Moyikeni UYehova Nize Nizukise Igama Lakhe Elingcwele
“Ngubani na ongekhe akoyike wena, [Yehova, “NW”], angalizukisi igama lakho? Ngokuba inguwe wedwa ongcwele.”—ISITYHILELO 15:4.
1, 2. (a) UYehova uzivule njani iingcango zasezulwini ebudeni bowe-1991? (b) Ngawaphi amava obomi awashukumisela umvangeli wasemazweni othembekileyo ukuba anikele eli cebiso: “Moyikeni uYehova”? (Bona kwane-1991 Yearbook, iphepha 187-9.)
UYEHOVA ‘uzivulile iingcango zezulu waza ngokwenene wathulula iintsikelelo de akwasweleka lutho.’ Loo mazwi anokusetyenziswa ngokuphindaphindiweyo kumaNgqina kaYehova kumaxesha akutshanje. (Malaki 3:10) Ngokomzekelo, ebudeni bonyaka wenkonzo we-1991, ihlombe lamaNgqina aziindwendwe nawasekuhlaleni awayeze ezindibanweni lalibonakala ngomanyano lobuKristu olwalukho kwiindibano ezikhethekileyo eziqhutywe emhlabeni wonke—ukususela kwiiNdibano “Zentetho Enyulu” eBuenos Aires eMzantsi Merika; naseManila, eTaipei, naseBangkok kwelaseMpuma; ukusa kwiiNdibano “Zabathandi Benkululeko” eBudapest, ePrague naseZagreb (ngoAgasti 16-18, 1991) eMpuma Yurophu.
2 Olunjani lona uvuyo ezazinalo iindwendwe ezivela phesheya ngokudibana namaNgqina athembekileyo nangamagqala ezo ndawo! Ngokomzekelo, eBangkok, uFrank Dewar—ngaxa lithile owayengokuphela komvakalisi woBukumkani eThailand—wabalisa ngeminyaka yakhe engama-58 ekwinkonzo yobuvangeli basemazweni. Waqalisa inkonzo yakhe kwiziqithi zePasifiki waza waya nakuMzantsi-mpuma weAsia, wada waya kufika naseTshayina. Wayejamelene neengozi zokwaphukelwa ngumkhombe, amarhamncwa asendle emahlathini, izifo ezifumaneka kweleenjiko nolawulo lwenkohlakalo lweenkokheli zomkhosi ezingoozwilakhe zaseJapan. Xa wabuzwa ngecebiso anokulinika abo beze endibanweni, wanikela impendulo elula: “Moyikeni uYehova!”
3. Kutheni sifanele sibonakalise ukumoyika uThixo?
3 “Moyikeni uYehova!” Hayi indlela ekubaluleke ngayo ngathi sonke ukuba sihlakulele olo loyiko lufanelekileyo! “Ingqalo yobulumko kukoyika uYehova.” (INdumiso 111:10) Olu asiloloyiko lokumngcangcazelela uYehova. Kunoko, yintlonelo enzulu ngobungangamsha oboyikekayo neempawu zakhe zobuthixo, esekelwe kwingqiqo esiyifumana ngokufundisisa iLizwi likaThixo. KwiSityhilelo 15:3, 4, ingoma kaMoses neyeMvana ithi: “Mikhulu, ingummangaliso imisebenzi yakho, Nkosi, Thixo Somandla; zinobulungisa, ziyinyaniso iindlela zakho, Kumkani weentlanga. Ngubani na ongekhe akoyike wena, Nkosi, angalizukisi igama lakho? Ngokuba inguwe wedwa ongcwele.” Ebonakalisa ukunyaniseka kubanquli bakhe, uYehova ‘unencwadi yokukhumbuza phambi kwakhe eyabhalelwa abamoyikayo uYehova nabacinga ngegama lakhe.’ Banikwa umvuzo wobomi obungunaphakade.—Malaki 3:16; ISityhilelo 20:12, 15.
Uloyiko Lobuthixo Luyoyisa
4. Sisiphi isiganeko sokusindiswa kwabantu mandulo esifanele sisikhuthaze ukuba simoyike uYehova?
4 Xa amaSirayeli ayephuma kwiYiputa kaFaro, uMoses wabonisa ngokucacileyo ukuba nguYehova kuphela awayemoyika. Kungekudala, amaSirayeli ayephakathi koLwandle Olubomvu nemikhosi yokulwa enamandla yaseYiputa. Yintoni awayenokuyenza? “Wathi uMoses ebantwini, Musani ukoyika; misani, nilubone usindiso lukaYehova aya kunenzela lona namhla; kuba amaYiputa lawo niwabonileyo namhlanje, anisayi kuphinda niwabone naphakade. UYehova uya kunilwela, ke nina niya kuthi cwaka.” Esenza into emangalisayo, uYehova wawahlukanisa amanzi. AmaSirayeli awela emhlabeni owomileyo. Andula ke amanzi abuyelana kwakhona. Umkhosi kaFaro watshatyalaliswa ngokupheleleyo. UYehova walusindisa olo hlanga olwalusoyika uThixo, ngoxa kwangaxeshanye waphumeza umgwebo kwiYiputa eyayingahloneli Thixo. Ngokunjalo nanamhlanje, uya kubonakalisa ukunyaniseka kwakhe ngokukhulula amaNgqina akhe awoyika uThixo kwihlabathi likaSathana.—Eksodus 14:13, 14; Roma 15:4.
5, 6. Ziziphi iziganeko ezenzeka ngexesha likaYoshuwa ezibonisa ukuba sifanele soyike uYehova kunabantu?
5 Emva kokufuduka eYiputa, uMoses wathumela iintlola ezili-12 kwiLizwe Ledinga. Ezilishumi zoyika zakubona iingxilimbela ezingabemi belo lizwe zaza zawacenga amaSirayeli ukuba angayi kwelo lizwe. Kodwa iintlola ezimbini, uYoshuwa noKalebhi, zanikela le ngxelo: “[Elo lizwe] lilizwe elihle kakhulu kunene. Ukuba uYehova usinonelele, wosisa kwelo zwe, asinike; lilizwe elibaleka amasi nobusi. Kodwa musani ukugwilika kuYehova, musani ukuboyika abantu belo zwe nina; kuba bakukudla kwethu. Umkile umthunzi wabo kubo, uYehova unathi; musani ukuboyika.”—Numeri 14:7-9.
6 Noko ke, loo maSirayeli aba ngamaxhoba okoyika abantu. Ngenxa yoko, awazange angene kwilizwe awayelithenjisiwe. Kodwa uYoshuwa noKalebhi, kunye nesizukulwana esitsha samaSirayeli, baba nelungelo lokungena kwelo lizwe lihle baza balime izidiliya nezinquma zalo. Kwintetho yakhe yokwahlukana nebandla labantu bakwaSirayeli, uYoshuwa wanikela eli cebiso: “Moyikeni . . . uYehova, nimkhonze ngokugqibeleleyo, nangenyaniso.” Yaye uYoshuwa wongezelela oku: “Ke mna nendlu yam siya kukhonza uYehova.” (Yoshuwa 24:14, 15) Hayi indlela la mazwi afanele abe lukhuthazo ngayo kwiintloko-ntsapho nabo bonke abanye ukuba bamoyike uYehova njengoko silungiselela ukungena kwihlabathi elitsha nelinobulungisa likaThixo!
7. UDavide wakubethelela njani ukubaluleka kokoyika uThixo?
7 Nenkwenkwe engumalusi uDavide yabonakalisa ukumoyika okungumzekelo uYehova xa yathi egameni likaThixo yafun’ undikho kuGoliyati. (1 Samuweli 17:45, 47) Eselukhukweni lokufa, uDavide wayenokuvakalisa oku: “UMoya kaYehova uthetha ngam, ukukhuluma kwakhe kuselulwimini lwam. Uthi uThixo kaSirayeli, uLiwa lakwaSirayeli uthetha kum, uthi, Kuya kuvela umlawuli woluntu olilungisa, elawula ngokoyika uThixo. Unjengokukhanya kwentsasa, lakuphuma ilanga, njengentsasa engenamafu.” (2 Samuweli 23:2-4) Abalawuli beli hlabathi ababonakalisi kumoyika uThixo, yaye enjani yona intlekele eye yangumphumo woku! Hayi indlela okuya kwahluka ngayo oku xa iya kube inguYesu, “unyana kaDavide,” olawula umhlaba ngendlela ebonakalisa ukumoyika uYehova!—Mateyu 21:9.
Ukwenza Ngokuvisisana Nokoyika UYehova
8. Kwakutheni ukuze uYuda aphumelele phantsi kukaYehoshafati, nto leyo ebonisa ntoni namhlanje?
8 Malunga neminyaka elikhulu emva kokufa kukaDavide, uYehoshafati waba ngukumkani kwelakwaYuda. Naye wayengukumkani owalawula ngendlela ebonakalisa ukumoyika uYehova. Wabuyisela inkqubo yolawulo lobuthixo kwaYuda, wamisa abagwebi kulo lonke elo lizwe, waza wabanika le miyalelo: “Akungenxa yomntu ukugweba kwenu, kungenxa kaYehova; unani ke emcimbini wokugweba. Ngoko ke ukoyikwa kukaYehova makube phezu kwenu; yenzani ngobulumko; ngokuba akukho bugqwetha kuYehova uThixo wethu, nakukhetha buso, nakwamkela sicengo. . . . Niya kwenjenjalo ukumoyika uYehova ngokunyanisekileyo, nangentliziyo epheleleyo.” (2 Kronike 19:6-9) Ngenxa yoko, uYuda waphumelela ekoyikeni uYehova, njengoko nabantu bakaThixo bengenelwa kwinkonzo yabaveleli abanovelwano namhlanje.
9, 10. UYehoshafati woyisa njani ngokoyika uYehova?
9 Phofu ke, uYuda wayeneentshaba. Ezi ntshaba zazigqibe kwelokuba zilucim’ igama uhlanga lukaThixo. Imikhosi emanyeneyo yakwa-Amon, eyakwaMowabhi neyabaseNtabeni yakwaSehire yangena kummandla welakwaYuda yaza yasongela iYerusalem. Yayingumkhosi onamandla. UYehoshafati wabhenela kuYehova ngomthandazo ‘ngoxa onke amaYuda ayemi phambi koYehova, neentsana zawo, nabafazi bawo, noonyana bawo.’ Ekuphenduleni loo mthandazo, umoya kaYehova wamfikela uYahaziyeli umLevi, owathetha oku: “Utsho uYehova ukuthi kuni, Musani ukoyika, musani ukuqhiphuka umbilini ngenxa yale ngxokolo inje ukuba ninzi; ngokuba imfazwe le asiyeyenu, yekaThixo. Yihlani ngomso niye kulwa nabo . . . Le yanamhla asiyeyenu; zimiseni nime nilubone usindiso lukaYehova onani, maYuda neYerusalem. Musani ukoyika, musani ukuqhiphuka umbilini. Phumani ngomso nibahlangabeze; uYehova unani.”—2 Kronike 20:5-17.
10 Ngentsasa elandelayo, amadoda akwaYuda avuka kwasekuseni. Njengoko ngentobelo ayephuma ehlangabeza utshaba, uYehoshafati wasukuma waza wathi: “Ndiphulaphuleni, nina maYuda, nani bemi baseYerusalem. Kholwani kuYehova uThixo wenu, nozimaseka; kholwani kubaprofeti bakhe, noba nempumelelo.” Zihamba phambi kwamadoda axhobileyo, iimvumi zikaYehova zavuma ngazwi linye zisithi: “Bulelani kuYehova, ngokuba ingunaphakade inceba [“ububele obunothando,” NW] yakhe.” UYehova wabubonakalisa obo bubele obunothando ngokuludubaduba utshaba ngokokude lubulalane lodwa. Njengoko amadoda akwaYuda efika emboniselweni yasentlango, kwakuqungquluze izidumbu zeentshaba kuphela apho.—2 Kronike 20:20-24.
11. Ngokuphathelele uloyiko, iintlanga zahluke njani kubantu bakaThixo?
11 Xa iintlanga eziselumelwaneni zevayo ngale ndlela imangalisayo yokusindiswa, zafikelwa ‘kukoyika uYehova.’ Kwelinye icala, uhlanga olwabonakalisa ukuthobela ngokoyika uYehova ngoku ‘lwaphunyuzwa ngeenxa zonke.’ (2 Kronike 20:29, 30) Ngokufanayo, xa uYehova ezisa umgwebo ngeArmagedon, iintlanga ziya kufikelwa ‘kukoyika uYehova’ noNyana wakhe onguMtshabalalisi, uYesu Kristu, kodwa azisayi kukwazi ukuxhathisa ngemini enkulu yomsindo kaThixo.—ISityhilelo 6:15-17.
12. Abanye baye bavuzwa njani ngenxa yokoyika uYehova?
12 Ukumoyika okufanelekileyo uYehova kuzisa imivuzo etyebileyo. UNowa “wathi ngokoyika uThixo wawakha umkhombe wokusindisa indlu yakhe.” (Hebhere 11:7) Yaye ngamaKristu enkulungwane yokuqala, kuye kwabhalwa kwathiwa ngawo, emva kwexesha lentshutshiso, ibandla “[lalinoxolo], lisakheka, lihamba liyoyika iNkosi [uYehova, NW]; laye lisanda ngentuthuzelo yoMoya oyiNgcwele—kanye njengokuba kunjalo kwiMpuma Yurophu namhlanje.—IZenzo 9:31.
Thanda Okulungileyo, Uthiye Into Embi
13. Yiyiphi ekuphela kwendlela esingayizuza ngayo intsikelelo kaYehova?
13 UYehova ulunge ngokupheleleyo. Ngenxa yoko, “ukoyika uYehova kukuthiya into embi.” (IMizekeliso 8:13) Kubhalwe oku ngoYesu: “Wathanda ubulungisa, wathiya okungendawo; ngenxa yoko, uThixo, uThixo wakho, ukuthambise ngeoli yomgcobo.” (Hebhere 1:9) Ukuba nathi, njengoYesu, sinqwenela ukusikelelwa nguYehova, simele sibucekise ububi, ukuziphatha okubi, ugonyamelo nokubawa kwehlabathi likaSathana elinekratshi. (Thelekisa IMizekeliso 6:16-19.) Simele sikuthande oko uYehova akuthandayo size sikuthiye oko akuthiyileyo. Simele soyike ukwenza nantoni na engayi kumkholisa uYehova. “Ngokoyika uYehova umntu uyatyeka ebubini.”—IMizekeliso 16:6.
14. UYesu usimisela njani umzekelo wokulandelwa?
14 UYesu wasishiyela umzekelo ukuze silandele ngokusondeleyo emanyathelweni akhe. “Obesithi, etshabhiswa, angaphindezeli atshabhise, athi esiva ubunzima, angaphindezeli asongele; ke ubeyekele kulowo ugwebayo ngokobulungisa.” (1 Petros 2:21-23) Ngokoyika uYehova, nathi sinokunyamezela ukungcikivwa, ukugxekwa nokutshutshiswa, esikuziselwa lihlabathi likaSathana.
15. Kutheni sifanele soyike uYehova kunokoyika abo banokubulala umzimba?
15 KuMateyu 10:28, uYesu uyasiluleka: “Ningaboyiki abo babulala umzimba, kodwa bengenako ukuwubulala wona umphefumlo; yoyikani ke kanye lowo unako ukutshabalalisa umphefumlo kwanomzimba [eGehena, NW].” Kwanokuba lowo woyika uYehova angabulawa lutshaba, iintlungu zokufa zizinto nje zokwexeshana. (Hoseya 13:14) Akuba evusiwe, loo mntu uya kukwazi ukuthi: “Kufa luphi na uloyiso lwakho? Kufa luphi na ulwamvila lwakho?”—1 Korinte 15:55, TE.
16. UYesu wakubonakalisa njani ukoyika uYehova waza wamzukisa?
16 UYesu ngokwakhe ubamisela umzekelo obalaseleyo bonke abo bathanda ubulungisa bukaYehova baze bathiye okubi. Ukumoyika kwakhe uYehova kubonakala kumazwi okugqibela awawathetha kubafundi bakhe, njengoko efumaneka kuYohane 16:33: “Ezi zinto ndizithethile kuni, ukuze nibe noxolo kum. Ehlabathini niya kuba neembandezelo; yomelelani, mna ndiloyisile ihlabathi.” Ingxelo kaYohane iyaqhubeka: “Ezi zinto wazithetha uYesu, wawaphakamisa amehlo akhe wakhangela ezulwini, wathi, Bawo, lifikile ilixa; mzukise uNyana wakho, ukuze noNyana wakho akuzukise . . . Ndilibonakalisile igama lakho kubo abantu obundinike bona, bephuma ehlabathini.”—Yohane 17:1-6.
Moyikeni UYehova Nize Nimdumise
17. Ziziphi iindlela esinokuwuxelisa ngazo umzekelo kaYesu?
17 Ngaba thina namhlanje sinokuwuxelisa umzekelo kaYesu wenkalipho? Ngokuqinisekileyo sinokuwuxelisa ngokubonakalisa ukumoyika uYehova! UYesu wasazisa igama likaYehova elibalaseleyo neempawu zakhe. Ekubeni simoyika uYehova njengeNkosi yethu enguMongami, siyamzukisa njengophakamileyo kunabo bonke abanye oothixo, kuquka uBathathu Emnye ongenagama noyimfihlelo weNgqobhoko. UYesu wamkhonza uYehova ngoloyiko olufanelekileyo, engazivumeli abanjiswe ngumgibe wokoyika umntu ofayo. “Ngemihla yenyama yakhe [uKristu], xa wayesondeze izikhungo kwanezibongozo kulowo unako ukumsindisa ekufeni, kunye nodanduluko olunamandla, neenyembezi, waviwa ngenxa yokumhlonela [“yokumoyika,” NW] kwakhe uThixo.” NjengoYesu, ngamana nathi singabonakalisa ukumoyika uYehova njengoko siqhubeka sifunda ukuthobela ngokuva kwethu ubunzima—ngamaxesha onke sinosukelo lokuzuza usindiso olungunaphakade.—Hebhere 5:7-9.
18. Sinokuyinikela njani kuThixo inkonzo engcwele sinokoyika uThixo?
18 Kamva kuloo ncwadi awayeyibhalela amaKristu angamaHebhere, uPawulos ubongoza amaKristu athanjisiweyo: “Masithi ngoko, sisamkela ubukumkani obungenakuzanyazanyiswa nje, sibe nombulelo, simkhonze ngawo uThixo ngokukholekileyo, sinokuhlonela nokoyika.” Namhlanje, “isihlwele esikhulu” sinenxaxheba kuloo nkonzo ingcwele. Ibe le nkonzo iquka ntoni? Emva kokuxubusha ngobabalo lukaYehova ngokulungiselela idini loNyana Wakhe, uYesu Kristu, uPawulos uthi: “Masithi ngaye sinyuse ngamaxesha onke kuye uThixo umbingelelo wendumiso, oko kukuthi, isiqhamo somlomo olivumayo igama lakhe.” (Hebhere 12:28; 13:12, 15) Sibonakalisa uxabiso ngobabalo lukaYehova, sifanele sifune ukunikela lonke ixesha esilifumanayo kwinkonzo yakhe engcwele. Njengamaqabane anyanisekileyo entsalela yamaKristu athanjisiweyo, isihlwele esikhulu namhlanje sifeza eyona nxalenye inkulu yaloo nkonzo. Esi sihlwele siyavuma ukuba usindiso lolukaThixo noKristu, njengoko simi ngokufuziselayo phambi kwetrone kaThixo, ‘sinikela inkonzo engcwele imini nobusuku.’—ISityhilelo 7:9, 10, 15.
Zukisa UYehova Ukuze Uzuze Ubomi Obungunaphakade
19, 20. Ziziphi iintlobo ezimbini zoloyiko eziya kubonakala ‘ngemini kaYehova’?
19 Imini ezukileyo yokuthethelelwa kukaYehova ayifikanga igalelekile! “Yabonani, iyeza imini evutha njengeziko; baya kuba ziindiza bonke abakhukhumali, nabenzi bonke bokungendawo, ibalenye loo mini izayo, utsho uYehova wemikhosi.” Elo xesha lentlekele ‘yimini enkulu neyoyikekayo kaYehova.’ (Malaki 4:1, 5) Iya kubetha ‘zidandatheke’ iintliziyo zabangendawo, baye aba ‘abayi kukha basinde.’—Yeremiya 8:15; 1 Tesalonika 5:3.
20 Noko ke, abantu bakaYehova bashukunyiswa luloyiko olwahlukileyo. Isithunywa sezulu esiphathiswe “iindaba ezilungileyo ezingunaphakade” siye sahlab’ ikhwelo kubo ngezwi eliphakamileyo, sisithi: “Moyikeni uThixo, nimzukise; ngokuba lifikile ixa lokugweba kwakhe.” (ISityhilelo 14:6, 7) Siya kubonakalisa intlonelo ngaloo mgwebo njengoko ubushushu obukhulu beHar–Magedon bulitsho libe luthuthu ihlabathi likaSathana. Ukumoyika okufanelekileyo uYehova kuya kubhalwa ngokungacimekiyo ezintliziyweni zethu. Ngamana ngelo xesha singababalwa size sizibone siphakathi ‘kwabasindisiweyo abaye babiza egameni likaYehova’!—Yoweli 2:31, 32; Roma 10:13.
21. Ukoyika uYehova kuya kukhokelela kweziphi iintsikelelo?
21 Kuya kulandela iintsikelelo ezizukileyo, kuquka “iminyaka yobomi” efikelela kunaphakade kanaphakade! (IMizekeliso 9:11; INdumiso 37:9-11, 29) Ngoko ke, enoba ithemba lethu likukudla ilifa loBukumkani okanye ukukhonza kummandla wabo emhlabeni, masiqhubeke ngoku sinikela kuThixo inkonzo engcwele ngokuhlonela uThixo nokumoyika. Masiqhubeke sizukisa igama lakhe elingcwele. Kwaye siya kusikelelwa ngantoni ngenxa yoko? Ukuba nombulelo ngonaphakade kuba siye sasithobela isiluleko sobulumko sokuba ngamaxesha onke simoyike uYehova!
Ubungaphendula Uthini?
◻ Kuthetha ukuthini “ukoyika uYehova”?
◻ Ukoyika uThixo kwabanceda njani abantu bakhe bamandulo?
◻ Nguwuphi umzekelo wokoyika uThixo esawushiyelwa nguYesu?
◻ Sinokuyigcina njani ingqibelelo sibonakalisa ukumoyika uYehova?
[Umfanekiso okwiphepha 18]
Kwincwadi yeSityhilelo, abazalwana bakaYesu babonwa bevuma “ingoma kaMoses,” ingoma yokudumisa uYehova
[Umfanekiso okwiphepha 20]
Umkhosi kaYehoshafati uyoyisa ngokubonakalisa ukoyika uYehova
[Umfanekiso okwiphepha 23]
Abo bamoyikayo uYehova baya kuvuzwa ngeminyaka yobomi efikelela kunaphakade kanaphakade