Indlela Ephefumlelweyo Yokwenza Umsebenzi WamaKristu Wobuvangeli
“Yibani ngabaxelisa mna, njengokuba nam ndixelisa uKristu.”—1 KORINTE 11:1.
1. Ziziphi ezinye zeendlela uYesu awabamisela ngazo umzekelo obalaseleyo abalandeli bakhe ukuba bawuxelise? (Filipi 2:5-9)
ONJANI wona ukubalasela umzekelo uYesu awawumisela abafundi bakhe! Ngovuyo washiya uzuko lwakhe lwasezulwini esiza apha emhlabeni waza waphila phakathi kwabantu abanesono. Wayekulungele ukutyhubela imbandezelo enkulu ukuze kusindiswe uluntu nokuze, okubaluleke ngakumbi, kungcwaliswe igama likaYise wasezulwini. (Yohane 3:16; 17:4) Xa kwakuchotshelwe ityala elaliza kuchaphazela ubomi bakhe, ngenkalipho uYesu wathi: “Mna ndizalelwe oku; ndizele oku ehlabathini, ukuze ndiyingqinele inyaniso.”—Yohane 18:37.
2. Kutheni uYesu ovusiweyo wayenokuyalela abafundi bakhe ukuba baqhubeke nomsebenzi awayewuqalile?
2 Ngaphambi kokufa kwakhe, uYesu wabaqeqesha kakuhle gqitha abafundi bakhe ukuze bakwazi ukuqhubeka nomsebenzi wokungqinela inyaniso yoBukumkani. (Mateyu 10:5-23; Luka 10:1-16) Ngaloo ndlela, emva kokuvuswa kwakhe, uYesu wakwazi ukubayalela oku: “Hambani . . . niye kuzenza abafundi zonke iintlanga, nibabhaptizela egameni loYise, loNyana, loMoya oyiNgcwele; nibafundisa ukuba bazigcine zonke izinto endiniwisele umthetho ngazo.”—Mateyu 28:19, 20.
3. Umsebenzi wokwenza abafundi wanda njani, kodwa ubukhulu becala wawupheleliselwe kweyiphi imimandla?
3 Kwiminyaka emithathu nesiqingatha eyalandelayo, abafundi bakaYesu bawuthobela lo myalelo kodwa bebenza abo bafundi kumaYuda, kwabo babeguqukele kubuYuda nakumaSamariya alukileyo kuphela. Kwandula ke, ngowama-36 C.E., uThixo walathisa ukuba iindaba ezilungileyo zivakaliswe kwindoda engalukileyo, uKorneli, nendlu yayo. Kwishumi leminyaka elalandelayo, ezinye iiNtlanga zangeniswa ebandleni. Noko ke, kubonakala ukuba ubukhulu becala umsebenzi wawupheleliselwe kwimimandla engasempuma yeMeditera.—IZenzo 10:24, 44-48; 11:19-21.
4. Yiyiphi inguqulelo ephawulekayo eyenzekayo malunga nowama-47-48 C.E.?
4 Kwakufuneka nto ithile eyayiza kushukumisa okanye incede amaKristu akwazi ukwenza abafundi kumaYuda nakwiiNtlanga ezikwimimandla ethe qelele ngakumbi. Ngoko, malunga nowama-47-48 C.E., abadala bebandla lakwa-Antiyokwe eSiriya bafumana esi sigidimi sivela kuThixo: “Ndahluleleni ke uBharnabhas kwanoSawule, baye emsebenzini endibabizele kuwo.” (IZenzo 13:2) Phawula ukuba ngelo xesha uPawulos wayesaziwa ngegama lakhe langaphambili, uSawule. Kwakhona, phawula ukuba uThixo wakhankanya uBharnabhas kuqala kunoPawulos, mhlawumbi ngenxa yokuba ngelo xesha uBharnabhas wayegqalwa engomkhulu kunoPawulos.
5. Kutheni ingxelo yokhenketho lobuvangeli basemazweni lukaPawulos noBharnabhas ibaluleke gqitha kumaKristu namhlanje?
5 Ingxelo eneenkcukacha yokhenketho lobuvangeli basemazweni lukaPawulos noBharnabhas ilukhuthazo gqitha kumaNgqina kaYehova, ngokukodwa kubavangeli basemazweni nakoovulindlela abaye bashiya amakhaya abo besiya kukhonza uThixo kwimimindla yasemzini. Ngaphezu koko, ukuhlolisisa IZenzo isahluko 13 nese-14 ngokuqinisekileyo kuya kushukumisela abangakumbi ukuxelisa uPawulos noBharnabhas baze bandise isabelo abanaso kulo msebenzi ubaluleke kunene wokwenza abafundi.
Isiqithi SaseSipro
6. Nguwuphi umzekelo owamiselwa ngabavangeli basemazweni eSipro?
6 Bengaphozisanga maseko aba bavangeli basemazweni banduluka ngomkhombe besuka kwichweba laseSeluki eSiriya besinge kwisiqithi saseSipro. Bakuba bemise eSalamis, abazange benze nayiphi na enye into kodwa “balishumayela ilizwi likaThixo ezindlwini zesikhungu zamaYuda.” Belandela umzekelo kaKristu, abazange baneliswe kukuhlala esixekweni belindele ukuba abemi besiqithi beze kubo. Kunoko, baqhubeka nomsebenzi wabo ‘ngokuhamba-hamba esiqithini.’ Ngokungathandabuzekiyo oku kwakuquka ubukhulu becala ukubetha ngezikaTshiwo nokuhamba belala kwiindawo ngeendawo, ekubeni iSipro isisiqithi esikhulu, yaye nokhenketho lwabo lwabafikisa kowona mmandla mkhulu waso.—IZenzo 13:5, 6.
7. (a) Sisiphi isiganeko esibalaseleyo esenzekayo ePafo? (b) Le ngxelo isikhuthaza ukuba sibe nasiphi isimo sengqondo?
7 Ngasekupheleni kwexesha lokuhlala kwabo, la madoda mabini avuzwa ngamava amangalisayo kwisixeko sasePafo. Umlawuli wesiqithi, uSergiyo Pawulos, wasiphulaphula isigidimi sawo waza ‘wakholwa.’ (IZenzo 13:7, 12) Kamva uPawulos wabhala: “Luboneni ubizo lwenu, bazalwana, ukuba azizininzi izilumko ngokwenyama, ababaninzi abanamandla, akamaninzi amanene.” (1 Korinte 1:26) Sekunjalo, phakathi kwabanamandla abasabelayo kwakukho uSergiyo Pawulos. La mava afanele akhuthaze bonke, ingakumbi abavangeli basemazweni, ukuba babe nesimo sengqondo esihle ngokunikela ubungqina kumagosa aseburhulumenteni, nanjengoko sikhuthazwa ukwenjenjalo kweyoku-1 kuTimoti 2:1-4. Maxa wambi abasemagunyeni baye babanceda kanobom abakhonzi bakaThixo.—Nehemiya 2:4-8.
8. (a) Yiyiphi inguqulelo ekubonakala ukuba yenzeka kulwalamano lukaBharnabhas noPawulos ukususela ngeli xesha kuse phambili? (b) Yiyiphi indlela uBharnabhas awaba ngumzekelo omhle ngayo?
8 Ngempembelelo yomoya kaYehova, uPawulos waba nendima enkulu ekuguqukeni kukaSergiyo Pawulos. (IZenzo 13:8-12) Kwakhona, ukususela ngeli xesha kuse phambili, kubonakala ukuba uPawulos wakhokela. (Thelekisa IZenzo 13:7 neZenzo 13:15, 16, 43.) Oku kwakuvisisana nothumo lukaThixo uPawulos awalunikwa ngexesha lokuguquka kwakhe. (IZenzo 9:15) Mhlawumbi oku kuguquka kwezinto kwavavanya ukuthobeka kukaBharnabhas. Noko ke, kunokuba ayigqale le nguqulelo njengemhlazayo, kubonakala ukuba uBharnabhas wasabela ngokuvisisana nentsingiselo yegama lakhe, “uMfo Wovuselelo,” waza wamxhasa ngokunyanisekileyo uPawulos kulo lonke olo hambo lobuvangeli basemazweni nasemva koko xa amanye amaKristu angamaYuda ayecela umngeni ubulungiseleli babo kwiiNtlanga ezingalukileyo. (IZenzo 15:1, 2) Onjani wona ukuba mhle lo mzekelo sonke esinokuwulandela, kuquka abo bahlala kumakhaya abavangeli basemazweni nawaseBheteli! Sifanele ngamaxesha onke sikulungele ukwamkela uhlengahlengiso lolawulo lobuthixo size sibaxhase ngokuzeleyo abo bamiselwe ukuba bakhokele phakathi kwethu.—Hebhere 13:17.
Ihewu LaseAsiya Mayina
9. Sifunda ntoni kuPawulos noBharnabhas ngokukulungela kwabo ukuya kwa-Antiyokwe kwelasePisidi?
9 Besuka eSipro, uPawulos noBharnabhas banduluka ngomkhombe besinge kwelasentla kwilizwekazi laseAsiya. Ngesizathu esingachazwanga, aba bavangeli basemazweni abazange bahlale kummandla oselunxwemeni kodwa bathabatha uhambo olude noluneengozi lomgama omalunga neekhilomitha ezili-180 besiya kwa-Antiyokwe kwelasePisidi, ethe zinzi kwihewu eliyintloko laseAsiya Mayina. Oku kwakubandakanya ukunyuka kwingxingwa yentaba uze wehlele kwithafa eliphakame kangangeemitha ezimalunga nezili-1 100 ngaphezu komphakamo wolwandle. Umphengululi weBhayibhile uJ. S. Howson uthi: “Abemi bezo ntaba ezazisahlula ihewu . . . kumathafa akunxweme olusemzantsi, babedume kuyo yonke imimandla yembali yamandulo ngokuba zizaphuli-mthetho nokuba ngabaphangi kwabo.” Ukongezelela, aba bavangeli basemazweni babejamelene neengozi zezinto zemvelo. Lo kaHowson wongezelela ngelithi, “Izithili zaseAsiya Mayina azithumani manzi ‘ngezikhukula’ zazo njengoko kunjalo nangendlela enqumla kwiintaba zasePisidi, apho imilambo iqhambuka emazantsi amawa amakhulu, okanye apho iqukuqela ngamandla ukuhlisa imiwonyo ecutheneyo.” Ezi nkcukacha ziyasinceda ukuba sibe nomfanekiso-ngqondweni walo lonke uhlobo lohambo aba bavangeli basemazweni ababekulungele ukuluhamba ukuze nje basasaze iindaba ezilungileyo. (2 Korinte 11:26) Ngokukwanjalo namhlanje, abakhonzi bakaYehova abaninzi bajamelana ngenkalipho nazo zonke iintlobo zemiqobo ukuze bafikelele abantu baze babelane nabo ngeendaba ezilungileyo.
10, 11. (a) UPawulos wanamathela njani kwizinto ababeziqonda nababenomdla kuzo abaphulaphuli bakhe? (b) Kutheni esenokuba amaYuda amaninzi akhwankqiswa kukuva ngeembandezelo ezafunyanwa nguMesiya? (c) Luhlobo luni losindiso uPawulos awaluvakalisa kwabo babemphulaphula?
10 Ekubeni kwakukho indlu yesikhungu yamaYuda kwa-Antiyokwe kwelasePisidi, abavangeli basemazweni baqala apho ukuze banike abo babeqhelene gqitha neLizwi likaThixo ithuba lokwamkela iindaba ezilungileyo. Bakuba becelwe ukuba bathethe, uPawulos waphakama waza wanikela udlwabevu lwentetho yesidlangalala. Kuyo yonke loo ntetho, wanamathela koko ayekuqonda yaye enomdla kuko amaYuda nabo babeguqukele kubuYuda ababephulaphule. (IZenzo 13:13-16, 26) Emva kwengabula-zigcawu yakhe, uPawulos wenza impinda yembali eyaziwayo yamaYuda, ewakhumbuza ukuba uYehova wayekhethe ooyisemkhulu waza ke wabahlangula eYiputa, nendlela awabanceda ngayo ukuba boyise abemi beLizwe Ledinga. Wandula ke uPawulos wabalaselisa iinkqubano zikaYehova noDavide. Loo nkcazelo yayibangel’ umdla kumaYuda ngenkulungwane yokuqala kuba ayelindele ukuba uThixo awavelisele umsindisi nomlawuli ongunaphakade owayengowenzala kaDavide. Kweli nqanaba, ngenkalipho uPawulos wavakalisa oku: “Embewini yalowo [uDavide], uthe uThixo ngokwedinga wavelisa uYesu, ukuba abe ngumsindisi kuSirayeli.”—IZenzo 13:17-23.
11 Noko ke, amaYuda amaninzi ayelindele uhlobo lomsindisi owayeligorha kwezomkhosi owayeza kuwakhulula kulawulo lwamaRoma aze aphakamise uhlanga lwamaYuda ngaphezu kwazo zonke ezinye iintlanga. Ngenxa yoko, alithandabuzeki elokuba akhwankqiswa kukuva uPawulos esithi uMesiya wanikelwa ziinkokeli zabo zonqulo ukuba abulawe. Ngenkalipho uPawulos uthi: “Ke uThixo wamvusa kwabafileyo.” Ngasekupheleni kwentetho yakhe, wabonisa abaphulaphuli bakhe ukuba babenokufumana uhlobo oluzukileyo losindiso. Wathi, “Makwazeke . . . kuni ukuba ngaye lowo kuxelwa kuni uxolelo lwezono; nakuzo zonke izinto ebeningenako ukugwetyelwa nikhululeke kuzo ngomthetho kaMoses, bonke abakholwayo bayagwetyelwa ngayo yena lowo.” UPawulos waqukumbela intetho yakhe ngokubongoza abaphulaphuli bakhe ukuba bangabi phakathi kwabo uThixo waxela kwangaphambili ukuba babeya kuligatya eli lungiselelo limangalisayo lokusindiswa.—IZenzo 13:30-41.
12. Yaba nawuphi umphumo intetho kaPawulos, ibe oku kufanele kusikhuthaze njani?
12 Enjani yona ukunikelwa kakuhle le ntetho yayisekelwe kwiZibhalo! Basabela njani abaphulaphuli? “Into eninzi yamaYuda neyabangene ebuYudeni, abamhlonelayo uThixo, yabalandela ooPawulos noBharnabhas.” (IZenzo 13:43) Hayi indlela okusikhuthaza ngayo oku namhlanje! Ngamana nathi ngokunjalo singenza unako nako ukuze sivakalise inyaniso ngokuphumelelayo, enoba kukubulungiseleli basesidlangalaleni okanye kumagqabaza neentetho esizinikela kwiintlanganiso zethu zebandla.—1 Timoti 4:13-16.
13. Kwakutheni ukuze kufuneke ukuba abavangeli basemazweni bemke kwa-Antiyokwe kwelasePisidi, ibe yiyiphi imibuzo ephakamayo ngokuphathelele abafundi abatsha?
13 Abo babesandul’ ukubonakalisa umdla kwa-Antiyokwe kwelasePisidi babengenakuzigcina kubo ezi ndaba zilungileyo. Ngenxa yoko, “ngelandelayo isabatha, waphantsa ukuhlanganisana umzi wonke, ukuba ulive ilizwi likaThixo.” Yaye kungekudala isigidimi sadlulela nangaphaya kwesixeko. Enyanisweni, “laye ke ilizwi leNkosi lihanjiswa kulo lonke ilizwe elo.” (IZenzo 13:44, 49) Kunokuyivuma le nyaniso, amaYuda anomona aphumelela ukubangela ukuba abavangeli basemazweni bagxothwe kweso sixeko. (IZenzo 13:45, 50) Oku kwabachaphazela njani abafundi abatsha? Ngaba badimazeka baza banikezela?
14. Kutheni abachasi babengenakuwubhangisa umsebenzi owawuqaliswe ngabavangeli basemazweni, yaye sifunda ntoni koku?
14 Hayi, kuba lo yayingumsebenzi kaThixo. Kwakhona, abavangeli basemazweni babebeke isiseko esiqinileyo sokukholwa kwiNkosi uYesu Kristu ovusiweyo. Ngoko, kucacile ukuba aba bafundi batsha bamgqala uKristu eyiNkokeli yabo, kungekhona abavangeli basemazweni. Ngaloo ndlela, sifunda ukuba baqhubeka “bezaliswe luvuyo nanguMoya oyiNgcwele.” (IZenzo 13:52) Hayi indlela okubakhuthaza ngayo oku abavangeli basemazweni nabanye abenza abafundi namhlanje! Ukuba siyifeza ngokuthobeka nangenzondelelo indima yethu, uYehova uThixo noYesu Kristu baya kubusikelela ubulungiseleli bethu.—1 Korinte 3:9.
EIkoniyo, EListra NaseDerbhe
15. Yintoni abafika bayenza abavangeli basemazweni eIkoniyo, ngayiphi imiphumo?
15 Ngoku uPawulos noBharnabhas bahamba umgama omalunga neekhilomitha ezili-140 besiya ngasemzantsi mpuma kwisixeko esilandelayo, i-Ikoniyo. Ukoyika intshutshiso akuzange kubathintele ekwenzeni oko babekwenze kwa-Antiyokwe. Ngenxa yoko, iBhayibhile ithi: “Inkitha enkulu yamaYuda namaGrike [yakholwa].” (IZenzo 14:1) Kwakhona, amaYuda angazange azamkele iindaba ezilungileyo axhokonxa inkcaso. Kodwa abavangeli basemazweni banyamezela baza bachitha ixesha elithile eIkoniyo benceda abafundi abatsha. Kwathi ke, bakuva ukuba amaYuda abachasileyo azimisele ukubaxuluba ngamatye, uPawulos noBharnabhas ngobulumko basabela kummandla olandelayo, “iListra neDerbhe, nakuloo mimandla.”—IZenzo 14:2-6.
16, 17. (a) Kwenzeka ntoni kuPawulos eListra? (b) Iinkqubano zikaThixo nalo mpostile zamchaphazela njani umfana othile eListra?
16 Ngenkalipho ‘baye bezishumayela iindaba ezilungileyo’ kulo mmandla mtsha nababeqala ukuwusebenza. (IZenzo 14:7) Xa amaYuda akwa-Antiyokwe kwelasePisidi naseIkoniyo evayo ngoku, ehla esiza eListra aza eyisela izihlwele ukuba zimxulube ngamatye uPawulos. Ekubeni engazange abe nalo ithuba lokusaba, uPawulos wabethwa walutywantsi ngamatye, ngokokude abo babemchasa baqiniseke ukuba ufile. Bamrholela ngaphandle kwesixeko.—IZenzo 14:19.
17 Ngaba unokuyithelekelela indlela abakhathazeke ngayo abafundi abatsha ngenxa yoku? Kodwa isimanga sezimanga, besamngqongile uPawulos, wasuka waphakama! IBhayibhile ayichazi enoba umfana ogama linguTimoti wayengomnye wabo bafundi batsha kusini na. Ngokuqinisekileyo ngaxa lithile waba nolwazi ngeenkqubano zikaThixo noPawulos ibe zabetheleleka kanobom engqondweni yakhe eselula. UPawulos wabhala oku kwincwadi yakhe yesibini awayeyibhalele uTimoti: “Uyilandile eyam imfundiso, ihambo, . . . iintlungu ezinjengezo zandihlelayo kwa-Antiyokwe, eIkoniyo, eListra; ukutshutshiswa okunjengoko ndakuthwalayo, yaza iNkosi yandihlangula kuko konke.” (2 Timoti 3:10, 11) Malunga nonyaka okanye emibini emva kokuxulutywa kukaPawulos, wabuyela eListra waza wafumanisa ukuba uTimoti oselula wayengumKristu ongumzekelo, “engqinelwe kakuhle ngabazalwana baseListra naseIkoniyo.” (IZenzo 16:1, 2) Ngoko uPawulos wamkhetha ukuba ampheleke kuhambo lwakhe. Oku kwamnceda uTimoti ukuba akhule ngokomoya, yaye ekuhambeni kwexesha wakufanelekela ukuthunywa nguPawulos ukuba atyelele amabandla ahlukahlukeneyo. (Filipi 2:19, 20; 1 Timoti 1:3) Ngokunjalo nanamhlanje, abakhonzi bakaThixo abanenzondelelo banempembelelo entle kwabaselula, abaninzi babo bayakhula baze babe ngabakhonzi abaxabisekileyo bakaThixo, njengoTimoti.
18. (a) Yintoni eyenzekayo kubavangeli basemazweni eDerbhe? (b) Ngoku liliphi ithuba elalibavulekele, kodwa bakhetha liphi ikhondo?
18 Ngentsasa elandelayo emva kokujika emlonyeni wengcwaba eListra, uPawulos wanduluka noBharnabhas besingise eDerbhe. Ngesi sihlandlo, abazange balandelwe ngabachasi, yaye iBhayibhile ithi ‘benza abafundi abaneleyo.’ (IZenzo 14:20, 21) Bakuba beseke ibandla eDerbhe, uPawulos noBharnabhas kwafuneka benze isigqibo. Kwakukho indlela entle neyayakhiwe ngamaRoma eyayisuka eDerbhe iphumela eTarso. Ukusuka apho wawuhamba umganyana ukubuyela kwa-Antiyokwe eSiriya. Kunokwenzeka ukuba leyo yayiyeyona ndlela ilula yokubuya, yaye abo bavangeli basemazweni babesenokuvakalelwa kukuba ngoku babefanelwe kukuphumla. Noko ke, bexelisa iNkosi yabo, uPawulos noBharnabhas baqonda ukuba imfuneko isenkulu ngakumbi.—Marko 6:31-34.
Ukuwufeza Ngokupheleleyo Umsebenzi KaThixo
19, 20. (a) UYehova wabasikelela njani abavangeli basemazweni ngokubuyela kwabo eListra, eIkoniyo nakwa-Antiyokwe? (b) Oku kubafundisa siphi isifundo abantu bakaYehova namhlanje?
19 Kunokuthabatha le ndlela imfutshane yokugoduka, ngenkalipho abavangeli basemazweni babuyela emva baza batyelela kwakhona kanye ezo zixeko babesinde emlonyeni wengonyama kuzo. Ngaba uYehova wakusikelela oku kubonakalisa kwabo inkxalabo yokungazingci ngenxa yezimvu ezintsha? Ngokwenene wabasikelela, kuba ingxelo ithi baphumelela ‘ukomeleza imiphefumlo yabafundi, bebavuselela ukuba bahlale behleli elukholweni.’ Kwaba kokufanelekileyo ukuba babaxelele oku abo bafundi batsha: “Simelwe kukuphumela ezimbandezelweni ezininzi, ukungena ebukumkanini bukaThixo.” (IZenzo 14:21, 22) UPawulos noBharnabhas bakwabakhumbuza nangobizo lwabo lokuba ziindlalifa ezimanyeneyo kuBukumkani bukaThixo obuzayo. Namhlanje, sifanele sibakhuthaze ngendlela efanayo abafundi abatsha. Sinokubomeleza ukuba banyamezele iimvavanyo ngokuhlala sibeka phambi kwabo ithemba lobomi obungunaphakade emhlabeni kulawulo lobo Bukumkani bukaThixo uPawulos noBharnabhas babeshumayela ngabo.
20 Ngaphambi kokushiya isixeko ngasinye, uPawulos noBharnabhas babenceda ibandla lasekuhlaleni ukuba lilungelelaniswe kakuhle. Ngokucacileyo, baqeqesha amadoda afanelekayo baza bawamisela ukuba akhokele. (IZenzo 14:23) Ngokungathandabuzekiyo oku kwaba negalelo kulwando olungakumbi. Nanamhlanje, ngokukwanjalo abavangeli basemazweni nabanye, emva kokunceda abo bangenamava benze inkqubela de bakwazi ukusingatha imbopheleleko, maxa wambi bayemka baze baqhubeke nomsebenzi wabo omhle kwezinye iindawo apho imfuneko inkulu khona.
21, 22. (a) Kwenzeka ntoni emva kokuba uPawulos noBharnabhas begqibe uhambo lwabo lobuvangeli basemazweni? (b) Oku kuphakamisa yiphi imibuzo?
21 Xa ekugqibeleni aba bavangeli basemazweni babuyela kwa-Antiyokwe eSiriya, baziva beneliseke ngokunzulu. Eneneni, ingxelo yeBhayibhile ithi ‘babewufezile’ umsebenzi uThixo awayebaphathise wona. (IZenzo 14:26) Kuyaqondakala ukuba ukubaliswa kwamava abo kwabangela “uvuyo olukhulu kubo bonke abazalwana.” (IZenzo 15:3) Kodwa kuthekani ngekamva? Ngaba ngoku babeza kuhlala phantsi basonge izandla benelisekile ngoko bakufezileyo? Nakanye. Emva kokutyelela iqumrhu elilawulayo eYerusalem ukuze beve isigqibo ngembambano yolwaluko, aba babini baqalisa kwakhona uhambo lobuvangeli basemazweni. Ngoku basinga kumacala awahlukahlukeneyo. UBharnabhas wahamba noYohane besiya eSipro, ngoxa uPawulos wafumana iqabane elitsha, uSilas, waza walityhutyha elaseSiriya nelaseKiliki. (IZenzo 15:39-41) Wamkhetha kolu hambo uTimoti oselula waza wahamba naye.
22 IBhayibhile ayiyichazi imiphumo yohambo lwesibini lukaBharnabhas. UPawulos yena, wadlulela kummandla omtsha waza wamisela amabandla ubuncinane kwizixeko ezihlanu—kwelaseFilipi, eBhereya, eTesalonika, eKorinte nase-Efese. Yintoni eyayingundoqo ekuphumeleleni okungaka kukaPawulos? Ngaba imigaqo efanayo iyasebenza kumaKristu enza abafundi namhlanje?
Uyakhumbula Na?
◻ Kutheni uYesu engumzekelo obalaseleyo wokuxeliswa?
◻ Yiyiphi indlela awaba ngumzekelo ngayo uBharnabhas?
◻ Sifunda ntoni kwintetho kaPawulos kwa-Antiyokwe kwelasePisidi?
◻ UPawulos noBharnabhas bawufeza njani ngokupheleleyo umsebenzi ababewunikiwe?
[Umfanekiso okwiphepha 15]
Ukunyamezela kompostile uPawulos intshutshiso kwabetheleleka kumfana onguTimoti