Iindawo Ezithile ZeLizwe Ledinga

Yitya Isidlo—Yitya Isonka

NGESINYE isihlandlo xa uYesu nabafundi bakhe babesendlwini, “babengakwazi nokutya isidlo” ngenxa yesihlwele. (Marko 3:20, NW) Ngesinye isihlandlo uYesu wangena ekhayeni lomFarisi “ukuba atye isidlo.” (Luka 14:1, NW) Luhlobo olunjani lwesidlo oluthi qatha engqondweni yakho?

Mhlawumbi amaSirayeli amandulo ayeya kucinga ngesonka ngenxa yokuba ibinzana lesiHebhere nelesiGrike elithi “yitya isidlo” ngokoqobo lalithetha ukuthi “yitya isonka.” Oku kuyaqondakala, ekubeni isonka esasisenziwa ngengqolowa okanye ngerhasi sasiyinxalenye ebalulekileyo yesidlo sawo.

Abantu abaninzi namhlanje bacinga ngoosolusapho abangamaHebhere njengabelusi yaye bacinga ngabafundi bakaYesu njengababambisi beentlanzi. Yaye bambi babesenza olo hlobo lomsebenzi kodwa ngokuqinisekileyo asingabo bonke. Ingqolowa yayisisidlo esiqhelekileyo kubomi babaninzi. Kuyabonakala ukuba maxa wambi kwakunjalo ngoIsake nangoYakobi, njengokuba sisenokubona kwiGenesis 26:12; 27:37; nesama-37:7. Yaye ekubeni ukulima yayingumsebenzi oyintloko eGalili ngexesha likaYesu, ngaba bambi ababa ngabapostile babengabalimi bengqolowa?

Kusenokwenzeka oko, kuba ingqolowa yayilinywa ngokubanzi kwiLizwe Ledinga, yaye iBhayibhile ibhekisela kuko izihlandlo eziliqela. (Duteronomi 8:7-9; 1 Samuweli 6:13) Yintoni eyayibandakanyekile kuko?

Emva kokuba iimvula zokuqala ezina ngo-Oktobha nangoNovemba zithambise umhlaba, umlimi wengqolowa wayelima aze ahlwayele imbewu yakhe. Iimvula zokugqibela zazinceda ukuba izityalo zakhe zikhule zize ke, ngoAprili nangoMeyi, zivuthwe zibe gwangqa phambi kokuba kufike ubushushu behlobo. Ukuvunwa kwengqolowa kwakusaziwa ngokubanzi kangangokuba unokufunda ngako njengokwalatha ixesha lonyaka. (Genesis 30:14; ABagwebi 15:1) Ngaba unokuchaza ukuba yayililiphi ixesha ebudeni bonyaka awathatyathwa ngalo lo mfanekiso ungasekhohlo?a Yaye yayililiphi ixesha lonyaka xa abafundi bakaYesu bakha izikhwebu eziluhlaza?—Mateyu 12:1.

Ukuvuna ingqolowa kwakungumsebenzi omkhulu kubalimi. Abavuni babesika iindiza ngerhenqa baze bazibophe zibe zizithungu, njengokuba ubona ngezantsi. Kambe ke, ezinye iindiza zazinokushiywa ngempazamo okanye zazinokuwa emhlabeni, kungenxa yoko uRute wayenokubhikica ngokuphumelelayo. (Rute 2:2, 7, 23; Marko 4:28, 29) Izithungu zengqolowa zazithatyathwa zisiwe esandeni, esinjengeso sikaAravena. Yintoni eyeyisenziwa apho? IBhayibhile ikhankanya ‘iimpahla zokubhula needyokhwe zeenkomo.’ (2 Samuweli 24:18-22; 1 Kronike 21:23) Izithungu zengqolowa zazisandlalwa kwindawo ethe tyaba enamatye okanye enomhlaba ofunjiweyo. Inkunzi yenkomo okanye esinye isilwanyana sasihambahamba sixusha ingqolowa. Eso silwanyana sisenokuba sasitsala isileyi esenziwe ngeenkuni esasiya kunceda ekwaphuleni iindiza ukuze kushiyeke iinkozo.—Isaya 41:15.

Ngoko iinkozo zazilungele ukweliwa, okwakusenziwa ngokuziphosa emoyeni ngomhlakulo okanye ngefolokhwe, njengokuba sinokubona ngasentla. (Mateyu 3:12) Umlimi wayenokwela ngorhatya xa impepho inokuyiphephetha ikafu (umququ ovela kwizikhwebu) ize izikhuphele ecaleni iindiza. Xa sele ziqokelelwe iinkozo zaza zahluzwa ukuze kususwe nawaphi na amakhasi, zazilungele ukugcinwa—okanye zenze oko kutya kubaluleke gqitha, isonka.—Mateyu 6:11.

Ukuba wawungumfazi onaloo mbopheleleko, suku ngalunye wawuya kusebenzisa ilitye lokuguba ukuze ugube iinkozo zibe ngumgubo, mhlawumbi ngesizathu esithile ibe ngumgubo wengqolowa ontlakantlaka. Okanye wawunokuguba ‘umgubo ocoliweyo,’ njengalowo wasetyenziswa nguSara ukuze enze “amaqebengwana ezonka” esenzela izithunywa zezulu ezazizenze abantu okanye njengalowo wawusetyenziswa nangamaSirayeli kwiminikelo yokudla eyayisenziwa kuYehova. (Genesis 18:6; Eksodus 29:2; Levitikus 2:1-5; Numeri 28:12) USara wawunyela ngamanzi umgubo wengqolowa waza wawuxova waba yintlama.

Ngezantsi, unokubona intlama ezizigaqa nesinye isonka esimcaba esandlaliweyo nesilungele ukuphekwa. Amaqebengwana azizigaqa namakhulu ngolo hlobo ayenokojiwa ezitovini okanye kwiinkcenkce zokoja, njengokuba eli bhinqa lisenza. Ngaba oku kuyakukunceda uthelekelele oko uSara wakwenzela abahambi abazizithunywa zezulu noko kwenziwa yintsapho kaLote kamva? Siyafunda: “[Izithunwa zezulu] zaphambukela kuye, zangena endlwini yakhe; wazenzela isidlo, woja nezonka ezingenagwele, zadla.”—Genesis 19:3.

[Umbhalo osemazantsi]

[Inkcazelo Ngomfanekiso okwiphepha 24]

Pictorial Archive (Near Eastern History) Est.

[Inkcazelo Ngomfanekiso okwiphepha 24]

Pictorial Archive (Near Eastern History) Est.

[Inkcazelo Ngomfanekiso okwiphepha 25]

Pictorial Archive (Near Eastern History) Est.

[Inkcazelo Ngomfanekiso okwiphepha 25]

Garo Nalbandian