Ngaba IBhayibhile Iyaziphikisa?
UMBHALI uHenry Van Dyke wakhe wabhala oku: “Ivela eMpuma yaye ibhalwe ngohlobo nangezigaba zentetho zaseMpuma, iBhayibhile ihamba iindlela zalo lonke ihlabathi ngeenyawo eziqhelekileyo yaye ingena kwimimandla ngemimandla ukuze ifumaneke kuyo yonke indawo. Iye yafunda ukuthetha amakhulukhulu eelwimi entliziyweni yomntu. Abantwana baphulaphula amabali ayo bemangalisiwe yaye bevuyile, yaye izilumko zicamngca ngawo njengemizekeliso yobomi. Abangendawo nabanekratshi bayagubha zizilumkiso zayo, kodwa kwiingxwelerha nakwabaguqukayo iyathuthuzela. . . . Umntu onobu butyebi akabi lihlwempu okanye ikheswa.”
Ngokwenene iBhayibhile iye “yafunda ukuthetha amakhulukhulu eelwimi.” Ubuncinane enye yeencwadi zayo ezingama-66 iye yaguqulelwa kwiilwimi ezinokuba li-1 970. Izigidi ziyigqala iBhayibhile njengesipho esivela kuThixo yaye ziyifunda ngovuyo nangengenelo. Noko ke, abanye bathi iyaziphikisa yaye ngoko ke ayinakuthenjwa. Lutyhila ntoni uphando olunyamekileyo?
Njengoko kuboniswe ngumfanekiso wethu okwiphepha elingaphandle, uThixo wasebenzisa amadoda athembekileyo ukuba abhale iBhayibhile. Eneneni, uhlolisiso lweBhayibhile olunyamekileyo lutyhila ukuba yabhalwa ngamadoda angama-40 kwithuba elingaphezu kweenkulungwane ezili-16. Ngaba yayiziingcaphephe zababhali ezazikufundele oko? Akunjalo. Phakathi kwabo unokufumana umalusi, umlobi weentlanzi, umbuthi werhafu, ugqirha, umenzi weentente, umbingeleli, umprofeti nokumkani. Ngokufuthi imibhalo yabo ikhankanya abantu namasiko esingawaqhelanga kule nkulungwane yama-20. Enyanisweni, ababhali beBhayibhile ngokwabo babengasoloko beyiqonda intsingiselo yoko babekubhala. (Daniyeli 12:8-10) Ngoko asifanele simangaliswe ukuba sifumana izinto ekunzima ukuziqonda xa sifunda iBhayibhile.
Ngaba ezo zinto ekunzima ukuziqonda zinokuconjululwa? Ngaba iBhayibhile iyaziphikisa? Ukuze siqonde, makhe siqwalasele imizekelo ethile.
Ngaba Ezi Zinto Kunzima Ngokwenene Ukuziqonda?
▪ UKayin wamfumana phi umkakhe? (Genesis 4:17)
Ubani usenokucinga ukuba emva kokubulawa kuka-Abheli, kwasala umntakwabo onetyala uKayin nabazali babo, uAdam noEva, kuphela emhlabeni. Noko ke, uAdam noEva babenentsapho enkulu. Ngokutsho kweGenesis 5:3, 4, uAdam wayenonyana ogama linguSete. Le ngxelo iyongezelela: “Imihla ka-Adam emveni kokuzala kwakhe uSete yaba yiminyaka emakhulu asibhozo; [ebudeni belo thuba, “NW”] wazala oonyana neentombi.” Ngoko uKayin watshata udade wabo okanye mhlawumbi omnye wabatshana bakhe. Ekubeni ngelo xesha uluntu lwalusondele gqitha kwimfezeko yabantu, umtshato onjalo ngokungathandabuzekiyo wawungenazingozi ezingokwempilo ezisenokuchaphazela inzala yomanyano olunjalo namhlanje.
▪ Ngubani owathengisa uYosefu eYiputa?
IGenesis 37:27 ithi abantakwaboYosefu bagqiba ekubeni bamthengise kumaIshmayeli. Kodwa indinyana elandelayo ithi: “Adlula amaMidiyan lawo angabarhwebi; bamrhola [abantakwaboYosefu], bamkhupha uYosefu emhadini, bathengisa ngoYosefu kumaIshmayeli ngeesilivere ezimashumi mabini; amsa uYosefu eYiputa.” Ngaba uYosefu wathengiswa kumaIshmayeli okanye kumaMidiyan? Kaloku, amaMidiyan kusenokwenzeka ukuba ayekwabizwa ngokuba ngamaIshmayeli, awayezalana nawo ngoyisemkhulu wawo uAbraham. Okanye abarhwebi abangamaMidiyan kusenokwenzeka ukuba babehamba ngomkhoko wamaIshmayeli. Phofu ke, yayingabantakwaboYosefu abamthengisayo, yaye kamva wayenokubaxelela oku: “NdinguYosefu, umzalwana wenu, enathengisayo ngaye eYiputa.”—Genesis 45:4.
▪ Mangaphi amaSirayeli awafayo ngenxa yokuziphatha kakubi neentombi zakwaMowabhi nangokubandakanyeka kunqulo lukaBhahali-Pehore?
INumeri 25:9 ithi: “Abafayo ngesibetho [esivela kuThixo ngenxa yehambo yabo engendawo] baba ngamawaka amashumi amabini anamane.” Noko ke, umpostile uPawulos wathi: “Kanjalo masingenzi mbulo, njengokuba inxenye yabo [amaSirayeli entlango] yenza umbulo, kwawa ngamini-nye amawaka amashumi mabini anamathathu.” (1 Korinte 10:8) Mhlawumbi inani labo babulawayo laliphakathi kwama-23 000 nama-24 000, ngoko omabini la manani asenokuba achanile. Kodwa ke, into ebalaseliswayo yincwadi yeNumeri kukuba “bonke abaziintloko zabantu” ababebandakanyekile kwesi sono babulawa ngabagwebi. (Numeri 25:4, 5) Kusenokwenzeka ukuba kwakukho i-1 000 ‘labo baziintloko’ ababenetyala, elenza isimbuku sama-24 000 xa lidityaniswe nama-23 000 akhankanywe nguPawulos. Ngoxa ngokucacileyo ama-23 000 abulawa ngokuthe ngqo sisibetho esivela kuThixo, bonke abangama-24 000 beva isibetho sikaYehova ngenxa yokuba ngamnye kubo wafa phantsi kommiselo wakhe womgwebo oqatha.—Duteronomi 4:3.
▪ Ekubeni uAgagi wayephila ngexesha ekwakuphila ngalo ukumkani wakwaSirayeli uSawule, ngaba ukubhekisela kwangaphambili kukaBhileham kumlawuli ongumAmaleki owayenelo gama akubonakalisi ukungangqinelani?
Malunga nowe-1473 B.C.E., uBhileham waxela kwangaphambili ukuba ukumkani wakwaSirayeli wayeya kuba “ngaphezulu koAgagi.” (Numeri 24:7) Akukho mbekiselo eyalandelayo eyenziwa ngoAgagi kwada kwalawula uKumkani uSawule (1117-1078 B.C.E.). (1 Samuweli 15:8) Noko ke, oku yayingekuko ukungangqinelani, kuba “uAgagi” kusenokuba yayisisibizo sasebukhosini njengesithi Faro eYiputa. Kwakhona kusenokwenzeka ukuba uAgagi yayiligama lobuqu elalisetyenziswa ngokuphindaphindiweyo ngabalawuli bama-Amaleki.
▪ Ngubani owenza ukuba uDavide abale amaSirayeli?
EyesiBini kaSamuweli 24:1 ithi: “Wabuya wavutha umsindo kaYehova kumaSirayeli, wamxhokonxela uDavide [okanye, “xa uDavide waxhokonxwayo,” umbhalo osemazantsi, weNW] kuwo, esithi, Yiya, uwabale amaSirayeli namaYuda.” Kodwa yayingengoYehova owashukumisela uKumkani uDavide ukuba one, kuba eyoku-1 yeziKronike 21:1 ithi: “USathana [okanye, “umchasi,” umbhalo osemazantsi weNW] wesukela phezulu kumaSirayeli, waxhokonxa uDavide ukuba awabale amaSirayeli.” UThixo wayengakholiswa ngamaSirayeli yaye ngoko ke wavumela uSathana uMtyholi ukuba awenzise esi sono. Ngenxa yoku, eyesi-2 kaSamuweli 24:1 ifundeka ngokungathi nguThixo owayengunobangela waso. Okubangel’ umdla kukuba inguqulelo kaJoseph B. Rotherham ifundeka ngolu hlobo: “Ingqumbo kaYahweh yavutha kumaSirayeli, khon’ ukuze ambandezele uDavide ukuba enze ngokuchasene nawo esithi, Yiya uwabale amaSirayeli namaYuda.”
▪ Ubani unokuwavisisanisa njani amanani awahlukeneyo awafunyanwa kubalo lukaDavide lwamaSirayeli namaYuda?
Kweyesi-2 kaSamuweli 24:9 la manani ngamaSirayeli angama-800 000 namaYuda angama-500 000, ngoxa eyoku-1 yeziKronike 21:5 isithi amadoda angamaSirayeli alwayo asisi-1 100 000 yaye angamaYuda angama-470 000. Amajoni awayebhaliswe ngokusisigxina kwinkonzo yasebukhosini ayengama-288 000, ehlulahlulwe angamaqela ali-12 anamadoda angama-24 000, qela ngalinye likhonza inyanga enye ebudeni bonyaka. Kwakukho i-12 000 labalindi abangakumbi kwiinkosana ezili-12 zezizwe, besenza isimbuku sama-300 000. Kuyabonakala ukuba isi-1 100 000 esikweyoku-1 yeziKronike 21:5 siquka la ma-300 000 awayesele ebhalisile, ngoxa eyesi-2 kaSamuweli 24:9 ingenjinjalo. (Numeri 1:16; Duteronomi 1:15; 1 Kronike 27:1-22) Ngokuphathelele amaYuda, kubonakala ukuba eyesi-2 kaSamuweli 24:9 yaquka amadoda angama-30 000 akumkhosi wokulinda owawubekwe kwimida yamaFilisti kodwa awayengaqukwanga kwinani elikweyoku-1 yeziKronike 21:5. (2 Samuweli 6:1) Ukuba siyakhumbula ukuba eyesi-2 kaSamuweli neyoku-1 yeziKronike zabhalwa ngamadoda amabini awayeneembono neenjongo ezahlukeneyo, sinokuwavisisanisa ngokulula la manani.
▪ Yayingubani uyise kaShelatiyeli?
Izibhalo ezithile zibonisa ukuba uYekoniya (uKumkani uYehoyakin) wayenguyise wokwenyama kaShelatiyeli. (1 Kronike 3:16-18; Mateyu 1:12) Kodwa umbhali wencwadi yeVangeli uLuka wambiza uShelatiyeli ngokuthi “[ngunyana] kaNeri.” (Luka 3:27) Kucacile ukuba uNeri wendisela intombi yakhe kuShelatiyeli. Ekubeni amaHebhere ngokuqhelekileyo ayebhekisela kumkhwenyana ngokuthi ngunyana, ngokukodwa kwimilibo yokuzalwa, ngokufanelekileyo uLuka wayenokumbiza uShelatiyeli ngokuthi ngunyana kaNeri. Ngokufanayo, uLuka wabhekisela kuYosefu njengonyana kaHeli, eneneni owayenguyise wenkosikazi kaYosefu, uMariya.—Luka 3:23.
Ukuvisisanisa Iindinyana Ezibandakanya UYesu
▪ UYesu Kristu wazikhupha kumadoda amangaphi iidemon ezangena kugxuba olukhulu lweehagu?
Umbhali wencwadi yeVangeli uMateyu ukhankanya amadoda amabini, kodwa uMarko noLuka babhekisela kwindoda nje enye. (Mateyu 8:28; Marko 5:2; Luka 8:27) Kubonakala ukuba uMarko noLuka batsalela ingqalelo kwindoda nje enye kuphela eyayineedemon kuba uYesu wathetha nayo yaye imeko yayo yayiphawuleka ngakumbi. Kunokwenzeka ukuba loo ndoda yayindlongondlongo ngakumbi okanye yabandezeleka phantsi kokulawulwa ziidemon ixesha elide. Mhlawumbi emva koko, yiloo ndoda kuphela eyafuna ukupheleka uYesu. (Marko 5:18-20) Kwimeko ephantse ukufana, uMateyu wathetha ngamadoda aziimfama amabini awaphiliswa nguYesu, ngoxa uMarko noLuka bakhankanya enye kuphela. (Mateyu 20:29-34; Marko 10:46; Luka 18:35) Oku yayingekuko ukuphikisana, kuba ubuncinane yayikho indoda enjalo.
▪ Wawunjani umbala wengubo eyayambethwe nguYesu ngomhla wokufa kwakhe?
Ngokutsho kukaMarko (15:17, NW) noYohane (19:2, NW), amajoni amambathisa ingubo emfusa uYesu. Kodwa uMateyu (27:28, NW) uthi ‘yingubo ebomvu,’ egxininisa umbala wayo obomvu. Ekubeni umbala omfusa unguwo nawuphi na umbala ophakathi kobomvu noluhlaza, uMarko noYohane bayavuma ukuba le ngubo yayibonakala ibomvu. Ukukhanya neemeko ezithile kusenokuba zayenza le ngubo yaneembonakalo ezahlukeneyo, yaye ababhali beencwadi zeVangeli bakhankanya umbala owawungowona uqaqambileyo kubo okanye kwabo bafumana inkcazelo yabo kubo. Iiyantlukwano ezincinane zibonisa ukungafani kwababhali kwaye zingqina ukuba babengazange benze yelenqe lokuvumelana ngoko bakubhalayo.
▪ Ngubani owathwala umthi kaYesu wentuthumbo?
UYohane (19:17, NW) wathi: “Ethwele umthi wakhe wentuthumbo, [uYesu] waphuma waya endaweni ekuthiwa yeyoKakayi, ekuthiwa ngesiHebhere yiGolʹgo·tha.” Kodwa uMateyu (27:32, NW) uMarko (15:21, NW) noLuka (23:26, NW) bathi ‘athe ke ekuphumeni, anyanzela uSimon waseKirene ukuba awuthwale umthi wentuthumbo.’ UYesu wawuthwala umthi wakhe wentuthumbo, njengoko watshoyo uYohane. Noko ke, kwingxelo yakhe eshwankathelweyo uYohane akazange ayikhankanye ingongoma yokuba kamva uSimon wanyanzelwa ukuba athwale umthi wentuthumbo. Ngenxa yoko, iingxelo zeVangeli ziyavisisana kule nkalo.
▪ Wafa njani uYuda Sikariyoti?
UMateyu 27:5 uthi uYuda wazixhoma, ngoxa IZenzo 1:18 zisithi “wathi ekhahleleke phantsi ngobuso, wagqabhuka phakathi, zaphalala zonke izibilini zakhe.” Nangona uMateyu ebonakala ethetha ngelinge awalenzayo lokuzibulala, IZenzo zichaza umphumo. Kubonakala ukuba uYuda wabophelela intambo kwisebe lomthi, wenza irhintyela entanyeni yakhe, waza wazama ukuzixhoma ngokutsiba eliweni. Kubonakala ukuba intambo yaqhawuka okanye isebe lomthi laphuka waza wawela phantsi wagqabhuka ematyeni angezantsi. Ukuma komhlaba ongqonge iYerusalem kusenza sibe sengqiqweni isigqibo esinjalo.
Uya Kuyijonga Njani Imicimbi?
Ukuba sidibana nezinto ezibonakala zingangqinelani eBhayibhileni, kuhle ukuqonda ukuba ngokufuthi abantu bathetha izinto ezibonakala ziphikisana kodwa ezicaciswa okanye ziqondwe ngokulula. Ngokomzekelo, usomashishini usenokubhalela umntu othile ngokuchazela unobhala wakhe into amakayibhale eleteni. Ukuba uyabuzwa, usenokuthi wayithumela ileta. Kodwa ekubeni ingunobhala wakhe oyichwethezileyo waza wayiposa le leta, nonobhala unokuthi wayithumela. Ngokufanayo, yayingekuko ukuphikisana xa uMateyu (8:5) wathi umthetheli-khulu weza kubongoza uYesu, ngoxa uLuka (7:2, 3) wathi le ndoda yathumela abameli.
Le mizekelo yandulelayo ibonisa ukuba izinto ekunzima ukuziqonda eBhayibhileni zinokuconjululwa. Ngenxa yoko, kukho isizathu esilungileyo sokuba nesimo sengqondo esilungileyo ngeZibhalo. Umoya onjalo wanconyelwa kula mazwi akwiBhayibhile yentsapho eyapapashwa ngonyaka we-1876:
“Umoya olungileyo wokuhlangabezana nezo zinto ekunzima ukuziqonda kukuba uzisuse ngendlela ekunokwenzeka ngayo, kwaye unamathele uze uzithobe kwinyaniso, naxa kungenakususwa ngokupheleleyo ukungayiqondi. Sifanele sixelise umzekelo wabapostile, abathi, xa bambi babafundi bakhutyekiswa koko bakubiza ngokuba ‘lilizwi elinqabileyo,’ baza bamshiya uKristu, baphelisa zonke iindlela zenkcaso ngokuthi: ‘Nkosi, sosuka siye kubani na? Nguwe onamazwi obomi obungunaphakade. Nathi sikholiwe, sazile, ukuba wena unguye uKristu, uNyana kaThixo ophilileyo.’ . . . Xa sibona inyaniso ibonakala ingavisisani nenye inyaniso, masizame ukuyivisisanisa, size ngaloo ndlela siyibonise ivisisana kubo bonke.”—Yohane 6:60-69.
Ngaba uya kukuthabatha ukuma okunjalo? Emva kokuhlolisisa imizekelo nje embalwa ebonisa ukuvisisana kweZibhalo, sithemba ukuba uyavumelana nomdumisi owathi kuThixo: “Isimbuku selizwi lakho siyinyaniso iphela.” (INdumiso 119:160) AmaNgqina kaYehova ayijonga ngolo hlobo yonke iBhayibhile kwaye aya kukuvuyela ukukuchazela izizathu zokuba nokholo kuyo. Kutheni ungaxubushi nawo ngale ncwadi ingenakuthelekiswa nezinye iincwadi? Isigidimi sayo esikhuthazayo sinokukuzalisa ngethemba nolonwabo lokwenyaniso.
[Umfanekiso okwiphepha 7]
Ngaba uwabuzile amaNgqina kaYehova isizathu esibangela ukuba abe nokholo eBhayibhileni?