Abavakalisi BoBukumkani Bayabalisa
Ukugubungela Umhlaba Okwanti EParaguay Kuzisa Isiqhamo
ISEBE leWatch Tower Society eliseParaguay liyiqonda kakuhle imfuneko yokuvakalisa iindaba ezilungileyo zoBukumkani kwintsimi yalo yonke. (IZenzo 1:8) Lithuba lokuba bonke bafunde ngoBukumkani baze bamkhonze uYehova ngaphambi kokuba aphelise le nkqubo yezinto ingendawo ‘kwimbandezelo enkulu’ eza kubakho. (Mateyu 24:21, 22) Amava alandelayo abonisa okwenziwayo ukunceda abantu abakumhlaba ongabelwanga bani. Isebe linikela le ngxelo:
Kwenziwa amalungiselelo okugubungela wonke umhlaba ongabelwanga bani ngoncedo loovulindlela abakhethekileyo bokwexeshana. Ebudeni benyanga kaNovemba ukuya kuJanuwari wonyaka wenkonzo we-1990, abazalwana noodade abangama-39 bagubungela izixeko ezilikhulu kunye needolophana apho kungekabikho bavakalisi boBukumkani kwaphela. Bakwazi ukusasaza iincwadi ezingama-6 119, iincwadana ezingama-4 262 kunye namaphephancwadi angama-5 144. Ngenxa yalo msebenzi, kusekwa amaqela amatsha abavakalisi.
◻ Elinye ibhinqa lathabatha incwadi ethi Unokuphila Ngonaphakade KwiParadisi Esemhlabeni kudade onguvulindlela owayesebenza kumhlaba ongabelwanga bani. Lo vulindlela wacela ukuliqhubela isifundo seBhayibhile, ibe lasamkela ngochulumanco. Ekubuyeni kwakhe lo vulindlela, wafika engalindelwanga nje kuphela leli nenekazi kodwa kukho nomyeni walo kunye nabantwana babo abalishumi. Kutyelelo olulandelayo, le ntsapho kunye nabahlobo bayo nabamelwane babelungele isifundo seBhayibhile! Eli binqa lalibamemile, lisithi isifundo eso sasiyingenelo ibe ithemba neentsikelelo ezivela kuYehova zazimangalisa. Le yayiyinto elingazange liyixelelwe bani ngaphambili, ngoko laba nemvakalelo yokuba abamelwane kunye nabahlobo balo nabo babemele bazive ezi ndaba zilungileyo.
Ngalo lonke ixesha lo vulindlela eqhuba esi sifundo, babesiba baninzi abezileyo ngokokude ibe ngathi libandla elincinane. Aba bantu banomdla babebuza imibuzo emininzi yaye besiba nenxaxheba esifundweni. Xa uvulindlela wachazayo ukuba yakuba igutyungelwe intsimi, kwakuza kufuneka yena namaqabane akhe bafudukele kummandla omtsha, eli nenekazi likhathazekile labuza oko kwakuza kwenzeka ngabo. Kwenziwa amalungiselelo nabazalwana bebandla elikufuphi ukuze baqhubeke nesifundo. Ngoku oovulindlela abakhethekileyo baye babelwa ukunceda aba bantu banomdla nababumvu.
◻ Xa wayekumsebenzi wendlu ngendlu kwenye intsimi ekumhlaba ongabelwanga bani, udade onguvulindlela wafumana indoda eyayifumene kwiminyaka elishumi ngaphambili incwadi ethi INyaniso eKhokelela kuBomi obungunaPhakade. Ukususela ngelo xesha ayizange iphinde iwabone amaNgqina kaYehova. Noko ke, yayisazi ukuba uYehova, lowo yayimbiza ngokuthi nguYehova wemikhosi, ungokuphela koThixo oyinyaniso nokuthi Nguye kuphela ofanele ukunqulwa. Ngokuzithandela, yayithetha ngoYehova kuye wonke ubani eyayimazi. Eneneni, veki nganye yayihamba iikhilomitha ezintathu ukuze ityelele isibini esinomdla ukwenzela ukuthetha naso ngoThixo kuba, njengokutsho kwayo, ‘Ukuba ndiyayeka ukubatyelela, baya kulibala ngoYehova.’ Ukongezelela kweso sibini sitshatileyo, kwakukho nabanye abamalunga neshumi ababefuna isifundo seBhayibhile—konke oku kwakungenxa nje yokuba lo mntu unomdla wayeshumayele kubo.
Okuphawulekayo kukuba, kwiintsuku nje ezimbalwa ngaphambi kokuba uvulindlela ayityelele, le ndoda yamalela umfundisi wasekuhlaleni kunye nomngcelele wakhe ukungena endlwini yayo nomfanekiso oqingqiweyo wentombi enyulu, ichaza ukuba yona ayikholelwa kwimifanekiso eqingqiweyo. Umfundisi wavutha ngumsindo. Ngobo busuku le ndoda yathandaza kuYehova icela uncedo. Ngoko khawuthelekelele imincili nemivuyo eyaba nayo xa uvulindlela wafikayo! Amalungiselelo esifundo seBhayibhile esicwangcisiweyo enziwa ngokukhawuleza, ibe le ndoda iqhubekela phambili ekunxulumaneni nentlangano yobuthixo.
Enyanisweni, uYehova uyawusikelela lo msebenzi wokuhlanganisa eParaguay njengoko abazalwana bezama ngamandla ukunikela ubungqina ngokucokisekileyo kulo mhlaba ungabelwanga bani.—Mateyu 24:14.