Hlala Uyikhumbula Imini KaYehova

“Isondele imini kaYehova entilini yesigqibo.”—YOWELI 3:14.

1. Kutheni imfazwe engcwele ezayo evakaliswe nguYehova iya kwahluka kwiimfazwe “ezingcwele” zoluntu?

“MEMEZANI oku ezintlangeni, ngcwalisani imfazwe!” (Yoweli 3:9) Ngaba oku kusingisele kwimfazwe engcwele? Xa sikhangela emva kwiiMfazwe zoMnqamlezo, iimfazwe eziliwe egameni lonqulo neemfazwe ezimbini zehlabathi—iNgqobhoko eyayinendima ephambili kuzo—ukucinga nje ngemfazwe “engcwele” kusenokusenza sityhwatyhwe kukoyika. Noko ke, imfazwe engcwele echazwe kwisiprofeto sikaYoweli asiyomfazwe ephakathi kweentlanga. Asilokruthakruthwano oluphenjelelwa yintiyo lokulwela umhlaba okanye iimpahla, kusetyenziswa unqulo njengento yokuzingxengxezela. Yimfazwe yobulungisa. Yimfazwe kaThixo yokushenxisa ukubawa, ungquzulwano, ukunganyaniseki nengcinezelo kulo mhlaba. Iya kuthethelela ilungelo likaYehova lokuba ngumongami phezu kwayo yonke indalo yakhe. Loo mfazwe iya kuhlahlel’ indlela uBukumkani bukaKristu ukuze bungenise uluntu kwiWaka Leminyaka loxolo, lempumelelo nolonwabo lwendalo iphela olwaxelwa kwangaphambili ngabaprofeti bakaThixo.—INdumiso 37:9-11; Isaya 65:17, 18; ISityhilelo 20:6.

2, 3. (a) Iyintoni “imini kaYehova” ekuprofetwe ngayo kuYoweli 3:14? (b) Kutheni iintlanga zifanelwe koko ziya kujamelana nako ngaloo mini?

² Ngoko, yintoni “imini kaYehova” eyaxelwa kwangaphambili kuYoweli 3:14? UYehova ngokwakhe uyadanduluka: “Hayi ke le mini! Kuba isondele imini kaYehova, ivela njengembuqo kuSomandla.” Iyimbuqo njani? Kamva umprofeti uyacacisa: “Yimbuthumbuthu [“zizihlwele,” NW], yimbuthumbuthu entilini yesigqibo! Kuba isondele imini kaYehova entilini yesigqibo.” (Yoweli 1:15; 3:14) Le yimini yokugweba kukaYehova izihlwele zabantu ezingenaThixo eziligatyayo ilungelo lakhe lokuba ngumongami ezulwini nasemhlabeni. UYehova ugqibe kwelokuba ayiphanzise le nkqubo yezinto kaSathana ebirhintyele uluntu ixesha elide kangaka.—Yeremiya 17:5-7; 25:31-33.

³ Inkqubo eyonakeleyo yasemhlabeni imele ijamelane naloo mgwebo. Kodwa ngaba inkqubo yehlabathi ngokwenene imbi ngolo hlobo? Ukuthi krwaqu nje kube kanye kwingxelo yayo kufanele kwanele! UYesu wachaza lo mgaqo kuMateyu 7:16: “Nobaqonda ngeziqhamo zabo.” Azithanga na izixeko ezikhulu zehlabathi zazaliswa ziziyobisi, lulwaphulo-mthetho, luloyiko, kukuziphatha okubi nongcoliso? Kumazwe amaninzi inkululeko esandul’ ukufunyanwa iphazanyiswa yingxuba-kaxaka ekwezobupolitika, kukunqongophala kokudla nobuhlwempu. Abantu abangaphezu kwewaka lezigidi baxhomekeke kwimixhesho yokutya elungiselelwe abo bathwaxwa linxele likaKhetsekile. Ngaphezu koko, ubhubhane onguGawulayo, onwenwa okomlilo wedobo ngenxa yokusetyenziswa kakubi kweziyobisi nokuziphatha okubi, ushiye ilifu elimnyama lilengalenga phezu kwenxalenye enkulu yomhlaba. Ngokukodwa ukususela ekuqhambukeni kweMfazwe Yehlabathi I ngowe-1914, umgangatho wobomi uye wadodobala ehlabathini lonke.—Thelekisa eyesi-2 kuTimoti 3:1-5.

4. Luluphi ucelomngeni uYehova alubhekisa ezintlangeni?

⁴ Phofu ke, kuzo zonke iintlanga uYehova ebehlanganisa abantu ngovuyo abafundiswa ngeendlela zakhe baze bahambe ngomendo wakhe. Aba bantu abasehlabathini lonke baye bawakhanda amakrele angamakhuba, bengafuni nokuzibona iindlela zogonyamelo zeli hlabathi. (Isaya 2:2-4) Ewe, bakhande amakrele angamakhuba! Kodwa ngaba le asinto yahlukileyo kwisibhengezo uYehova ayalela ukuba sivakaliswe kuYoweli 3:9, 10? Apho sifunda oku: “Memezani oku ezintlangeni, ngcwalisani imfazwe; xhoxhani amagorha; makafike enyuke onke amadoda okulwa. Khandani amakhuba enu abe ngamakrele, nezitshetshe zenu zemidiliya zibe zizikhali.” Apha uYehova ucela umngeni abalawuli beli hlabathi esithi mabazise imikhosi yabo emanyeneyo ize kulwa naye eArmagedon. Kodwa abanakuphumelela! Bamele boyiswe ngokupheleleyo!—ISityhilelo 16:16.

5. Uya kuba yintoni umphumo xa “umdiliya womhlaba” uvunwa?

⁵ Bebonakalisa indelelo kwiNkosi enguMongami uYehova, abalawuli abanamandla baye bazifumbela intaphane yezixhobo ezoyikekayo—kodwa batsho phantsi! UYehova unikela lo myalelo kuYoweli 3:13: “Fakani irhengqa, kuba ukudla kuvuthiwe; yizani nixovule, ngokuba isixovulelo sewayini sizele, iyaphalala imikhombe yokukhongozela; kuba bukhulu ububi bazo.” Loo mazwi avisisana nalawo akwiSityhilelo 14:18-20, apho isithunywa sezulu esinerhengqa elibukhali siyalelwa ukuba ‘sizibuthe izihloko zomdiliya womhlaba, ngokuba iidiliya zawo zivuthiwe.’ Esi sithunywa sezulu siyalifaka irhengqa laso size siphosele ezo ntlanga zidelelayo “esixovulelweni esikhulu somsindo kaThixo.” Ngokufuziselayo, kuphuma igazi esixovulelweni eso lide lifikelele emikhaleni yamahashe, umgama oziitadiya ezili-1 600—malunga neekhilomitha ezingama-300! Elinjani lona ukoyikeka ikamva elilindele ezo ntlanga zingamhloneliyo uYehova!

Abemi Abagcina Umthetho

6. AmaNgqina kaYehova azijonga njani iintlanga nabalawuli bazo?

⁶ Ngaba oku kuthetha ukuba amaNgqina kaYehova awazihloneli iintlanga nabalawuli bazo? Akunjalo konke konke! Ekuphela nje kwento ayicekisayo kukunganyaniseki okucace nakuthathatha, yaye alumkisa ngemini kaYehova yomgwebo esondela ngokukhawuleza. Kwangaxeshanye, ngokuthobeka athobela umyalelo wompostile uPawulos okwabaseRoma 13:1: “Yonke imiphefumlo mayiwalulamele amagunya awongamileyo.” Abahlonela ngendlela ebafaneleyo aba balawuli bangabantu kodwa awabanquli. Njengabemi abagcina umthetho, alandela imilinganiselo yeBhayibhile yokunyaniseka, ukuthetha inyaniso nokucoceka yaye akhuthaza imilinganiselo efanelekileyo yokuziphatha kwiintsapho zawo. Anceda abanye ukuba babone indlela abanokukwenza ngayo nabo oku. Ahlalisana ngoxolo nabantu bonke, engabandakanyeki kwimingcelele yoqhankqalazo okanye kwizenzo zemvukelo yezobupolitika. AmaNgqina kaYehova afuna ukumisela umzekelo ekuthobeleni imithetho yamagunya awongamileyo angabantu, ngoxa elindele ukuba iGunya Eliphakamileyo, iNkosi enguMongami uYehova, libuyisele uxolo olugqibeleleyo norhulumente wobulungisa kulo mhlaba.

Ukuphumeza Umgwebo Wakhe

7, 8. (a) Yiyiphi indlela eziya kunyikimiswa ngayo iintlanga nobuya kuzifikela ngayo ubumnyama? (b) UYoweli ufanekisela oobani namhlanje, yaye ngokwahlukileyo kwihlabathi ngokubanzi, aba basikelelwe njani?

⁷ Ngentetho ecacileyo nebusafobe, uYehova unikela inkcazelo engakumbi ngendlela aza kugweba ngayo: “Ilanga nenyanga zenziwe mnyama, iinkwenkwezi zikufinyezile ukukhanya kwazo. UYehova ubharhula eZiyon, ukhupha ilizwi lakhe eYerusalem, linyikime izulu nehlabathi; ke uYehova ulihlathi kubantu bakhe, uligwiba koonyana bakaSirayeli.” (Yoweli 3:15, 16) Imeko yoluntu ebonakala iqaqambile yaye iphumelela iya kuguquka ibe mnyama, ibe mfiliba, yaye le nkqubo yehlabathi ewohlokayo iya kunyikimiswa iphele kuthi tu, iphanziswe ngokunga kungenyikima enkulu!—Hagayi 2:20-22.

⁸ Phawula isiqinisekiso esivuyisayo sokuba uYehova uya kuba lihlathi negwiba labantu bakhe! Kutheni? Kungenxa yokuba bakuphela kwabantu—abantu bezizwe ngezizwe—abaye basabela kula mazwi kaYehova: “Niya kwazi ke ukuba mna Yehova ndinguThixo wenu.” (Yoweli 3:17) Ekubeni igama likaYoweli lithetha ukuba “UYehova NguThixo,” ngokufanelekileyo ke ufanekisela amaNgqina kaYehova athanjisiweyo kumaxesha anamhlanje, akhonza ngenkalipho evakalisa ulongamo lukaYehova. (Thelekisa uMalaki 1:11.) Xa sibuyela kumazwi entshayelelo esiprofeto sikaYoweli, siya kubona indlela awuxela kwangaphambili ngayo ngokucacileyo umsebenzi wabantu bakaThixo namhlanje.

Umkhosi Weenkumbi

9, 10. (a) Sisiphi isibetho esixelwa kwangaphambili nguYoweli? (b) ISityhilelo sisichaza njani isiprofeto esifana nesikaYoweli sesibetho, yaye esi sibetho sinawuphi umphumo kwiNgqobhoko?

⁹ Ngoku khawuphulaphule “ilizwi likaYehova elafika kuYoweli”: “Yivani oku, nina madoda makhulu, nibeke iindlebe, nonke bemi belizwe; kwakha kwakho na oku ngemihla yenu, nangemihla yooyihlo? Kuxeleni koonyana benu, oonyana benu bakuxele koonyana babo, oonyana babo bakuxele kwisizukulwana esisemva kwabo. Okushiywe ngumqikela kudliwe yinkumbi, okushiywe yinkumbi kudliwe ngumkhothululi, okushiywe ngumkhothululi kudliwe ngumnqunquthi.”—Yoweli 1:1-4.

¹⁰ Eli liphulo elingaqhelekanga, eliya kuhlala likhunjulwa ngonaphakade. Inyambalala yezinambuzane, ezona zibalaseleyo iziinkumbi, iphanzisa ilizwe. Iyintoni intsingiselo yoku? NeSityhilelo 9:1-12 sithetha ngesibetho seenkumbi, esathunyelwa nguYehova esebenzisa ‘ukumkani, isithunywa senzonzobila,’ onguKristu Yesu. Igama lakhe elithi Abhadon (ngesiHebhere) nelithi Apoliyon (ngesiGrike) lithetha “Ntshabalalo” nokuthi “Mtshabalalisi.” Ezi nkumbi zifanekisela intsalela ethanjisiweyo yamaKristu ethi, ngoku ngemini yeNkosi, iphume isiya kubhuqa amadlelo eNgqobhoko ngokulubhenca ngokupheleleyo unqulo lobuxoki nangokuvakalisa impindezelo kaYehova kuyo.

11. Iinkumbi zanamhla zithelelwa ngoobani, ibe ngoobani ngokuyintloko ezijoliswe kubo iintlaselo zazo?

¹¹ Njengoko kuboniswe kwiSityhilelo 9:13-21, isibetho seenkumbi silandelwa sisibetho esikhulu semikhosi yamahashe. Hayi indlela okuyinyaniso ngayo oku namhlanje, njengoko amawaka ambalwa amaKristu athanjisiweyo asaseleyo ethelelwa zizigidi ezingaphezu kwezine ‘zezinye izimvu’ baze bebonke babumbe umkhosi wamahashe ongenakuxhathiswa! (Yohane 10:16) Bayamanyana ekuvakaliseni imigwebo kaYehova ehlaba okolwamvila kubanquli-zithixo beNgqobhoko nakwabo ‘bangaguqukiyo ekubulaleni kwabo, nasekukhafuleni kwabo, nasembulweni wabo nasebuseleni babo.’ Abefundisi—abamaKatolika nabamaProtestanti—abaye banegalelo ekuxhaseni iimfazwe ezibangele ukubulawa kwabantu zale nkulungwane, kwanabefundisi abaxhaphaza abantwana ngesini nabo bashumayela kumabonwakude abathanda izenzo ezigqwethekileyo zesini, baphakathi kwabo zijoliswe kubo ezi zigidimi zomgwebo.

12. Kutheni iinkokeli zeNgqobhoko zifanele zifumane izigidimi zomgwebo, yaye yintoni eza kuzehlela kwakamsinya, kuquka onke amalungu eBhabhiloni Enkulu?

¹² Kula “manene” anganyanisekanga angabefundisi, uYehova uthi: “Vukani, manxila, nilile; bhombolozani, nonke baseli bewayini, ngenxa yencindi yewayini; kuba inqunyulwe emlonyeni wenu.” (Yoweli 1:5) Kule nkulungwane yama-20, unqulo lweNgqobhoko luye lwakhetha uvula-zibhuqe wehlabathi kunemigaqo ecocekileyo yokuziphatha ekwiLizwi likaThixo. Kubonakele kuyinto entle kunqulo lobuxoki nakumarhamente alo ukwamkela iindlela zehlabathi, kodwa esinjani sona isivuno sokugula ngokomoya nasemzimbeni oluye lwasivuna! Kungekudala, njengoko kuchazwe kwiSityhilelo 17:16, 17, iya kuba ‘yingcinga’ kaThixo ukuba amagunya ezobupolitika abujikele bonke obo bukhosi behlabathi bonqulo lobuxoki, iBhabhiloni Enkulu, aze abuphanzise. Kuphela kungoko, njengoko bubona umgwebo kaYehova uphunyezwa kubo, obuya kuthi ‘buvuke’ kubunxila babo.

“Abantu Abaninzi, Abanamandla”

13. Iinkumbi zibonakala ‘zininzi yaye zinamandla’ ngayiphi indlela kwiNgqobhoko?

¹³ Umprofeti kaYehova uhlabela mgama echaza eli gquba leenkumbi ‘njengabantu abaninzi nabanamandla,’ yaye libonakala linjalo kwiBhabhiloni Enkulu. (Yoweli 2:2) Ngokomzekelo, abefundisi bayo bakhathazekile ngenxa yesibakala sokuba iinkonzo zeNgqobhoko zingakwazanga ukufumana amaguquka kwiJapan yobuBhuda. Sekunjalo, namhlanje, amaNgqina kaYehova aseJapan angaphezu kwe-160 000 ayanyakazela kwelo lizwe yaye aqhuba izifundo zeBhayibhile zobuqu nabantu kumakhaya abo angaphezu kwama-200 000. Ngoku eItali amaNgqina kaYehova ali-180 000 agqalwa njengawodlulwa ngamaKatolika kuphela ngenani. Ukukhalaza kobhishophu ongumRoma Katolika eItali ngesibakala sokuba amaNgqina kaYehova athabatha ecaweni ‘ubuncinane amaKatolika athembekileyo ali-10 000’ nyaka ngamnye akuzange kumncede nganto.a AmaNgqina ayakuvuyela ukwamkela abantu abanjalo.—Isaya 60:8, 22.

14, 15. UYoweli ulichaza njani igquba leenkumbi, kwaye oku kuzaliseke ngayiphi indlela namhlanje?

¹⁴ Echaza igquba leenkumbi ezingamaNgqina athanjisiweyo, uYoweli 2:7-9 uthi: “Bagidima njengamagorha; banyuka njengamadoda okulwa; bahamba elowo ngendlela yakhe, abaphambaphambi emendweni wabo. Abagilani, bahamba elowo ngomendo wakhe; bawa nasezikhalini, bangenzakali. Baphithizela emzini; babaleka eludongeni; banyuka ezindlwini; bangena ngeefestile njengesela.”

¹⁵ Ngokwenene, le yindlela ecacileyo yokuchaza lo mkhosi ‘weenkumbi’ ezithanjisiweyo, ngoku othelelwa ngamaqabane angaphezu kwezigidi ezine, ezinye izimvu! Akukho ‘ludonga’ lobutshaba bonqulo olunokubathintela. Ngenkalipho, ‘bahamba ngolungelelwano nangomgca omnye’ wokunikela ubungqina esidlangalaleni neminye imisebenzi yamaKristu. (Thelekisa eyabaseFilipi 3:16, NW.) Kunokulalanisa, ebekulungele ukujamelana nokufa, njengoko enzayo amawaka amaNgqina ‘awawela ezikhalini’ ngenxa yokuba ayengavumi ukuthi “Heil” kuHitler owayengumKatolika weJamani yamaNazi. Igquba leenkumbi liye lanikela ubungqina obucokisekileyo “emzini” weNgqobhoko, litsiba yonke imiqobo, ngokungathi kunjalo, lityhutyha-tyhutyha njengesela emakhayeni njengoko liye lasasaza amawaka ezigidi eempapasho zeBhayibhile ngomsebenzi walo wendlu ngendlu. Kukuthanda kukaYehova ukuba kunikelwe obu bungqina, ibe akukho mandla anokubuthintela enoba kusezulwini okanye emhlabeni.—Isaya 55:11.

‘Bazaliswe Ngumoya Oyingcwele’

16, 17. (a) Amazwi kaYoweli 2:28, 29 azaliseka nini ngendlela ebalaseleyo? (b) Ngawaphi amazwi esiprofeto sikaYoweli angazange azaliseke ngokupheleleyo ngenkulungwane yokuqala?

¹⁶ UYehova uxelela amaNgqina akhe: “Nazi ukuba ndiphakathi kwamaSirayeli [okomoya]; ukuba mna Yehova ndinguThixo wenu, akukho wumbi.” (Yoweli 2:27) Abantu bakhe basiqonda esi sibakala sixabisekileyo xa uYehova waqalisa ukuzalisekisa amazwi akhe akuYoweli 2:28, 29: “[Ndiya kumthulula] uMoya wam phezu kwenyama yonke, baprofete oonyana benu neentombi zenu.” Oku kwenzeka ngePentekoste yowama-33 C.E., xa abafundi bakaYesu ababehlanganisene bathanjiswayo baza “bazaliswa bonke nguMoya oyiNgcwele.” Ngamandla omoya oyingcwele, bashumayela, yaye ngolo suku lunye, ‘kongezelelwa imiphefumlo engathi imawaka mathathu.’—IZenzo 2:4, 16, 17, 41.

¹⁷ Ngeso sihlandlo sivuyisayo, noPetros wacaphula kuYoweli 2:30-32: “Ndiya kwenza izimanga ezulwini nasehlabathini, igazi nomlilo nemiqulu yomsi. Ilanga liya kusuka libe mnyama, nenyanga ibe ligazi, phambi kokuba ifike imini kaYehova, leyo inkulu yoyikekayo. Bothi bonke abasukuba benqula igama likaYehova, basinde.” Loo mazwi azaliseka ngokuyinxenye ekutshatyalalisweni kweYerusalem ngowama-70 C.E.

18. UYoweli 2:28, 29 waqala nini ukuzaliseka ngomlinganiselo omkhulu ngakumbi?

¹⁸ Noko ke, kwakuza kubakho inzaliseko engakumbi kaYoweli 2:28-32. Eneneni, esi siprofeto siye sazaliseka ngokuphawulekayo ukususela ngoSeptemba 1919. Ngelo xesha kwaqhutywa indibano engalibalekiyo yabantu bakaYehova eCedar Point, eOhio, eUnited States. Umoya kaThixo wabonakala ngokucacileyo, yaye abakhonzi bakhe abathanjisiweyo bakhuthazwa ukuba bazibhokoxe kwiphulo lokunikela ubungqina emhlabeni wonke nebeliqhubeka ukuza kuthi ga kulo mhla. Olunjani lona ukuba lukhulu ulwando oluye lwangumphumo woku! Abantu abangaphezu kwama-7 000 ababeze kuloo ndibano yayiseCedar Point baye banda baya kufikelela kwizi-10 650 158 zababeze kwiSikhumbuzo sokufa kukaYesu ngoMatshi 30, 1991. Kwaba, ngabangama-8 850 kuphela abathi bangamaKristu athanjisiweyo. Hayi indlela olulukhulu ngayo uvuyo lwaba xa bebona isiqhamo somhlaba wonke esiveliswa ngumoya kaYehova onamandla!—Isaya 40:29, 31.

19. Ngenxa yokusondela kwemini kaYehova, sisiphi isimo sengqondo ngamnye wethu afanele abe naso?

¹⁹ Ngaphambili apha sele ingxangile “imini kaYehova, leyo inkulu yoyikekayo” eza kuphanzisa inkqubo yezinto kaSathana. (Yoweli 2:31) Okuvuyisayo kukuba “baya kuthi bonke abasukuba belinqula igama [likaYehova, NW] basindiswe.” (IZenzo 2:21) Njani? Umpostile uPetros usixelela ukuba “iya kufika ke imini [kaYehova, NW] njengesela” aze ke ongezelele oku: “Ezo zinto zonke ngoku zichithakala nje, nimele ukuba ngabanjani na ngeehambo ezingcwele nokuhlonela uThixo; nikulindela, nikukhawulezela [“nihlala nikukhumbula,” NW] ukufika kwayo imini kaThixo.” Sikhumbula ukuba imini kaYehova isondele, siya kuvuyela nokubona ukuzaliseka kwedinga likaYehova ‘lamazulu amatsha nomtsha umhlaba’ onobulungisa.—2 Petros 3:10-13.

[Umbhalo osemazantsi]

Ngaba Unokucacisa?

◻ Iyintoni “imini kaYehova”?

◻ Uya kuwuvunwa njani ‘umdiliya womhlaba,’ yaye ngoba?

◻ Isibetho seenkumbi siye sayihlasela njani iNgqobhoko ukususela ngowe-1919?

◻ Umoya kaYehova wathululwa njani kubantu bakhe ngowama-33 C.E., nangowe-1919?