Iindawo Ezithile ZeLizwe Ledinga

Ukuya EShilo—Abantwana Abalungileyo Nababi

XA UCINGA ngezixeko, iidolophu, okanye imimandla yeLizwe Ledinga, ngaba amadoda nabafazi abathile ababalulekileyo bathi qatha engqondweni yakho? Mhlawumbi kunjalo, kuba iingxelo zeBhayibhile ezininzi ziquka abantu abakhulu. Kodwa kuthekani ngabantwana belo xesha? Ngaba unombono wabo kwezi ndawo?

Umfanekiso ongasentla unokusinceda sinikele ingqalelo kwiingxelo eziquka ulutsha, olunye lwalo olwaluyimizekelo emihle kumaKristu yaye lumbi luyimizekelo elumkisayo. Ngokucacileyo iShilo isembindini wale nduli ingqukuva.a

Usenokuba uyakhumbula ukuba xa amaSirayeli angena kwiLizwe Ledinga, umnquba kaThixo okokuqala awakha eGiligali kufuphi neYeriko. (Yoshuwa 4:19) Kodwa xa ilizwe lalisahlulwa, le ntente ingcwele—isazulu sonqulo lwamaSirayeli—yafuduselwa apha eShilo. (Yoshuwa 18:1) Yayimalunga neekhilomitha ezingama-30 kumntla weYerusalem kummandla oneentaba wakwaEfrayim. Amadoda nabafazi abavela kuwo wonke ummandla wakwaSirayeli babesiya eShilo; amaqela abantu ayenokuhlanganisana kwintlambo engezantsi osenokuba wawumi kuyo umnquba. (Yoshuwa 22:12) Ngaba unombono wabantwana besiza apha?

Bambi babesiza. Owona mzekelo ubalulekileyo esifanele ukuba siyawazi nguSamuweli oselula. Abazali bakhe, uElikana noHana, babehlala kwidolophu eyayingaphaya kwenduli ukuya ngasentshona. Nyaka ngamnye babesiza apha, mhlawumbi besiza nabanye abantwana bomnye umfazi kaElikana. Ekugqibeleni uYehova wamsikelela uHana ngonyana owathiywa igama lokuba nguSamuweli. Ekuhambeni kwethuba abazali bakhe baza kumhlalisa eShilo ukuze akhonze emnqubeni nombingeleli omkhulu uEli.—1 Samuweli 1:1–2:11.

Le nkwenkwe yayinemisetyenzana eyayiyenza endlwini kaThixo, yaye kumele ukuba yayinamathuba amaninzi okubethwa ngumoya kwiinduli ezikufuphi. (1 Samuweli 3:1, 15) Zimbi zazo zazilinyiwe yaye zazizele yimithi yomnquma, njengoko kubonakala kumfanekiso okwiphepha 9. Phawula imboniselo encinane yelitye. Abalimi okanye abelusi babedla ngokulinda bekuloo mboniselo, kodwa unokuba nombono kaSamuweli oselula naye enyuka ukuze abone. (Thelekisa eyesi-2 yeziKronike 20:24.) Le yayiyindawo entle yokubukela izilwanyana zasendle.

Emva phaya, yayimininzi imithi kunokuba kunjalo ngoku, kwanamahlathi ekwakubhadula kuwo izilwanyana zasendle. (Yoshuwa 17:15, 18) Oku sikwazi ngesiganeko esehla xa uElisha waba ngumprofeti kaThixo oyintloko. UElisha wayehamba evela eYeriko esiya ngaseBheteli, ngoko waye kulo mmandla, iikhilomitha ezili-16 kumzantsi weShilo. Babeza kumamkela njani abantu baseBheteli, eyaye yaba sisazulu sonqulo lwethole legolide? (1 Kumkani 12:27-33; 2 Kumkani 10:29) Kubonakala ngathi abantu abakhulu babemchasile umprofeti kaYehova, yaye isimo sabo sengqondo kubonakala ngathi sayosulela inzala yabo.

EyeSibini yooKumkani 2:23, 24 isixelela ukuba iqela lolutsha lagculela umprofeti kaThixo: “Nyuka, nkqayindini! Nyuka, nkqayindini!” Esabela oko, uElisha “waluqalekisa egameni likaYehova. Kwaphuma iibherekazi zambini ehlathini, zabaqwenga abantwana abamashumi mane anababini kulo.” Olo hlobo lweebhere zaseSiriya ezinombala omdaka lunokuba nengcwangu xa lothusiwe okanye xa kudlaliswa ngamathole azo. (2 Samuweli 17:8; IMizekeliso 17:12; 28:15) UThixo wazisebenzisa ukuphumeza umgwebo wakhe wokusesikweni nxamnye nabo babegculela ummeli wakhe yaye ngaloo ndlela begculela uYehova.

Isibakala sokuba umntwana wayenokudibana nezilwanyana eziyingozi ngolo hlobo kwiinduli ezikufuphi neShilo sifanele sisincede siluqonde ngakumbi ukholo abazali bakaSamuweli abalubonakalisayo ngokumsa etempileni ukuze aye kukhonza khona.

Omnye umnquli owayenyanisekile wabonakalisa ukholo nokuzinikela okufanayo—uMgwebi uYifeta. Wayehlala kwilizwe elalineenduli laseGiliyadi kwicala elingasempuma yeYordan. Enenzondelelo ngoYehova nxamnye nama-Amon awayelutshaba, uYifeta wafunga wathi owokuqala ophume endlwini yakhe ukuza kumkhawulela wayeyakubingelela ngaye kuYehova. Yaba yintombi yakhe eyenjenjalo. Ngoko wasa okuphela komntwana wakhe etempileni kaThixo eShilo, apho wahlala waza wakhonza ngokuthembeka kangangeminyaka.—ABagwebi 11:30-40.

Ukuzinikela ngokuthembeka okwabonakaliswa nguSamuweli nentombi kaYifeta kulo mmandla waseShilo ngokuqinisekileyo kuchasene nomzekelo ombi weenjubaqa ezingama-42 ezagculela umprofeti kaYehova kwakulo mmandla mnye.—Thelekisa eyoku-1 kwabaseKorinte 10:6, 11.

[Umbhalo osemazantsi]

[Inkcazelo Ngomfanekiso okwiphepha 8]

Pictorial Archive (Near Eastern History) Est.

[Inkcazelo Ngomfanekiso okwiphepha 9]

Pictorial Archive (Near Eastern History) Est.

[Inkcazelo Ngomfanekiso okwiphepha 9]

Safari Zoo, Ramat-Gan, Tel Aviv