Imibuzo Evela Kubafundi
◼ Kukuphi oku “kulungileyo” umpostile uPawulos wayengakwazi ukukwenza, njengoko wakhankanya kumaRoma 7:19?
Ngokusisiseko, uPawulos wayebhekisela kukungakwazi ukwenza konke okulungileyo okwakufuneka kuMthetho kaMoses. UPawulos nabo bonke abanye, kuquka nathi, wayengenako ukukwenza oku, ngenxa yokungafezeki nokuba nesono. Kodwa akukho mfuneko yakunxunguphaliswa koko. Idini likaKristu lavula indlela yokuba sixolelwe nguThixo nokuze sibe nokuma okufanelekileyo Naye.
EyabaseRoma 7:19 ifundeka ngolu hlobo: “Kuba okulungileyo endikuthandayo, andikwenzi; khona okubi, endingakuthandiyo, oko ndiyakwenza.” Umongo ubonisa ukuba uPawulos ngokuyintloko wayethetha ngoko “kulungileyo” ngengqiqo yoko kwakumiselwe nguMthetho. Kwindinyana yesi-7 wathi: “Umthetho usisono na? Nakanye! Ke ngendingasazanga isono, ukuba bekungengamthetho; kuba nenkanuko ngendingayazanga, ukuba umthetho ubungatshongo ukuthi, Uze ungakhanuki.” Ewe, uMthetho wakwenza kwacaca ukuba ekubeni babengakwazi ukuwugcina uphela, bonke abantu babenesono.
UPawulos wahlabela mgama waza wakhankanya ukuba yena ‘ebefudula ephila ungekho umthetho.’ Kwakunini ngoko? Kaloku, kuxa wayesesezibilinini zika-Abraham ngaphambi kokuba uYehova amise uMthetho. (Roma 7:9; thelekisa amaHebhere 7:9, 10.) Nangona uAbraham wayengafezekanga, uMthetho wawungekamiswa, ngoko akazange akhunjuzwe ngemeko yakhe yesono ngokusilela ukugcina imiyalelo yawo emininzi. Ngaba oku kuthetha ukuba xa kwamiswa uMthetho waza wabonakalisa ukungafezeki kwabantu, oku kwaba nemiphumo emibi? Akunjalo. UPawulos uhlabela mgama esithi: “Ngoko ke umyalelo okunene ungcwele; nomthetho ungcwele, unobulungisa, ulungile.”—Roma 7:12.
Phawula ukuba uPawulos uwuchaza uMthetho ngokuthi “ungcwele,” kwaye “ulungile.” Kwiindinyana ezilandelayo, wacacisa ukuba le nto ‘ilungileyo’—uMthetho—yakwenza kwacaca ukuba wayengumoni, yaye esi sono simenza afanelwe kukufa. uPawulos wabhala esithi: “Kuba okulungileyo endikuthandayo, andikwenzi; khona okubi, endingakuthandiyo, oko ndiyakwenza. Ukuba ke endingakuthandiyo mna, ndenza khona oko, ayisendim okusebenzayo oko, seyisisono esi simiyo ngaphakathi kwam.”—Roma 7:13-20.
Ngoko ke, kumongo woku, uPawulos wayengathethi ngokulunga nje okuqhelekileyo, okanye izenzo ezilungileyo. (Thelekisa IZenzo 9:36; Roma 13:3.) Ngokukhethekileyo wayebhekisela ekwenzeni (okanye ekungazenzini) izinto ezivisisana noMthetho olungileyo kaThixo. Ngaphambili wayekhuthele kunqulo lobuYuda yaye—xa kuthelekiswa nabanye—‘wayengenakusoleka.’ Sekunjalo, nangona engqondweni yakhe wayelikhoboka elizinikeleyo loMthetho olungileyo, akazange aphile ngokuvumelana nawo ngokupheleleyo. (Filipi 3:4-6) UMthetho wabonakalisa imilinganiselo kaThixo egqibeleleyo, imbonakalisa lo mpostile ukuba ngoxa esesenyameni wayeselikhoboka lomthetho wesono yaye ngaloo ndlela wayegwetyelwe ukufa. Noko ke, uPawulos wayenokuvuya kuba ngenxa yedini likaKristu wavakaliswa elilungisa—ekhululwe kumthetho wesono nemiphumo yawo, isigwebo sokufa.—Roma 7:25.
Namhlanje amaKristu awakho phantsi koMthetho kaMoses, kuba wabethelelwa emthini wentuthumbo. (Roma 7:4-6; Kolose 2:14) Kanti senza kakuhle ukuqonda ukuba umthetho wawungeloxanduva kangangokuba kwakufuneka nje umntu alibale ngawo. Akunjalo, ngokusisiseko uMthetho wawulungile. Ngenxa yoko sinesizathu sokufunda iincwadi zeBhayibhile eziqulethe uMthetho nokufunda oko wawukufuna kuSirayeli. Kungekudala amaNgqina kaYehova emhlabeni wonke aza kube esenza oko, kwisifundo sawo seBhayibhile seeveki ngeeveki.
Njengoko sifunda uMthetho, sifanele sikhumbule imigaqo ephuhliswa yimimiselo eyahlukahlukeneyo ekuwo neengenelo abantu bakaThixo abazifumana kuwo njengoko babezama ukulandela imiyalelo yawo elungileyo. Kwakhona, sifanele siqonde ukuba asifezekanga yaye ngenxa yoko asikwazi ukukwenza ngokupheleleyo oko kulungileyo sikufunda kwiLizwi likaThixo. Kodwa ngoxa sisenza umzamo wokulwisana nomthetho wesono, sinokuvuyiswa lithemba lokuba sinokusindiswa ngokusebenza kwedini likaKristu lentlawulelo kuthi.