Yisebenzise Ngobulumko Inkululeko Yakho YobuKristu

“Nithi ningabakhululekileyo nje, . . . nibe ngabakhonzi bakaThixo.”—1 PETROS 2:16.

1. Yiyiphi inkululeko uAdam awaphulukana nayo, kwaye yiyiphi inkululeko ezukileyo uYehova aya kulubuyisela kuyo uluntu?

XA ABAZALI bethu bokuqala bonayo kumyezo wase-Eden, babangela ukuba abantwana babo baphulukane nelifa elizukileyo—ukukhululeka esonweni nasekonakaleni. Ngenxa yoko, sonke sazalwa singamakhoboka okonakala nokufa. Noko ke, okuvuyisayo kukuba uYehova unenjongo yokubuyisela abantu abathembekileyo kwinkululeko ezukileyo. Namhlanje, amalungisa alindele ngolangazelelo “ukutyhileka koonyana bakaThixo,” ekuya kuthi ngenxa yako ‘akhululwe ebukhobokeni bokonakala aze asingiswe enkululekweni yozuko lwabantwana bakaThixo.’—Roma 8:19-21.

‘Ukuthanjiselwa Ukushumayela’

2, 3. (a) Ngoobani “oonyana bakaThixo”? (b) Kukuphi ukuma okuzukileyo abakunandiphayo, yaye kubazisela yiphi imbopheleleko?

² Ngoobani aba ‘nyana bakaThixo’? Ngabazalwana bakaYesu abathanjiswe ngomoya abaya kulawula naye kuBukumkani basezulwini. Abokuqala kubo babonakala kwinkulungwane yokuqala yeXesha Eliqhelekileyo. Bamkela inyaniso ekhululayo eyayifundiswa nguYesu, yaye ukususela ngePentekoste yowama-33 C.E., banandipha amalungelo azukileyo uPetros awathetha ngawo xa wababhalela oku: “‘Niluhlanga olunyuliweyo, uluhlu lwababingeleli basebukhosini, uhlanga olungcwele, abantu abakhethekileyo.’”—1 Petros 2:9a, NW; Yohane 8:32.

³ Ukuba ngabantu bakaThixo abakhethekileyo—enjani yona ukuzuka intsikelelo! Kwaye intsalela yanamhlanje yaba nyana bakaThixo abathanjisiweyo inandipha ukuma okufanayo nokusikelelekileyo phambi koThixo. Kodwa ilungelo eliphakamileyo ngolo hlobo lihambisana neembopheleleko. UPetros watsalel’ ingqalelo kwenye yezi xa wahlabela mgama esithi: “[Nifanele] nivakalise isidima salowo wanibizayo ukuba niphume ebumnyameni, ningene ekukhanyeni kwakhe okungummangaliso.”—1 Petros 2:9b.

4. AmaKristu athanjisiweyo ayifeze njani imbopheleleko ehambisana nenkululeko yawo yobuKristu?

⁴ Ngaba amaKristu athanjisiweyo aye ayizalisekisa le mbopheleleko yokuvakalisa isidima sikaThixo? Ewe. Ngokuprofetayo ethetha ngabathanjisiweyo ukususela ngowe-1919, uIsaya wathi: “UMoya weNkosi uYehova uphezu kwam; ngenxa yokuba uYehova endithambisele ukuba ndishumayeze abalulamileyo iindaba ezilungileyo. Undithume ukubopha abantliziyo zaphukileyo, ukumemeza inkululeko kwabathinjiweyo, ukuvulwa kwamehlo kwabakhonkxiweyo; ukumemeza umnyaka wetarhu likaYehova, nomhla wempindezelo yoThixo wethu.” (Isaya 61:1, 2) Namhlanje, ngenzondelelo intsalela ethanjisiweyo, ilandela umzekelo kaYesu, lowo ngokuyintloko esi sibhalo sasisebenza kuye, ivakalisa kwabanye iindaba ezilungileyo zenkululeko.—Mateyu 4:23-25; Luka 4:14-21.

5, 6. (a) Ube yintoni umphumo wokushumayela ngehlombe kwamaKristu athanjisiweyo? (b) Ngawaphi amalungelo neembopheleleko ezinanditshwa ngabo besihlwele esikhulu?

⁵ Ngenxa yokushumayela kwayo ngehlombe, kule mihla yamva ehlabathini kuye kwavela isihlwele esikhulu sezinye izimvu. Siye saphuma kuzo zonke iintlanga sisiza kuthelela abathanjisiweyo ekukhonzeni uYehova, yaye naso siye sakhululwa yinyaniso. (Zekariya 8:23; Yohane 10:16) NjengoAbraham sivakaliswa singamalungisa ngenxa yokholo lwaso yaye siye saba nolwalamano olusenyongweni noYehova uThixo. Yaye njengoRahabhi ukuvakaliswa kwaso singamalungisa kusenza sibe nethemba lokusinda—kwimeko yaso, ukusinda kwiArmagedon. (Yakobi 2:23-25; ISityhilelo 16:14, 16) Kodwa namalungelo azuke ngolo hlobo ahambisana nembopheleleko yokuxelela abanye ngozuko lukaThixo. Kungoko uYohane wababona bedumisa uYehova ekuhleni, “bedanduluka ngezwi elikhulu, besithi: Usindiso kuye uThixo wethu, lowo uhleli phezu kwetrone, nakuyo iMvana!”—ISityhilelo 7:9, 10, 14.

⁶ Nyakenye isihlwele esikhulu, ngoku esingaphezu kwezigidi ezine ngenani, sibambisene nebathwana lentsalela yamaKristu athanjisiweyo, sichithe phantse iiyure eziliwaka lezigidi ekuvakaliseni isidima sikaYehova. Le yeyona ndlela intle yokusebenzisa kangangoko sinako inkululeko yaso yokomoya.

“Ukumkani Mbekeni”

7, 8. Inkululeko yobuKristu ihambisana nayiphi imbopheleleko ngakumagunya ehlabathi, yaye kule nkalo, sisiphi isimo sengqondo esiphosakeleyo esimele sisiphephe?

⁷ Inkululeko yethu yobuKristu ihambisana nezinye iimbopheleleko. UPetros wazikhankanya ezinye zazo xa wabhala oku: “Bekani abantu bonke. Thandani isizalwana [“lonke umanyano lwabazalwana,” NW]. UThixo moyikeni. Ukumkani mbekeni.” (1 Petros 2:17) Amazwi athi “ukumkani mbekeni” anikela yiphi ingcamango?

⁸ “Ukumkani” umela abalawuli behlabathi. Namhlanje, umoya wokungahlonelwa kwegunya uye wanda ehlabathini, yaye oku kunokuwasulela ngokulula amaKristu. UmKristu usenokude azibuze isizathu sokuba efanele ambeke “ukumkani,” ekubeni “ihlabathi liphela lilele kongendawo.” (1 Yohane 5:19) Ngenxa yala mazwi, usenokuziva ekhululekile ukungayithobeli imithetho angayithandiyo aze angazihlawuli iirhafu ukuba akanakubhaqwa. Kodwa oku ibiya kuba kukwaphula umyalelo owavakaliswa nguYesu ‘wokunikela izinto zikaKesare kuKesare.’ Ngokungathi kunjalo, ibiya kuba ‘kukuyisebenzisa inkululeko yakhe njengesigqubuthelo sobubi.’—Mateyu 22:21; 1 Petros 2:16.

9. Ziziphi izizathu ezibini ezifanelekileyo zokuthobela amagunya ehlabathi?

⁹ AmaKristu anyanzelekile ukuba alihlonele igunya yaye azithobe kulo—kwanokuba oku akwenza ngendlela elinganiselweyo. (IZenzo 5:29) Ngoba? Kweyoku-1 kaPetros 2:14, 15, uPetros ukhankanya izizathu ezithathu xa esithi abalawuli ‘bathunywe [nguThixo], ukuze baphindezele okunene kubenzi bokubi, badumise abenzi bokulungileyo.’ Ukoyika ukohlwaywa sisizathu esaneleyo sokuthobela igunya. Elinjani lona ihlazo ebekuya kuba lilo ngomnye wamaNgqina kaYehova ukuba ohlwaywe okanye aphoswe entolongweni ngenxa yokubetha umntu, ubusela okanye ngenye indlela yolwaphulo-mthetho! Khawufan’ ucinge nje indlela abanye abangakuvuyela ngayo ukubhengeza into enjalo! Kwelinye icala, njengoko sizenzel’ igama ngokuthobela abaphetheyo, siyadunyiswa ngabalawuli abaneengqondo ezintle. Sisenokunikwa inkululeko engakumbi yokuqhubeka nomsebenzi wethu wokushumayela iindaba ezilungileyo. Ukongezelela, ‘ngokwenza okulungileyo, sibetha ithi cwaka intswela-kwazi yabantu abaziintsweli-kuqonda.’ (1 Petros 2:15b) Esi sisizathu sesibini sokuba silithobele igunya.—Roma 13:3.

10. Sisiphi esona sizathu sifanelekileyo sokuthobela amagunya ehlabathi?

¹⁰ Kodwa kukho isizathu esibaluleke ngakumbi. Amagunya avunyelwe nguYehova ukuba abekho. Njengoko uPetros esitsho, abalawuli bezobupolitika ‘bathunywe’ nguYehova, yaye ‘kukuthanda kukaThixo’ ukuba amaKristu ahlale ebathobele. (1 Petros 2:15a) Ngokufanayo, umpostile uPawulos uthi: “Amagunya ke akhoyo amiswe nguThixo.” Ngenxa yoko, isazela sethu esiqeqeshwe ngeBhayibhile sisishukumisela ukuba siwathobele amagunya. Ukuba asiwathobeli, ‘simelene nelungiselelo likaThixo.’ (Roma 13:1, 2, 5, NW) Ngubani phakathi kwethu ongathanda ukumelana nelungiselelo likaThixo? Okunjani kona ukusebenzisa kakubi inkululeko yobuKristu obekungaba kuko oko!

‘Thandani Abazalwana’

11, 12. (a) Yiyiphi imbopheleleko esinayo ngakwabo bakholwa nathi ngenxa yenkululeko yethu yobuKristu? (b) Ngoobani ngokukodwa esimele sibacingele ngothando, yaye ngoba?

¹¹ Kwakhona uPetros wathi umKristu ufanele ‘athande lonke umanyano lwabazalwana.’ (1 Petros 2:17, NW) Le yenye imbopheleleko ehambisana nenkululeko yobuKristu. Inkoliso yethu ingamalungu ebandla. Eneneni sonke siyinxalenye yomanyano, okanye intlangano yezizwe ngezizwe yabazalwana. Ukubonakalisa ukubathanda aba bazalwana kulikhondo lobulumko.—Yohane 15:12, 13.

¹² Umpostile uPawulos wakhankanya ngokukhethekileyo elona qela lamaKristu esifanele silithande ngokukodwa. Wathi: “Bathambeleni abakhokeli benu, nibathobele; kuba bona abalali, ngenxa yemiphefumlo yenu, ngokwabaya kuphendula, ukuze bakwenze oko bevuyile, bengancwini; kuba anisizakali kuko oko.” (Hebhere 13:17) Ngabadala abakhokelayo ebandleni. Liyinyaniso elokuba la madoda awafezekanga. Sekunjalo, amiselwa ngaphantsi kweliso elibukhali leQumrhu Elilawulayo. Ayakhokela ngomzekelo nangolwazelelelo, yaye abelwe ukulondoloza imiphefumlo yethu. Onjani wona ukuba nzima umsebenzi anawo! (Hebhere 13:7) Okuvuyisayo kukuba inkoliso yamabandla inomoya omhle wentsebenziswano, yaye kuyabavuyisa abadala ukusebenzisana nawo. Kunzima ngakumbi xa abantu abathile bengafuni ukusebenzisana nabo. Umdala uyaqhubeka ewenza umsebenzi wakhe, kodwa njengoko uPawulos esitsho, uwenza ‘encwina.’ Ngokuqinisekileyo, asifuni ukuba abadala bancwine! Sifuna bavuye ngenxa yomsebenzi wabo khon’ ukuze babe nokusakha.

13. Ziziphi ezinye zeendlela esinokusebenzisana ngazo nabadala?

¹³ Ziziphi ezinye zeendlela esinokusebenzisana ngazo nabadala? Enye yazo kukuncedisa ekunyamekeleni nasekucoceni iHolo yoBukumkani. Enye kungokubambisana nabo kumsebenzi wokutyelela abagulayo nokunceda abaneziphene. Ukongezelela koko, sinokuzabalazela ukuhlala somelele ngokomoya, ukuze singabi luxanduva. Inkalo ebalulekileyo yokusebenzisana nabo kukulondoloza ukucoceka kwebandla kokuziphatha nokomoya, ngehambo yethu nangokuxela izono ezinzulu esiye sanolwazi ngazo.

14. Sifanele sisebenzisane njani nesohlwayo esiwiswe ngabadala?

¹⁴ Maxa wambi, ukuze bagcine ibandla licocekile, abadala bafanele basuse kubudlelane umenzi wobubi ongaguqukiyo. (1 Korinte 5:1-5) Oku kuyalikhusela ibandla. Kwakhona kusenokumnceda nomenzi wobubi. Ngokufuthi, uqeqesho olunjalo luye lwamnceda umoni wabuyela ezingqondweni. Noko ke, kuthekani ukuba umntu osuswe kubudlelane ngumhlobo okanye sisalamane esisondeleyo? Masithi loo mntu ngutata, umama, unyana okanye intombi yethu. Ngaba sekunjalo siyalihlonela inyathelo elithatyathwe ngabadala? Yinyaniso ukuba oku kusenokuba nzima. Kodwa hayi indlela ebesiya kuba siyisebenzisa kakubi ngayo inkululeko yethu ngokuthandabuza isigqibo sabadala size siqhubeke sinxulumana ngokomoya nomntu oye wazibonakalisa enempembelelo eyonakalisayo ebandleni! (2 Yohane 10, 11) Simele sibancome xa bebonke abantu bakaYehova ngenxa yendlela abasebenzisana ngayo nabadala kwimibandela enjalo. Ngenxa yoko, intlangano kaYehova ayidyojwa leli hlabathi lingcolileyo.—Yakobi 1:27.

15. Ukuba umntu wenza isono esinzulu, yintoni afanele ayenze ngokukhawuleza?

¹⁵ Kuthekani ukuba thina senza isono esinzulu? UKumkani uDavide wachaza abo uYehova akholiswayo ngabo xa wathi: “Ngubani na onokunyuka aye entabeni kaYehova? Ngubani na onokuma endaweni yakhe engcwele? Ngozandla zimsulwa, ontliziyo inyulu, ongawuphakamiseli kwinkohlakalo umphefumlo wakhe, ongafungiyo ngenkohliso.” (INdumiso 24:3, 4) Ukuba ngenxa yesizathu esithile ‘izandla zethu azisekho msulwa yaye neentliziyo zethu azisekho nyulu,’ masenze oko kufunekayo ngokukhawuleza. Ubomi bethu obungunaphakade busengozini.

16, 17. Kutheni umntu onetyala lezono ezinzulu engafanele azame ukuwucombulula ngokwakhe lo mbandela?

¹⁶ Bambi baye bahendelwa ukuba bazigushe izono ezinzulu, mhlawumbi beqiqa ngelithi: ‘Ndisivumile isono kuYehova ibe ndiguqukile. Ngoko ndisabakhathazela ntoni ke abadala?’ Umenzi wobubi usenokuba neentloni okanye oyike oko kusenokwenziwa ngabadala. Noko ke, ufanele akhumbule ukuba nangona inguYehova kuphela onokusihlambulula esonweni, umisele abadala ukuba ngokuyintloko banyamekele ubumsulwa bebandla. (INdumiso 51:2) Bamiselwe ukuba baphilise, ‘basulungekise abangcwele.’ (Efese 4:12) Ukungayi kubo xa sifuna uncedo lokomoya kufana nokungayi kugqirha xa sigula.

¹⁷ Bambi abazama ukuzisingathela imicimbi bebodwa bafumanisa ukuba emva kweenyanga okanye kweminyaka, isazela sabo sisabakhathaza kakhulu. Okubi nangakumbi kukuba abanye abasigushayo isono esinzulu bayasiphinda eso sono isihlandlo sesibini okanye sesithathu. Xa ekugqibeleni umbandela usiza engqalelweni yabadala, seyingumbandela wobubi obenziwe ngokuphindaphindiweyo. Hayi indlela ekulunge ngakumbi ngayo ukulandela isiluleko sikaYakobi! Wabhala: “Kukho mntu na ufayo phakathi kwenu? Makabizele kuye amadoda amakhulu alo ibandla, athandaze wona phezu kwakhe, akuba emthambisile ngeoli, egameni leNkosi.” (Yakobi 5:14) Yiya kubadala ngoxa kusekho ixesha lokuphiliswa. Ukuba silinde ixesha elide gqitha, sisenokuqaqadekiswa kukwenza isono.—INtshumayeli 3:3; Isaya 32:1, 2.

Imbonakalo Yobuqu Nokuzihlaziya

18, 19. Kwakutheni ukuze umfundisi athethe kakuhle ngamaNgqina kaYehova?

¹⁸ Kwiminyaka emihlanu edluleyo, umfundisi ongumKatolika eItali wathetha kakuhle ngamaNgqina kaYehova kwiphephancwadi lecawa.a Wathi: “Mna ngokobuqu, ndiyawathanda amaNgqina kaYehova; oko ndikuvuma ekuhleni. . . . Ndiwazi eziphethe ngokungenakusoleka, ethetha kakuhle . . . [yaye] ngawona anempembelelo gqitha. Siya kuyiqonda nini into yokuba inyaniso ifuna ukushunyayelwa ngendlela eyamkelekileyo? Ukuba abo bavakalisa inyaniso akufuneki babe mbaxa, babe ngabangcolileyo, abangalungelelananga nabanxiba ngokungenasidima?”

¹⁹ Ngokwala mazwi, lo mfundisi wachukunyiswa, phakathi kwezinye izinto, yindlela amaNgqina anxiba nathetha ngayo. Kubonakala ukuba lawo wayedibene nawo ayesithobele isiluleko esinikelwe ‘ngumkhonzi othembekileyo noqondayo’ ukutyhubela iminyaka. (Mateyu 24:45) IBhayibhile ithi isinxibo sabafazi sifanele sibe ‘sesifanelekileyo, sindiliseke.’ (1 Timoti 2:9, NW) Kweli xesha lokuwohloka kwemilinganiselo yokuziphatha, eso siluleko siyimfuneko nasemadodeni. Ngaba alikho ngqiqweni elokuba abameli boBukumkani bukaThixo bafanele bakhangeleke kakuhle kwabo bangaphandle?

20. Kutheni umKristu efanele ayiphaphele indlela anxiba ngayo ngamaxesha onke?

²⁰ Bambi basenokuvuma ukuba kwiintlanganiso nakwinkonzo yasentsimini, bafanele bayiphaphele indlela abanxiba ngayo, kodwa basenokuba noluvo lokuba le migaqo yeBhayibhile ayibhekiseli kwamanye amaxesha. Noko ke, ngaba kukho amaxesha esikhe siyeke ngawo ukuba ngabameli boBukumkani bukaThixo? Liyinyaniso elokuba iimeko ziyahlukahlukana. Ukuba sincedisa ekwakheni iHolo yoBukumkani, siya kunxiba ngokwahlukileyo kunaxa sisiya kwintlanganiso ekuloo Holo yoBukumkani ikwanye. Xa siphumlile, nalapho sisenokunxiba ngendlela evisisana nokuphumla kwethu. Kodwa isinxibo sethu sifanele sibe sesifanelekileyo nesindilisekileyo ngamaxesha onke sibonwa ngabanye.

21, 22. Siye sakhuselwa njani kwindlela eyingozi yokuzihlaziya, yaye sifanele sisijonge ngayiphi indlela isiluleko kwimibandela enjalo?

²¹ Enye inkalo eye yanikelw’ ingqalelo kakhulu kukuzihlaziya. Abantu—ngokukodwa abantu abaselula—bayakufuna ukuzihlaziya. Akusosono okanye inkcitha-xesha ukubekela bucala ixesha lokuzihlaziya njengentsapho. KwanoYesu wababiza abafundi bakhe esithi ‘mabaphumle kancinane.’ (Marko 6:31) Kodwa sifanele silumkele ukuzihlaziya kungavul’ ithuba lokungcoliswa ngokomoya. Siphila kwihlabathi elibalaselisa ukuziphatha okubi ngokwesini, ugonyamelo oluhambis’ umzimba, izinto ezingamasikizi nokusebenzelana nemimoya njengendlela yokuzihlaziya. (2 Timoti 3:3; ISityhilelo 22:15) Umkhonzi othembekileyo noqondayo uziphaphele iingozi ezinjalo yaye usoloko usilumkisa ngazo. Ngaba uvakalelwa kukuba la mazwi akhumbuzayo ayaphazamisana nenkululeko yakho? Okanye ngaba unombulelo kuba intlangano kaYehova ikunyamekela ngolu hlobo ngokokude ngamaxesha onke ikukhumbuze ngeengozi ezinjalo?—INdumiso 19:7; 119:95.

²² Ungaze ulibale ukuba nangona inkululeko esinayo siyinikwe nguYehova, sithi abaza kuphendula ngendlela esiyisebenzisa ngayo. Ukuba sisibetha ngoyaba isiluleko esifanelekileyo size senze izigqibo eziphosakeleyo, asinakubek’ abanye ityala. Umpostile uPawulos uthi: “Elowo kuthi uya kuziphendulela kuThixo.”—Roma 14:12; Hebhere 4:13.

Yilindele Ngolangazelelo Inkululeko Yabantwana BakaThixo

23. (a) Ziziphi iintsikelelo esizinandiphayo ngoku ngokuphathelele inkululeko? (b) Ziziphi iintsikelelo esizilindele ngolangazelelo?

²³ Eneneni singabantu abasikelelweyo. Sikhululwe kunqulo lobuxoki nakwiinkolo. Ngenxa yedini lentlawulelo likaYesu Kristu, sinokusondela kuYehova sinesazela esicocekileyo, sikhululwe ngokomoya kubukhoboka besono nokufa. Ibe kungekudala kuza kufika “ukutyhileka koonyana bakaThixo.” EArmagedon, abazalwana bakaYesu bekuzuko lwabo lwasezulwini baya kutyhileka ebantwini njengabaza kutshabalalisa iintshaba zikaYehova. (Roma 8:19; 2 Tesalonika 1:6-8; ISityhilelo 2:26, 27) Emva koko, aba nyana bakaThixo baya kutyhileka njengemijelo yeentsikelelo ezithululelwa uluntu zivela kwitrone kaThixo. (ISityhilelo 22:1-5) Ekugqibeleni, oku kutyhileka koonyana bakaThixo kuya kuphumela ekusikelelweni koluntu oluthembekileyo ngenkululeko yozuko lwabantwana bakaThixo. Ngaba ulangazelela ukubona elo xesha? Ngoko yisebenzise ngobulumko inkululeko yakho. Yiba ngumkhonzi kaThixo ngoku, yaye uya kunandipha loo nkululeko izukileyo ngonaphakade kanaphakade!

[Umbhalo osemazantsi]

Ibhokisi Yempinda

◻ Abathanjisiweyo nezinye izimvu baye bamzukisa njani uYehova?

◻ Kutheni amaKristu efanele ahlonele amagunya awongamileyo?

◻ Ziziphi iindlela umKristu anokusebenzisana ngazo nabadala?

◻ Ngokuphathelele isinxibo, kutheni amaNgqina kaYehova ebonakala ahlukile kubantu abaninzi ehlabathini?

◻ Yintoni esifanele siyiphephe ngokuzonwabisa?

[Umfanekiso okwiphepha 17]

Ngokukodwa abadala sifanele sibathande yaye sisebenzisane nabo

[Imifanekiso ekwiphepha 18]

Isinxibo somKristu sifanele sifaneleke, sindiliseke, yaye sifanele isihlandlo eso