Ngaba Nawe Ungangumlungiseleli?

UYEHOVA uye wabonakalisa ububele bakhe ngokulungiselela umhlaba ngokugqibeleleyo ukuze sinandiphe ubomi. Ngobubele uye wenza ukuba la malungiselelo abekho kwanasemva kokuvukela kuka-Adam noEva. Ngokungakumbi, uye wabonakalisa uthando lwakhe olubalaseleyo ngokuthumela uNyana wakhe ukuze asindise abantu abakholwayo kwintlekele yesono.—Mateyu 5:45; Yohane 3:16.

Sinokusabela njani kuthando olunjalo? UYesu wathi sifanele simthande uYehova uThixo wethu ngentliziyo, ngomphefumlo, ngengqondo nangamandla ethu ephela. Oku kubonisa ukuba sifanele simnqule size sinyaniseke kuye nokuba ubomi bethu sifanele sibuvisisanise nokuthanda kwakhe.—Marko 12:30; 1 Petros 4:2.

Kodwa yintoni ebandakanyekileyo ekwenzeni ukuthanda kukaThixo? Ngaba ikho inkonzo esinokuyinikela kuye—ubulungiseleli esifanele sibandakanyeke kubo?

Imfuneko Yabalungiseleli

Iicawa ziye zabadida abantu ngokuphathelele indlela yokunqula nokukhonza uThixo. Kanti, iBhayibhile ibonisa ukuba lunye kuphela unqulo lokwenyaniso, “inye iNkosi, lunye ukholo, lunye ubhaptizo, mnye uThixo, uYise wabo bonke.” UYesu wathi: “Abanquli abayinyaniso baya kumnqula uBawo ngoMoya nangenyaniso.” Ngenxa yoko balulekwa ngelithi: “Nithethe nto-nye nonke, nokuba kungabikho zahlukahlukano kuni.”—Efese 4:3-6; Yohane 4:23; 1 Korinte 1:10.

Ukudideka ngokuphathelele oko unqulo lokwenyaniso lukuko kwaqala e-Eden xa uSathana wacel’ umngeni ukulunga kolongamo lukaYehova ngokuthandabuza indlela kaThixo yokulawula. (Genesis 3:1-6, 13) Ngoku uSathana uxhasa oku kuphikisa kwakhe uThixo ngeemfundiso zobuxoki ezisasazwa ngabefundisi bonqulo abanenkohliso abo ‘bazimilisa okwabalungiseleli bobulungisa.’ Ngoko iBhayibhile ithi: “Zintanda, musani ukukholwa ngoomoya bonke, . . . ngokuba baninzi abaprofeti ababuxoki, abaphume bangena ehlabathini.”—2 Korinte 11:14, 15; 1 Yohane 4:1.

Okuchwayitisayo kukuba uThixo uye wathabatha amanyathelo okuzinzisa le mbambano yolawulo. Ekubeni wathumela uNyana wakhe ukuza kukhulula uluntu, ngoku uye wamenza uYesu wanguKumkani woBukumkani bukaThixo basezulwini, wanegunya lokutshabalalisa uSathana nabaprofeti okanye abalungiseleli bakhe. Oku kuya kuqinisekisa ukuba ukuthanda kukaThixo kuyenziwa emhlabeni, ukuze kuzisele abantu abathobekileyo intsikelelo kanaphakade.—Daniyeli 7:13, 14; Hebhere 2:9.

USathana uye wazisitha ezi nyaniso. (2 Korinte 4:4) Ngenxa yoko, kufuneka sikhonze njengabalungiseleli bakaThixo, ababhenca ubuxoki bukaSathana nabangqinela inyaniso. UYehova akasinyanzeli kule nkonzo. Ufuna ukuba, njengoYesu, sizinikele ngokuzithandela siqhutywa luxabiso ngaye nangoko asenzele kona.—INdumiso 110:3; Hebhere 12:1-3.

Ubulungiseleli BobuKristu

UYesu “wayihamba imizi ngemizi, nemizana ngemizana, ezivakalisa ezishumayela iindaba ezilungileyo zobukumkani bukaThixo.” (Luka 8:1) Kwakhona waqeqesha abafundi bakhe ukuba babe ngabalungiseleli njengaye ibe wabathuma ukuya kushumayela. (Mateyu 10:1-14, 27) Kamva, wabayalela ukuba baqhubeke nobulungiseleli kude kuse eziphelweni zomhlaba.—Mateyu 28:19, 20; IZenzo 1:8.

Oko koko amaKristu okwenyaniso athunywe kona, ibe umoya kaThixo uwashukumisela ukuba ashumayele. Njengoko kwenzekayo ngePentekoste yowama-33 C.E., bonke abo bazamkelayo iindaba ezilungileyo banembopheleleko yokuluvakalisa ekuhleni ukholo lwabo.—IZenzo 2:1-4, 16-21; Roma 10:9, 13-15.

Noko ke, abantu abaninzi abaziboni bengabalungiseleli. UPeter, omnye wamaNgqina kaYehova, uthi: “Amadoda aseJamani adla ngokukujonga ikukuzithob’ isidima ukuthetha ngonqulo. Athi, ‘Oko kokwabefundisi.’” Ngokutsho kukaTony, umvangeli wasemazweni kangangamashumi eminyaka, abantu eNgilani baye bathi: “Enikuthethayo kulungile, yaye ndicinga ukuba amaNgqina kaYehova angabantu abalungileyo. Kodwa ukuya kwiminyango ngeminyango ndishumayela—andinakukwenza oko.” UBen wafundisisa iBhayibhile okwexeshana nendoda yaseNigeria eyamxelela oku: “Andinakuzibonakalisa ndishumayela ekuhleni kwindlu ngendlu; kodwa ndinokunikela ngemali ebandleni lenu ukuze kuncedwe abo bakulungeleyo ukukwenza oko.” Ewe, abantu abaninzi abanalo ukholo nolweyiseko olufunekayo ukuze ubani abandakanyeke kubulungiseleli bobuKristu.

Kusenjalo, ukushumayela ekuhleni kuyimbopheleleko yabo bonke abakwibandla lamaKristu, kungakhathaliseki ubudala okanye isini. Abuyombopheleleko yabadala nezicaka zolungiselelo, ‘abakhokelayo’ kuphela, kodwa yimbopheleleko yamaKristu ngokubanzi. Sonke siyakhuthazwa: “Masinyuse ngamaxesha onke kuye uThixo umbingelelo wendumiso, oko kukuthi, isiqhamo somlomo olivumayo igama lakhe. . . . Bathambeleni abakhokeli banu.”—Hebhere 13:15, 17.

Ethetha nesihlwele esixubeneyo kwiNtshumayelo yakhe yaseNtabeni, uYesu wathi: “Asingabo bonke abathi kum, Nkosi, Nkosi, abaya kungena ebukumkanini bamazulu; ngokwenzayo ukuthanda kukaBawo osemazulwini.” Ngesinye isihlandlo wabonisa ukuba ukwenza ukuthanda kukaThixo kubandakanya ukushumayeza abangakholwayo. Abafundi bakhe babembongoza ukuba ayeke ukushumayela kumaSamariya athile khon’ ukuze atye, kodwa wathi: “Okwam ukudla kukuba ndenze ukuthanda kowandithumayo, ndiwufeze umsebenzi wakhe.”—Mateyu 7:21; Yohane 4:27-38.

Ngaba Bufanele Bube Ngumsebenzi Ojonge Kuwo?

Abantu badla ngokukhetha ukusukela ukutya nobutyebi obuphathekayo. Kodwa ngaphambilana kwiNtshumayelo yaseNtabeni, uYesu wacebisa abaphulaphuli bakhe ukuba bangaxhalabeli ukusukela izinto ezinjalo. Wathi: “Ziqwebeleni ke ubutyebi emazulwini . . . Funani ke tanci ubukumkani bukaThixo nobulungisa bakhe.”—Mateyu 6:20, 33.

Ukufuna tanci uBukumkani kuthetha ukungavumeli ezinye izilangazelelo ukuba zibusithe ubulungiseleli bethu. Noko ke, ukwenza oku akuthethi ukuba sifanele sizibekele ecaleni zonke ezinye izinto. Ngokomzekelo, iBhayibhile isikhuthaza ukuba singazityesheli iimbopheleleko zokwenene zentsapho. Sineembopheleleko ezinjalo ezifana nezabantu bonke. Ukuzityeshela kuchasene nokholo lobuKristu. (1 Timoti 5:8) Sekunjalo, simele senze konke esinokukwenza ngokusengqiqweni kubulungiseleli ngoxa sinyamekela ezinye iimbopheleleko ngendlela elungeleleneyo.

UYesu wathi: “Ezi ndaba zilungileyo zoBukumkani ziya kuvakaliswa . . . zibe bubungqina kuzo zonke iintlanga; kwandule ke ukufika ukuphela.” (Mateyu 24:14) Umongo wesi siprofeto unenzaliseko yawo kumhla wethu. Ukususela ngowe-1914 iindaba ezilungileyo bezikukuba uBukumkani buye bagunyaziswa ukuba busebenze ngokuvisisana nolongamo lukaYehova nangokunxamnye noSathana nehlabathi lakhe. (ISityhilelo 11:15-18) Sifanele sicinge nzulu ngentsingiselo yoku. Isiphelo siza kufika, ibe sifanele siwuqoshelise umsebenzi wokushumayela ngaphambi koko. Ubomi babantu busesichengeni; sinokufak’ isandla ekusindiseni abaninzi babo.

Zabalazela Ukuba Nenxaxheba Ngakumbi Kubulungiseleli

AmaNgqina kaYehova amaninzi anikela iiyure ezilishumi okanye ezingaphezulu nyanga nganye ekwabelaneni nabanye ngeendaba ezilungileyo. Amawaka achitha iiyure ezimbini nangakumbi ngosuku ekushumayeleni njengoovulindlela abangabancedani, yaye abanye bakhonza ngokuqhubekayo njengoovulindlela abathe ngxi nabakhethekileyo. Bayakuqonda ukungxamiseka kwalo msebenzi yaye bafuna ukuba nesona sabelo sizeleyo kangangoko kunokwenzeka ekuwuqosheliseni ngaphambi kokuba isiphelo seli hlabathi lingonwabanga sifike.

Ngaba sele usebenza njengeNgqina likaYehova? Ngoko zabalazela ukuba nesabelo esizele ngakumbi enkonzweni. Phucula ubuchule bakho ekushumayeleni nasekufundiseni, uzabalazele ukufeza okuninzi ngakumbi kubulungiseleli. Ukuba iimeko ziyakuvumela ukuba ube nguvulindlela, yiba nguye. Ukuba iimeko zakho azikuvumeli ngokwenene, khuthaza abo banako ukuba bazabalazele ukungenela le nkonzo.

Ukuba akulilo iNgqina likaYehova elizahluleleyo, musa ukuthi akunakuze ube ngumlungiseleli. Enye indoda egama linguPeter, elungisa oomatshini, yakuchasa kabukhali ukwabelana komkayo nabanye ngeendaba ezilungileyo. Yayibuza oku: “Ndinokujongana njani nento yokuba umfazi wam ashumayele kwindlu ngendlu?” Emva kweminyaka yondele ukuzimisela komkayo ngokuphathelele inyaniso yeLizwi likaThixo, nayo yagqiba kwelokuba ifundisise iBhayibhile. Ngoku, njengomkayo, ingumlungiseleli weendaba ezilungileyo ozahluleleyo nobhaptiziweyo.

Ngoko musa ukuzithintela ekubeni nelungelo lokukhonza uYehova. Siyakukhuthaza ukuba ufundisise iBhayibhile uze unxulumane namaKristu okwenyaniso kwiintlanganiso zawo. Oku kuya kukunceda ukuba ubomi bakho ubuvisisanise nobulungisa bukaThixo nokuze wakhe ukholo olomeleleyo kwiinjongo zakhe. Ukuba wenza inkqubela koku, nawe uya kukufanelekela ukuba ngumlungiseleli kaThixo. Ngoko uya kuba nelungelo lokuba nesabelo ekuthwaleni lo myalelo kaYesu: “Hambani ngoko niye kuzenza abafundi . . . nibafundisa ukuba bazigcine zonke izinto endiniwisele umthetho ngazo.”—Mateyu 28:19, 20.

Ewe, kukho ubulungiseleli onokuba nesabelo kubo, ibe kungxamiseke ngakumbi kunanini na ngawe ukuba ube nesabelo.

[Ibhokisi ekwiphepha 25]

Umongikazi okwamele anyamekele intsapho uthi: “Ntsuku zonke ndichitha iyure enye ndisendleleni eya esibhedlele apho ndisebenza khona, ngoko ndacinga ukuba andinakuba nguvulindlela ongumncedani. Kodwa ngenyameko ndayilungelelanisa imisebenzi yam ukuze ndibe nesabelo kwinkonzo yasentsimini ekuseni ntsasa nganye ngaphambi kokuba ndiye emsebenzini, ebudeni bamaxesha ezidlo nangeentsuku endingasebenziyo ngazo. Unokuluthelekelela uvuyo lwam xa, ekupheleni kwenye inyanga, ndandichithele iiyure ezili-117 ekushumayeleni! Ndahambisa amaphephancwadi angama-263, imirhumo yamaphephancwadi engama-22 ibe ndakwazi ukuqalisa izifundo zeBhayibhile ezithathu.”

[Ibhokisi ekwiphepha 27]

UMichael unabantwana abasixhenxe abancinane ibe unomsebenzi oyimbopheleleko kwikholeji yaseNigeria. Ukwangumdala kwibandla lamaKristu. Unembono efanayo neyamawaka amaNgqina:

“Ubulungiseleli ndibujonga njengo-msebenzi wam ophambili ibe ndisoloko ndikhumbula ukuba uPawulos wathi: ‘Ndatyala, uApolo wankcenkcesha, kodwa uThixo waqhubeka ekhulisa.’ Mna nowakwam ‘siyatyala’ ebudeni beengxoxo ezimfutshane ezingee-ndaba ezilungileyo kwindlu ngendlu. ‘Siyankcenkcesha’ ngokubuyela kwabo babonakalisa umdla ukuze sibafundise ngokusuka eBhayibhileni, njengoko uYesu wathi sifanele senjenjalo. Izifundo zeBhayibhile zasemakhaya zeeveki ngeeveki ziye zanceda abaninzi—kwiimeko ezithile ziye zanceda iintsapho eziphe-leleyo—ukuba bazi ngenyaniso.”