Intlawulelo Yokukhulula Abaninzi

NGOMATSHI 31, 1970, kwaqweqwediswa inqwelo-moya kufutshane neNtaba iFuji eJapan. Amalungu alithoba eqela elaziwa njengeJapanese Red Army Faction (Umkhosi Ongquzulana Norhulumente WaseJapan) athimba abantu ababekhwele apho abangaphezu kwe-120 nabantu ababesebenza kule nqwelo-moya aza anyanzelisa ukuba ibathwale ngokukhuselekileyo ibase kuMntla Korea.

Xa le nqwelo-moya yafikayo eSeoul, kwiRiphabliki yaseKorea, usekela-mphathiswa wezothutho waseJapan uShinjiro Yamamura wazinikela ukuba abeke ubomi bakhe engozini ukuze kukhululwe abo bathinjwa. Ekubeni bevumile ukumamkela njengesiqinisekiso sokukhuseleka kwabo, abaqweqwedisi babakhulula bonke abo bathinjwa ngaphandle kwamagosa asebenza kwinqwelo-moya. Baza ke banduluka ngale nqwelo-moya baya ePyongyang, apho bafika bazinikezela kwabasemagunyeni baseMntla Korea. Kamva uMnu. Yamamura nomqhubi wenqwelo-moya babuyela eJapan bengenzakaliswanga.

Kule meko, umntu omnye waba yintlawulelo yokumela ubomi babathinjwa abangaphezu kwe-120. Oku kusenokusinceda sibone indlela umntu omnye anokubunikela ngayo ubomi bakhe njengentlawulelo yokukhulula abaninzi. Kodwa ukuze siqonde imfundiso yeBhayibhile yentlawulelo, simele siwuhlolisise ngokucokiseke ngakumbi lo mbandela.

Phakathi kwezinye izinto, sifanele silande imvelaphi yesono. IBhayibhile ithi: “Isono sangena ngamntu mnye ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke, ekubeni bonke bonayo.” (Roma 5:12) Kwenzeka njani oko? NguAdam umntu ekuthethwa ngaye apho, umntu wokuqala ukudalwa. Unokufunda ingxelo yembali engokudalwa kwakhe noko kwakhokelela ekuphambukeni kwakhe kumlinganiselo kaThixo. Oku kubhalwe kwizahluko ezithathu zokuqala zencwadi yeBhayibhile iGenesis.

Loo ngxelo ityhila ukuba kwakukho umphembeleli owayengabonakali xa uAdam wenza isono okokuqala. Ukuze anelise umnqweno wakhe wokufuna igunya, loo mphembeleli wayecebe ukulawula uAdam kunye nayo nayiphi na inzala awayenokuba nayo. Loo mphembeleli yayinguSathana uMtyholi. Ukwabizwa ngokuba “yinyoka yakudala” kuba wasebenzisa inyoka ukubangela ukuba uAdam one. (ISityhilelo 12:9) Nangona uMdali woluntu onothando wayemxelele uAdam ukuba ahlonele ilungelo Lakhe lokugqiba ngoko kulungileyo noko kubi, inyoka yalukuhla umfazi ka-Adam, uEva, ukuba angamthobeli uThixo. Waza yena wakhohlisa umyeni wakhe ukuba angathobeli. Ngelo khondo, uAdam waphuma phantsi kolawulo lukaThixo, waba nesono ngokuzithandela, yaye wayenokudlulisela olo hlobo lobomi kwinzala yakhe.

Sisayiva imiphumo yoko. Njani? Kaloku, uMdali wayevakalise ngokusesikweni ukuba ukuba uAdam noEva babenokukhetha ukungathobeli ngabom, umphumo wawuya kuba kukufa. Ngoko ke, ngokona, uAdam wathengisa lonke uluntu ebukhobokeni besono nokufa.—Genesis 2:17; 3:1-7.

Abantu babenokukhululwa njani kweso sono? UYesu Kristu weza emhlabeni ukuze ‘ancame ubomi bakhe, bube yintlawulelo yokukhulula abaninzi,’ yaye oku kwavulel’ indlela yokukhulula uluntu.—Mateyu 20:28.

Ukugubungela Nokukhulula

IBhayibhile ibonisa ukuba inkqubo yokukhulula uluntu yabandakanya amanyathelo amabini: (1) ukuthenga (2) nokukhulula. Ngokuphathelele igama lesiGrike (lyʹtron) eliguqulelwe ngokuthi “intlawulelo,” umphengululi weBhayibhile uAlbert Barnes wabhala: “Igama elithi intlawulelo ngokoqobo lithetha ixabiso elihlawuliweyo lokukhulula abantu abathinjiweyo. Emfazweni, xa amabanjwa ethinjwa lutshaba, imali ehlawulwayo yokuwakhulula kuthiwa yintlawulelo; oko kukuthi, yindlela akhululwa ngayo. Ngoko nantoni na ekhulula nabani na kwisohlwayo, okanye entlungwini, okanye esonweni, kuthiwa yintlawulelo.”

Ewe, “nantoni na ekhulula nabani na” kunokuthethwa ngayo njengelyʹtron. Ngoko eli gama lesiGrike libalaselisa isenzo okanye inkqubo yokukhulula.a

Umpostile uPawulos wasebenzisa igama elinxulumene nalawo elithi an·tiʹly·tron ukugxininisa ukubaluleka kwexabiso elihlawulwa njengentlawulelo. Kweyoku-1 kuTimoti 2:6, (NW) wabhala ukuba ‘uYesu wazinikela njengentlawulelo elinganayo ngenxa yabo bonke.’ Igqabaza ngoku iGreek and English Lexicon to the New Testament kaParkhurst ithi: “Ibonisa ngokufanelekileyo ixabiso ekukhululwa ngalo abantu abathinjiweyo elutshabeni; yaye olu luhlobo lokukhulula apho ubomi bukabani bukhululwa ngobomi bomnye.” Into ebethelelwayo apha kukulingana okanye ukubaluleka kwexabiso lentlawulelo elihlawulwayo ukuzalisekisa okusesikweni. Idini lentlawulelo likaYesu linokugqalwa njani ‘njengentlawulelo elinganayo’?

Intlawulelo Elinganayo

UAdam wathengisa lonke uluntu, kuquka nathi, esonweni nasekufeni. Ixabiso, okanye isohlwayo awasihlawulayo, yayibubomi bakhe bobuntu obufezekileyo, nethemba lokuphila ngonaphakade. Ukuze kugutyungelwe oku, obunye ubomi bomntu ofezekileyo—intlawulelo elinganayo—babumele buhlawulwe. Noko ke, akukho mntu ozalwe ngabantu abangafezekanga onokunikela ubomi bobuntu obufezekileyo obufunekayo. (Yobhi 14:4; INdumiso 51:5) Noko ke, ngobulumko bakhe, uThixo wavula indlela yokukhululeka kobu bunzima. Wafudusa ubomi obufezekileyo bokuphela koNyana wakhe amzeleyo emazulwini wabusa kwisibeleko sentombi enyulu, wenza ukuba azalwe njengomntu ofezekileyo. (Luka 1:30-38; Yohane 3:16-18) Le mfundiso yokuzalwa kukaYesu yintombi enyulu ayilobali eliyilelwe ukuphakamisa umseki wonqulo. Kunoko, icacisa inyathelo lobulumko likaThixo lelungiselelo lentlawulelo.

Ukuze abe nako ukuphumeza ukukhulula, uYesu wayemele alondoloze udumo oluhle ngalo lonke ixesha xa wayesesemhlabeni. Oku wakwenza. Waza wafa ukufa okulidini. Ngale ndlela, uYesu wahlawula ixabiso lobomi bakhe bobuntu obufezekileyo njengentlawulelo yokukhulula uluntu. (1 Petros 1:19) Ngoko sinokutsho ngokuchanileyo ukuthi “umntu omnye wabafela bonke.” (2 Korinte 5:14, NW) Ewe, “njengokuba kuye uAdam bafa bonke, ngokunjalo nakuye uKristu baya kudliswa ubomi bonke.”—1 Korinte 15:22.

Umntu Omnye Ukhulula Abaninzi

Kwimeko yokuqweqwediswa ekhankanywe ngaphambilana, abathinjwa babengenandlela yakuzikhulula, nokuba babe zizityebi. Kwakufuneka uncedo lomnye umntu, yaye umntu owayeza kubakhulula wayemele azalisekise imilinganiselo ethile. Oku kunjalo ngendlela enzulu ngakumbi ngokuphathelele intlawulelo efunekayo yokukhulula uluntu. Umdumisi wabhala: “Abo . . . baqhayisa ngobuninzi bobutyebi babo. Akukho bani unokukhulula umzalwana; akanakumnika uThixo isicamagusho ngaye (sinqabile isikhululo somphefumlo wabo, masincanywe ngonaphakade).” (INdumiso 49:6-8) Eneneni, uluntu lwalufuna uncedo oluvela kwenye indawo. Ubomi bomntu omnye babuza kwanela ukukhulula lonke uluntu logama nje buvisisana neemeko ezazifuneka ukulungelelanisa izikali zikaThixo zokusesikweni. NguYesu Kristu kuphela umntu ofezekileyo owahlangabezana noko kwakufuneka.

UYehova uThixo unikele inkululeko kuluntu ngokuhlawula intlawulelo ngoYesu Kristu. Kodwa uThixo wenze okungakumbi. Udlulisele isigwebo sokufa kuSathana uMtyholi, lowo wakhokelela uluntu esonweni. (ISityhilelo 12:7-9) Kungekudala uYehova uza kumkhonkxa lowo unetyala yaye ekugqibeleni uya kuphumeza umgwebo ‘ngokumphosa edikeni lomlilo nesulfure,’ elifuzisela intshabalalo engunaphakade. (ISityhilelo 20:1-3, 7-10, 14) Ngokutshatyalaliswa kwesi sidalwa singumoya esingendawo nangokusebenza kwentlawulelo, uluntu luya kunandipha inkululeko kungekhona ukukhululeka kubukhoboka besono nokufa kuphela kodwa kwanakwimpembelelo kaSathana. Lwakuba lukhululwe ngolo hlobo yaye amandla edini lentlawulelo likaKristu esetyenziswa ngokupheleleyo, uluntu oluthobelayo luya kwenza inkqubela lube ngabantu abafezekileyo.

Ilungiselelo Lentlawulelo Kunye Nawe

Besakufunda ngedini lentlawulelo likaYesu Kristu, abaninzi kumazwe aseMpuma baye bakuxabisa ngokunzulu oko uThixo abenzele kona. UKazuo ungumzekelo wabo. Ubomi bakhe babusekelwe ekusezeleni nasekuyotyweni ngumchiza wokunyibilikisa ipeyinti. Xa eqhuba ephantsi kwempembelelo yawo, wayezintlitha ngokuphindaphindiweyo iinqwelo-mafutha zakhe. Abathathu kubahlobo bakhe bazibulala emva kokuba babeyonakalisile impilo yabo. NoKazuo wazama ukuzibulala. Kamva, waqalisa ukufundisisa iBhayibhile. Echukunyiswe yinyaniso awayeyifunda, wagqiba ekubeni acoce ubomi bakhe. Walwa nomkhwa wakhe wokonakalisa umzimba wakhe ngomchiza wokunyibilikisa ipeyinti, yaye izihlandlo ezininzi wayebuyela kwikakade lakhe. Wayengayazi into awayemele ayenze ngenxa yenkanuko yakhe yenyama nokulangazelela ukwenza okulungileyo. Hayi indlela awaba novuyo ngayo ngokukwazi ukuthandazela ukuxolelwa nguThixo ngesizinzi sedini lentlawulelo likaYesu Kristu! Ngomthandazo nangoncedo olwaluvela kubahlobo abangamaKristu, uKazuo waloyisa uqheliselo lwakhe olubi yaye ngoku ukhonza uYehova njengomlungiseleli owonwabileyo enesazela esicocekileyo.

Ngaba uyamkhumbula uChisako, okhankanywe ekuqaleni kwenqaku elandulelayo? Ngofundisiso lweBhayibhile, naye waliqonda ilungiselelo lothando lentlawulelo. Wachukumiseka ngokunzulu xa wafunda ukuba uThixo wanikela ngoNyana wakhe ukuze akhulule uluntu esonweni. UChisako wabahlulela kuYehova ubomi bakhe. Kwanangoku, kubudala beminyaka engama-77, uchitha iiyure ezinokuba ngama-90 nyanga nganye exelela abanye ngothando olubalaseleyo lukaYehova nangobabalo alubonisayo.

Intlawulelo ifanele ibe yinto ebalulekileyo nakuwe. Ngentlawulelo, uThixo uya kuvula indlela esa kwinkululeko yokwenyaniso yoluntu—ukukhululeka esonweni nasekufeni. Ikamva elizukileyo lobomi obungunaphakade kumhlaba oyiparadisi lilindele abo bamkela idini lentlawulelo likaYesu Kristu. Nceda udibane namaNgqina kaYehova uze uhlolisise ngokwakho indlela onokukunandipha ngayo ukukhululeka esonweni nasekufeni ngelungiselelo lothando lentlawulelo.

[Umbhalo osemazantsi]

[Inkcazelo Ngomfanekiso okwiphepha 5]

Courtesy of the Mainichi Shimbun