‘UYehova NguThixo Wam, Endikholose Ngaye’
NGOKUBALISWA NGUWILLI DIEHL
“Kutheni ufuna ukuya eBheteli?” Lo ngumbuzo endawubuzwa ngubawo ngentlakohlaza yowe-1931 xa ndandimxelela ukuba ndinqwenela ukungenela inkonzo yaseBheteli. Abazali bam, ababehlala eSaarland, babeneminyaka emalunga neshumi besenyanisweni, yaye babesibekele umzekelo omhle thina makhwenkwe mathathu. Inyaniso babephila ngayo, yaye nam ndafuna ukuphila ngayo.
KODWA abazali bam babefunde njani ngoYehova nangokuthanda kwakhe okungcwele? Benganeliswa yinkqubo yonqulo olumiselweyo, kwakukudala besihla benyuka befuna inyaniso. Babephuma bengena kwiicawa nakumahlelo awahlukahlukeneyo, bewafumanisa onke engalunganga.
Ngaminazana ithile kwashiywa isimemo ekhaya esasisazisa ngentetho yemifanekiso nefilimu ethetha ngenjongo kaThixo nenomxholo othi “Photo-Drama of Creation.” UBawo kwakufuneka ephangele ngexesha le “Photo-Drama” eyayiza kuboniswa ngalo, kodwa wakhuthaza uMama ukuba aye. Wathi, “Mhlawumbi kungabhaqeka nto kuyo.” Emva kokuyibona ngaloo ngokuhlwa, uMama wayenehlombe. Wathi: “Ekugqibeleni ndiyifumene! Yiza uze kuzibonela ngengokuhlwa yangomso. Yile nyaniso besiyifuna.” Oko kwenzeka ngowe-1921.
NjengamaKristu athanjiswe ngomoya, abazali bam bahlala bethembekile de kwasekufeni, uBawo wafa ngowe-1944, emva kokuvalelwa entolongweni ngamaNazi izihlandlo eziliqela, waza uMama wafa ngowe-1970. Naye wakhe wahlala ixesha elide entolongweni phantsi kolawulo lwamaNazi.
Inzondelelo Engumzekelo Yabazali Bam
Ngaphambi kokufa kwabo, abazali bam babeyikhuthalele gqitha inkonzo yasentsimini. UMama wayekuthanda ngokukodwa ukusasaza izigqibo ezazisenziwa ezindibanweni zize zishicilelwe ezakhutshwa ukususela ngowe-1922 kuse kowe-1928. Iphecana iEcclesiastics Indicted (Abefundisi Babekek’ Ityala), elaliqulethe isigqibo esamkelwa ngowe-1924 layigxeka kanobom inkqubo yabefundisi. Ukulisasaza kwakufuna inkalipho. Abavakalisi babevuka ngentsimbi yesine ekuseni, befaka amaphecana ngaphantsi kweengcango. Nangona ndandineminyaka eli-12 kuphela, abazali bam bandivumela ukuba nenxaxheba. Ngokufuthi sasinduluka ngentsimbi yesihlanu ekuseni, sikhwele iibhayisekile iiyure ezintathu ukusa kwezine sisiya kummandla osemagqagaleni. Sasizifihla iibhayisekile ematyholweni, yaye ndandibek’ iliso kuzo ngoxa abanye babesebenza elalini. Emva kwemini sasikhwela iibhayisekile sibuyele emakhaya, yaye ngokuhlwa sasihamba iyure sisiya entlanganisweni.
Ekuhambeni kwethuba, iibhayisekile zazilindwa ngomnye omncinane kunam, yaye mna ndandihamba nabavakalisi. Kodwa akukho bani wacinga ngokundiqeqesha. Basuka nje bandixelela isitrato endandiza kusebenza kuso! Ndisothukile ndachwechwa ukuya kwindlu yokuqala, ndinethemba lokuba ndiza kufika kungekho mntu. Ngelishwa, indoda ethile yavula ucango. Kwaba nzima nokuthetha oku. Ndiphatha ndiyeka, ndayalathisa incwadi esengxoweni yam. Yabuza oku: “Ngaba yenye yeencwadi zikaJudge Rutherford?” Ndathintiliza ndizama ukuphendula. “Ngaba yincwadi entsha, endingekayifumani mna?” “Ewe, intsha,” ndayiqinisekisa ngelitshoyo. “Ngoko ndimele ndiyifumane. Yimalini?” Oku kwandibangela ndanenkalipho yokuqhubeka.
Ngowe-1924 abantu abakhulileyo babesoloko bethetha ngowe-1925. Sakhe satyelela enye intsapho yabaFundi BeBhayibhile, ndaza ndeva omnye umzalwana ebuza oku: “Ukuba iNkosi ithe yasithabathela kuyo, baza kuthini abantwana bethu?” UMama, owayesoloko enesimo sengqondo esikhuthazayo, waphendula wathi: “INkosi iya kukwazi ukubanyamekela.” Lo mbandela wawunomtsalane kum. Yayiyintoni intsingiselo yako konke oku? Unyaka we-1925 wagaleleka wedlula, yaye akuzange kwenzeke nto. Noko ke, inzondelelo yabazali bam ayizange ithothe.
Isiluleko Sobulumko Endasinikwa Ngubawo
Ekugqibeleni, ngowe-1931, ndaxelela ubawo oko ndandifuna ukukwenza ngobomi bam. Ephendula ubawo wandibuza oku, “Kutheni ufuna ukuya eBheteli?” Ndaphendula ngelithi: “Kungenxa yokuba ndifuna ukukhonza uYehova.” Waqhubeka wathi: “Masithi mhlawumbi bayakwamkela eBheteli. Ngaba uyaqonda ukuba abazalwana abaphaya asingobantu bafezekileyo abangazenziyo iimpazamo? Abafezekanga yaye bayazenza iimpazamo. Ndinoloyiko lokuba oku kusenokukubangela ukuba uyishiye ude ulahle nolo kholo. Qiniseka ukuba ucingisisa kakuhle ngoku.”
Kwandothusa ukuva into enjalo, kodwa emva kokuyihlolisisa ngenyameko imibandela kangangeentsuku ezithile, ndaphinda ndawuvakalisa umnqweno wokuya eBheteli. Wathi: “Khawuphinde undixelele isizathu sokufuna kwakho ukuya khona.” Ndaphinda ndathi: “Kungenxa yokuba ndifuna ukukhonza uYehova.” “Mntwanam, ungaze uyilibale loo nto. Ukuba bayakubiza, khumbula isizathu sokuya kwakho. Ukuba ubona okuthile okuphosakeleyo, musa ukuzixhalabisa ngokugqithiseleyo ngako. Nokuba uphathwa kakubi, musa ukumka. Ungaze usilibale isizathu sokuba useBheteli—kungenxa yokuba ufuna ukukhonza uYehova! Wena yenza nje umsebenzi wakho uze ukholose ngaye.”
Kwenzeka ngolo hlobo ke ukuba ngenjikalanga yowe-17 kuNovemba 1931, ndigaleleke eBheteli eBern, eSwitzerland. Ndandihlala gumbini linye nabanye abathathu yaye ndisebenza kwisebe lokushicilela, ndifunda ukusebenza ngomatshini wokushicilela ekufakwa kuwo amaphepha ngesandla. Enye yezinto zokuqala endanikwa umsebenzi wokuzishicilela yaba yiMboniselo ngesiRomania.
Isigidimi Esivela Ezulwini!
Ngowe-1933 uMbutho wapapasha incwadana ethi The Crisis, eyayiqulethe iintetho ezintathu ezazisasazwe ngonomathotholo nezazinikelwe nguMzalwan’ uRutherford eUnited States. Ngenye intsasa uMzalwan’ uHarbeck, owayesisicaka sesebe, waxelela intsapho yaseBheteli kwisidlo sakusasa ukuba le ncwadana yayiza kusasazwa ngendlela ekhethekileyo. Kwakuza kusetyenziswa inqwelo-moya encinane neqashiweyo eyayiza kubhabha phezu kweBern ukuze kuphoswe phantsi amaphetshana ayibhengezayo, ngoxa abavakalisi babeza kuma ezitratweni benikela le ncwadana kuwonke wonke. Wabuza oku: “Nguwuphi kuni bazalwana baselula okulungeleyo ukukhwela inqwelo-moya? Bhalisani amagama enu ngokukhawuleza.” Ndabhalisa, yaye kamva uMzalwan’ uHarbeck wavakalisa ukuba kwakunyulwe mna.
Ngaloo mini yeemini, sathutha iibhokisi ezizele ngamaphetshana sizisa kwisikhululo seenqwelo-moya. Ndahlala emva komqhubi wenqwelo-moya ndaza ndabeka imfumba yamaphetshana esihlalweni ecaleni kwam. Ndanikwa imiyalelo engqalileyo ethi: Songa iziqhuma zezimemo ezilikhulu kwisiqhuma ngasinye, uze isiqhuma ngasinye usithi jwii ngefestile ngamandla amakhulu kangangoko unako. Ukungakwenzi ngenyameko oku kwakunokubangela ukuba izimemo ziye kuphelela emsileni wenqwelo-ntaka, nto leyo eyayinokubangela iingxaki. Kodwa zonke izinto zahamba kakuhle. Kamva abazalwana bathi olunjani lona uchulumanco okwaba lulo ukubona esi ‘sigidimi sivela ezulwini.’ Kwenzeka ngendlela ekwakunqwenelwa ngayo, yaye kwahanjiswa iincwadana ezininzi, nakuba nje bambi abantu baye batsal’ umnxeba bekhalaza ngelithi iintyatyambo zabo zazingabonakali ngenxa yala maphetshana.
Ukuba Nombulelo Ngawo Onke Amalungelo Enkonzo
Umhla nezolo ndandimbulela uYehova ngovuyo nolwaneliseko lwenkonzo yaseBheteli. Ebandleni, ndandinikwe isabelo sokuvula iingcango zeHolo yoBukumkani, ukulungisa izihlalo, nokubeka iglasi yamanzi acocekileyo kwiqonga lesithethi. Oku ndandikugqala njengelungelo elikhulu.
EBheteli, ekugqibeleni ndasebenza kumatshini omkhulu noyiflatbed wokushicilela owawusetyenziselwa ukushicilela iThe Golden Age (ngoku ekuthiwa nguVukani!) ngesiPolish. Ngowe-1934 saqalisa ukusebenzisa iiphonographs, kwaye ndandincedisa ekwakhiweni kwazo. Ndandikuvuyela gqitha ukuya kwindlu ngendlu ndiphethe iintetho ezirekhodiweyo zeBhayibhile. Abaninimzi abaninzi babenomdla wokwazi ngale gumba-gumbana bangazange bayibone ngaphambili, yaye intsapho iyonke yayidla ngokuhlanganisana iphulaphule, suka nje bathi shwaka omnye emva komnye. Yakuba yonke intsapho iphumile, ndandisiya kwindlu elandelayo.
Ukuhlala Sikhuthele Ebudeni Bemfazwe
Emva kweMfazwe Yehlabathi I, iSaarland endandizalelwe kuyo yahlulwa kwiJamani yaza yalawulwa luManyano Lwezizwe. Ngenxa yoko, iSaarland yayinezayo iincwadana zezazisi. Ngowe-1935 kwavotwa ukuze kubonwe enoba abemi bakhona babenqwenela ukubuyiselwa eJamani kusini na. Ndasebenzisa eli thuba ukutyelela intsapho yakowethu, ndisazi ukuba kwakungenakwenzeka ukwenjenjalo ukuba iSaarland inokunikezelwa kulawulo lwamaNazi. Ibe okunene, kangangeminyaka emininzi emva koko, andizange ndive nto ngabazali bam okanye abantakwethu.
Nangona yayingabandakanyekanga ngokungqalileyo kwiMfazwe Yehlabathi II, iSwitzerland yaba likheswa ngokupheleleyo njengoko iJamani yayiwarhwaphilizela kuyo ngamanye ngamanye amazwe angabamelwane. Sasishicilela uncwadi size siluthumele kuwo onke amazwe aseYurophu ngaphandle kweJamani, kodwa ngoku kwakungasekho luncwadi luthunyelwayo. UMzalwan’ uZürcher, owayesisicaka sesebe ngelo xesha, wasixelela ukuba kwakungekho nepeni eseleyo, waza wasicela ukuba sifumane umsebenzi ngaphandle kweBheteli zide izinto zibuyele kwimeko yesiqhelo. Noko ke, mna ndavunyelwa ukuba ndihlale njengoko kwakukho iintwana-ntwana ezingephi ekwakufuneka zishicilelwe ukulungiselela abavakalisi ababemalunga newaka basekuhlaleni.
Intsapho yaseBheteli ayisokuze iwulibale umhla wesi-5 kuJulayi 1940. Kanye nje emva kwesidlo sasemini kwagaleleka ilori yamajoni. Amajoni atsho phantsi aza ee dyulukudu ukungena eBheteli. Asiyalela ukuba singashukumi, ibe ngamnye wethu wayelindwe lijoni elixhobileyo. Sasiwa kwigumbi lokutyela ngoxa ayegubhulula eso sakhiwo. Abasemagunyeni baberhanela ukuba thina sixelela abanye abantu ukuba bangayi kwinkonzo yasemkhosini, kodwa babuya nemband’ esikhova xa babefuna ubungqina.
Ebudeni beminyaka yemfazwe, ndandisisicaka sebandla eThun naseFrutigen. Oko kwakuthetha ukuba ndandixakeka gqitha ngeempela-veki. Kwakamsinya nje emva kwesidlo sasemini, kuMgqibelo ngamnye, ndandikhwela ibhayisekile yam ndize ndihambe iikhilomitha ezingama-50 ndisinge eFrutigen, apho ndandiqhuba iSifundo seMboniselo ngokuhlwa. Ngentsasa yangeCawa ndandihamba nabavakalisi kwinkonzo yasentsimini. Ndandule ke, ngenjika-langa, ndenjenjeya ukusinga eInterlaken ukuya kuqhuba iSifundo Sencwadi Sebandla ndize xa lingcangcayo ndiye kuqhuba isifundo seBhayibhile nenye intsapho eSpiez. Usuku ndandiluqukumbela ngokuqhuba iSifundo seMboniselo eThun.
Ebusuku, ndakuba ndigqibe yonke imisebenzi yam, ndandibuyela ekhaya eBern ndiziculela yaye ndikhalisa nemilozi, kumnandi kuyiloo nto. Ndandingadibani nazinqwelo-mafutha zininzi endleleni. Kwezo nduli ziphakamileyo, ezazimnyama ngenxa yokucinywa kwezibane ukuze kuphetshwe uhlaselo lwasemoyeni, kwakuzole nasebukhweni bezinja yaye kubetha impepho, ngamathuba athile uhlangatyezwa kukukhanya kwenyanga. Hayi indlela ezo mpela-veki ezabutyebisa ngayo ubomi bam nezawavuselela ngayo amandla am!
Utyelelo Olwaba Nemiphumo Eyayingalindelekanga
Ekwindla lowe-1945, uMzalwan’ uKnorr wasityelela. Ngenye imini wangena kumzi-mveliso njengoko ndandimi phezu komatshini wokushicilela oyirotary. Wakhwaza esithi: “Khawuhle uz’ apha! Ungakuthanda njani ukuya kwiSikolo saseGiliyadi?” Ndandikhwankqiswe ngokwenene. Ndaphendula ndathi: “Ukuba ucinga ukuba ndiyafaneleka, ndingakuvuyela ukuya.” Ngentlakohlaza yowe-1946 safika isimemo sam, esikaMzalwan’ uFred Borys noDade Alice Berner. Kodwa ngenxa yokuba ndandizalelwe eSaarland, ndandingagqalwa njengommi welizwe elithile yaye ngoko ke kwafuneka ndenze isicelo sevisa ekhethekileyo eWashington, D.C., eUnited States.
Ngoxa abanye banduluka kwangethuba, kwafuneka mna ndilindele impendulo yesicelo sam. Xa isikolo saqalayo ngoSeptemba 4, mna ndandiseseSwitzerland, ndiqalisa ukuphelelwa lithemba. Yandula ke iOfisi Yozakuzo yaseUnited States yanditsalel’ umnxeba, indazisa ukuba ivisa yam ifikile. Ngoko nangoko ndazama ukwenza amalungiselelo ohambo yaye ekugqibeleni ndayifumana indawo kwinqanawa yomkhosi eyayisuka eMarseilles isiya eNew York. Anjani wona amava! IAthos II yayizele imi ngeembambo. Ndanikwa isingqengqelo kwigumbi elivulekileyo. Ngosuku lwesibini siselwandle, kwabakho uqhushumbo kwigumbi elinenjini nolwabangela ukuba inqanawa ime ngxi. Kubahambi nakubasebenzi bayo izibilini zaziphezulu, benoloyiko lokuba sisenokuzika. Oku kwandivulela ithuba elihle lokunikela ubungqina ngethemba lovuko.
Kwathabatha iintsuku ezimbini ukulungisa inqanawa, ekwathi emva kwazo sathi chu okolovane kuhambo lwethu. Safika eNew York emva kweentsuku ezili-18, kanti siza kufika sihlale enqanaweni kuba oomalayisha basezikhepheni babegwayimbile. Emva kothethathethwano, ekugqibeleni sakwazi ukuyishiya inqanawa. Ndandibethe ucingo ndixelela uMbutho ngale meko, yaye njengoko ndandiphuma kwiofisi ejongene nemibandela yokungeniswa kwezinto ezivela kwamanye amazwe, indoda ethile yabuza oku: “Ngaba unguMnu. Diehl?” Le ndoda yayingomnye wababencedisana noMzalwan’ uKnorr, ibe yandikhwelisa kuloliwe wasebusuku oya eIthaca, kufuphi nendawo eneSikolo saseGiliyadi, apho ndafika nje emva kwentsimbi yesibhozo ngentsasa elandelayo. Hayi indlela endandinemincili ngayo kuba ndide ndafika ekugqibeleni, ndakwazi ukuya kwiklasi yokuqala yezizwe ngezizwe eGiliyadi!
Ukunyamezela Phezu Kokujamelana Nobunzima
Uthweso-mbasa lweklasi yesibhozo yaseGiliyadi lwalungoFebruwari 9, 1947, yaye bonke babenexhala. Sasiza kuthunyelwa phi? Kum, “izintya zokulinganisa” zawela kwiofisi yokushicilela yoMbutho eyayisandul’ ukuvulwa eWiesbaden, eJamani. (INdumiso 16:6, NW) Ndabuyela eBern ukuze ndenze isicelo samaphepha-mvume awayefuneka, kodwa ekuphela kwabantu imikhosi yaseUnited States eyayiseJamani eyayibavumela ukuba bangene apho yayingabo babehlala khona ngaphambi kwemfazwe. Ekubeni ndandingazange ndihlale apho, ndafuna isabelo esitsha kwikomkhulu eBrooklyn. Ndanikwa isabelo somsebenzi wesiphaluka eSwitzerland, sabelo eso endasamkela ndikholose ngokupheleleyo ngoYehova. Kodwa ngoxa ndandisalindele esi sabelo, ngenye imini ndacelwa ukuba ndikhenkethise oodade abathathu ababetyelele kwisakhiwo saseBheteli. Omnye wabo yayinguvulindlela ogama linguMarthe Mehl.
NgoMeyi 1949, ndazisa kwikomkhulu elaliseBern ukuba ndandiceba ukutshata noMarthe nokuba sasinqwenela ukuhlala kwinkonzo yexesha elizeleyo. Yathini impendulo? Yathi akukho malungelo sasinokuwafumana ngaphandle kokuba ngoovulindlela abathe ngxi. Saqalisa njengoovulindlela eBiel, emva kokutshata kwethu ngoJuni 1949. Ndandingavunyelwanga ukunikela iintetho, singenako nokufunela indawo iindwendwe ezazisiza kwindibano eyayisondela, nakubeni sasinconyelwe ngumveleli wesiphaluka kweli lungelo. Abaninzi babengasasibulisi nokusibulisa, besiphatha njengabantu abasuswe kubudlelane, nakubeni sasingoovulindlela.
Phofu ke, sasisazi ukuba ukutshata kwakungaphosakalanga ngokwezibhalo, ngoko saqamela ngomthandazo saza sakholosa ngoYehova. Enyanisweni, le mpatho yayingabonakalisi imbono yoMbutho ngezinto. Yayingumbandela nje wokusebenzisa kakubi imigaqo yentlangano.
Ukubuya KukaMzalwana UKnorr
Ngowe-1951, kwakhona uMzalwan’ uKnorr watyelela eSwitzerland. Emva kokunikela intetho, ndaxelelwa ukuba wayenqwenela ukuthetha nam. Nangona ndandinedyudyu ngandlel’ ithile, ndandivuya kuba wayethanda ukundibona. Wabuza enoba sasingakuthanda kusini na ukwamkela isabelo kwikhaya labavangeli basemazweni elalicetywa ukuvulwa eGeneva. Ngokuzenzekelayo sakuvuyela oku, nangona ukunikel’ umva iBiel kwakuza kuba buhlungu. Ngosuku olulandelayo safumana esinye isicelo esivela kuMzalwan’ uKnorr. Ngaba singakuthanda ukuqalisa kumsebenzi wesiphaluka, ekubeni lo msebenzi wawufuna ingqalelo engakumbi eSwitzerland? Ngoko nangoko savuma. Ngamaxesha onke bendinesimo sengqondo sokwamkela nasiphi na isabelo endisinikwayo.
Umsebenzi wethu wesiphaluka kwimpuma Switzerland wasikelelwa kakhulu. Sasihamba ngololiwe ukutyelela amabandla, siphethe zonke izinto zethu ngeesutikheyisi ezimbini. Abazalwana babedla ngokusihlangabeza esikhululweni sikaloliwe ngeebhayisekile, kuba babembalwa ababeneenqwelo-mafutha ngezo mini. Iminyaka ethile kamva omnye umzalwana wasinika inqwelo-mafutha ukuze siyisebenzise, nto leyo yabangela ukuba inkonzo yethu ithande ukuba lula ngakumbi.
Ezinye Izinto Ezintsha Ezimangalisayo
Olunjani lona uvuyo ekwaba lulo ngowe-1964 xa mna nowakwam samenyelwa ukuya kwiklasi yama-40 yaseGiliyadi, iklasi yokugqibela yenkqubo yoqeqesho oluneenkcukacha nolubanzi, lweenyanga ezilishumi, ngoku eyayifinyeziwe ukuze ibe ziinyanga ezisibhozo. UMarthe kwafuneka afunde isiNgesi ngokukhawuleza, kodwa wakwenza oku ngendlela encomekayo. Kwakuyinto eqhelekileyo ukuzibuza enoba sasiza kuthunyelwa phi. Isimo sam sengqondo yayisesi: ‘Andikhathali nokuba bandithumela phi, logama nje bengandiniki umsebenzi waseofisini!’
Kodwa kwenzeka kanye loo nto! Ngosuku lothweso-mbasa, ngoSeptemba 13, 1965, ndamiselwa ukuba sisicaka sesebe eSwitzerland. UMarthe wayeza kuyizibula into yokuya kukhonza eBheteli. Kum, kwakuthetha ukubuyela ‘eNdlwini kaThixo,’ kungekhona kwindawo yokushicilela, endandikhonze kuyo ukususela ngowe-1931 ukusa kowe-1946, koko eofisini. Zininzi izinto ekwakufuneka ndizifunde, kodwa ngoncedo lukaYehova ndakwazi ukwenjenjalo.
Ukukhangela Ngemva
Kuyo yonke le minyaka engama-60 ndikwinkonzo yexesha elizeleyo, ndiye ndakholosa ngokupheleleyo ngoYehova, kanye njengoko ubawo wayendixelele ukuba ndenjenjalo. Kwaye uYehova uye wathulula iintsikelelo ezininzi. UMarthe ube ngumthombo wokhuthazo kakhulu ngamaxesha okudimazeka okanye xa bekubonakala ngathi imisebenzi iza kundongamela, enyanisweni ebeliqabane elinyanisekileyo nelikholose ngokupheleleyo ngoYehova.
Makadunyiswe uYehova ngenxa yamalungelo amaninzi enkonzo endiye ndawanandipha! Ndisakhonza njengomlungelelanisi weKomiti Yesebe eThun, yaye izihlandlo eziliqela ndiye ndahamba-hamba njengomveleli wecandelo. Kungakhathaliseki oko bendicelwa ukukwenza, bendisoloko ndikhangele kuYehova ukuba andikhokele. Phezu kwazo nje iimpazamo neentsilelo zam ezininzi, ngokuqinisekileyo ndikholelwa kwelokuba uYehova undixolele ngoKristu. Ngamana ndingaqhubeka ndisenza okumkholisayo. Ibe ngamana angaqhubeka esalathisa amanyathelo am, njengoko ngamaxesha onke ndikhangele kuye ‘njengoThixo wam, endikholose ngaye.’—INdumiso 91:2.
[Picture of Willi and Marthe Diehl on page 25]
[Umfanekiso okwiphepha 27]
UMzalwan’ uDiehl ekuqaleni kwenkonzo yakhe yaseBheteli