Iveki Eyaguqula Ihlabathi
“Makabongwe lo uzayo egameni leNkosi!”—MATEYU 21:9.
1. Ngawaphi amaqela amabini angafaniyo awachatshazelwa ziziganeko ezenzeka kuAgasti ophelileyo?
“IINTSUKU EZINTATHU EZINXUNGUPHALISA GQITHA EZAGUNGQISA IHLABATHI.” NgoAgasti 1991, imixholo yamaphephandaba enjengalo yagxininisa isibakala sokuba kwiintsuku nje ezimbalwa ihlabathi linokwenziwa indawo yomdudo woononkala. Eneneni, iintsuku zokugqibela zika-Agasti yayizezona zibalulekileyo kungekuphela nje ehlabathini kodwa kwanakwiqela labantu uYesu awathetha oku ngalo: ‘Abangabo abehlabathi.’ Namhlanje eli qela laziwa njengamaNgqina kaYehova.—Yohane 17:14.
2, 3. (a) Inkululeko yabalaseliswa njani eZagreb phezu kwaso nje isisongelo semfazwe? (b) Ukuba nokholo olomeleleyo kwavuzwa njani eOdessa?
2 Indibano yokuqala yezizwe ngezizwe yamaNgqina kaYehova eyayicetyelwe ukuba ibe seYugoslavia yayicwangciselwe ukuba ibe ngomhla we-16 kuse kowe-18 kuAgasti. Njengoko kwathi kwaba njalo, kwakhona yayiza kuba yindibano yokuqala enkulu yabantu bakaYehova kwilizwe elisongelwa yimfazwe yamakhaya. AmaNgqina asekuhlaleni, kunye namatsha-ntliziyo awayevela kumazwe akufuphi, ayesebenze nzima kangangeenyanga ezimbini ehlaziya ibala lebhola ekhatywayo iHAŠK Građanski eZagreb. Lalicoceke gqitha, likufanelekele kakuhle ukuba kuqhutyelwe kulo iNdibano “Yabathandi Benkululeko KaThixo.” Iindwendwe ezininzi eziphuma kumazwe ngamazwe zazicebe ukubakho, kuquka ezingama-600 ezisuka eUnited States. Njengoko imfazwe yamakhaya yayisongela, kwavakala iintetho ezithi: “AmaMerika awasoze alubeke olwawo unyawo apha.” Kodwa alubeka, kuquka neendwendwe ezazivela kwamanye amazwe amaninzi. Kwakulindeleke ukuba kubekho abantu abali-10 000, kodwa ngosuku lokugqibela kwakukho abali-14 684 kwelo bala! Bonke basikelelwa ngokutyebileyo kuba abazange ‘bakuhilizele ukuhlanganisana kwabo.’—Hebhere 10:25.
3 Kwiintsuku ezintathu emva kwendibano eyayiseZagreb, kwabakho ubhukuqo-mbuso olungazange luphumelele eSoviet Union. Ngelo xesha, abathandi benkululeko kaThixo babesenza amalungiselelo okugqibela endibano yabo eyayiza kuba seOdessa eUkraine. Ngaba le ndibano yayiza kuphumelela? Benokholo olomeleleyo abazalwana bacokisa ukulungisa ngokupheleleyo ibala lemidlalo, yaye iindwendwe zazifika ngokufika. Ngokungathi kungommangaliso, ubhukuqo-mbuso lwaphela. Ngomhla wama-24 nowama-25 kuAgasti kwaqhutywa indibano entle ekwakuze kuyo abantu abali-12 115 kwaza kwabhaptizwa abali-1 943—i-16 ekhulwini lencopho yababezile! La maNgqina matsha, kunye nabagcini bengqibelelo abangamagqala, babekuvuyela ukuza kwabo kuloo ndibano bekholose ngokupheleleyo ngoYehova.—IMizekeliso 3:5, 6.
4. AmaNgqina aseMpuma Yurophu ebelandela wuphi umzekelo owamiselwa nguYesu?
4 La maNgqina athembekileyo ayelandela umzekelo owamiselwa nguMzekelo wethu, uYesu Kristu. Akazange akutyeshele ukuya kwimithendeleko eyayimiselwe nguYehova, kwanaxa amaYuda ayefuna ukumbulala. Njengoko wayenyuka esiya eYerusalem kwiPasika awayegqibelisa ukuya kuyo, la maYuda ayemi erhangqe itempile, ebuzana: “Nithini na? akasayi kuza na emthendelekweni?” (Yohane 11:56) Kodwa weza! Oku kwatshayelela iveki eyafikelela incopho yayo ngokuguqulwa kwendlela eyayihamba ngayo imbali yabantu. Ngaba ngoku singakhe sihlolisise ezinye zeembalasane zaloo veki—uNisan 8 kuse kowe-14 ngokwekhalenda yamaYuda?
NgoNisan 8
5. Yintoni le uYesu wayeyazi njengoko wayesinge eBhetani ngoNisan 8, 33 C.E.?
5 Ngolu suku uYesu nabafundi bakhe bafika eBhetani. Apha, uYesu uza kuchitha iintsuku ezintandathu kwikhaya lomhlobo wakhe othandekayo uLazaro, lowo ebesandul’ ukumvusa kwabafileyo. IBhetani ikufuphi eYerusalem. Ngasese, uYesu sele ebaxelele abafundi bakhe oku: “Niyabona, siyenyuka siya eYerusalem, waye uNyana woMntu eya kunikelwa kubo ababingeleli abakhulu nababhali. Baya kumgweba ukuba afe, bamnikele kuzo iintlanga ukuba zidlale ngaye, zimtyakatye, zimbethelele [emthini, NW], athi ngomhla wesithathu abuye avuke.” (Mateyu 20:18, 19) UYesu wazi kakuhle ukuba ngoku umele ajamelane nezilingo ezingcungcuthekisayo. Noko ke, njengoko elo xesha lovavanyo olukhulu lisondela, uzibhokoxa ngokupheleleyo ekukhonzeni abazalwana bakhe. Ngamana ngamaxesha onke singaba “nesi simo sengqondo . . . noKristu Yesu awayenaso.”—Filipi 2:1-5, NW; 1 Yohane 3:16.
NgoNisan 9
6. Ngokuhlwa ngoNisan 9, wenza ntoni uMariya, yaye wathini uYesu kuYuda?
6 Ngemva kokutshona kwelanga, njengoko kuqalisa uNisan 9, uYesu unandipha isidlo kwikhaya likaSimon owayeneqhenqa ngaphambili. Kulapha ke apho athi udadeboLazaro uMariya athambise intloko neenyawo zikaYesu ngamafutha aqholiweyo anexabiso elikhulu aze ngokuthobeka osule iinyawo zikaYesu ngeenwele zakhe. Xa uYuda engahambisani noku, uYesu uthi: “Myeke; uwalondolozele imini yokungcwatywa kwam.” Besiva ukuba amaYuda amaninzi aya eBhetani yaye ayakholwa kuYesu, ababingeleli abakhulu benza iyelenqe lokumbulala yena noLazaro.—Yohane 12:1-7.
7. Ngentsasa kaNisan 9, igama likaYehova lazukiswa njani, ibe yintoni uYesu awayixela kwangaphambili?
7 Ngentseni, uYesu usinga eYerusalem. Izihlwele ziyaphuma zimhlangabeza, ziwangawangisa amasebe esundu yaye ziyakhwaza: “Hosana! makabongwe lowo uzayo egameni leNkosi, uKumkani kaSirayeli!” Wandula ke uYesu azalisekise isiprofeto sikaZekariya 9:9 ngokungena esixekweni ekhwele iesile. Njengoko esondela eYerusalem, uyayililela, exela kwangaphambili ukuba amaRoma aya kuyingqinga ngezibonda ezineencam ezitsolo aze ayitshabalalise ngokupheleleyo—siprofeto eso esasiya kuzaliseka ngokuphawulekayo kwiminyaka engama-37 kamva. (Oku kukwabonisa inkathazo eza kufikela iNgqobhoko, eye yawexuka ilandela umzekelo weYerusalem yamandulo.) Abalawuli bakwaYuda abafuni kumkani unguYesu. Ngomsindo badanduluka besithi: “Yabonani, ulandelwa lilizwe lonke.”—Yohane 12:13, 19.
NgoNisan 10
8. NgoNisan 10, uYesu wayibonisa njani intlonelo enzulu ngendlu kaYehova yokuthandaza, ibe kwenzeka ntoni ngokulandelayo?
8 Kwakhona uYesu utyelela itempile. Okwesihlandlo sesibini, uyabagxotha abarhwebi ababawayo nabo bananiselana ngemali. Inkqubo yezorhwebo—“ukuthanda imali”—ayifanele iqhutyelwe endlwini kaYehova yokuthandaza! (1 Timoti 6:9, 10) Kungekudala uYesu uza kufa. Uthetha ngokuhlwayelwa kokhozo ukuze acacise oku. Ukhozo lokuqala luyafa, kodwa luyantshula luze lukhulele ekubeni ludiza oluvelisa iinkozo ezininzi. Ngokufanayo, ukufa kukaYesu kuya kuphumela ekubeni izihlwele ezikholwayo kuye zifumane ubomi obungunaphakade. Ebuhlungu ngenxa yokucinga ngokufa kwakhe okusondelayo, uYesu uthandazela ukuba igama likaYise lizukiswe. Ephendula, uThixo uthetha esezulwini ngelizwi elingathi yindudumo ukuze aviwe ngabo bonke abalapho: “Ndilizukisile, ndiya kubuya ndilizukise.”—Yohane 12:27, 28.
NgoNisan 11—Imini Yokuxakeka
9. (a) Ekuseni ngoNisan 11, uYesu wayisebenzisa njani imizekeliso ukugweba amaYuda awexukileyo? (b) Ngokuvisisana nomzekeliso kaYesu, ngoobani abalahlekelwe lithuba elimangalisayo?
9 Kwakhona uYesu nabafundi bakhe bayayishiya iBhetani ekubeni le iyimini yokuxakeka. UYesu usebenzisa imizekeliso emithathu ukuze abonise isizathu sokugwetywa kwamaYuda awexukileyo. Wayeqalekise umthi womkhiwane ongenaziqhamo, yaye imeko yawo ngoku ebunileyo ifuzisela uhlanga lwamaYuda olungenalukholo nolungenaziqhamo. Akungena etempileni, uchaza indlela abalimi abangoongantweni abasebenza kwisidiliya senkosi abathi ekugqibeleni babulale ngayo unyana nendlalifa yenkosi—oku kufanekisela ukuyeka kwamaYuda ukukholosa ngoYehova, nto leyo eza kuphelela ekuthini abulale uYesu. Uthetha ngomsitho owenziwa ngukumkani—uYehova—lowo iindwendwe zakhe ezimenyiweyo (amaYuda) ngokuzingca zizingxengxezelayo zisithi azinakuphumelela ukubakho. Ngenxa yoko, isimemo sidluliselwa kwabangaphandle—iiNtlanga—bambi kubo abaphumelelayo ukuza. Kodwa indoda engenayo ingubo yomsitho ikhutshelwa ngaphandle. Ifanekisela amaKristu obuxoki eNgqobhoko. AmaYuda amaninzi omhla kaYesu ayemenyiwe ‘kodwa ambalwa awanyulwayo’ ukuba abe phakathi kwe-144 000 labatywiniweyo abaza kubudla ilifa uBukumkani bamazulu.—Mateyu 22:14; ISityhilelo 7:4.
10-12. (a) Kwakutheni ukuze uYesu abakhalimele abefundisi bamaYuda, ibe ziziphi iziqalekiso eziqatha awazivakalisa kwabo bahanahanisi? (b) Ekugqibeleni umgwebo waphunyezwa njani kumaYuda awexukileyo?
10 Abefundisi bamaYuda abangabahanahanisi bafuna ikroba lokubambisa uYesu, kodwa uyayiphendula imibuzo yabo emininzi yokumbambisa yaye ubaphoxa phambi kwabantu. Hayi indlela awexuke ngayo la maYuda angabantu bonqulo! Hayi indlela uYesu awakhalimela ngokuphandle ngayo! Athanda ukubonakala, ukunxiba izambatho ezahlukileyo kwezabanye abantu nezibizo ezibenza bazive bebakhulu, njengokuthi “Rabhi” nokuthi “Bawo,” ngokufanayo nabefundisi abaninzi kulo mhla wethu. UYesu umisela lo mgaqo: “Osukuba ke eziphakamisa uya kuthotywa; nosukuba ezithoba uya kuphakanyiswa.”—Mateyu 23:12.
11 UYesu uziqalekisa ngamazwi aqatha ezo nkokeli zonqulo. Kangangezihlandlo ezisixhenxe udanduluka esithi: “Yeha, nina!” ezibiza ngokuthi ziinkokeli zeemfama eziziimfama nabahanahanisi. Yaye sihlandlo ngasinye uchaza isizathu esicacileyo sokuzigweba. Ziyayivala indlela yokungena kuBukumkani bamazulu. Xa zibambise umntu ukuba angene ebuYudeni, uba sisisulu seGehena ngokuphindwe kabini, mhlawumbi ngenxa yokuba ebesele egwetyelwe ukutshatyalaliswa ngenxa yesono esinzulu sangaphambili okanye inzondelelo yempambano. “Ziyatha, zimfama!” utsho njalo uYesu, kuba abaFarisi banomdla kwigolide yetempile kunasekulondolozeni unqulo oluhlambulukileyo kuyo. Babushiyile ubulungisa, inceba nokuthembeka njengoko benikela ngezishumi zetyeleba enqwenelekayo, zedile nezekumin, kodwa bengazinanzi iindawo ezinzima zoMthetho. Ukuhlamba okwenziwa ngokwesithethe akusoze kukushenxise ukungcola kwabo kwangaphakathi—kuphela kukuba nentliziyo ecocwe ngokukholwa kwidini eliza kunikelwa nguYesu okunokwenjenjalo. Ukuhanahanisa nokuchas’ umthetho kwabo kwangaphakathi kubonisa ukuba umphandle ‘oqatywe ifutha’ yinkohliso nje.—Mateyu 23:13-29.
12 Ngokwenene abaFarisi bajamelene nentlekele, inene ‘bangoonyana babo babulala abaprofeti’ bakudala! Baziinyoka, inzala yamarhamba, bagwetyelwe ukuphoswa eGehena, kuba abayi kubulala uYesu kuphela koko nabo abathumileyo. Lo ngumgwebo oza kufikela “esi sizukulwana.” Oku kwazaliseka xa iYerusalem yatshatyalaliswa ngokupheleleyo kwiminyaka engama-37 kamva.—Mateyu 23:30-36.
13. Amazwi kaYesu ngeminikelo yasetempileni abonakala kweziphi iimeko namhlanje?
13 Ngaphambi kokuyishiya itempile, uYesu uncoma umhlolokazi osweleyo ophosa emkhumbini wokulondoloza imali iimalana ezimbini—“yonke impilo abenayo.” Oku kwahluke ngokwenene kwizityebi ezibawayo, eziphosa nje iminikelo kuba zifanele zinikele! Njengaloo mhlolokazi usweleyo, amaNgqina kaYehova namhlanje ngokuzithandela ancama ixesha, amandla nemali ukuze axhase aze andise umsebenzi woBukumkani ehlabathini lonke. Hayi indlela ahluke ngayo kwabo bashumayeli bakamabonwakude abaziphethe kakubi abaxhaphaza imihlambi yabo baze bazifumbele intaphane yobutyebi!—Luka 20:45–21:4.
Njengoko UNisan 11 Esiya Ngasekuqoshelisweni
14. UYesu wavakalisa buphi ubuhlungu, yaye wayiphendula njani imibuzo engakumbi yokufun’ ukwazi yabafundi bakhe?
14 UYesu ulilela iYerusalem nabantu bayo aze athi: “Aniyi kuba sandibona emveni koku, nide nithi, Makabongwe lowo uzayo egameni leNkosi.” (Mateyu 23:37-39) Kamva, xa behleli eNtabeni Yeminquma, abafundi bakaYesu abasenyongweni bayambuza ngale nto, yaye xa ebaphendula uYesu ubachazela umqondiso oya kuphawula ubukho bakhe esemandleni oBukumkani nokuqosheliswa kwenkqubo yezinto engendawo kaSathana.—Mateyu 24:1–25:46; Marko 13:1-37; Luka 21:5-36.
15. Nguwuphi umqondiso uYesu awawunikelayo ngokuphathelele ubukho bakhe eze kugweba, kwaye uzaliseka ukususela nini?
15 Ethetha ngomgwebo kaYehova oza kufikela itempile kungekudala, uYesu ubonisa ukuba oku kufanekisela iziganeko eziyintlekele eziza kwenzeka ekuqoshelisweni kwale nkqubo yezinto iphela. Elo xesha lobukho bakhe liya kuphawulwa kukuqhambuka kweemfazwe ngomlinganiselo ongazange ubonwe ngaphambili, kwaneendlala, ukunyikima komhlaba neendyikitya zezifo, ndawonye nokuphela kothando nokwanda kokuchas’ umthetho. Hayi indlela ebekuyinyaniso ngayo oku kwihlabathi lethu lenkulungwane yama-20 ukususela ngowe-1914!
16, 17. Ziziphi izinto uYesu awazichazayo ezaziza kwenzeka ehlabathini, yaye amaKristu afanele asabele njani kwesi siprofeto?
16 Oku kuya kufikelela incopho ‘ngembandezelo enkulu ekungazange kubekho injengayo ukususela ekuqalekeni kwehlabathi kude kube ngoku, ekungasayi kubuye kubekho injengayo.’ Ekubeni le iya kutshabalalisa ngendlela owatshabalalisa ngayo uMkhukula womhla kaNowa, uYesu ulumkisa nxamnye nokuzixakekisa ngezilangazelelo zehlabathi. “Phaphani ngoko; ngokuba ningazi ukuba lilixa liphi na eza ngalo iNkosi yenu.” Hayi indlela esinokuvuya ngayo kuba iNkosi iye yamisela ‘umkhonzi othembekileyo noqondayo’ othanjisiweyo ukuba avakalise isilumkiso nokuba anikele intabalala yokudla kokomoya ukwenzela lo mhla wobukho bayo!—Mateyu 24:21, 42, 45-47.
17 Kule nkulungwane yethu yama-20, siye sabona ‘emhlabeni ukuxinezeleka kweentlanga, zithingaza; abantu besifa kukoyika nakukulindela izinto ezilizelayo elimiweyo.’ Kodwa uYesu usixelela oku: “Zakubon’ ukuba ezi zinto ziyaqala ukuhla, sukani nime, niziphakamise iintloko zenu, ngenxa yokuba iyasondela inkululeko yenu.” Kwaye uyasilumkisa: “Zilumkeleni ke, hleze zisindwe iintliziyo zenu kukuzingxala, nakukunxila, nangamaxhala obu bomi, ize loo mini inifikele ngebhaqo.” Kuphela kungokuhlala siphaphile esinokuthi sime ngokukholekileyo phambi kukaYesu, ‘uNyana woMntu,’ kubukho bakhe.—Luka 21:25-28, 34-36.
18. Sinokufumana luphi ukhuthazo kumzekeliso kaYesu weentombi ezilishumi noweetalente?
18 Ekuqukumbeleni ingxelo yakhe yobuciko engeziganeko ezaziza kwenzeka kule mihla, uYesu wenza imizekeliso emithathu. Okokuqala, kumzekeliso weentombi ezilishumi, kwakhona ugxininisa imfuneko ‘yokuhlala siphaphile.’ Wandula ke, kumzekeliso wabakhonzi neetalente, abonise indlela ukukhuthala okuvuzwa ngayo ngokumenyelwa ‘ukungena eluvuyweni lweNkosi.’ AmaKristu athanjisiweyo, ekufanekiselwa wona kule mizekeliso, kwanezinye izimvu anokukhuthazwa gqitha zezi nkcazelo zicacileyo.—Mateyu 25:1-30.
19, 20. Luluphi ulwalamano oluhle lwanamhla olubalaseliswa kumzekeliso kaYesu wezimvu neebhokhwe?
19 Umzekeliso wesithathu ubhekisela kubukho bukaYesu esemandleni oBukumkani emva kokufika kwakhe ukuze ahlale phantsi kwitrone yakhe ezukileyo ezulwini. Lixesha lokugwetywa kweentlanga nelokwahlulwa kwezizwe zomhlaba zibe ngamaqela amabini, elinye elibunjwe ngabantu abalulamileyo nabanjengezimvu yaye elinye, libunjwe ngabo baneenkani nabanjengeebhokhwe. Izimvu zenza umgudu ongakumbi wokuzibonakalisa ukuba ziyabaxhasa abazalwana boKumkani—abathanjiswa abaseleyo emhlabeni kweli xesha lokuphela kwehlabathi. Ezi zimvu zivuzwa ngobomi, ngoxa iibhokhwe ezingenaluxabiso zisiya kwintshabalalo kanaphakade.—Mateyu 25:31-46.
20 Olunjani lona ukumangalisa ulwalamano esilubonayo phakathi kwezinye izimvu nabazalwana boKumkani ekuqoshelisweni kwale nkqubo yezinto! Nangona intsalela ethanjisiweyo yayithwele imbopheleleko yokufeza umsebenzi ekuqalekeni kobukho bukaKumkani, izigidi zezinye izimvu ezinenzondelelo ngoku zibalelwa kuma-99,8 ekhulwini abakhonzi bakaThixo abasemhlabeni. (Yohane 10:16) Kwaye nazo ziye zazibonakalisa zikulungele ukunyamezela ‘ukulamba, ukunxanwa, ukuhamba ze, ukugula nokuba sentolongweni’ njengamaqabane abathanjiswa abagcina ingqibelelo.a
NgoNisan 12
21. Yintoni eyayisiya ngasekuphumeleleni ngoNisan 12, yaye njani?
21 Iyelenqe lokubulala uYesu liya ngasekuphumeleleni. UYuda uya kubonana nababingeleli abakhulu etempileni, evuma ukungcatsha uYesu ngamaqhosha angama-30 esilivere. Kwanoku kwakuprofetiwe ngako.—Zekariya 11:12.
NgoNisan 13
22. Ngawaphi amalungiselelo enziwa ngoNisan 13?
22 UYesu, oqhubeka ehlala eBhetani, mhlawumbi esenzela ukuthandaza nokucamngca, uthumela abafundi bakhe eYerusalem ukuba baye kufuna “uthile.” Kumzi wale ndoda, kwigumbi elikhulu eliphezulu, balungisa iPasika. (Mateyu 26:17-19) Njengoko ilanga litshona ngoNisan 13, uYesu uba kunye nabo ukulungiselela esona sikhumbuzo sibalulekileyo kuyo yonke imbali. Ngoku yintoni eza kwenzeka ngoNisan 14? Inqaku lethu elilandelayo liza kusichazela.
[Umbhalo osemazantsi]
a Inqaku elilandelayo lifanele lisincede siluxabise ngakumbi ulwalamano olusenyongweni oluphakathi komhlambi omncinane wabathanjiswa nezinye izimvu.
Ungashwankathela Uthini?
◻ Abanye babubonakalisa njani ububele nokwamkela uYesu ebudeni bomhla wesi-8 kuse kowe-10 kuNisan?
◻ UYesu wababhenca njani abefundisi abahanahanisayo ngoNisan 11?
◻ Sithini isiprofeto esikhulu esanikelwa nguYesu, yaye sizaliseka njani namhlanje?
◻ Iziganeko zasondela njani kwincopho yazo ngomhla we-12 nowe-13 kuNisan?
[Umfanekiso okwiphepha 12]
UYesu uyamncoma umhlolokazi olihlwempu onikele ngeemalana ezimbini—konke awayenako