Usuku Lokukhunjulwa

“Ezi zinto ndizithethile kuni, ukuze nibe noxolo kum. Ehlabathini niya kuba nembandezelo; yomelelani, mna ndiloyisile ihlabathi.”—YOHANE 16:33.

1, 2. Luluphi usuku olubalaseleyo kunazo zonke ezinye iintsuku embalini, yaye ngoba?

NAMHLANJE ihlabathi lithetha lophele ngoxolo. Ekupheleni kweMfazwe Yehlabathi II, uxolo lwalunxulunyaniswa neV-E Day kunye neV-J Day.a Nyaka ngamnye, iKrismesi ibangela abantu bacinge ‘ngoxolo emhlabeni.’ (Luka 2:14) Kodwa kuyo yonke imbali yabantu kukho usuku olubalaseleyo kunazo zonke ezinye. Olu lusuku uYesu Kristu awathetha ngalo amazwi acatshulwe ngasentla. Kwiintsuku ezingaphezu kwezigidi ezibini uluntu lulapha emhlabeni, lusuku olunye olwayiguqula ngokupheleleyo indlela uluntu olwenza ngayo izinto ukuze lulungelwe ngonaphakade.

² Olo suku lubalulekileyo lwalunguNisan 14 kwikhalenda yamaYuda. Ngonyaka wama-33 weXesha lethu Eliqhelekileyo, uNisan 14 waqala ukutshona kwelanga ngoAprili 1. Masiqwalasele iziganeko ezenzeka ngolo suku lubaluleke kakhulu.

NgoNisan 14!

3. UYesu wazisebenzisa njani ezi yure zokugqibela?

³ Njengoko kusihlwa, kusenokwenzeka ukuba inyanga epheleleyo ebukekayo iyakhanya ukukhumbuza abantu ukuba uYehova umisa amaxesha namathuba. (IZenzo 1:7) Kwenzeka ntoni kwela gumbi liphezulu apho uYesu ahlanganisene khona nabapostile bakhe abali-12 ukuze babhiyozele iPasika yamaYuda yaminyaka le? Njengoko uYesu elungiselela ‘ukunduluka kweli hlabathi esiya kuYise, ubonakalisa ukubathanda abakhe kude kube sekupheleni.’ (Yohane 13:1) Ukwenza njani oku? Ngamazwi nangokubamisela umzekelo, uYesu usabethelela kubafundi bakhe iimpawu eziya kubanceda baloyise ihlabathi.

Ukwambatha Ukuthobeka Nothando

4. (a) UYesu walubonakalisa njani uphawu oluyimfuneko kubafundi bakhe? (b) Sazi njani ukuba uPetros wakuqonda ukubaluleka kokuthobeka?

⁴ Kusafuneka ukuba abapostile bahlukane nekhwele nekratshi elithile elibangelwa ngamabhongo. Ngoko uYesu ubhinqa itawuli aze aqalise ukuhlamba iinyawo zabo. Oku asikokubonakalisa ukuthobeka kwenkohliso, njengoko upopu weNgqobhoko ekwenza nyaka ngamnye eRoma. Eneneni, akunjalo! Ukuthobeka kokwenyaniso kukuzincama okushukunyiswa ‘kukubagqala abanye njengabongamileyo kunawe ngenxa yokuthobeka kwentliziyo.’ (Filipi 2:2-5) Ekuqaleni, uPetros akayifumani ingongoma, engamvumeli uYesu ukuba ahlambe iinyawo zakhe. Akuba elungisiwe, ucela uYesu ukuba amhlambe umzimba wonke. (Yohane 13:1-10) Noko ke, uPetros umele ukuba wasifunda isifundo. Kwiminyaka kamva, waluleka abanye ngendlela echanileyo. (1 Petros 3:8, 9; 5:5) Hayi indlela ekubaluleke ngayo namhlanje ukuba sonke sisebenzele uKristu ngokuthobeka!—Bona kwaneMizekeliso 22:4; Mateyu 23:8-12.

5. Nguwuphi umthetho owanikelwa nguYesu obonisa ukubaluleka kolunye uphawu olubalulekileyo?

⁵ Omnye wabali-12 akafundi nto kwisiluleko sikaYesu. Lo nguYuda Sikariyoti. Njengoko isidlo sePasika siqhubeka, uYesu uyakhathazeka emoyeni, uchaza ukuba uYuda ngumngcatshi wakhe, yaye uyamgxotha. Emva koku ke uYesu uxelela abafundi bakhe abathembekileyo abali-11 oku: “Ndiniwisela umthetho omtsha, wokuba nithandane, njengoko ndinithandileyo nina, ukuze nani nithandane. Ngayo le nto baya kwazi bonke, ukuba ningabafundi bam, ukuba nithe nathandana.” (Yohane 13:34, 35) Ngokwenene lo ngumthetho omtsha, owabonakaliswa ngomzekelo kaYesu ongowona ubalaseleyo! Njengoko iyure yokufa kwakhe njengedini isondela, uYesu ubonakalisa uthando olubalaseleyo. Usebenzisa lonke ixesha analo efundisa yaye ekhuthaza abo bafundi. Kamva, ugxininisa ukubaluleka kothando, esithi: “Nguwo lo umthetho wam, wokuba nithandane, njengoko ndanithandayo nina. Akukho namnye unalo uthando olungaphezu kolu, lokuba ubomi bakhe abuncamele izihlobo zakhe.”—Yohane 15:12, 13.

‘Indlela, Inyaniso Nobomi’

6. Luluphi usukelo uYesu alubekela abafundi bakhe abathandayo?

⁶ UYesu ubaxelela oku abathembekileyo abali-11: “Intliziyo yenu mayingakhathazeki; kholwani kuThixo, nikholwe nakum. Endlwini kaBawo zininzi iindawo zokuhlala; ukuba bekungenjalo, ngendanixelelayo. Ndiyemka, ndiya kunilungisela indawo.” (Yohane 14:1, 2) Le ndawo iya kuba ‘sebukumkanini bamazulu.’ (Mateyu 7:21) UYesu uchaza indlela eli qela lithandekayo labafundi abanyanisekileyo elinokulufikelela ngayo usukelo lwalo. Uthi: “Ndim indlela, ndim inyaniso, ndim ubomi; akukho namnye uzayo kuBawo, engezi ngam.” (Yohane 14:6) Oku kukwanjalo nangabo boluntu abaza kufumana ubomi obungunaphakade emhlabeni.—ISityhilelo 7:9, 10; 21:1-4.

7-9. Kwakutheni ukuze uYesu azichaze ‘njengendlela, inyaniso nobomi’?

⁷ UYesu ‘uyindlela.’ Ekuphela kwendlela yokusondela kuThixo emthandazweni kungoYesu Kristu. UYesu ngokwakhe uyabaqinisekisa abafundi bakhe ukuba uYise uya kubanika nayiphi na into abayicelayo egameni likaYesu. (Yohane 15:16) Imithandazo ebhekiswa kwimifanekiso eqingqiweyo okanye “kwiingcwele” zonqulo okanye ezaliswe ngamazwi okuDumisa uMariya nezicengcelezo eziphindaphindwayo—akukho namnye kule awuvayo nawamkelayo uBawo. (Mateyu 6:5-8) Ngaphezu koko, kwiZenzo 4:12 sifunda oku ngoYesu: “Akukho gama limbi phantsi kwezulu, linikiweyo phakathi kwabantu, esimele ukusindiswa ngalo.”

⁸ UYesu ‘uyinyaniso.’ Umpostile uYohane wathi ngaye: “ULizwi waba yinyama, wahlala phakathi kwethu, sabubona ubuqaqawuli bakhe, ubuqaqawuli kanye bowokuphela kwamzeleyo uYise, ezele lubabalo nayinyaniso.” (Yohane 1:14) UYesu waba yinyaniso kumakhulukhulu eziprofeto ezikwiZibhalo zesiHebhere ngokuzizalisekisa. (2 Korinte 1:20; ISityhilelo 19:10) Wayazisa inyaniso ngokuthetha nabafundi bakhe nezihlwele ezaziphulaphula, ngokukhalimela abefundisi abahanahanisayo, nangomzekelo wokuphila kwakhe.

⁹ UYesu ‘ububomi.’ NjengoNyana kaThixo, uYesu wathi: “Lowo ukholwayo kuNyana, unobomi obungunaphakade; ke lowo ungamviyo uNyana, akayi kubona bomi; ingqumbo kaThixo ihleli phezu kwakhe.” (Yohane 3:36) Ukuba nokholo kwidini likaYesu kukhokelela kubomi obungunaphakade—‘kumhlambi omncinane’ bubomi bokungafi ezulwini nobomi obungunaphakade kumhlaba oyiparadisi kwisihlwele esikhulu ‘sezinye izimvu.’—Luka 12:32; 23:43; Yohane 10:16.

Ukunyamezela Intshutshiso

10. Kutheni sifanele ‘siloyise ihlabathi,’ yaye luluphi ukhuthazo uYesu awalunikelayo kule nkalo?

¹⁰ Abo banethemba lokuphila kwinkqubo entsha kaYehova bamele balwisane nehlabathi ‘elilele kongendawo,’ uSathana uMtyholi. (1 Yohane 5:19) Ngoko, hayi indlela akhuthaza ngayo amazwi kaYesu akuYohane 15:17-19! Uthi: “Ndiniwisela lo mthetho wokuba nithandane. Ukuba ihlabathi linithiyile, yazini ukuba lindithiye kuqala kunani. Ukuba beningabehlabathi, ihlabathi linge likuthanda okwalo; ke ngokuba ningengabehlabathi, ndaninyulayo mna kulo ihlabathi, ngenxa yoko linithiyile ihlabathi.” AmaKristu okwenyaniso ebethiyiwe ukuhla ukuza kufikelela kulo nyaka we-1992, ibe hayi indlela esivuya ngayo ngenxa yemizekelo emihle yabo baqhubeka beqinile, ngokuthobeka besomelezwa sisandla esinamandla sikaThixo! (1 Petros 5:6-10) Sonke sinokuzinyamezela iimvavanyo ngokukholwa kuYesu, oqukumbela ingxubusho yakhe ngala mazwi achukumisayo: “Ehlabathini niya kuba nembandezelo; yomelelani, mna ndiloyisile ihlabathi.”—Yohane 16:33.

Ukwenziwa Komnqophiso Omtsha

11. UYeremiya waprofeta wathini ngomnqophiso omtsha?

¹¹ Ngaloo ngokuhlwa, kwakuba kugqityiwe ukubhiyozelwa kwePasika, uYesu uthetha ngomnqophiso omtsha. Umprofeti uYeremiya wayekuxelile oku kwiinkulungwane ngaphambili, esithi: “Yabona, kuza imihla, utsho uYehova, endiya kwenza umnqophiso omtsha nendlu kaSirayeli nendlu kaYuda . . . ndiya kuwubeka umyalelo wam embilinini yabo, ndiwubhale ezintliziyweni zabo, ndibe nguThixo wabo, babe ngabantu bam; . . . ndiya kubuxolela ubugwenxa babo, ndingabi sasikhumbula isono sabo.” (Yeremiya 31:31-34) NgoNisan 14, 33 C.E., kuza kunikelwa idini elibangela lo mnqophiso mtsha usebenze!

12. UYesu wawusungula njani umnqophiso omtsha, ibe lo mnqophiso ufeza ntoni?

¹² UYesu uxelela abali-11 abathembekileyo ukuba ebekunqwenela kakhulu ukuyidla nabo le Pasika. Wandula ke athabathe isonka, abulele, asiqhekeze, aze abanike, esithi: “Ngumzimba wam lo, onikelwa ngenxa yenu; oku kwenzeleni ukundikhumbula.” Ngendlela efanayo, ubanika indebe yewayini ebomvu, esithi: “Le ndebe ingumnqophiso omtsha osegazini lam, eliphalalela nina.” (Luka 22:15, 19, 20) Umnqophiso omtsha wenziwa usebenze ‘ngegazi elinqabileyo’ likaYesu, elibaluleke gqitha kunegazi lezilwanyana elalifefwa ukuze umnqophiso woMthetho owawenziwe noSirayeli usebenze! (1 Petros 1:19; Hebhere 9:13, 14) Izono zabo bangeniswe kumnqophiso omtsha zixolelwa ngokupheleleyo. Kungoko, bekwazi ukufanelekela ukuba ngamalungu abali-144 000, abafumana ilifa elingunaphakade njengoSirayeli wokomoya.—Galati 6:16; Hebhere 9:15-18; 13:20; ISityhilelo 14:1.

“Ukundikhumbula”

13. (a) Sifanele sicinge ngantoni ngexesha leSikhumbuzo? (b) Kuphela ngoobani abafanele badle kwimifuziselo, yaye ngoba?

¹³ ISikhumbuzo esenziwa minyaka le se-1 960 sokufa kukaYesu siya kuba ngoAprili 17, 1992. Njengoko loo mhla usondela, kuhle ukuba sicinge ngako konke oko kufezwa lidini elifezekileyo likaYesu. Eli lungiselelo libalaselisa ubulumko bukaYehova nothando olunzulu analo ngoluntu. Ingqibelelo kaYesu engenasiphako, nkqu ukusa ekufeni okungcungcuthekisayo, ithethelela uYehova kungcikivo lukaSathana lokuba indalo Yakhe engabantu ayifezekanga yaye iya kusilela xa ivavanywa. (Yobhi 1:8-11; IMizekeliso 27:11) Ngegazi ledini lakhe, uYesu uba ngumlamleli womnqophiso omtsha, isixhobo uYehova asisebenzisayo ukukhetha “isizukulwana esinyuliweyo, isibingeleli esibukumkani, uhlanga olungcwele, abantu abayinqobo.” Ngoxa beselapha emhlabeni, aba ‘bavakalisa isidima’ soThixo wabo, uYehova, ‘owababizayo ukuba baphume ebumnyameni baze bangene ekukhanyeni kwakhe okumangalisayo.’ (1 Petros 2:9; thelekisa iEksodus 19:5, 6.) Ngokufanelekileyo, ngabo kuphela abadlayo kwimifuziselo yeSikhumbuzo nyaka ngamnye.

14. Izigidi zababukeli zivuzwa njani ngokutyebileyo?

¹⁴ KwiSikhumbuzo sonyaka ophelileyo, emhlabeni jikelele kwakuze abantu abali-10 650-158, kodwa phakathi kwaba ngabangama-8 850—ngaphantsi nakwisinye ekhulwini labantu ababezile—kuphela abadlayo kumfuziselo. Ngoko, lo mbhiyozo uzinceda ngantoni izigidi zababukeli? Uzinceda kakhulu! Nangona zingadli, zivuzwa ngokutyebileyo ngokomoya ngokunxulumana ngolu hlobo nobuzalwana obubanzi bomhlaba wonke, njengoko zisiva izinto ezimangalisayo uYehova azifezayo ngedini loNyana wakhe.

15. Abanye ngaphandle kwabathanjiswa bangenelwa njani kwidini likaYesu?

¹⁵ Ngaphezu koko, umpostile usixelela oku kweyoku-1 kaYohane 2:1, 2: “SinoMthetheleli kuye uYise, uYesu Kristu ilungisa. Yena usisicamagushelo sezono zethu; engesazethu zodwa, usiso nesehlabathi liphela.” Ewe, idini likaYesu, ngoxa okokuqala lisizisa iingenelo kudidi lukaYohane olungeniswe kumnqophiso omtsha, likwalungiselela ukuxolelwa kwezono ‘zehlabathi liphela.’ “Sisicamagushelo” sezono zabo bonke abanye abantu behlabathi abakholwayo kwigazi likaYesu elaphalazwayo, esibavulela ithemba elivuyisayo lobomi obungunaphakade kumhlaba oyiparadisi.—Mateyu 20:28.

“Ebukumkanini BukaBawo”

16. (a) Ngoku kubonakala ukuba uYesu neendlalifa ezidlelana naye bahlanganyela entwenini? (b) Yintoni efunekayo namhlanje kwintsalela ethanjisiweyo nakwisihlwele esikhulu?

¹⁶ Eqhubeka ekhuthaza abapostile bakhe, uYesu uthetha ngosuku lwaxa ngokufuziselayo eya kusela isiqhamo somdiliya omtsha nabafundi bakhe kuBukumkani bukaYise. (Mateyu 26:29) Ubaxelela oku: “Nina ke ningabo basoloko behleli nam ekulingweni kwam. Nam ndinimisela ubukumkani, njengokuba uBawo endimisele mna, ukuze nidle, nisele, esithebeni sam ebukumkanini bam, nihlale ezitroneni, nigweba izizwe ezilishumi elinazibini zakwaSirayeli.” (Luka 22:28-30) Ekubeni uYesu waqalisa ukulawula njengoKumkani ezulwini ngowe-1914, sisenokugqiba kwelokuba abaninzi kwiindlalifa ezingamadlelane noYesu, ebezihlanganiswa ukutyhubela iinkulungwane, sele bevusiwe, ukuze ‘bahlale ezitroneni’ naye. (1 Tesalonika 4:15, 16) Ayifikanga igalelekile imini yokuba izithunywa zezulu zikhulule “imimoya yomine” ‘yembandezelo enkulu’! Ngelo xesha, ukutywinwa kwabali-144 000 boSirayeli wokomoya nokuhlanganiswa kwezigidi zesihlwele esikhulu kobe kugqityiwe. Bonke aba bamele bagcine ingqibelelo, njengoko noYesu wenzayo, ukuze bafumane umvuzo wobomi obungunaphakade.—ISityhilelo 2:10; 7:1-4, 9.

17 nebhokisi. (a) Ukuba umntu othanjisiweyo unokugxothwa ngenxa yokunganyaniseki, ngokusengqiqweni ngubani osenokuthabath’ indawo yakhe? (b) Amanqaku eWatchtower ngowe-1938 anikela kuphi ukukhanya okubangel’ umdla ngokusekwa nokwandiswa kwentlangano yobuthixo emhlabeni?

¹⁷ Kuthekani ukuba bambi kwabathanjisiweyo bayasilela ukugcina ingqibelelo? Ekubeni sele lihambe kangaka ixesha, ngokungathandabuzekiyo baya kuba mbalwa abantu abanganyanisekanga ngolo hlobo. Lisengqiqweni elokuba abantu bokubathabathel’ indawo bebeya kukhethwa, kungekhona kubantu abasandul’ ukubhaptizwa, kodwa phakathi kwabo bebesoloko benoYesu ekulingweni kwakhe ukutyhubela iminyaka emininzi yokukhonza ngokuthembeka. Ukukhanya okuqaqambileyo kokomoya okwakufika ngeThe Watchtower kwiminyaka yee-1920 neyee-1930 kubonisa ukuba ukuhlanganiswa kwentsalela yabathanjisiweyo ngokwenene kwakufikelele esiphelweni ebudeni belo xesha. Abo ‘bebehlamba iingubo zabo baze bazenze mhlophe egazini leMvana’ ukususela ngelo xesha banethemba elahlukileyo nelivuyisayo. NgoKristu, umoya kaYehova ubakhokelela ‘emithonjeni yamanzi obomi’ kumhlaba oyiParadisi.—ISityhilelo 7:10, 14, 17.

Owona Mthandazo Ubalaseleyo

18. Ziziphi izifundo ezinamandla esizifunda kumthandazo kaYesu kuYohane isahluko 17?

¹⁸ UYesu uqukumbela intlanganiso yeSikhumbuzo nabafundi bakhe ngokwenza umthandazo obalaseleyo nobhalwe kuYohane 17:1-26. Okokuqala uthandazela ukuba uYise amzukise njengoko egcina ingqibelelo ukusa ekupheleni. Ngale ndlela noYehova uya kuzukiswa, lingcwaliswe igama lakhe—licocwe kulo lonke ugculelo. Kuba, ngokwenene, indoda ethembekileyo enguYesu iyangqina ukuba indalo kaThixo engabantu inokuhlala ithembekile, kwanaxa ijamelene nolona vavanyo luqatha. (Duteronomi 32:4, 5; Hebhere 4:15) Ngaphezu koko, ukufa kukaYesu njengedini kuvulela inzala ka-Adam ithuba elizukileyo. UYesu uthi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.” Hayi indlela ekubaluleke ngayo ukuzuza ulwazi oluchanileyo ngoYehova uThixo noNyana wakhe, iMvana kaThixo, owancama ubomi bakhe ukuze kuthethelelwe uYehova nokuze kusindiswe uluntu! (Yohane 1:29; 1 Petros 2:22-25) Ngaba uyalixabisa elo dini lothando olubalaseleyo ukusa kumkhamo wokuzinikela ngokupheleleyo kuYehova nakwinkonzo yakhe exabisekileyo?

19. Intsalela nesihlwele esikhulu zinokulunandipha njani umanyano oluxabisekileyo?

¹⁹ Ngaphezu koko, uYesu uyathandaza kuYise Ongcwele emcela ukuba Alondoloze abafundi bakhe njengoko bezibonakalisa ukuba abangabo abehlabathi, benamathela kwilizwi Lakhe njengeliyinyaniso, baze balondoloze ubunye obuxabisekileyo noBawo noNyana. Ngaba lo mthandazo awukhange uphendulwe ngokumangalisayo ukuza kuthi ga kulo mhla njengoko abo bentsalela ethanjisiweyo nabesihlwele esikhulu bekhonza kunye bemanyaniswe luthando, ngoxa behlala bengoondilele kulo ihlabathi, kugonyamelo lwalo nakubungendawo balo? Hayi indlela axabiseke ngayo amazwi kaYesu okuqukumbela awabhekisa kuYise, uYehova! UYesu uthi: “Ndabazisa igama lakho, ndandiya kubazisa; ukuze uthando ondithande ngalo lube kubo, nam ndibe kubo.”—Yohane 17:14, 16, 26.

20. Kutheni uNisan 14, 33 C.E., ngokuqinisekileyo elusuku lokukhunjulwa?

²⁰ Njengoko bephuma besiya kumyezo waseGetsemane, uYesu usaqhubeka enxulumana ngokufutshane nangendlela eyakhayo nabafundi bakhe. Kuthi ke kufike iintshaba zakhe! Aphel’ emlonyeni amazwi okuchaza ukubandezeleka kukaYesu emzimbeni, okuchaza intlungu etyumz’ intliziyo awaba nayo ngokunyeliswa kukaYehova nawokuchaza ingqibelelo yakhe engumzekelo ukutyhubela konke oku. UYesu uyanyamezela kude kube sekupheleni, ubusuku bonke nayo yonke loo mini. Ubonisa ngokucacileyo ukuba uBukumkani bakhe asibubo obeli hlabathi. Yaye xa etsala umoya wakhe wokugqibela, uyadanduluka: “Kugqityiwe!” (Yohane 18:36, 37; 19:30) Uloyise ngokupheleleyo ihlabathi! Ngokuqinisekileyo uNisan 14, 33 C.E., lusuku lokukhunjulwa!

[Umbhalo osemazantsi]

Ubungaphendula Uthini?

◻ UYesu wafundisa ntoni ngokuthobeka nangothando?

◻ Kwenzeka njani ukuba uYesu abe ‘yindlela, yinyaniso nobomi’?

◻ Iyintoni injongo yomnqophiso omtsha?

◻ Luluphi umanyano nothando olukhoyo phakathi kwentsalela ethanjisiweyo nesihlwele esikhulu?

[Ibhokisi ekwiphepha 20]

Ubulumko BukaSolomon Omkhulu

Amanqaku anomxholo othi “Organization” (INtlangano) kwinkupho yeThe Watchtower kaJuni 1 nekaJuni 15, 1938, achaza ilungiselelo elisisiseko lolawulo lobuthixo elilandelwa ngamaNgqina kaYehova ukuza kuthi ga kulo mhla. Anikela ingxelo eyincopho yethuba lokuhlengahlengiswa kweemfundiso nokwentlangano okwaqala ngowe-1919. (Isaya 60:17) Ifanisa elo thuba leminyaka engama-20 neminyaka engama-20 yokwakha kukaSolomon itempile nendlu yokumkani eYerusalem, iThe Watchtower yathi: “IZibhalo zibonisa ukuba, emva kweminyaka engamashumi amabini uSolomon esakha . . . , waqalisa iphulo lokwakha elizweni lonke. (1 Kum. 9:10, 17-23; 2 Kron. 8:1-10) Kwandula ke kwafika ukumkanikazi waseShebha ‘evela eziphelweni zomhlaba esiza kuva ubulumko bukaSolomon’. (Mat. 12:42; 1 Kum. 10:1-10; 2 Kron. 9:1-9, 12) Oku kuphakamisa lo mbuzo: Yintoni elindele abantu bakaYehova abasemhlabeni kwikamva elingekude? Ngentembelo epheleleyo siza kulinda, yaye siza kubona.” Leyo yayingeyontembelo yenkohliso. Phantsi kwentlangano yolawulo lobuthixo inkqubo enkulu yokwakha ngokomoya eqhutywa ehlabathini lonke iye yahlanganisa abantu besihlwele esikhulu abangaphezu kwezigidi ezine. Njengokumkanikazi waseShebha, aba baye beza bevela kweyona mimandla ikude yomhlaba bezokuva ubulumko bukaSolomon Omkhulu, uKristu Yesu—obudluliselwa kubo ‘ngomkhonzi othembekileyo noqondayo.’—Mateyu 24:45-47.