Ngaba “Ulungelelwaniso Olutsha Lwehlabathi” Oluya Kuziswa Ngabantu Lusondele?
1. Ukunqwenela inkululeko engakumbi yezobupolitika kuye kwabonakaliswa njani kwiminyaka yakutshanje?
NAMHLANJE, izigidi zabantu zikhotyokiswe lunqulo lobuxoki, yaye abaninzi bakhetha ukuhlala bekuloo meko. Kwangaxeshanye, abaninzi ngakumbi nangakumbi bafuna inkululeko yezobupolitika. Iziganeko ezixhomis’ amehlo ezenzeke kule minyaka imbalwa idluleyo eMpuma Yurophu nakwezinye iindawo zibonisa ukuba abantu bafuna uhlobo loorhulumente abanenkululeko engakumbi. Ngenxa yoko, abaninzi bathi alifikanga ligalelekile ixesha elitsha lenkululeko. Umongameli waseUnited States walibiza ngokuthi “lulungelelwaniso olutsha lwehlabathi.” Eneneni, iinkokeli zehlabathi ezindaweni zonke bezisithi iMfazwe Yomlomo nokhuphiswano lwezixhobo ziphelile yaye ixesha elitsha loxolo lifikile kuluntu.—Thelekisa eyoku-1 kwabaseTesalonika 5:3.
2, 3. Ziziphi iimeko ezibangela inkululeko yokwenyaniso ingabikho?
2 Sekunjalo, kwanokuba imigudu yabantu inokuphumela ekubeni kuncitshiswe izixhobo yaye kubekho iindlela zolawulo ezikhululeke ngakumbi, ngaba inokubakho ngokwenene inkululeko yokwenyaniso? Unotshe, ngenxa yeengxaki ezothusayo ezikhoyo kuwo onke amazwe, kuquka nawolawulo-melo, apho inani lamahlwempu landayo yaye izigidi zitsala nzima ngokwezoqoqosho. Ingxelo yeZizwe Ezimanyeneyo ithi phezu kwayo nje inkqubela kwezenzululwazi nezonyango, suku ngalunye ehlabathini lonke ngokwesilinganiselo abantwana abangama-40 000 bayafa ngenxa yokungondleki okanye izifo ezinokuthintelwa. Ingcali kulo mbandela yathi: “Indlala iya isiba neempawu ezilisongela ngokwenene ikamva loluntu.”
3 Ukongezelela koko, abantu abangakumbi basoloko bengamaxhoba olwaphulo-mthetho oluya lusiba qatha ngakumbi nangakumbi. Intiyo yobuzwe, yobupolitika neyonqulo ibangela amazwe amaninzi abe ziintlaba-zahlukane. Kwezinye iindawo imeko ayahlukanga kuyaphi kuleyo yaxelwa kwangaphambili kuZekariya 14:13, xa abantu beya “kudideka batyhwatyhwe kangangokuba elowo nalowo [uya kuthi] ahlasele ummelwane wakhe.” (Today’s English Version) Ukusetyenziswa kakubi kweziyobisi nezifo ezidluliselwa ngeentlobano zesini ziye zangubhubhani. Izigidi zabantu zasulelwe nguGawulayo; eUnited States kuphela, sele ebulele abantu abangaphezu kwe-120 000.
Ukukhotyokiswa Sisono Nokufa
4, 5. Kungakhathaliseki ukuba ziziphi na iinkululeko ezikhoyo namhlanje, bubuphi ubukhoboka ababanjiswe kubo bonke abantu?
4 Phofu ke, kwanokuba bezingekho ezi meko zimbi, abantu bebengayi kuba nayo inkululeko yokwenyaniso. Bonke bebesaya kuba ngamakhoboka. Kutheni kunjalo? Ngokomzekelo: Kuthekani ukuba bonke abantu abasemhlabeni bebengamakhoboka ozwilakhe othile aze ababulale bonke? Ngokungathi kunjalo, oko koko kwenzekayo kuluntu xa abazali bethu bokuqala bavukela uThixo baza bangamakhoboka olawulo olucinezelayo lukaMtyholi.—2 Korinte 4:4.
5 Xa uThixo wadala abantu, wayenenjongo yokuba baphile emhlabeni ngonaphakade befezekile, eparadisi, njengoko iGenesis isahluko 1 nesesi-2 zibonisa. Kodwa ngenxa yokuba ukhokho wethu uAdam wamvukela uThixo, sonke singaphantsi kwesigwebo sokufa ukususela ekukhawulweni kwethu: “Isono sangena ngamntu mnye [uAdam, intloko-ntsapho yoluntu] ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke.” Njengokuba iBhayibhile isitsho, “ukufa ke kwalawula [njengokumkani, NW].” (Roma 5:12, 14) Ngoko kungakhathaliseki inkululeko esisenokuba sinayo ngokobuqu, sonke singamakhoboka esono nokufa.
6. Kutheni ubude bobomi babantu buye baphucuka kancinane ukususela oko INdumiso 90:10 yabhalwayo?
6 Ngaphezu koko, ubomi bethu ngoku bufutshane gqitha. Kwanabo banethamsanqa, baphila nje amashumi ambalwa eminyaka. Kwabo ke babe nelishwa, iba yiminyakana nje embalwa, okanye ngaphantsi. Yaye uphengululo lwamvanje luthi: “Inzululwazi nezonyango ziye zabangela ukuba ubude bobomi babantu bufikelele apho bungenakudlula khona.” Oku kungenxa yokuba inkqubo yethu yemfuza inokungafezeki nokufa okukuyo nto leyo eyabangelwa sisono sika-Adam. Hayi indlela esilusizi ngayo isibakala sokuba ukuba siphile ukusa kwiminyaka engama-70 okanye engama-80, xa kanye besifanel’ ukuba siya sisiba zizilumko size sikwazi ukubunandipha ngakumbi ubomi, imizimba yethu isuka idodobale yaye siphela njengothuli!—INdumiso 90:10.
7. Kutheni abantu bengenakuze bayizise inkululeko yokwenyaniso esiyifunayo nesiyisweleyo?
7 Luluphi uhlobo lolawulo lwabantu olunokukuthintela oku kukhotyokiswa sisono nokufa? Akukho nalunye. Akukho magosa aseburhulumenteni, zazinzulu, okanye gqirha naphi na abanokusikhulula kwesi siqalekiso sokugula, ukwaluphala nokufa, kungekho namnye onokuphelisa ukunganqabiseki, ukungabikho kokusesikweni, ulwaphulo-mthetho, indlala nobuhlwempu. (INdumiso 89:48) Kungakhathaliseki ukuba abantu baneenjongo ezintle kangakanani na, abakwazi nje kwaphela ukusinika inkululeko yokwenyaniso esiyifunayo nesiyisweleyo.—INdumiso 146:3.
Ukusetyenziswa Kakubi Kwenkululeko Yokuzikhethela
8, 9. Yintoni eyafaka uluntu kobu bugxwayiba lukubo ngoku?
8 Intsapho engabantu ikobu bugxwayiba ngenxa yokuba uAdam noEva bayisebenzisa kakubi inkululeko yabo yokuzikhethela. NgokweTestamente Entsha yenguqulelo entsha yeBhayibhile yesiXhosa, eyokuQala kaPetros 2:16 ithi: “Ziphatheni njengabantu abakhululekileyo. Kambe ke inkululeko leyo mayingabi lokhusi lokungcola.” Ngenxa yoko, kucacile ukuba uThixo wayengacebanga ukuba inkululeko yabantu ingabi namida. Yayimele isetyenziswe ngokuvisisana nemida yemithetho kaThixo, mithetho leyo eyayiyeyobulungisa neyayiza kusebenzela ukulungelwa kwabo bonke abantu. Kwaye loo mida yayibanzi ngokwaneleyo ukuba ivumele inkululeko enkulu yokuba ubani azikhethele, ukuze ulawulo lukaThixo lungabi lolucinezelayo.—Duteronomi 32:4.
9 Phofu ke, abazali bethu bokuqala bakhetha ukuzigqibela ngokwabo ngoko kulungileyo nokubi. Ekubeni balutyeshela ngabom ulawulo lukaThixo, wayeka ukubaxhasa. (Genesis 3:17-19) Ngaloo ndlela baba ngabangafezekanga, bagula baza bafa ngenxa yoku. Kunokukhululeka, uluntu lwaba ngamakhoboka esono nokufa. Kwakhona lwaba ngaphantsi kwedyokhwe yabalawuli abangafezekanga nabaye, ngokufuthi, bazibalula ngenkohlakalo.—Duteronomi 32:5.
10. UYehova uye wayisingatha njani ngokunothando imicimbi?
10 UThixo uye wabavumela abantu ukuba balinge ukuzilawula ngokupheleleyo okwexesha elilinganiselweyo. Wayesazi ukuba imiphumo yayiya kubonisa ngaphandle kwamathandabuzo ukuba ukuzilawula komntu ngaphandle koThixo akunakuphumelela. Ekubeni inkululeko yokuzikhethela, esetyenziswa kakuhle, iyinto exabiseke ngolo hlobo, ngenxa yothando lwakhe uThixo uye wakuvumela okwexeshana oko kwenzekileyo kunokuba abandeze abantu isipho senkululeko yokuzikhethela.
‘Umntu Akanakukuqinisela Ukunyathela Kwakhe’
11. Imbali ikuxhase njani ukuchana kweBhayibhile?
11 Imbali iye yabonisa ukuchana kukaYeremiya isahluko 10, indinyana 23 neyama-24, xa esithi: “Akukhona endodeni ehambayo ukuqinisela ukunyathela kwayo. Ndithethise, Yehova.” Kwakhona imbali ibonise ukuba INtshumayeli 8:9 ichan’ ucwethe xa isithi: “Umntu [ugunyazela] umntu, kube kubi kuye.” Hayi indlela okuyinyaniso ngayo oku! Intsapho engabantu iye yantlitheka kwiintlekele ngeentlekele, yaye ekugqibeleni yonke iphelela engcwabeni. Umpostile uPawulos wayichaza kakuhle le meko, xa wathetha oko kubhalwe kumaRoma 8:22: “Siyazi ukuba yonke indalo iyancwina, inenimba kunye, unangoku.” Ewe, ukuzimela geqe kwimithetho kaThixo kuye kwathetha intlekele.
12. Eminye imithombo yehlabathi ithini ngenkululeko epheleleyo?
12 Incwadi ethi Inquisition and Liberty yathi xa ithetha ngenkululeko: “Ukuzimela geqe, kukodwa nje, kusenokungabi yeyona nto ibalaseleyo: asinto onokuzigwagwisa ngayo ungenayo imfanelo engakumbi. Enyanisweni, isenokuba iyenye nje yeendlela zokuzingca ezonakele ngakumbi . . . Umntu akasosidalwa sizimele geqe ngokupheleleyo, yaye akanakuze alangazelele ukuba njalo ngaphandle kokuba usisidenge.” Yaye iNkosana uPhilip yaseNgilani yakha yathi: “Inkululeko yokwenza unothanda noko ukucingayo isenokuba nomtsalane, kodwa izihlandlo ezininzi amava abonise ukuba inkululeko engenamida . . . nesimo sokubonisa ukungabi nalwazelelelo ngabanye yeyona ndlela iqinisekileyo yokutshabalalisa ubomi boluntu, kungakhathaliseki ukuba lunobutyebi obungakanani na.”
Ngubani Owazi Kakuhle?
13, 14. Ngubani ongokuphela konokunikela inkululeko yokwenyaniso kwintsapho yabantu?
13 Ngubani oyazi kakuhle indlela elifanele lilungelelaniswe ngayo ikhaya—ngabazali abanothando, abanobuchule namava okanye ngabantwana abancinane? Impendulo izicacele. Ngokufanayo, uMdali wabantu, uBawo wethu wasezulwini, uyakwazi okona kusilungeleyo. Uyayazi indlela abantu abafanele balungelelaniswe baze balawulwe ngayo. Uyayazi indlela inkululeko yokuzikhethela efanele ilawulwe ngayo ukuze bonke bazuze iingenelo zenkululeko yokwenyaniso. NguThixo usomandla, uYehova, kuphela onokuhlangula intsapho engabantu kubukhoboka ekubo aze abanike bonke inkululeko yokwenyaniso.—Isaya 48:17-19.
14 KwiLizwi lakhe, kumaRoma 8:21, uYehova unikela eli dinga likhuthazayo: “Nendalo ngokwayo iya kukhululwa ebukhobokeni bokonakala, isingiswe enkululekweni yozuko lwabantwana bakaThixo.” Ewe, uThixo uthembisa ukuyikhulula ngokupheleleyo intsapho yoluntu kubugxwayiba ekubo ngoku. Inqaku elilandelayo liza kuxubusha indlela oku okuya kwenzeka ngayo.
Ubuya Kuphendula Uthini?
(Impinda yombandela osusela kwiphepha 3 ukusa kwelesi-8)
◻ Kutheni abantu beyithanda nje inkululeko?
◻ Abantu baye benziwa amakhoboka ngaziphi iindlela ukutyhubela imbali?
◻ Kutheni uYehova eye wakuvumela ithuba elide kangaka ukusetyenziswa kakubi kwenkululeko yokuzikhethela?
◻ Ngubani ongokuphela konokunikela inkululeko yokwenyaniso kulo lonke uluntu, yaye ngoba?
[Umfanekiso okwiphepha 7]
Ubude bobomi babantu phantse buyafana nobo bachazwa kwiminyaka engama-3 500 eyadlulayo kwiNdumiso 90:10
[Inkcazelo]
Courtesy of The British Museum