Abantu Abapha Behlonela UThixo Balindelwe Lulonwabo Olungunaphakade
“Wenjenje uThixo ukulithanda kwakhe ihlabathi, ude wancama [“wanikela,” “NW”] uNyana wakhe okuphela kwamzeleyo, ukuze bonke abakholwayo kuye bangatshabalali, koko babe nobomi obungunaphakade.”—YOHANE 3:16.
1, 2. (a) Ngubani oyena Mntu ubalasele ngokupha, yaye sisiphi esona sipho sikhulu awasinikela kuluntu? (b) Ngokunikela ngesona sipho sikhulu, luluphi uphawu uThixo awalubonakalisayo?
UYEHOVA UTHIXO ungoyena Mntu ubalaseleyo ngokupha kunabo bonke abantu. Umfundi ongumKristu uYakobi wayebhekisela kuye, uMdali wezulu nomhlaba, xa wabhala wathi: “Sonke isipho esilungileyo, naso sonke isipho esigqibeleleyo, sesaphezulu; sihla sivela kuye uYise wezikhanyiso, ongenabuyambo nasithunzi sakujika.” (Yakobi 1:17) Kwakhona uYehova wanikela ngesona sipho sikhulu esasinokunikelwa. Mayela nesona sipho sakhe sikhulu awasinika uluntu, kwathiwa: “Wenjenje uThixo ukulithanda kwakhe ihlabathi, ude wancama [wanikela] uNyana wakhe okuphela kwamzeleyo, ukuze bonke abakholwayo kuye bangatshabalali, koko babe nobomi obungunaphakade.”—Yohane 3:16.
2 Loo mazwi athethwa nguNyana kaThixo okuphela kwamzeleyo ngokwakhe. Unyana okuphela kozelwe nguyise ngokwemvelo ebeya kumxabisa aze amthande ubawo onjalo njengomthombo wobomi bakhe nazo zonke izinto ezilungileyo amlungiselele zona ukuze abunandiphe ubomi. Kodwa uthando lukaThixo aluzange lupheleliselwe kulo Nyana mnye kuphela. Ukudlulisela eso sipho kwezinye zezidalwa zakhe kwakuya kubonisa ukuba uThixo ubonakalisa uthando ngomlinganiselo omkhulu ngokwenene. (Thelekisa amaRoma 5:8-10.) Oku kubonakala ngakumbi xa sihlolisisa oko igama elithi “wanikela” likuthethayo ngokwenene kulo mongo.
Isipho SikaThixo ‘EsinguNyana Wothando Lwakhe’
3. Ngaphandle ‘konyana wothando lwakhe,’ ngoobani abanye ababenandipha uthando lukaBawo wasezulwini?
3 Kangangexesha elingachazwanga ubude balo, uThixo wayenandipha unxulumano lobuqu noNyana wakhe okuphela kwamzeleyo—‘uNyana wothando lwakhe’—kummandla wasezulwini. (Kolose 1:13) Ukutyhubela lonke elo xesha, uthando olwalukho phakathi koYise noNyana lwakhula kangangokuba kwakungekho bantu babini babethandana njengabo. Ezinye izidalwa uThixo awazidala ngoNyana wakhe okuphela kwamzeleyo nazo zazithandwa njengamalungu entsapho kaYehova engokobuthixo. Ngaloo ndlela, kwakugquba uthando kuyo yonke intsapho kaThixo. Ngokuchanileyo iZibhalo ezingcwele zithi “uThixo uluthando.” (1 Yohane 4:8) Ngoko ke, intsapho kaThixo yayibunjwa ngabo bathandwayo nguYise, uYehova uThixo.
4. Ukunikela kukaThixo ngoNyana wakhe kwabandakanya okungakumbi kunokuphulukana nonxulumano olusenyongweni njani, yaye ngenxa yoobani?
4 UYehova noNyana wakhe wamazibulo babesondelelene gqitha kangangokuba ukuqhawula olo nxulumano lusenyongweni kwakuya kuba yilahleko enkulu. (Kolose 1:15) Kodwa ‘ukunikela’ ngalo Nyana okuphela kozelweyo kwathetha okungakumbi kunokuba uThixo wayeza kuphulukana nonxulumano lobuqu ‘noNyana wothando lwakhe.’ Kwafikelela nakwinqanaba lokuba uYehova avumele uNyana wakhe ukuba afe aze ngaloo ndlela akhe angabikho okomzuzwana phakathi kwentsapho kaThixo yendalo yonke. Oku yayikukufela abo babengazange babe ngamalungu entsapho kaThixo. UYehova wayengenakulunika uluntu olusweleyo isipho esingaphezu kweso singuNyana wakhe okuphela kwamzeleyo, iZibhalo ezikwambiza ngokuthi “ingqalo yayo indalo kaThixo.”—ISityhilelo 3:14.
5. (a) Yiyiphi imeko ebuhlungu inzala ka-Adam eyayikuyo, yaye kwafuneka omnye woonyana bakaThixo abathembekileyo enze ntoni ngenxa yokusesikweni kukaThixo? (b) Ukuze anikele ngesona sipho sikhulu yintoni ekwafuneka uThixo ayenze?
5 Isibini sokuqala esingabantu, uAdam noEva, sasilela ukugcina indawo yaso njengamalungu entsapho kaThixo. Leyo yimeko esaba kuyo emva kokugxothwa emyezweni wase-Eden ngenxa yokona uThixo. Ukongezelela ekubeni sasingasengawo amalungu entsapho kaThixo sasikwaphantsi kwesigwebo sokufa. Ngoko ke, ingxaki yayingekokubuyiselwa kwenzala yaso kwinkoliseko kaThixo njengamalungu entsapho yakhe kuphela kodwa yayikwakukukhutshwa kwayo kwisigwebo sikaThixo sokufa. Ngokuvisisana nendlela okusebenza ngayo okusesikweni kukaThixo, kwakuza kufuneka ukuba omnye woonyana bakaYehova uThixo abathembekileyo afe esikhundleni sayo, okanye abe yintlawulelo. Ngenxa yoko, umbuzo omkhulu yaba ngulo: Ngaba lowo ukhethiweyo wayeya kuvuma ukufa esikhundleni soluntu olungaboni? Ngaphezu koko, ukuze oku kuphumelele kwakuza kufuneka uThixo onguSomandla enze ummangaliso. Kwakhona kwakuza kufuneka uThixo abonakalise uthando ngomlinganiselo omkhulu.—Roma 8:32.
6. UNyana kaThixo wakwazi njani ukukufikelela oko kwakufuneka ngokukhethekileyo kwimeko yoluntu olunesono, yaye wathini mayela noku?
6 NguNyana kaYehova olizibulo kuphela owayenokukufikelela oko kwakufuneka ngokukhethekileyo kwimeko eyayibandakanya uluntu olunesono. Ungumfanekiselo kaYise wasezulwini ekubonakaliseni uthando ngentsapho edalwe nguThixo kangangokuba akakho olingana naye koonyana bakaThixo. Ekubeni zonke ezinye izidalwa ezikrelekrele zabakho ngaye, ngokuqinisekileyo ebeya kuzithanda kakhulu. Ngaphezu koko, uthando luphawu abalasele ngalo uNyana kaYehova okuphela kozelweyo, uYesu Kristu, ngenxa yokuba “elubengezelo lobuqaqawuli [bukaThixo], nombhalo wenkqu yakhe.” (Hebhere 1:3) Ebonisa ukuba wayekulungele ukubonakalisa olu thando ngowona mlinganiselo mkhulu ngokunikela ngobomi bakhe ngenxa yoluntu olunesono, uYesu waxelela abapostile bakhe abali-12 oku: “Kuba noNyana woMntu engezanga kulungiselelwa; weza kulungiselela, nokuncama ubomi bakhe, bube yintlawulelo yokukhulula abaninzi.”—Marko 10:45; bona kwanoYohane 15:13.
7, 8. (a) Yayiyintoni intsusa-senzo kaYehova yokuthumela uYesu Kristu kwihlabathi loluntu? (b) Luhlobo luni lothumo uThixo awamthumela lona uNyana wakhe okuphela kwamzeleyo?
7 UYehova uThixo wayenesizathu esikhethekileyo sokuthumela uYesu kweli hlabathi lihlelelekileyo loluntu. Luthando lukaThixo olwaluyintsusa-senzo yoku, kuba noYesu wathi: “Wenjenje uThixo ukulithanda kwakhe ihlabathi, ude wancama uNyana wakhe okuphela kwamzeleyo, ukuze bonke abakholwayo kuye bangatshabalali, koko babe nobomi obungunaphakade. Kuba uThixo akamthumanga uNyana wakhe ehlabathini, ukuze aligwebe ihlabathi; wamthuma ukuze ihlabathi lisindiswe ngaye.”—Yohane 3:16, 17.
8 Luthumo lokusindisa awathi uYehova ngothando wamthuma lona uNyana wakhe okuphela kwamzeleyo. UThixo akazange amthumele apha uNyana wakhe ukuze aligwebe ihlabathi. Ukuba uNyana kaThixo wayethunyelwe ukugweba imeko yalo lonke uluntu ngeyayibe yenganiki themba. Isohlwayo somgwebo oqatha engesasiwiswe nguYesu Kristu kwintsapho yoluntu ngesasibe sesokugwetyelwa ukufa. (Roma 5:12) Ngaloo ndlela, ngale mbonakaliso ikhethekileyo yothando lukaThixo, uThixo wasilungiselela isigwebo sokufa esasifuneka ngenxa yokusesikweni.
9. Umdumisi uDavide wavakalelwa njani ngokupha kukaYehova?
9 Ezintweni zonke, uYehova uThixo uvakalisa aze abonakalise uthando njengenkalo ebalaseleyo yobuntu bakhe. Yaye ngokuchanileyo kunokuthiwa uThixo ngothando ubapha izinto ezilungileyo ngaphezu kokuba kuyimfuneko abanquli bakhe abathembekileyo abasemhlabeni. Umdumisi uDavide wavakalelwa ngolo hlobo ngalo mbandela xa wathi kuThixo: “Hayi, ubukhulu bokulunga kwakho, obuqwebele abakoyikayo, obenzela abazimela ngawe, ebusweni boonyana babantu.” (INdumiso 31:19) Xa uDavide wayengukumkani wohlanga lwakwaSirayeli—ewe, ukutyhubela bonke ubomi bakhe njengelungu lohlanga olwalunyulwe nguThixo ngokukhethekileyo—wakubona ukulunga kukaYehova izihlandlo eziliqela. Yaye uDavide wakufumanisa kukukhulu.
Ukuphulukana KukaSirayeli Nesipho Esikhulu Esivela KuThixo
10. Kutheni uSirayeli wamandulo wayengafani nalo naluphi na olunye uhlanga emhlabeni?
10 Ngokuba noYehova njengoThixo wakhe, uSirayeli wamandulo wayengafani nalo naluphi na olunye uhlanga emhlabeni. Esebenzisa umprofeti uMoses njengomlamleli, uYehova wangenisa inzala ka-Abraham, uIsake noYakobi kulwalamano lomnqophiso kunye naye. Wayengazange aqhubane nalo naluphi na olunye uhlanga ngolu hlobo. Ngoko ke, umdumisi ophefumlelweyo wavakalisa la mazwi: “Uloxelela uYakobi ilizwi lakhe, uSirayeli imimiselo yakhe namasiko akhe. Akenjanga njalo kolunye uhlanga, namasiko aluwazi. Haleluya!”—INdumiso 147:19, 20.
11. USirayeli wakunandipha kwada kwanini ukuma kwakhe okukhethekileyo noThixo, yaye uYesu wakuchaza njani ukuguquka kolwalamano lwabo?
11 Uhlanga lukaSirayeli wemvelo lwaqhubeka lunolu lwalamano lukholekileyo noThixo de lwamgatya uYesu Kristu njengoMesiya ngonyaka wama-33 weXesha lethu Eliqhelekileyo. Yayilusuku olulusizi ngokwenene kuSirayeli xa uYesu wadanduluka kabuhlungu wathi: “Yerusalem, Yerusalem, wena ubabulalayo abaprofeti, ubagibisele ngamatye abo bathunywe kuwe, kufuthi kangakanani na ndithande ukubabuthela ndawonye abantwana bakho, ngohlobo esithi isikhukukazi siwabuthele ndawonye amathole aso ngaphantsi kwamaphiko, anavuma! Yabonani, indlu yenu ishiywa nani ize.” (Mateyu 23:37, 38) Amazwi kaYesu abonisa ukuba uhlanga lwakwaSirayeli, nangona ngaphambili lwalunenkoliseko kaYehova, lwaluphulukene nesipho esikhethekileyo esivela kuThixo. Oku kwenzeka njani?
12. Babengoobani ‘abantwana beYerusalem,’ yaye ngekwakuthethe ntoni ukubabuthela ndawonye kukaYesu?
12 Ngokusebenzisa igama elithi “abantwana,” uYesu wayebhekisela kuphela kumaYuda emvelo awayalukile nawayehlala eYerusalem yaye emela uhlanga lwamaYuda luphela. Ukubuthela ndawonye kukaYesu ‘abantwana beYerusalem’ kwakuya kuthetha ukungenisa aba “bantwana” kumnqophiso omtsha kunye noThixo, yena enguMlamleli phakathi koYehova nala maYuda emvelo. (Yeremiya 31:31-34) Umphumo woku wawuya kuba kukuxolelwa kwezono, kuba lwalunzulu ngolo hlobo uthando lukaThixo. (Thelekisa uMalaki 1:2.) Esi sasiya kuba sisipho esikhulu ngokwenene.
13. Ukungamamkeli kukaSirayeli uNyana kaThixo kwaphumela ekulahlekelweni yintoni, kodwa kutheni uvuyo lukaYehova lwaqhubeka lungathothanga?
13 Ngokuvisisana neLizwi lakhe elibuprofeti, uYehova walinda ithuba elide ngokwaneleyo ngaphambi kokudlulisela kubantu abangemaYuda isipho sokuba ngamalungu omnqophiso omtsha. Kodwa ngokungamamkeli uNyana kaThixo, uMesiya, uhlanga lukaSirayeli wemvelo lwaphulukana nesi sipho sikhulu. Ngoko ke uYehova wakulungisa oku kungamkelwa koNyana wakhe ngokudlulisela esi sipho kubantu ababengaphandle kohlanga lwamaYuda. Ngaloo ndlela, uvuyo lukaYehova njengoMphi Omkhulu aluzange luthothe.
Uyolo Lokupha
14. Kutheni uYesu Kristu esesona sidalwa sonwabileyo kwindalo yonke?
14 UYehova “unguThixo owonwabileyo.” (1 Timoti 1:11, NW) Ukupha abanye yenye yezinto ezimonwabisayo. Yaye kwinkulungwane yokuqala yeXesha Eliqhelekileyo, uNyana wakhe okuphela kwamzeleyo wathi: “Ukupha kunoyolo ngaphezu kokuphiwa.” (IZenzo 20:35) Ngokuvisisana nalo mgaqo, uYesu usesona sidalwa sonwabileyo soMdali kwindalo iphela. Njani? Kaloku, emva koYehova uThixo, uYesu Kristu uye wanikela ngesona sipho sikhulu kunazo zonke ngokunikela ngobomi bakhe ukuze kungenelwe uluntu. Enyanisweni, ‘ungOnamandla owonwabileyo.’ (1 Timoti 6:15, NW) Ngaloo ndlela uYesu umisela umzekelo woko wakuthethayo ngoyolo olungakumbi oluziswa kukupha.
15. UYehova akasayi kuze ayeke ukuba ngumzekelo wantoni, yaye izidalwa zakhe ezikrelekrele zinokuwufumana njani umlinganiselo wolonwabo?
15 NgoYesu Kristu, uYehova uThixo akasayi kuze asilele ukupha ngesisa kuzo zonke izidalwa zakhe ezikrelekrele yaye uya kusoloko engowona mzekelo wazo ubalaseleyo wokupha. Njengokuba uThixo eyoliswa kukubapha izipho ezilungileyo abanye, ngoko uye wafaka umoya wokuba nesisa ezintliziyweni zezidalwa zakhe ezikrelekrele ezisemhlabeni. Ngaloo ndlela zibonakalisa yaye zixelisa ubuntu bakhe ibe zifumana umlinganiselo othile wolonwabo lwakhe. (Genesis 1:26; Efese 5:1) Ngokufanelekileyo, uYesu waxelela abafundi bakhe oku: “Yiphani, naniya kuphiwa nani; umlinganiselo omhle, ohlohliweyo, ohlunguzelweyo, ophalalayo, nowuphiwa esondweni lengubo yenu; kuba umlinganiselo enilinganisela ngawo, niya kulinganiselwa kwangawo nani.”—Luka 6:38.
16. UYesu wayebhekisela kukuphi ukupha kuLuka 6:38?
16 UYesu wabamisela umzekelo obalaseleyo abafundi bakhe ngokuba ngumntu ophayo. Wathi abo baphiwayo baya kusabela kakuhle xa bephiwa ngolo hlobo. KuLuka 6:38, uYesu wayengabhekiseli ekunikeleni ngezipho zezinto eziphathekayo kuphela. Wayengaxeleli abafundi bakhe ukuba balandele ikhondo elaliya kubenza amahlwempu ngokwezinto eziphathekayo. Kunoko, wayebalathisela kwikhondo elaliya kubenza bazive befeze okuthile ngokomoya.
Ulonwabo Olungunaphakade Luqinisekile
17. Sisiphi isipho esimangalisayo uThixo awaphe sona amaNgqina akhe kule mihla yokugqibela?
17 Esinjani ukumangalisa isipho athe uYehova, iNtloko yayo yonke indalo, wasinika amaNgqina akhe kule mihla yokugqibela! Usinike iindaba ezilungileyo zoBukumkani bakhe. Sinelungelo elibalaseleyo lokuba ngabavakalisi boBukumkani bukaThixo obumiselweyo nobulawulwa nguNyana wakhe, uYesu Kristu. (Mateyu 24:14; Marko 13:10) Ukwenziwa amaNgqina avakalisa ngomlomo nangqinela uThixo Osenyangweni sisipho esingenakuthelekiswa nanto, yaye eyona ndlela ilungileyo esinokupha ngayo sixelisa uThixo kungokwabelana nabanye ngesigidimi soBukumkani ngaphambi kokuba isiphelo sale nkqubo yezinto ingendawo sifike.
18. NjengamaNgqina kaYehova, yintoni esifanele sibaphe yona abanye?
18 Umpostile uPawulos wathetha ngeenzima ekwafuneka ajamelane nazo xa wayevakalisa isigidimi soBukumkani kwabanye. (2 Korinte 11:23-27) AmaNgqina kaYehova anamhlanje akwamele atyhubele iinzima yaye abekele ecaleni izinto ebengathanda ukuzenza ukuze anikele ngethemba loBukumkani kwabanye. Sisenokuba asikuthandi ukuya ezindlwini zabantu, ingakumbi ukuba sineentloni. Kodwa njengabalandeli bakaKristu, asinakuliphepha ilungelo lokupha abanye izinto zokomoya ngokushumayela “ezi ndaba zilungileyo zobukumkani.” (Mateyu 24:14) Kufuneka sibe nesimo sengqondo esifanayo neso uYesu wayenaso. Xa wayejamelene nokufa, wathandaza wathi: “Bawo, . . . makungabi njengokuthanda kwam, makube njengokuthanda kwakho.” (Mateyu 26:39) Kumbandela wokunikela iindaba ezilungileyo zoBukumkani kwabanye, abakhonzi bakaYehova bamele benze ukuthanda kukaThixo, kungekhona okwabo—oko akufunayo, kungekhona oko basenokuba bayakufuna.
19. Yeyoobani ‘iminquba engunaphakade,’ yaye sinokubenza njani ubuhlobo kunye nabo?
19 Ukupha okunjalo kuya kubandakanya ixesha nobuncwane bethu, kodwa ngokuba ngabo bapha behlonela uThixo, siqinisekisa ukuba ulonwabo lwethu luya kuba ngunaphakade. Ngoba? Kuba uYesu wathi: “Zenzeleni izihlobo ngabo ubutyebi bokungalungisi [“ubutyebi behlabathi,” New International Version], ukuze xa nithe naphelelwa, namkelwe eminqubeni engunaphakade.” (Luka 16:9) Sifanele sizimisele ukusebenzisa “ubutyebi bokungalungisi” ukuzenzela ubuhlobo nabo iyeyabo ‘iminquba engunaphakade.’ Ekubeni uYehova enguMdali, zezakhe zonke izinto, yaye ikwazezoNyana wakhe wamazibulo kuba eyiNdlalifa yeento zonke. (INdumiso 50:10-12; Hebhere 1:1, 2) Ukuze sakhe ubuhlobo kunye nabo, simele sisebenzise ubutyebi ngendlela ebakholisayo. Oku kuquka ukuba nesimo sengqondo esilungileyo ngokusebenzisa izinto eziphathekayo ukuze kungenelwe abanye. (Thelekisa uMateyu 6:3, 4; 2 Korinte 9:7.) Imali sinokuyisebenzisa ngendlela efanelekileyo ukuqinisa ubuhlobo bethu noYehova uThixo noYesu Kristu. Ngokomzekelo, oku sikwenza ngokusebenzisa ngokuchwayita esinako ukunceda abantu abaswele ngokwenene nangokusebenzisa ubuncwane bethu ekuhambiseleni phambili izilangazelelo zoBukumkani bukaThixo.—IMizekeliso 19:17; Mateyu 6:33.
20. (a) Kutheni uYehova noYesu benokusingenisa “eminqubeni engunaphakade,” yaye isenokuba phi le minquba? (b) Leliphi ilungelo esiya kuqhubeka sinalo ukutyhubela onke amaphakade?
20 Ngenxa yokuba bengafi, uYehova uThixo noYesu Kristu banokuba ngaBahlobo bethu ngonaphakade yaye banokusingenisa “eminqubeni engunaphakade.” Oku kunjalo enoba le minquba iya kuba sezulwini kunye nazo zonke izithunywa zezulu okanye kulo mhlaba kwiParadisi ebuyiselweyo. (Luka 23:43) Isipho sikaThixo sothando esinguYesu Kristu senza konke oku kwaba nokwenzeka. (Yohane 3:16) Yaye uYehova uThixo uya kusebenzisa uYesu ukuqhubeka enikela izipho kuyo yonke indalo yakhe, ukwenzela ulonwabo Lwakhe olukhethekileyo. Enyanisweni, ukutyhubela amaphakade thina ngokwethu siya kuba nelungelo lokupha ngaphantsi kolongamo lwendalo iphela lukaYehova uThixo nobukumkani boNyana wakhe okuphela kwamzeleyo, iNkosi noMsindisi wethu, uYesu Kristu. Oku kuya kuphumela kulonwabo olungunaphakade kubo bonke abantu abapha behlonela uThixo.
Uyakhumbula Na?
◻ Ukuze anikele ngesona sipho sakhe sikhulu yintoni ekwafuneka uThixo ayenze?
◻ Luhlobo luni lothumo uThixo awamthumela lona uNyana wakhe?
◻ Ngubani osesona sidalwa sonwabileyo kwindalo yonke, yaye ngoba?
◻ Abo bapha behlonela uThixo baya kulufumana njani ulonwabo olungunaphakade?
[Umfanekiso okwiphepha 10]
Ngaba uyasixabisa isipho sikaThixo soNyana wakhe njengedini lentlawulelo?
[Imifanekiso ekwiphepha 12]
Ngaba ufuna uBukumkani bukaThixo kuqala ngokushumayela iindaba ezilungileyo nangokuxhasa loo msebenzi ngobuncwane bakho?