Khonza UYehova Ngokunyaniseka
“Konyanisekileyo [uYehova] wenza ngokunyaniseka.”—2 SAMUWELI 22:26, NW.
1. UYehova uqhubana njani nabo banyanisekileyo kuye?
UYEHOVA akanakubuyiselwa nganto ngako konke akwenzela abantu bakhe. (INdumiso 116:12) Hayi indlela ezimangalisa ngayo izipho zakhe zokomoya nezokwenyama nenceba yakhe enothando! UKumkani uDavide woSirayeli wamandulo wayesazi kwanokuba uThixo wenza ngokunyaniseka kwabo banyanisekileyo kuye. UDavide wakuthetha oku kwingoma awayiqambayo “mini uYehova wamhlangulayo esandleni seentshaba zakhe zonke, nasesandleni sikaSawule [uKumkani].”—2 Samuweli 22:1.
2. Ziziphi ezinye iingongoma eziveliswe kwingoma kaDavide ebhalwe kweyesi-2 kaSamuweli isahluko 22?
2 UDavide waqalisa ingoma yakhe (efana neNdumiso 18) ngokudumisa uYehova ‘njengeNgxondorha’ ekuphenduleni umthandazo. (2 Samuweli 22:2-7) Ekwitempile yakhe yasemazulwini, uThixo wabahlangula abakhonzi bakhe abathembekileyo kwiintshaba zabo ezinamandla. (2Sa 22 Indinyana 8-19) Ngaloo ndlela uDavide wabuyekezwa ngokusukela ikhondo elithe tye nokugcina iindlela zikaYehova. (2Sa 22 Indinyana 20-27) Ngokulandelayo wabala izinto ezenziwe ngamandla avela kuThixo. (2Sa 22 Indinyana 28-43) Okokugqibela, uDavide wacaphula ukuhlangulwa kwakhe kubagxeki awayehlala nabo nakwiintshaba ezivela kwezinye iintlanga ibe wambulela uYehova ‘njengaLowo ukhulisa usindiso lokumkani wakhe; nowenza inceba kumthanjiswa wakhe.’ (2Sa 22 Indinyana 44-51) Nathi uYehova unokusihlangula ukuba sisukela ikhondo elithe tye size sithembele kuye ngamandla.
Okuthethwa Kukunyaniseka
3. Ngokwembono yeZibhalo, kuthetha ukuthini ukunyaniseka?
3 Ingoma kaDavide yokuhlangulwa isinika isiqinisekiso esithuthuzelayo: “Konyanisekileyo [uYehova] wenza ngokunyaniseka.” (2 Samuweli 22:26, NW) Sisiphawuli sesiHebhere ucha·sidhʹ esithetha “onyanisekileyo,” okanye “owobubele obunothando.” (INdumiso 18:25, umbhalo osemazantsi weNW) Isibizo esingucheʹsedh siquka ingcamango yobubele obuthi ngokunothando buzinamathelise entweni ethile de injongo yaloo nto izalisekiswe. UYehova ubonakalisa olo hlobo lobubele kubakhonzi bakhe, kwananjengokuba bebubonakalisa kuye. Oku kunyaniseka kobulungisa nokungcwele kuguqulelwe ngokuthi “ububele obunothando” nangokuthi “uthando lokunyaniseka.” (Genesis 20:13; 21:23, NW) KwiZibhalo zesiGrike, “ukunyaniseka” kunengcamango yobungcwele nentlonelo, ebonakaliswa sisibizo uho·si·oʹtes nesiphawuli uhoʹsi·os. Ukunyaniseka okunjalo kubandakanya ukuthembeka nokuzinikela ibe kuthetha ukuzinikela nokuyenza ngenyameko yonke imisebenzi eyenzelwa uThixo. Ukunyaniseka kuYehova kuthetha ukunamathela kuye ngokuzinikela ngamandla njengesinamathelisi esinamandla.
4. Kubonakaliswa njani ukunyaniseka kukaYehova?
4 Ukunyaniseka kukaYehova kubonakaliswa ngeendlela ezininzi. Ngokomzekelo, ugweba abangendawo ngenxa yothando lwakhe lokunyaniseka kubantu bakhe nokunyaniseka kokusesikweni nasebulungiseni. (ISityhilelo 15:3, 4; 16:5) Ukunyaniseka kwakhe kumnqophiso awawenza noAbraham kwamshukumisela ukuba azeke kade umsindo kumaSirayeli. (2 Kumkani 13:23) Abo banyanisekileyo kuThixo banokuthembela ngoncedo lwakhe kude kuse ekupheleni kwekhondo labo lokunyaniseka yaye banokuqiniseka ukuba uya kubakhumbula. (INdumiso 37:27, 28; 97:10) UYesu womelezwa kukwazi ukuba ‘njengonyanisekileyo’ kaThixo oyintloko, umphefumlo wakhe wawungasayi kushiywa kwelabafileyo.—INdumiso 16:10; IZenzo 2:25, 27, NW.
5. Ekubeni uYehova enyanisekile, yintoni ayifunayo kubakhonzi bakhe, yaye nguwuphi umbuzo oza kuqwalaselwa?
5 Ekubeni uYehova uThixo enyanisekile, ufuna ukuba abakhonzi bakhe banyaniseke. (Efese 4:24) Ngokomzekelo, amadoda afanele anyaniseke ukuze afanelekele ukuba ngabadala abamiselweyo bamabandla. (Tito 1:8) Ziziphi iinkalo ezifanele zishukumisele abantu bakaYehova ukuba bamkhonze ngokunyaniseka?
Ukuxabisa Izinto Ozifundileyo
6. Sifanele sivakalelwe njani ngezinto ezingokweZibhalo esizifundileyo, yaye yintoni esifanele siyikhumbule ngolwazi olunjalo?
6 Ukuba nombulelo ngezinto esizifundileyo ezingokweZibhalo kufanele kusishukumisele ukukhonza uYehova ngokunyaniseka. Umpostile uPawulos wabongoza uTimoti wathi: “Yima ezintweni owazifundayo, waqiniselwa kuzo, umazi owazifunda kuye; nokuba uzaze kwasebuntwaneni izibhalo ezingcwele, ezinako ukukulumkisela elusindisweni ngokukholwa kuKristu Yesu.” (2 Timoti 3:14, 15) Khumbula ukuba ulwazi olunjalo luvela kuThixo ‘ngomkhonzi othembekileyo noqondayo.’—Mateyu 24:45-47.
7. Abadala bafanele bavakalelwe njani ngokutya kokomoya okulungiselelwe nguThixo ngomkhonzi othembekileyo?
7 Ngokukodwa abadala abamiselweyo bafanele bakuxabise ukutya kokomoya okunandiphekayo okulungiselelwe nguThixo ngomkhonzi othembekileyo. Kwiminyaka emininzi eyadlulayo abadala abambalwa abazange babe nalo uxabiso olunjalo. Omnye umntu owakubonayo oku waphawula ukuba la madoda “ayewahlab’ amadlala amanqaku eMboniselo, engafuni ukuyamkela . . . njengejelo likaThixo lenyaniso, esoloko ezama ukuphembelela nabanye ukuba bacinge njengawo.” Noko ke, abadala abanyanisekileyo abaze bazame ukuphembelela abanye ukuba bachase nakuphi na ukutya kokomoya okulungiselelwe nguThixo ngomkhonzi othembekileyo.
8. Kuthekani ukuba asiyamkeli ngokupheleleyo ingongoma ethile engokweZibhalo enikelwa ngumkhonzi othembekileyo noqondayo?
8 NjengamaNgqina kaYehova azinikeleyo, sonke sifanele sinyaniseke kuye nakwintlangano yakhe. Asifanele size sicinge nokucinga ngokuphambuka ekukhanyeni kukaThixo okumangalisayo silandele inyathelo lokuwexuka elinokusikhokelela ekufeni ngokomoya ngoku nasekutshatyalalisweni ekugqibeleni. (Yeremiya 17:13) Kodwa kuthekani ukuba kunzima ukwamkela okanye ukuyixabisa ngokupheleleyo ingongoma ethile engokweZibhalo enikelwe ngumkhonzi othembekileyo? Ngoko masiqonde ngokululama apho siyifunde khona inyaniso size sithandazele ubulumko bokumelana nolu vavanyo lude luphele xa kupapashwa okuthile okucacisa imibandela.—Yakobi 1:5-8.
Buxabise Ubuzalwana BobuKristu
9. Eyoku-1 kaYohane 1:3-6 ibonisa njani ukuba amaKristu afanele abe nomoya wobudlelane?
9 Uxabiso olusuka entliziyweni ngomoya wobudlelane okhoyo phakathi kwabazalwana bethu abangamaKristu lusinika enye intshukumisa yokukhonza uYehova ngokunyaniseka. Enyanisweni, ulwalamano lwethu noThixo noKristu alunakuphila ngokomoya ukuba asinawo lo moya. Umpostile uYohane wawaxelela oku amaKristu athanjisiweyo: “Oko ke sikubonileyo, sikuvileyo, siyakuxela kuni, ukuze nani nibe nobudlelane nathi. Baye ke ubudlelane bethu bunaye uYise, bunaye uNyana wakhe uYesu Kristu. . . . Ukuba sithi sinobudlelane naye, sibe sihamba ebumnyameni, soba siyaxoka, asiyenzi inyaniso.” (1 Yohane 1:3-6) Lo mgaqo usebenza kuwo onke amaKristu, enoba anethemba lasezulwini okanye lasemhlabeni.
10. Nangona kubonakala ukuba uWodiya noSintike babenobunzima ekucombululeni ingxaki eyayiphakathi kwabo, uPawulos wawagqala njani la mabhinqa?
10 Kufuneka umgudu ukuze silondoloze umoya wobudlelane. Ngokomzekelo, kubonakala ukuba amabhinqa angamaKristu uWodiya noSintike akufumanisa kunzima ukucombulula iingxaki ezaziphakathi kwawo. Ngaloo ndlela uPawulos wawabongoza “ukuba bacinge nto-nye beseNkosini.” Wongezelela oku: “Ndiyakucela nawe, sinxulumani senyaniso, bambisana nabo bafazi bazama nam ezindabeni ezilungileyo, kwanoKlemente, nabanye abasebenzisi bam, abamagama asencwadini yobomi.” (Filipi 4:2, 3) Loo mabhinqa ayehlonel’ uThixo ayebambisana noPawulos nabanye “ezindabeni ezilungileyo,” ibe wayeqinisekile ukuba ayephakathi kwabo ‘amagama abo ayesencwadini yobomi.’
11. Ukuba umKristu onyanisekileyo ungena engxakini ngokomoya, yintoni ekuya kuba kuhle ukuyikhumbula?
11 AmaKristu awanxibi imbasa ebonisa oko aye anelungelo lokukwenza entlanganweni kaYehova nendlela aye amkhonza ngayo ngokunyaniseka. Ukuba anengxaki yokomoya, hayi indlela ebekuya kuba kukungabi naluthando ngayo ukutyeshela iminyaka yawo emininzi ekhonza uYehova ngokuthembeka! Kusenokuba, lowo ubizwa ngokuba ‘sisinxulumani senyaniso’ yayingumzalwana okulangazelelayo ukunceda abanye. Ukuba ungumdala, ngaba ‘usisinxulumani senyaniso,’ esikulungeleyo ukunikela uncedo ngemfesane? Ngamana sonke singaziqwalasela izinto ezilungileyo ezenziwa ngabo bakholwa kunye nathi, kanye njengokuba uThixo esenjenjalo, size sibancede ngothando ukuba bayithwale imithwalo yabo.—Galati 6:2; Hebhere 6:10.
Ayikho Enye Indawo Esinokuya Kuyo
12. Xa amazwi kaYesu abangela ukuba ‘inkoliso yabafundi ibuye umva,’ wema phi uPetros?
12 Siya kuqhutyelwa ekukhonzeni uYehova ngokunyaniseka nentlangano yakhe ukuba siyakhumbula ukuba ayikho enye indawo esinokuya kuyo ukuze sifumane ubomi obungunaphakade. Xa amazwi kaYesu abangela ukuba ‘inkoliso yabafundi ibuye umva,’ wababuza oku abapostile bakhe: “Nani nifuna ukumka, yini na?” UPetros waphendula wathi: “Nkosi, sosuka siye kubani na? Nguwe onamazwi obomi obungunaphakade. Nathi sikholiwe, sazile, ukuba wena unguye uKristu, uNyana kaThixo ophilileyo.”—Yohane 6:66-69.
13, 14. (a) Kwakutheni ukuze ubuYuda benkulungwane yokuqala bungamkholisi uThixo? (b) Yintoni eyathethwa ngomnye obeliNgqina likaYehova kangangethuba elide ngentlangano kaThixo ebonakalayo?
13 ‘Amazwi obomi obungunaphakade’ ayengafunyanwa kubuYuda benkulungwane yokuqala yeXesha lethu Eliqhelekileyo. Isono sabo esiyintloko sasikukuchasa uYesu njengoMesiya. Akukho nanye kwiindlela zobuYuda eyayisekelwe ngokukhethekileyo kwiZibhalo zesiHebhere. AbaSadusi babebukhanyela ubukho bezithunywa zezulu yaye babengakholelwa eluvukweni. Nakuba abaFarisi bengazange bavumelane nabo kwezi zinto, ngokusisono benza iLizwi likaThixo into engaxabisekanga ngenxa yezithethe zabo ezingaxhaswa zizibhalo. (Mateyu 15:1-11; IZenzo 23:6-9) Ezi zithethe zawakhobokisa amaYuda zaza zenza kwanzima kwabaninzi ukumamkela uYesu Kristu. (Kolose 2:8) Ukuzondelela ‘izithethe zooyisemkhulu’ kwabangela ukuba uSawule (uPawulos) athi engaqondanga abe ngumtshutshisi okhohlakeleyo wabalandeli bakaKristu.—Galati 1:13, 14, 23.
14 UThixo wayengakholiswa bubuYuda, kodwa uYehova wayisikelela intlangano eyayibunjwa ngabalandeli boNyana wakhe—‘abantu abazondelela imisebenzi emihle.’ (Tito 2:14) Loo ntlangano isekho nanamhlanje, yaye omnye obeliNgqina likaYehova kangangethuba elide wathi: “Eyona nto ibibaluleke gqitha kum, ibikukuhlala ndisondelelene nentlangano kaYehova ebonakalayo. Amava am okukhula andifundise indlela ekungebobulumko ngayo ukuthembela ngabantu. Yakuba nje ingqondo yam ifikelele kweso sigqibo sinjalo, ndazimisela ukuhlala ndikwintlangano ethembekileyo. Yiyiphi enye indlela umntu anokufumana ngayo inkoliseko nentsikelelo kaYehova?” Akukho ndawo yimbi esinokuya kuyo ukuze sifumane inkoliseko kaThixo nobomi obungunaphakade.
15. Kutheni sifanele sisebenzisane nentlangano kaYehova ebonakalayo kunye nabo banembopheleleko kuyo?
15 Iintliziyo zethu zifanele zisiqhubele ekusebenzisaneni nentlangano kaYehova ngenxa yokuba ikhokelwa ngumoya wakhe yaye yazisa igama neenjongo zakhe. Kakade ke, abo bathwele imbopheleleko kuyo abafezekanga. (Roma 5:12) Kodwa “wavutha umsindo kaYehova” kuAron noMiriyam xa bambek’ ityala uMoses baza balibala ukuba asingabo, kodwa nguye, owayephathiswe imbopheleleko nguThixo. (Numeri 12:7-9) Namhlanje, amaKristu anyanisekileyo ayasebenzisana ‘nabo bakhokelayo’ kuba oko koko uYehova akufunayo. (Hebhere 13:7, 17) Ubungqina bokunyaniseka kwethu buquka ukuya rhoqo kwiintlanganiso zamaKrisu nokugqabaza ‘okulola abanye eluthandweni nasemisebenzini emihle.’—Hebhere 10:24, 25.
Yiba Ngowakhayo
16. Ngumnqweno wokubenzela ntoni abanye okwafanele usishukumisele ukukhonza uYehova ngokunyaniseka?
16 Kwakhona umnqweno wokuba ngowakha abanye ufanele usishukumisele ukukhonza uYehova ngokunyaniseka. UPawulos wabhala: “Ukwazi oku kuyakhukhumalisa, ke lona uthando luyakha.” (1 Korinte 8:1) Ekubeni uhlobo oluthile lolwazi lwalubakhukhumalisa abanalo, kufanele ukuba uPawulos wayethetha ukuba nothando luyabakha abo balubonakalisayo. Incwadi kaNjingalwazi uWeiss noEnglish ithi: “Umntu onamandla othando udla ngokuthandwa naye. Amandla okwenza okulungileyo nokubonakalisa ulwazelelelo kuzo zonke iinkalo zobomi . . . anomphumo ophawulekayo nowakhayo kumntu lowo obonakalisa iimvakalelo ezinjalo kwanakumntu ozifumanayo yaye ngaloo ndlela bobabini abazisela ulonwabo.” Ngokubonakalisa uthando, siyabakha abanye nathi siyazakha, njengoko kuboniswa ngamazwi kaYesu: “Ukupha kunoyolo ngaphezu kokuphiwa.”—IZenzo 20:35.
17. Uthando lwakha njani, yaye yintoni oluya kusithintela ukuyenza?
17 Kweyoku-1 kwabaseKorinte 8:1, uPawulos wasebenzisa igama lesiGrike ua·gaʹpe, elibonisa uthando olulawulwa yimigaqo. Luyakha, kuba luzeka kade umsindo yaye lulungile, lunyamezela yaye luthwala izinto zonke yaye aluze lutshitshe. Olu thando luyazisusa iimvakalelo ezonakalisayo, ezinjengekratshi nomona. (1 Korinte 13:4-8) Uthando olunjalo luya kusenza singabakhalazeli abazalwana bethu, abangafezekanga njengokuba nathi sinjalo. Luya kusikhusela ekufaneni ‘nabangahloneli Thixo’ abaye ‘bathwethwa’ phakathi kwamaKristu okwenyaniso enkulungwane yokuqala. La madoda ‘ayengakufuni ukulawulwa yaye ayezingcikiva izithwala-ndwe zaphezulu,’ yaye kubonakala ukuba ayebanyelisa abantu abanjengabaveleli bamaKristu abathanjisiweyo nababethweswe uzuko oluthile. (Yuda 3, 4, 8, TE) Ekunyanisekeni kuYehova, masingaze siyekelele kwisilingo sokwenza nantoni na efana naleyo.
Mxhathise UMtyholi!
18. Yintoni uSathana aya kuthanda ukuyenza kubantu bakaYehova, kodwa kutheni engenakwenjenjalo?
18 Ukwazi ukuba uSathana ufuna ukuphelisa umanyano lwethu nabantu bakaThixo kufanele kulwandise uzimiselo lwethu lokukhonza uYehova ngokunyaniseka. USathana usenokufuna ukuphelisa bonke abantu bakaThixo, yaye maxa wambi abakhonzi bakaMtyholi abasemhlabeni bayababulala abanquli bokwenyaniso. Kodwa uThixo akayi kuvumela uSathana ukuba ababulale bonke. UYesu wafa ukuze “ambhangise lowo unamandla okufa, oko kukuthi, uMtyholi.” (Hebhere 2:14) Ngokukhethekileyo ukususela oko uSathana wakhutshwayo ezulwini emva kokuba uKristu eye wanguKumkani ngowe-1914, ulawulo lwakhe luye lwasikelwa umda. Yaye ngexesha uYehova alimisileyo, uYesu uya kumtshabalalisa uSathana nentlangano yakhe.
19. (a) Sisiphi isilumkiso ngemigudu kaSathana lo lindixesha aye wasinikela kwiminyaka eyadlulayo? (b) Ukuze siphephe imigibe kaSathana, yiyiphi inyameko esifanele sibe nayo ekuqhubaneni nabo bakholwa kunye nathi?
19 Lo lindixesha wakha walumkisa: “Ukuba uSathana uMtyholi unokubangela ukungalungelelani phakathi kwabantu bakaThixo, unokubabangela baxabane baze balwe, okanye babonakalise baze bavelise isimo sengqondo sokuzingca esinokukhokelela ekupheleni kothando ngabazalwana, ngaloo ndlela uya kuphumelela ekubaqwengeni.” (IMboniselo yesiNgesi kaMeyi 1, 1921, iphepha 134) Masingavumeli uMtyholi aphelise umanyano lwethu, mhlawumbi ngokusikhokelela ekuhlebaneni, okanye ekulweni. (Levitikus 19:16) Ngamana uSathana angangaze asoyise ngokokude sibonzakalise ngokobuqu abo bakhonza uYehova ngokunyaniseka okanye senze ubomi babo bube nzima. (Thelekisa eyesi-2 kwabaseKorinte 2:10, 11.) Kunoko, masisebenzise amazwi kaPetros: “Yibani nobungcathu, phaphani; ngokuba ummangaleli wenu, uMtyholi, uhamba njengengonyama egqumayo, efuna ubani angamginyayo; mchaseni lowo, nizimasekile elukholweni.” (1 Petros 5:8, 9) Ngokuma ngokuqinileyo nxamnye noSathana, sinokulondoloza umanyano lwethu olusikelelweyo njengabantu bakaYehova.—INdumiso 133:1-3.
Thembela KuThixo Ngomthandazo
20, 21. Kutheni ukuthembela kuYehova ngomthandazo kuhlobene nokumkhonza ngokunyaniseka?
20 Ukuthembela kuThixo ngomthandazo kuya kusinceda ukuba siqhubeke sikhonza uYehova ngokunyaniseka. Xa sibona ukuba uyayiphendula imithandazo yethu, sisondela ngakumbi kuye. Ukuthembela kuYehova uThixo ngomthandazo kwabongozwa ngumpostile uPawulos xa wabhala: “Ndinga angathandaza amadoda kuzo zonke iindawo, ephakamisa izandla ezingcwele, engenangqumbo, engenantandabuzo [“engaxambulisani,” NW].” (1 Timoti 2:8) Ngokomzekelo, hayi indlela ekubaluleke ngayo ukuba abadala bathembele kuThixo ngomthandazo! Ukubonakaliswa okunjalo kokunyaniseka kuYehova xa behlanganisene ukuze baxubushe imicimbi yebandla kuya kunceda ukuthintela ukuxambulisana okungapheliyo nokugqabhuka komsindo.
21 Ukuthembela kuYehova uThixo ngomthandazo kuyasinceda ukuba sinyamekele amalungelo ethu enkonzweni yakhe. Indoda eyakhonza uYehova ngokunyaniseka kangangamashumi eminyaka yathi: “Ukulungela kwethu ukwamkela nasiphi na isabelo esisinikwa entlanganweni kaThixo yazwenibanzi, nokuhlala kwethu kwizabelo zethu, singabi nakushukuma, kwenza ukuba uThixo akholiswe yimigudu yethu. Enoba umsebenzi esiwabelweyo ubonakala ungabalulekanga, kusoloko kubonakala ukuba ngaphandle kokwenziwa kwawo eminye imisebenzi emininzi ebalulekileyo ayibi nakwenziwa. Ngaloo ndlela ukuba sithobekile yaye sinomdla ngokungqalileyo ekuzukiseni igama likaYehova kungekhona elethu, ngoko sinokuqiniseka ukuba siya kusoloko ‘siqinile, singabi nakushukuma, sihlale siphuphuma umsebenzi weNkosi.’”—1 Korinte 15:58.
22. Iintsikelelo zikaYehova ezininzi zifanele zikuchaphazele njani ukunyaniseka kwethu?
22 Kakade ke, kungakhathaliseki oko sikwenzayo enkonzweni kaYehova, asinakumbuyisela ngoko asenzela kona. Hayi indlela esinqabiseke ngayo entlanganweni kaThixo ebunjwe ngabo bangabahlobo bakhe! (Yakobi 2:23) UYehova usisikelele ngomanyano olubangelwa luthando olunzulu lobuzalwana kangangokuba uSathana akanakuluphelisa. Ngoko ke masinamathele kuBawo wethu wasezulwini onyanisekileyo size sisebenze kunye njengabantu bakhe. Masikhonze uYehova ngokunyaniseka ngoku nangonaphakade.
Unokuphendula Njani?
◻ Kuthetha ukuthini ukunyaniseka?
◻ Ziziphi ezinye iinkalo ezifanele zisishukumisele ukukhonza uYehova ngokunyaniseka?
◻ Kutheni sifanele simxhathise uMtyholi?
◻ Umthandazo unokusinceda njani ukuba sibe ngabakhonzi bakaYehova abanyanisekileyo?
[Umfanekiso okwiphepha 23]
Abakhonzi bakaYehova abanyanisekileyo abaluvumeli uTshaba lwabo olunjengengonyama, uMtyholi, luluphazamise umanyano lwabo