Ukuvuna Abanquli
UMPOSTILE uYohane waboniswa umbono weziganeko ezigungqisa ihlabathi ezaziya kwenzeka “ngemini eyeyeNkosi.” Wabona iNkosi yasezulwini uYesu Kristu iphalisa ukuze yenze imfazwe yobulungisa, efanekiselwa lihashe elimhlophe—‘iseyisa nokuze yeyise.’ Into yokuqala eyenzayo kukuphosela utshaba olukhulu lukaThixo, uSathana, ngaphandle kwamazulu kummandla walo mhlaba. USathana uphindisela ngokuthwaxa uluntu ngokulubangela ukuba lusikane, kubekho indlala nezifo ezingenakuthelekiswa nanto, ezifanekiselwe ngabakhweli bokomfuziselo nangamahashe abo—elibomvu, elimnyama neliluthuthu ngebala. (ISityhilelo 1:10; 6:1-8; 12:9-12) Aba yeha baqhambuka okokuqala ngonyaka we-1914 ibe baye banda ukususela ngoko. Kungekudala, baya kufikelela encotsheni xa kusenzeka oko uYesu akuchaza ngokuba ‘yimbandezelo enkulu, ekungazange kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo.’—Mateyu 24:3-8, 21.
Kuya kuqhubeka ntoni ngabanquli bakaYehova ngelo xesha? ISityhilelo isahluko 7, indinyana 1 ukusa kweye-10, sithetha ngomkhosi wezithunywa zezulu ‘obambe’ imimoya yentshabalalo de aba banquli bahlanganiswe. Ebudeni bethuba elisusela kowe-1914, abokugqibela boSirayeli wokomoya abasemhlabeni, abali-144 000, baye bahlanganiswa. Emva koko “[khangela! NW] naso isihlwele esikhulu, ebekungekho namnye unako ukusibala, siphuma kuzo zonke iintlanga, nezizwe, nabantu neelwimi.” Esi sihlwele sikhulu sele sifikelela kwizigidi. Simi ngokwamkelekileyo phambi kwetrone kaThixo ngenxa yokholo esinalo kwigazi lentlawulelo likaYesu, owaxhelwa njengemvana emsulwa. ‘Sidanduluka ngezwi elikhulu, sisithi: Usindiso kuye uThixo wethu, lowo uhleli phezu kwetrone, nakuyo iMvana!’ Aba banquli banenzondelelo ngamaxesha onke bahlala besithi kwabanye ‘Yizani,’ abathi nabo bahlanganiselwe ukusinda “embandezelweni enkulu.”—ISityhilelo 7:14-17; 22:17.
“Kulo Lonke Ihlabathi”
Kunokuthethwa oku ngaba banquli bazinikeleyo: “Intlokoma yabo yaphuma, yaya kulo lonke ihlabathi, namazwi abo aya eziphelweni zelimiweyo.” (Roma 10:18) Umsebenzi wabo onzima uye wasikelelwa ngeziqhamo ezihle gqitha. Ngokomzekelo:
Ngoku iMexico inikela ingxelo yabanquli bakaYehova abakhutheleyo abangama-335 965, ulwando olunokuba ngamawaka alikhulu kwiminyaka nje emithathu! Kutheni kukho ulwando olukhulu kangaka? Ingxelo elandelayo inokunceda ukucacisa oku. Umfana ogama linguAurelio wayeligosa kwicawa yamaKatolika. Ngalo lonke ixesha amaNgqina kaYehova efika kuloo dolophana, wayebetha intsimbi yecawa ukuze adimaze bonke ukuba bangawaphulaphuli. Ekuhambeni kwexesha wathenga iJerusalem Bible yamaKatolika waza waqalisa ukuyifunda, kodwa wayengayilandeli. Kwathi ngaminazana ithile wabona umhlobo wakhe enkonye ekhwapheni umbhalo weNew World Translation. UAurelio wamngxolisa umhlobo wakhe waza, emxelela ukuba loo Bhayibhile yakhe yayiyeyobuxoki, waya naye kowabo ukuze ambonise iBhayibhile “yokwenene.” Umhlobo wakhe wathi: “Funda iEksodus 20,” waza wamshiya.
Liqala kwisahluko 1, eli gosa layifunda iEksodus lada lafikelela kwisahluko 20, indinyana 4 neyesi-5. Lothuswa koko iBhayibhile yalo yamaKatolika ikuthethayo ngemifanekiso eqingqiweyo. Emva kwedini leMisa kwiCawa elandelayo, laya kumfundisi ukuze limbuze ngezibhalo ezithetha ngemifanekiso eqingqiweyo. Ekuqaleni umfundisi wathi yena wayeyihlonela nje imifanekiso eqingqiweyo; wayengayinquli. Ebona ukuba oku kwakungamanelisi uAurelio, umfundisi wamtyhola ngokufundisisa namaNgqina kaYehova. UAurelio wakukhanyela oku kodwa wongezelela esithi, “Ngoku ndiza kwenjenjalo!”
Kwisihlandlo esilandelayo amaNgqina efika kuloo dolophana, uAurelio waqhagamshelana nawo waza waqalisa ukufundisisa iBhayibhile kunye nawo. Wayeka ukusebenza ecaweni waza kwiinyanga ezintathu wakufanelekela ukuba nesabelo kubulungiseleli basesidlangalaleni kunye namaNgqina kaYehova. Ikhaya lokuqala awalityelelayo yayilelomfundisi, owakhwankqiswayo kukubona owayesakuba ligosa lecawa ekumsebenzi wokushumayela ngoBukumkani. Umfundisi wamsongela ngokumsika ecaweni, kodwa uAurelio wamxelela ukuba oku kwakungayi kuba yimfuneko njengoko wayesele eyishiyile icawa. Ikhondo lakhe lenkalipho lakhuthaza abaninzi kuloo dolophana ababesele befundisisa namaNgqina kaYehova. UAurelio nabanye abangama-21 kuloo dolophana babhaptizwa kwindibano yesithili elandelayo. Ulwando lukhawuleze gqitha kuloo mmandla kangangokuba kwakukho umdala omnye kuphela owayenokuqwalasela neli qela imibuzo yabantu abaza kubhaptizwa.
“Intlokoma Yabo Yaphuma”
Ayikho indlela yokukubaleka ukushunyayelwa koBukumkani. Omnye umTaliyane ongumKatolika wayedla ngokucaphuka ngalo lonke ixesha amaNgqina kaYehova emtyelela. Ngoko xa inkampani yakhe yamtshintshela eSingapore, wavakalelwa kukuba ekugqibeleni ayengayi kuphinda amkhathaze. Kodwa okwammangalisayo kukuba, amaNgqina ayekho nalapho. Ngoko wafuya izinja ezimbini ezibukhali ukuze zihlasele amaNgqina awayeza kuphinda afike. Xa amaNgqina amabini afikayo ekhayeni lakhe, axhunyelwa zezo zinja. Izibilini ziphezulu, loo mabhinqa abaleka ukuze asindise ubomi bawo, esinga kumacala awahlukahlukeneyo kwisiphambuko sendlela. Xa enye yezinja yalifumanayo elinye, ngelokuncama elo Ngqina lathi rhuthu kwingxowa yalo iincwadana ezinemifanekiso ezimbini laza lazinyanzela emlonyeni ovulekileyo waloo nja. Ngenxa yoko, yayeka ukulileqa, yajika, yaza yabuyela kowayo.
Kwiveki elandelayo, la maNgqina mabini abuyela kwindlu eyayimelene naleyo. Umnini wezinja wayesesitiyeni sakhe, yaye, okumangalisayo kukuba, wawabulisa la mabhinqa waza wawamemela endlwini yakhe. Wawaxelela ukuba akazange akhe athethe namaNgqina kaYehova okanye afunde naziphi na iimpapasho zawo. Kodwa wayothuswe kukufumana iincwadana ezinemifanekiso emlonyeni wenye yezinja zakhe. Wazifunda ngaloo ngokuhlwa ezo ncwadana kwaye zamchukumisa ngokwenene. Nangona wayengumKatolika bonke ubomi bakhe, wabonakalisa umdla wokufundisisa iBhayibhile namaNgqina kaYehova.
Ekubeni le ndoda yatshintshelwa kwakhona eItali, kwenziwa amalungiselelo okuba amaNgqina kaYehova afundisise kunye nayo apho. Njengoko yona nomkayo baqalisa ukuya kwiintlanganiso, umfundisi wenqila enomsindo waya kubo eze kubasongela. Xa umntu othile watshisa isitiya sabo, esi sibini sawaqhawula onke amaqhina aso necawa. Ngoku le ndoda ithi: “Sele ndinikele ubungqina kumalungu amaninzi entsapho yakowethu ngenxa yokuba ndifuna azi ukuba uYehova ungokuphela koThixo wokwenyaniso.”
“Eziphelweni Zelimiweyo”
Amanye amava avela esiphelweni sehlabathi abonisa indlela isigidimi soBukumkani esixatyiswa nesiluncedo ngayo ekuguquleni ubomi babantu. Ngoxa lalisiya kwizifundo zangaphambi kokubeleka, iNgqina laseOstreliya ladibana nebhinqa elalinemikhwa emibi emininzi, nelalingafuni ukuyeka ukutshaya ebudeni bokukhulelwa kwalo. Isimo salo sengqondo salikhathaza eli Ngqina. Kwenzeka ukuba babeleke ngaxeshanye kwigumbi elinye lesibhedlele, ngoko baba nethuba lokuncokola. Kwabonakala ukuba eli bhinqa lalineengxaki ezininzi ekukhuleni kwalo, yaye ngoku umtshato walo wawusesichengeni sokuqhawuka. Ngoko, emva kokuba liphumile esibhedlele, eli Ngqina latyelela eli bhinqa laza laqalisa isifundo seBhayibhile kunye nalo, lisebenzisa incwadi ethi Ukwenza Ubomi Bentsapho Yakho Bonwabe.
Indoda yeli bhinqa yayithandaza kuThixo ifuna unqulo lokwenyaniso, isongezelela la mazwi: “Ngoxa nje ingengomaNgqina kaYehova!” Sekunjalo, xa yafumanisa ukuba umkayo wayefundisisa kunye namaNgqina, yaqalisa ukubuza imibuzo ibe yamenyelwa kwesi sifundo. Yakwenza oku, ibe kungekudala yaqalisa ukuya kwiintlanganiso zebandla. Ngoku, bobabini indoda nomfazi babhaptiziwe, yaye ngokucacileyo imeko yabo yomtshato iye yaphucula kakhulu.
Izifundo zeBhayibhile zamakhaya ezisekelwe kuncwadi olunjalo ziye zaphumela ekuhlanganisweni kwabanquli abatsha abaninzi. Kumazwe apho kuye kwafuneka amaNgqina kaYehova ajamelane neemvukelo, iimfazwe zamakhaya, okanye imiqathango yaseburhulumenteni, ukuqhutywa kwezifundo zeBhayibhile zasemakhaya kuye kwanda. Imfazwe yamakhaya iye yagquba eAngola kangangeminyaka emininzi, ibe amaNgqina aye athubeleza phantsi kwentshutshiso nobunzima obukhulu. Ekuqaleni konyaka ophelileyo, iingxelo zabonisa ukuba, ngokwesilinganiselo, umvakalisi ngamnye wayeqhuba phantse izifundo zeBhayibhile zamakhaya ezithathu, kodwa abavakalisi babenoncwadi lweBhayibhile oluncinane. Abaveleli abahambahambayo babetyelela iqela elincinane usuku ngalunye, belungiselela inkonzo yasentsimini ebudeni bemini neentlanganiso ngengokuhlwa nganye. Olunjani uvuyo olwalukho xa imfazwe yaphelayo ibe iitoni ezingama-42 zoncwadi lweBhayibhile obelufuneka kakhulu zafika zivela eMzantsi Afrika! Ngokuqinisekileyo, uthando lwabo bazalwana luya ‘kuphuphuma ngokuphuphuma kukwazi okukhulu, nako konke ukuqonda,’ njengoko ngoku benako ‘ukuzicikida izinto eziziincamisa.’ (Filipi 1:9, 10) Olunjani lona ukhuthazo okumele kube lulo oku kwabo baneencwadi ezininzi eziluncedo ekufundisiseni iBhayibhile ukuze balisebenzise ngokupheleleyo ilungiselelo uYehova awalenza ngobubele!—1 Timoti 4:15, 16.
Ulonwabo olufunyanwa ngabo banquli bathembekileyo lusikhumbuza ngamazwi kaYesu kwiNtshumayelo yaseNtabeni: “Banoyolo abangamahlwempu ngomoya; ngokuba ubukumkani bamazulu bobabo. . . . Banoyolo abatshutshiswa ngenxa yobulungisa; ngokuba ubukumkani bamazulu bobabo. . . . Vuyani nigcobe kunene; ngokuba umvuzo wenu mkhulu emazulwini.” (Mateyu 5:3-12) Esinjani sona isivuno esisele sihlanganiswa eAngola!
Kwanakweminye imimandla yehlabathi, imiqathango kumsebenzi wamaNgqina kaYehova iya incitshiswa okanye ishenxiswa. UYesu wathi ngomhla wakhe: “Ukuvuna okunene kuninzi, kodwa bona abasebenzi bambalwa.” (Mateyu 9:37) Hayi indlela okuyinyaniso ngayo oku namhlanje! Imfuneko yabasebenzi abangakumbi isoloko ikho. Siyavuya kuba ukunqula kwethu kubandakanya ukuba nenxaxheba ekuvuneni. Alukho uvuyo olungakumbi olunokufunyanwa emhlabeni namhlanje ngaphezu kwenkonzo yethu eneziqhamo esiyinikela kuYehova uThixo.
Noko ke, yintoni eshukumisela abanquli bakaYehova ukuba babonakalise uvuyo nenzondelelo engaka? Siza kubona.