Ukusebenzisa KukaYehova “Ubudenge” Ukuze Asindise Abakholwayo

“Ekubeni ke kuthe, ebulumkweni bukaThixo, ihlabathi alamazi uThixo ngobulumko balo, kwakholeka kuThixo ukusindisa abo bakholwayo, ngabo ubudenge bokuvakalisa iindaba ezilungileyo.”—1 KORINTE 1:21.

1. UYehova angabusebenzisa ngayiphi ingqiqo “ubudenge,” yaye sazi njani ukuba ihlabathi ngobulumko balo alimazanga uThixo?

INTONI? Ingenzeka na into yokuba uYehova asebenzise ubudenge? Asingetsho! Kodwa unako ukukusebenzisa yaye uyakusebenzisa oko kubonakala kububudenge ehlabathini. Ukwenza oko ukuze asindise abantu abamaziyo nabamthandayo. Ihlabathi alinakumazi uThixo ngobulumko balo. UYesu Kristu wakwenza kwacaca oku xa wathi emthandazweni: “Bawo olilungisa, ihlabathi lona alikwazanga.”—Yohane 17:25.

2. Kusenokubonakala njani ngathi iindlela zikaYehova ziyahambisana neendlela zehlabathi, kodwa ziyintoni izibakala?

² Amazwi kaYesu abonisa ukuba iindlela zikaYehova zahlukile kwezo zehlabathi. Xa usikha nje phezulu kusenokubonakala ngathi injongo kaThixo iyahambisana naleyo yeli hlabathi. Kusenokubonakala ngathi uThixo uyazisikelela iinjongo zeli hlabathi. Ngokomzekelo, iBhayibhile ithi uThixo uya kumisela urhulumente wobulungisa oya kuzisa ubomi boxolo nolonwabo, kwanempumelelo kuluntu olusemhlabeni. (Isaya 9:6, 7; Mateyu 6:10) Ngokukwanjalo, ihlabathi livakalisa injongo yalo yokunika abantu uxolo, impumelelo norhulumente olungileyo ngokuthi lizise oko kufane kubizwe ngokuba lulungelelwaniso olutsha lwehlabathi. Kodwa iinjongo zikaThixo nezo zehlabathi azifani. Injongo kaYehova kukuzithethelela njengoMongami Ozukileyo wendalo iphela. Oku uya kukwenza ngorhulumente wasezulwini oya kubaguzula bonke oorhulumente basemhlabeni. (Daniyeli 2:44; ISityhilelo 4:11; 12:10) Ngoko uThixo akadibaniselananga nganto neli hlabathi. (Yohane 18:36; 1 Yohane 2:15-17) Kungenxa yoko le nto iBhayibhile ithetha ngeendidi ezimbini zobulumko—‘ubulumko bukaThixo’ ‘nobulumko behlabathi.’—1 Korinte 1:20, 21.

Esona Siphako Siyintloko Sobulumko Behlabathi

3. Ngoxa ubulumko behlabathi busenokubonakala bunomtsalane, kutheni ulungelelwaniso olutsha lwehlabathi oluthenjiswa ngabantu lungasayi kuze lwanelise?

³ Kwabo bangalathiswa bubulumko bukaThixo, ubulumko behlabathi bubonakala bunomtsalane. Kukho iintanda-bulumko zehlabathi ezivakala zibalasele ezithi zithimbe ingqondo. Kukho amawakawaka amaziko emfundo ephakamileyo anikela ulwazi oluvela kwabo bagqalwa ngabaninzi njengabona makhwekhwetha beenkcuba-buchopho. Imizi emikhulu yogcino-ncwadi izele iyaphuphuma yintabalala yolwazi lwamava abantu abawaqokelele ebudeni beenkulungwane. Noko ke, phezu kwako nje oku, ulungelelwaniso olutsha lwehlabathi oluthenjiswa ngabalawuli behlabathi kuphela lulawulo lwabantu abangafezekanga, abadyojwe sisono nabafayo. Ngenxa yoko, olo lungelelwaniso luya kuba lolungagqibelelanga, luphinda iziphoso ezininzi zexa elidluleyo yaye lungaze luzanelise zonke iintswelo zoluntu.—Roma 3:10-12; 5:12.

4. Ulungelelwaniso olutsha lwehlabathi oluthenjiswayo luchanabeke entwenini, yaye oko kuphumele entwenini?

⁴ Ulungelelwaniso olutsha lwehlabathi oluthenjiswa ngabantu aluchanabekanga nje kuphela kubuthathaka babantu kodwa kwanakwimpembelelo yezidalwa ezingendawo zomoya—oko kukuthi, uSathana uMtyholi needemon zakhe. USathana uzimfamekisile iingqondo zabantu ukuze bangazikholelwa ‘iindaba ezilungileyo zobuqaqawuli bukaKristu.’ (2 Korinte 4:3, 4; Efese 6:12) Ngenxa yoko, ihlabathi liyingxuba-kaxaka. Lizigqebh’ olungophiyo ngelinge lalo elikhokelela kwintlekele yokuzilawula ngaphandle koncedo lukaThixo yaye lingakukhathalelanga ukuthanda kwakhe. (Yeremiya 10:23; Yakobi 3:15, 16) Ngaloo ndlela, njengoko umpostile uPawulos watshoyo, ‘ihlabathi alizange limazi uThixo ngobulumko balo.’—1 Korinte 1:21.

5. Siyintoni esona siphako siyintloko sobulumko behlabathi?

⁵ Ke ngoko, siyintoni esona siphako siyintloko sobulumko beli hlabathi, kuquka namacebo alo olungelelwaniso olutsha lwehlabathi? Sikukuba ihlabathi lityeshela oko lingenakuze liphumelele ngaphandle kwako—ulongamo oluzukileyo lukaYehova uThixo. Ngobuntamo-lukhuni liyala ukwamkela ulongamo lukaThixo. Ihlabathi limtyeshela ngabom uYehova kuzo zonke izicwangciso zalo lize lithembele kubuchule nakumacebo alo. (Thelekisa uDaniyeli 4:31-34; Yohane 18:37.) IBhayibhile yenza kucace ukuba “yingqalo yokulumka ukoyika uYehova.” (IMizekeliso 9:10; INdumiso 111:10) Ukanti, ihlabathi alikayiqondi nale mfanelo isisiseko yobulumko. Ngoko, linokuphumelela njani ke, ngaphandle kokuxhaswa nguThixo?—INdumiso 127:1.

Ukushumayela NgoBukumkani—Ngaba Kububudenge Okanye Kusengqiqweni?

6, 7. (a) Abo balathiswa bubulumko bukaThixo bashumayela ntoni, kodwa ihlabathi libagqala njani? (b) INgqobhoko ishumayela ngobulumko bukabani, yaye oko kuphumele entwenini?

⁶ Kwelinye icala, abo bamaziyo uThixo babonakalisa ubulumko bukaThixo baze bakhethe ukwalathiswa bubo. Njengoko uYesu waxela kwangaphambili, bashumayela “ezi ndaba zilungileyo zobukumkani . . . kulo elimiweyo liphela.” (Mateyu 24:14; 28:19, 20) Ngaba ukushumayela okunjalo kusengqiqweni ngoku, njengoko umhlaba wethu uzaliswe zizidubedube, ungcoliso, ubuhlwempu nokubandezeleka kwabantu? Kwizilumko zeli zehlabathi ukushumayela okunjalo ngoBukumkani bukaThixo kubonakala kububudenge nje bodwa, kungekho ngqiqweni. Zibagqala abashumayeli boBukumkani bukaThixo njengeziphazamiso ezixabe endleleni kaRhulumente yaye bedodobalisa inkqubela yakhe yezopolitiko. Kule ngcamango zixhaswa ngabefundisi beNgqobhoko, abashumayela ngokobulumko beli hlabathi yaye bengabaxeleli abantu oko bafanele bakwazi ngehlabathi elitsha likaThixo nangorhulumente walo obuBukumkani, nakubeni oku kwakuyimfundiso eyintloko kaKristu.—Mateyu 4:17; Marko 1:14, 15.

⁷ Umbhali-mbhali uH. G. Wells watsalel’ ingqalelo koku kusilela kwabefundisi beNgqobhoko. Wabhala oku: “Icace gca indlela uYesu awayibalaselisa ngayo imfundiso yoko kubizwa ngokuba buBukumkani bamaZulu njengobubalasele gqitha, xa ithelekiswa kunye nenkqubo kwanemfundiso yeecawa zeNgqobhoko ezibusingela phantsi njengento engento.” Ukanti, ukuze abantu besi sizukulwana bazuze ubomi, bamele kuqala beve ngoBukumkani bukaThixo obumiselweyo, yaye ukuze oko kuphunyezwe kumele kubekho ubani oshumayela iindaba ezilungileyo ngabo.—Roma 10:14, 15.

8. Kutheni ukushumayela iindaba ezilungileyo zikaThixo kuyeyona nto isengqiqweni enokwenziwa namhlanje, kodwa liliphi ikhondo elingayi kuba nazingenelo zikanaphakade?

⁸ Ngoko, ukushumayela iindaba ezilungileyo zikaThixo kuyeyona nto isengqiqweni esinokuyenza namhlanje. Oko kubangelwa kukuba isigidimi soBukumkani sinikela ithemba lokwenene elivuyisa iintliziyo zabantu ebudeni bezi ntsuku zokugqibela ‘zamaxesha anomngcipheko.’ (2 Timoti 3:1-5; Roma 12:12; Tito 2:13) Ngoxa ubomi kweli hlabathi bungaqinisekanga yaye bubufutshane, ubomi kwihlabathi elitsha likaThixo buya kuba bobukanaphakade, buzaliswe luvuyo, yonke into ifumaneka ngokuyintabalala, yaye kukho noxolo kanye apha emhlabeni. (INdumiso 37:3, 4, 11) Njengoko uYesu Kristu watshoyo, “kumnceda ntoni na umntu, ukuba uthe wazuza ihlabathi liphela, waza wonakalelwa ke ngumphefumlo wakhe? Okanye worhola ntoni na umntu, ibe sisananelo somphefumlo wakhe?” Ukuba umntu uphulukana nelungelo lokuphila kwihlabathi elitsha likaThixo, limnceda ngantoni eli hlabathi lidlulayo? Ukunandipha komntu onjalo ngoku izinto eziphathekayo kungamampunge, kulilize yaye kokwexeshana nje.—Mateyu 16:26; INtshumayeli 1:14; Marko 10:29, 30.

9. (a) Xa enye indoda yamenywa ukuba ibe ngumlandeli kaYesu yacela ukusibekel’ amangomso esi simemo, yintoni uYesu awayicebisa ukuba iyenze? (b) Impendulo kaYesu ifanele isichaphazele njani?

⁹ Enye indoda uYesu awayimema ukuba ibe ngumlandeli wakhe yathi: “Ndivumele khe ndimke, ndiye kungcwaba ubawo kuqala.” Yintoni uYesu awayicebisa ukuba iyenze? Esazi ukuba le ndoda yayiya kuba iwubekel’ amangomso owona msebenzi ubalulekileyo ngenxa nje yokuba ilindele ukuba abazali bayo bade bafe, uYesu wayiphendula ngelithi: “Bayeke abafileyo, bangcwabe abafileyo babo; ke wena hamba uye kushumayela ubukumkani bukaThixo.” (Luka 9:59, 60) Abo babonisa ubulumko ngokuthobela uKristu abanakukutyeshela ukuphumeza uthumo lwabo lokushumayela isigidimi soBukumkani. Ubulumko bukaThixo bubenza bazi ukuba eli hlabathi kunye nabalawuli balo ligwetyelwe intshabalalo. (1 Korinte 2:6; 1 Yohane 2:17) Abaxhasi bolongamo lukaThixo bayazi ukuba ekuphela kwethemba lokwenyaniso loluntu lixhomekeke ekungeneleleni kukaThixo nolawulo lwakhe. (Zekariya 9:10) Ngoko ngoxa abo banobulumko beli hlabathi bengakholelwa kuBukumkani bukaThixo yaye bengamfuni loo rhulumente wasezulwini, abantu abakhokelwa bubulumko bukaThixo benza oko kuzisa ingenelo yokwenene kwabanye abantu, bebenza bafanelekele ubomi obungunaphakade kwihlabathi elitsha elithenjisiweyo likaYehova.—Yohane 3:16; 2 Petros 3:13.

‘Zibubudenge Kwabo Batshabalalayo’

10. (a) Xa uSawule waseTarso waguqulwayo, nguwuphi umsebenzi awawungenelayo, ibe wawugqala njani? (b) Ayedume ngantoni amaGrike amandulo, kodwa uThixo wabugqala njani ubulumko bawo?

¹⁰ USawule waseTarso, owaba nguPawulos umpostile kaYesu Kristu, wangenela lo msebenzi wokusindis’ ubomi. Ngaba kusengqiqweni ukucinga ukuba xa uYesu Kristu waguqula uSawule, wayemnika isabelo sokubandakanyeka kumsebenzi wobudenge? UPawulos akazange acinge njalo. (Filipi 2:16) Ngelo xesha amaGrike ayegqalwa njengabona bantu baziinkcuba-buchopho ehlabathini. Ayeqhayisa ngezithandi zobulumko zawo ezibalaseleyo nangamadoda awo azizilumko. Nangona uPawulos wayethetha isiGrike, akazange alandele intanda-bulumko nemfundo yamaGrike. Ngoba? Kuba ubulumko obunjalo beli hlabathi bububudenge kuThixo.a UPawulos wafuna ubulumko bukaThixo, obamshukumisela ekubeni ashumayele iindaba ezilungileyo kwindlu ngendlu. Oyena Mshumayeli ubalaseleyo wakha wakho, uYesu Kristu, wayemisele umzekelo waza wamyalela ukuba enze umsebenzi ofanayo.—Luka 4:43; IZenzo 20:20, 21; 26:15-20; 1 Korinte 9:16.

11. Ngokusisiseko, wathini uPawulos ngothumo lwakhe lokushumayela nangobulumko behlabathi?

¹¹ UPawulos uthi ngothumo lwakhe lokushumayela: “UKristu . . . wandithuma ukushumayela iindaba ezilungileyo, kungabi ngabulumko bakuthetha, ukuze [“umthi wentuthumbo,” NW] kaKristu ungalanjathiswa. Kuba ilizwi [“lomthi wentuthumbo,” NW] [idini likaYesu lentlawulelo] libubudenge okunene kwabatshabalalayo; kodwa ke kwabasindiswayo, thina aba, lingamandla kaThixo. Kuba kubhaliwe kwathiwa, Ndiya kubutshabalalisa ubulumko bezilumko, ingqondo yeengqondi ndiyitshitshise. Siphi na ke isilumko [njengesithandi sobulumko]? Uphi na ke umbhali? Uphi na ke umphiki weli phakade? UThixo akabenzanga baba bubudenge na ubulumko beli hlabathi? Ekubeni ke kuthe, ebulumkweni bukaThixo, ihlabathi alamazi uThixo ngobulumko balo, kwakholeka kuThixo ukusindisa abo bakholwayo, ngabo ubudenge bokuvakalisa iindaba ezilungileyo.”—1 Korinte 1:17-21.

12. Yintoni uYehova ayiphumezayo ‘ngobudenge boko kuvakaliswayo,’ yaye baya kusabela njani abo bafuna “ubulumko baphezulu”?

¹² Asikuko nokuba kuyamangalisa ukuthi, abo ihlabathi elibabiza ngokuthi bazizidenge ngabo kanye uYehova abasebenzisa njengabashumayeli bakhe. Ewe, ngabo ubudenge bobulungiseleli baba bashumayeli, uThixo usindisa abo bakholwayo. UYehova uyicwangcisa imicimbi ngohlobo lokuba abashumayeli bobu “budenge” bangabi nakuzizukisa bona ngokwabo, nokuze abanye abantu bangabi nalungelo lakubazukisa abo bazive ngabo iindaba ezilungileyo. Oku kwenza ukuba ‘kungaqhayisi namnye umntu emehlweni kaThixo.’ (1 Korinte 1:28-31; 3:6, 7) Liyinyaniso elokuba, umshumayeli unendima ebalulekileyo, kodwa isigidimi athunywe ukuba asishumayele siso esimkhokelela elusindisweni umntu ukuba uyasikholelwa. Abo bafuna “ubulumko baphezulu” abasayi kusichasa isigidimi somshumayeli ngenxa yokuba ebonakala esisidenge yaye ehlelelekile, etshutshiswa, kwaye engena kwindlu ngendlu. Kunoko, abalulamileyo baya kumhlonela umvakalisi woBukumkani njengomshumayeli othunywe nguYehova yaye esiza egameni likaThixo. Baya kusigqala njengesibaluleke kakhulu isigidimi esiziswa ngumshumayeli lowo ngomlomo nangoncwadi olushicilelweyo.—Yakobi 3:17; 1 Tesalonika 2:13.

13. (a) AmaYuda namaGrike akugqala njani ukushunyayelwa kokubethelelwa kukaKristu? (b) Ziziphi iindidi zabantu ekungazange kumenywe abaninzi ukuba babe ngabalandeli bakaYesu kuzo, yaye ngoba?

¹³ Ehlabela mgama nengxubusho yakhe engeendlela zikaThixo, uPawulos uthi: “Ekubeni ke amaYuda ecela umqondiso, amaGrike efuna ubulumko, thina okwethu sivakalisa uKristu, ebethelelwe [“emthini,” NW]; isikhubekiso ke eso kumaYuda, ubudenge kumaGrike; ke kwabo babiziweyo, amaYuda kwanamaGrike, sivakalisa uKristu ongamandla kaThixo, nobulumko bukaThixo. Ngokuba into kaThixo ebubudenge ilumkile kunabantu, nento kaThixo engenamandla yomelele kunabantu. Kuba luboneni ubizo lwenu, bazalwana, ukuba azizininzi izilumko ngokwenyama, ababaninzi abanamandla, akamaninzi amanene. UThixo usuke wanyula izinto ezibubudenge zehlabathi, ukuze azidanise izilumko; nezinto ezingenamandla zehlabathi usuke uThixo wazinyula, ukuze azidanise izinto ezomeleleyo.”—1 Korinte 1:22-27; thelekisa uIsaya 55:8, 9.

14. (a) Xa ebuzwa ngeziqinisekiso ezingumqondiso, amaNgqina kaYehova alatha entwenini? (b) Kwakutheni ukuze uPawulos ale ukukholisa amaGrike ngokubonakalisa nabuphi na ubulumko behlabathi?

¹⁴ Xa uYesu wayesemhlabeni, amaYuda acela kuye umqondiso ovela ezulwini. (Mateyu 12:38, 39; 16:1) Kodwa uYesu akazange avume ukuwanika nawuphi na umqondiso. Ngokukwanjalo, amaNgqina kaYehova namhlanje awasebenzisi nasinye isiqinisekiso njengomqondiso. Kunoko, alatha kuthumo lokushumayela iindaba ezilungileyo, njengokuba lubhalwe kwiindinyana zeBhayibhile ezinjengoIsaya 61:1, 2; Marko 13:10; neSityhilelo 22:17. AmaGrike amandulo ayethe phithi kukufuna ubulumko, imfundo ephakamileyo kwizinto zeli hlabathi. Ngoxa uPawulos wayenabo ubulumko bemfundo yeli hlabathi, wala ukukholisa amaGrike ngokububonakalisa nangayiphi na indlela. (IZenzo 22:3) Wayethetha kwaye ebhala ngesiGrike esiqhelekileyo ebantwini, kunokuba asebenzise isiGrike esintsonkothileyo. UPawulos wabaxelela oku abaseKorinte: “Ndakuba ndizile kuni, bazalwana, andizanga ngabugcisa bakuthetha nabulumko, ndinazisa ubungqina bukaThixo. . . . Nokuthetha kwam, nokuvakalisa kwam uKristu kube kungengamazwi oyisa ngabulumko babantu; bekungokuqondakalisa koMoya nokwamandla, ukuze ukholo lwenu lungabi sebulumkweni babantu, lube semandleni kaThixo.”—1 Korinte 2:1-5.

15. UPetros ubakhumbuza ngantoni abagxeki beendaba ezilungileyo, yaye imeko yanamhlanje ifana njani naleyo yomhla kaNowa?

¹⁵ Kule mihla yokugqibela, abagxeki beendaba ezilungileyo ezingehlabathi elitsha likaThixo elizayo nesiphelo esisondelayo seli hlabathi bayakhunjuzwa ngumpostile uPetros ukuba ihlabathi lomhla kaNowa “lantywiliselwa ngamanzi, latshabalala.” (2 Petros 3:3-7) Ekubeni wayejamelene neso siphelo siyintlekele, yintoni awayenzayo uNowa? Abantu abaninzi bacinga ukuba waphelela nje ekubeni ngumakhi womkhombe. Kodwa uPetros uthi xa uThixo wazisa loo Nogumbe kwihlabathi lamandulo, “wesuka walondoloza uNowa, umvakalisi wobulungisa, enabasixhenxe.” (2 Petros 2:5) Benobulumko babo behlabathi, ngokungathandabuzekiyo abo bantu bangahloneli Thixo bangaphambi koMkhukula bahlekisa ngoko uNowa wayekushumayela baza bambiza ngokuthi sisidenge esingenangqiqo. Namhlanje, amaKristu okwenyaniso ajamelene nemeko efanayo, ekubeni uYesu wathelekisa isizukulwana sethu kunye neso somhla kaNowa. Noko ke, phezu kwako nje ukugxekwa, ukushunyayelwa kweendaba ezilungileyo zoBukumkani kubaluleke ngakumbi kunokuba yintetho nje yomlomo. Njengokushumayela kukaNowa, kuthetha usindiso kumshumayeli nakwabo bamphulaphulayo!—Mateyu 24:37-39; 1 Timoti 4:16.

‘Ukuba Sisidenge Ukuze Ube Sisilumko’

16. Kuya kwenzeka ntoni kubulumko beli hlabathi eArmagedon, yaye ngoobani abaya kusindela kwihlabathi elitsha likaThixo?

¹⁶ Kamsinya, eArmagedon, uYehova uThixo uya kubutshabalalisa bonke “ubulumko bezilumko.” Uya kuyitshitshisa yonke “ingqondo yeengqondi” ezavakalisa amathemba endlela ulungelelwaniso lwazo olutsha lwehlabathi oluya kuzisa ngayo iimeko eziphucukileyo kuluntu. ‘Imfazwe yaloo mini inkulu kaThixo uSomandla’ iya kububhangisa bonke ubuqhophololo, intanda-bulumko nobulumko beli hlabathi. (1 Korinte 1:19; ISityhilelo 16:14-16) Ekuphela kwabantu abaya kusinda kuloo mfazwe baze bazuze ubomi kwihlabathi elitsha likaThixo ngabo bathobela oko eli hlabathi likubiza ngokuthi bubudenge—ewe, iindaba ezilungileyo zoBukumkani bukaYehova obuzukileyo.

17. AmaNgqina kaYehova aye aba ‘zizidenge’ njani, ibe yintoni abashumayeli bakaThixo beendaba ezilungileyo abazimisele ukuyenza?

¹⁷ AmaNgqina kaYehova, ekhokelwa ngumoya wakhe, akanazintloni ekushumayeleni oko ihlabathi lithi kububudenge. Kunokuba azame ukuzuza ubulumko behlabathi, aye aba ‘zizidenge.’ Njani? Ngokwenza umsebenzi wokushumayela ngoBukumkani ukuze abe zizilumko, njengoko uPawulos wabhala wathi: “Ukuba umntu uba usisilumko phakathi kwenu kweli phakade, makabe sisidenge, ukuze abe sisilumko.” (1 Korinte 3:18-20) Abashumayeli bakaYehova beendaba ezilungileyo bayalazi ixabiso elisindis’ ubomi lesigidimi sabo yaye baya kuqhubeka besivakalisa bengayeki de kube sekuphelisweni kweli hlabathi nobulumko balo kwimfazwe yeArmagedon. Kungekudala, uYehova uThixo uza kuluthethelela ulongamo lwakhe lwendalo iphela aze abazisele ubomi obungunaphakade bonke abo bakholwayo ngoku baze basabele ‘kubudenge boko kuvakaliswayo.’

[Umbhalo osemazantsi]

Zithini Iimpendulo Zakho?

◻ Ziziphi iindidi ezimbini zobulumko ezikhoyo?

◻ Siyintoni isiphako esiyintloko sobulumko behlabathi?

◻ Kutheni ukushumayela iindaba ezilungileyo kuyeyona nto isengqiqweni inokwenziwa?

◻ Yintoni eya kwenzeka kwakamsinya kubo bonke ubulumko behlabathi?

◻ Kutheni amaNgqina kaYehova engenazintloni zokushumayela oko ihlabathi likubiza ngokuthi kububudenge?

[Umfanekiso okwiphepha 23]

AmaGrike ayefuna ubulumko behlabathi yaye ngokufuthi akugqala ukushumayela kukaPawulos njengokububudenge