Komnye wale, uYesu wabalisa ngomSamariya owadibana nendoda eyayiphangiwe, ibethwe kanobom yaza yashiywa ilele endleleni. UmLevi nombingeleli badlula ngakuloo ndoda ingxwelerhekileyo, bala ukuyinceda. Kodwa umSamariya wema waza wayinceda, esenza okungaphezu kokwakusenokulindelwa ngokusengqiqweni. Eli bali lidla ngokubizwa ngokuba ngumzekeliso womSamariya Olungileyo. Kukuphi ukulunga okwabonakaliswa ngulo mSamariya? Yinceba. Xa uYesu wacela ukuba abaphulaphuli bakhe bachaze lowo owaba ngummelwane walo ndoda yayingxwelerhiwe, kwanikelwa impendulo echanileyo: “Ngulowo wamenzela inceba.”—Luka 10:37.
10 AmaKristu anenceba axelisa uYehova, uMoses awathi ngaye kumaSirayeli: “NguThixo onemfesane [onenceba, NW] uYehova uThixo wakho; akayi kukuyekela, akayi kukonakalisa, akayi kuwulibala umnqophiso wooyihlo awabafungelayo.” (Duteronomi 4:31) UYesu wabonisa indlela inceba kaThixo emele isichaphazele ngayo: “Yibani nenceba, njengokuba naye uYihlo enenceba.” (Luka 6:36) Sinokuyibonakalisa njani inceba? Njengoko umzekeliso kaYesu wabonisa, enye indlela kukulungela ukunceda abanye, kwanokuba oko kuthetha ukuzibeka esichengeni okanye akuyi kusilungela ngandlel’ ithile. Umntu olungileyo akayi kungakusi so ukubandezeleka komzalwana wakhe ukuba ukwimeko yokwenza okuthile ngako.—Yakobi 2:15, 16.
11, 12. Ngokutsho komzekeliso kaYesu wabakhonzi, yintoni equkwa yinceba, yaye sinokukubonakalisa njani oku namhlanje?
11 Omnye umzekeliso kaYesu wabonisa ukuba ukulunga okunenceba kuquka ukukulungela ukuxolela abanye. Wabalisa ngomkhonzi owayenetyala leetalente ezingamawaka alishumi enkosini yakhe. Ekubeni wayengakwazi ukuhlawula, lo mkhonzi wacela ukwenzelwa inceba, yaye inkosi yakhe ngobubele yamxolela elo tyala leedenariyo ezingama-60 000 000. Kodwa lo mkhonzi wahamba waza wafumana omnye umkhonzi owayenetyala kuye leedenariyo ezilikhulu kuphela. Lo mkhonzi uxolelweyo ngokungenanceba wamphosela entolongweni loo mkhonzi unetyala ade akwazi ukulihlawula. Ngokucacileyo, umkhonzi ongenanceba wayengengomntu ulungileyo, yaye xa inkosi yeva okwenzekileyo, yamphendulisa.—Mateyu 18:23-35.
12 Sikwimeko efana neyaloo mkhonzi waxolelwayo. Ngesizinzi sedini likaYesu, uYehova ulixolele ityala lethu elikhulu lesono. Ngoko, ngokuqinisekileyo sifanele sikulungele ukubaxolela abanye. UYesu wathi sifanele silungele ukuxolela ‘kude kube kamashumi asixhenxe,’ oko kukuthi, singayeki. (Mateyu 5:7; 6:12, 14, 15; 18:21, 22) Ngenxa yoko, umKristu onenceba akayi kuba nenqala. Akayi kufukama inzondo okanye angafuni ukuthetha nomnye umKristu ngenxa yokungevani. Ukungabi nanceba okunjalo akulophawu lokulunga kobuKristu.
Ukuba Nesisa Nokubuka Iindwendwe
13. Yintoni enye equkwa kukulunga?
13 Ukulunga kukwabonakaliswa ngesisa nokubuka iindwendwe. Ngesinye isihlandlo umfana othile waza kuYesu efuna icebiso. Wathi: “Mfundisi ulungileyo, yiyiphi na into elungileyo endingenza yona, ukuze ndibe nabo ubomi obungunaphakade”? UYesu wamxelela ukuba ufanele agcine imithetho kaThixo ngamaxesha onke. Ewe, enye inkalo yokulunga kukuthobela imithetho kaYehova. Loo mfana wacinga ukuba oku wayesele ekwenza kangangoko wayenako. Ngokucacileyo, abamelwane bakhe babesele bemcingela njengomntu olungileyo, kanti wayevakalelwa kukuba kwakusekho okuthile okusilelayo. Ngoko uYesu wathi: “Ukuba unga ungafezeka, hamba uye kuthengisa ngeempahla zakho, uphe amahlwempu; woba nobutyebi emazulwini; uze ke undilandele.” (Mateyu 19:16-22) Loo mfana wemka ebuhlungu. Wayetyebe gqitha. Ukuba wayenokulandela isiluleko sikaYesu, wayeya kuba ubonakalisa ukuba akazithandi izinto eziphathekayo. Yaye wayeya kuba wenze isenzo esilungileyo sesisa sokungazingci.
14. Sisiphi isiluleko esifanelekileyo uYehova noYesu abasinikelayo ngokuphathelele isisa?
14 UYehova wabongoza amaSirayeli ukuba abe nesisa. Ngokomzekelo, siyafunda: “Uze umnike [ummelwane wakho olihlwempu], ingabi mbi [ingagogotyi, NW] intliziyo yakho ekumnikeni kwakho; ngokuba ngenxa yale ndawo wokusikelela uYehova uThixo wakho emsebenzini wakho wonke, nasezintweni zonke osa isandla sakho kuzo.” (Duteronomi 15:10; IMizekeliso 11:25) KwanoYesu Kristu ngokwakhe wabongoza ukubonakaliswa kwesisa esithi: “Yiphani, naniya kuphiwa nani; umlinganiselo omhle, ohlohliweyo, ohlunguzelweyo, ophalalayo.” (Luka 6:38) Ngaphezu koko, uYesu ngokwakhe wayenesisa kakhulu. Ngesinye isihlandlo, wayezibekele ixesha lokuba akhe aphumle kancinane. Izihlwele zayifumanisa indawo awayekuyo zaza zeza kuye. UYesu ebonakalisa ukuba nesisa akazange abe saphumla ibe wazibhokoxa ngenxa yezihlwele. Kamva, wabonisa ukubuka iindwendwe okubalaseleyo ngokulungiselela ukudla isihlwele esikhulu.—Marko 6:30-44.
15. Abafundi bakaYesu bamisela umzekelo obalaseleyo ngayiphi indlela ekubonakaliseni isisa?
15 Bebambelele ngokuthembekileyo kwisiluleko sikaYehova noYesu, abafundi bakaYesu abaninzi babenesisa yaye bebuka iindwendwe ngokuphawulekayo. Ngemihla yamandulo yebandla lamaKristu, iqela elikhulu labo babeze kumsitho wePentekoste yowama-33 C.E. bayiva intshumayelo yabapostile baza bangamakholwa. Ekubeni bahlala emva komsitho ukuze bafunde okungakumbi, baphelelwa zizinto. Ngoko ke, amakholwa asekuhlaleni athengisa imihlaba yawo aza anikela ngemali ukuxhasa abazalwana bawo abatsha ukuze aba baqine ngakumbi elukholweni. Esinjani sona isisa!—IZenzo 4:32-35; bona kwaneZenzo 16:15; Roma 15:26.
16. Khankanya ezinye zeendlela esinokubuka iindwendwe size sibonakalise isisa ngazo namhlanje.
16 Namhlanje, amaKristu abonakalisa isisa esinjengesikaKristu ngokunikela ngexesha nangemali kumabandla akuwo nakumsebenzi wokushumayela wazwenibanzi. Oku kungqineka xa enceda abazalwana bawo ababandezelekileyo ngenxa yeentlekele ezingokwemvelo okanye imfazwe. Oku kubonakala xa enyamekela umveleli wesiphaluka ebudeni botyelelo lwakhe oluqhelekileyo. Okanye xa kubonakaliswa isisa ngokumenywa ‘kweenkedama’ ukuya kuzihlaziya nokuba zibekho kwizifundo zeBhayibhile zentsapho kwezinye iintsapho zamaKristu, kwanako oku kukubuka iindwendwe, ukubonakaliswa kokulunga kwamaKristu.—INdumiso 68:5.
Ukuthetha Inyaniso
17. Kutheni ukuthetha inyaniso kulucelomngeni namhlanje?
17 Xa uPawulos wachaza isiqhamo sokukhanya, wanxibelelanisa ukulunga nobulungisa nenyaniso, yaye bekuya kuba kokuchanileyo ukuthi ukutheth’ inyaniso kulolunye uhlobo lokulunga. Abantu abalungileyo abaxoki. Sekunjalo, ukuthetha inyaniso kulucelomngeni ngokukhethekileyo namhlanje ekubeni ukuxoka kwesamele. Abantu abaninzi bayaxoka xa bezalisa iifomu zabo zerhafu. Abasebenzi banikela ingxelo ebubuxoki ngomsebenzi abawenzayo. Abafundi bayaqhatha kwiizifundo nakwiimviwo zabo. Oosomashishini bayaxoka xa besenza izivumelwano zoshishino. Abantwana bayaxoka ukuze baphephe ukohlwaywa. Abo bahleba ngokwenzakalisayo ngobuxoki bonakalisa udumo lwabanye.
18. UYehova uwajonga njani amaxoki?
18 Ukuxoka kuyenyanyeka kuYehova. Phakathi ‘kwezinto ezisixhenxe’ azithiyileyo “lulwimi oluxokayo” kunye ‘nengqina elixokayo, elifutha amanga.’ (IMizekeliso 6:16-19) “Onke amaxoki” abalwe phakathi kwamagwala, ababulali nabahenyuzi, abangayi kungena kwihlabathi elitsha likaThixo. (ISityhilelo 21:8) Ukongezelela umzekeliso usixelela ukuba: “Uhamba ngokuthe tye owoyika uYehova; uthi gu bucala ngeendlela zakhe omdelayo.” (IMizekeliso 14:2) Iindlela zexoki zinobugqwetha. Ngenxa yoko, ixoki lingqina ukuba limdelile uYehova. Enjani yona ukoyikeka ingcamango! Masithethe inyaniso ngamaxesha onke, kwanokuba ikhokelela ekubeni sohlaywe okanye silahlekelwe ngokwasemalini. (IMizekeliso 16:6; Efese 4:25) Abo bathetha inyaniso baxelisa uYehova, ‘uThixo wenyaniso.’—INdumiso 31:5.
Hlakulela Ukulunga
19. Maxa wambi yintoni esiyibonayo ehlabathini, enikela uzuko kuMdali?
19 Ezi zezimbalwa nje zeendlela zako ‘konke’ ukulunga umKristu afanele azihlakulele. Kuyinyaniso ukuba abantu ehlabathini bayakubonakalisa ukulunga ngomlinganiselo othile. Ngokomzekelo, bambi banobubele, yaye abanye banenceba. Enyanisweni, okwenza umzekeliso womSamariya Olungileyo wangobalaseleyo kukuba uYesu wathetha ngomntu ongengomYuda owabonakalisa inceba ngoxa abadala bebandla lamaYuda bengazange bakwenze oko. Ukuba iimpawu ezinjalo zisabonakala ngokwemvelo kubantu abathile kwanasemva kweminyaka engamawaka amathandathu yokungafezeki ngokwenene oko kuyamzukisa uMdali womntu.
20, 21. (a) Kutheni ukulunga kwamaKristu kwahlukile kuko nakuphi na ukulunga esinokukubona kubantu behlabathi namhlanje? (b) UmKristu unokukuhlakulela njani ukulunga, yaye kutheni sifanele sikhuthale ekwenzeni oko?
20 Sekunjalo, kumaKristu ukulunga kungaphezulu kunophawu asenokuba nalo okanye angabi nalo. Kuluphawu amele ahlakulele zonke iinkalo zalo, ekubeni emele abe ngaxelisa uThixo. Kunokwenzeka njani oku? IBhayibhile isixelela ukuba sinako ukukufunda ukulunga. Umdumisi wathandaza kuThixo wathi, “Ndifundise . . . okulungileyo [ukulunga, NW].” Njani? Wahlabela mgama wathi: “Ngokuba ndikholwa yimithetho yakho.” Wongezelela: “Ulungile wena, ulungisa; ndifundise imimiselo yakho.”—INdumiso 119:66, 68.
21 Ewe, ukuba sifunda imithetho kaYehova size siyithobele, siya kukuhlakulela ukulunga. Ngamaxesha onke khumbula ukuba ukulunga kusisiqhamo somoya Ukuba sifuna umoya kaYehova ngomthandazo, ngokunxulumana nabazalwana nangofundisiso lweBhayibhile, ngokuqinisekileyo ngoko siya kuncedwa siluhlakulele olu phawu. Ngaphezu koko, ukulunga kunamandla. Kunokuboyisa nobungendawo. (Roma 12:21) Ngoko ke, hayi indlela okubaluleke ngayo ukuba senze okulungileyo kubantu bonke, ngokukodwa kubazalwana bethu abangamaKristu. (Galati 6:10) Ukuba senjenjalo, siya kuba phakathi kwabo baya kunandipha “uzuko . . . nembeko, noxolo” izinto ezithenjiswe “bonke abasebenza okulungileyo.”—Roma 2:6-11.
Ngaba Unokuphendula?
◻ Sinokuqhubeka njani sisenza okulungileyo ngokuphathelele amagunya awongamileyo?
◻ Ngoobani, phakathi kwabanye, esifanele sibonakalise kubo ulwazelelelo?
◻ Inceba izibonakalisa ngaziphi iindlela?
◻ Ziziphi izenzo zesisa nokubuka iindwendwe eziphawula amaKristu namhlanje?
◻ Kunokuhlakulelwa njani ukulunga?
[Umfanekiso okwiphepha 20]
Ukuba nolwazelelelo ngabanye kukubonakalisa ukulunga
[Umfanekiso okwiphepha 23]
NjengoMfundisi Omkhulu, uYesu wazinikela ngesisa