UMdali Wethu Ozukileyo Nemisebenzi Yakhe

KHAWUKHANGELE! Iingxangxasi ezigqumayo zaseIguaçú okanye zaseNiagara, imiwonyo emikhulu yaseArizona okanye yaseHawaii, iingxingwa ezibalaseleyo ezingena elwandle zaseNorway okanye zaseNew Zealand—hayi indlela le mimangaliso yemvelo encomeka ngayo! Kodwa ngaba oku kuvele ngamabona-ndenzile ngenxa yalowo ubizwa ngokuba nguNina Wendalo? Akunjalo, akunakusuka nje kuzivelele! Yimisebenzi emangalisayo yoMdali Ozukileyo, uBawo wasemazulwini onothando esathi isilumko uKumkani uSolomon sabhala oku ngaye: “Zonke izinto uzenze zantle ngexesha lazo; kwanephakade ulinikele ezintliziyweni zabo ngohlobo lokuba umntu angasifumani isenzo asenzayo uThixo, athabathele ekuqaleni ade ase ekupheleni.” (INtshumayeli 3:11) Enyanisweni, bekuya kuthabatha ixesha elingenasiphelo ngabantu ukuba baphande ngayo yonke imisebenzi ezukileyo uMdali wethu azalise ngayo indalo iphela.

Onjani yena ukuZuka uMdali esinaye! Yaye hayi indlela esivuya ngayo kuba lo Thixo onamandla onke ethe ‘ngale mihla yokugqibela wathetha kuthi ngoNyana; awammisayo wayindlalifa yeento zonke, awathi kwangaye wayenza indalo yonke.’ (Hebhere 1:2) Lo Nyana, uYesu Kristu, wazixabisa izinto ezithandekayo zendalo kaYise. Ngokuphindaphindiweyo wabhekisela kuzo xa wayebonisa iinjongo zikaYise naxa wayekhuthaza abaphulaphuli bakhe. (Mateyu 6:28-30; Yohane 4:35, 36) “Ngokholo” abaninzi baye babona ukuba imimangaliso yendalo “yenziwe yabakho ngelizwi likaThixo.” (Hebhere 11:3) Ubomi bethu bemihla ngemihla bufanele bubonakalise ukholo olunjalo.—Yakobi 2:14, 26.

Ngokwenene, izukile indalo yoThixo wethu. Ngokumangalisayo ibonisa ubulumko, amandla, ukulunga nothando lwakhe. Ngokomzekelo, wenza umhlaba wethu waza wawumisela ukuba ujikeleze ilanga ukuze indalo yakhe yexesha elizayo, umntu, anandiphe ukulandelelana okonwabisayo kwamaxesha onyaka. UThixo wathi: “Yonke imihla yehlabathi, akuyi kuphela ukuhlwayela nokuvuna, ukubanda nobushushu, ihlobo nobusika, imini nobusuku.” (Genesis 8:22) Ukongezelela, uThixo wazalisa umhlaba wethu ngentabalala yezimbiwa ezixabisekileyo. Ngokukhethekileyo, walungiselela amanzi amaninzi, kamva awayeza kufuneka nawayeza kuxhasa bonke ubomi basemhlabeni.

Ngolandelelwano olulungeleleneyo ‘lwemihla yokudala’ emithandathu, mhla ngamnye ungamawaka eminyaka ubude, ‘amandla kaThixo asebenzayo’ aqhubeka elungisa umhlaba ukuze kuhlale umntu. Ukukhanya okusenza sibone, umoya esiwuphefumlayo, umhlaba owomileyo esihlala kuwo, izityalo, ukulandelelana kwemini nobusuku, iintlanzi, iintaka, izilwanyana—zonke zadalwa ngolandelelwano nguMdali wethu Ozukileyo ukuze zibe yingenelo zize zinanditshwe ngumntu. (Genesis 1:2-25) Ngokuqinisekileyo, sinokuthelela umdumisi xa wadanduluka esithi: “Hayi, ukuba zininzi izenzo zakho, Yehova! Zonke ziphela uzenze ngobulumko; uzele umhlaba zizidalwa zakho.”—INdumiso 104:24.

Ubugcisa BukaThixo Bendalo

Njengokuba ‘umhla’ wesithandathu wokudala wawusondela ekupheleni, uThixo wenza indoda emva koko wadala umncedi wayo, umfazi. Enjani yona incopho yobugcisa kwindalo esemhlabeni, emangalisa ngakumbi kunayo yonke indalo yokwenyama eyayidalwe ngaphambili! INdumiso 115:16 isixelela oku: “Amazulu ngamazulu kaYehova, ihlabathi ulinike oonyana babantu.” Ngokuvisisana noko, uYehova wasenza thina miphefumlo ingabantu khon’ ukuze sikwazi ukunandipha nokusebenzisa indalo yakhe yokuqala emhlabeni. Hayi indlela esifanele sibe nombulelo ngayo kuba amehlo ethu—entsonkothe ngakumbi kuneyona khamera isemgangathweni—enokwenza sibone ihlabathi elinemibalabala elisingqongileyo! Sineendlebe—ezilunge ngakumbi kunayo nayiphi na inkqubo yesandi eyenziwe ngumntu—ezisinceda ukuba sinandiphe incoko, umculo nentsholo emnandi yeentaka. Sinenkqubo yokuthetha eyakhelwe ngaphakathi, iquka ulwimi lwethu olunemisebenzi emininzi. Amaqhuqhuvana okungcamla aselulwimini, kunye nesivamvo sethu sokujoja, aluncedo ekunandipheni incasa yeentlobo ngeentlobo ezingapheliyo zokutya. Yaye hayi indlela esikuxabisa ngayo ukuchukunyiswa ngesandla esinothando! Ngokuqinisekileyo sinokumbulela uMdali wethu, njengokuba wenzayo umdumisi owathi: “Ndiyabulela kuwe ngenxa enokuba ndenziwe ngokoyikekayo, ngokubalulekileyo; zibalulekile izenzo zakho, umphefumlo wam uyazi kakuhle.”—INdumiso 139:14.

Ububele Obunothando BoMdali Wethu

Umdumisi wabhala oku: “Bulelani kuYehova, ngokuba elungile: . . . KuloMenzi wemisebenzi ebalulekileyo emikhulu yedwa: ngokuba ingunaphakade inceba [“ububele obunothando,” NW] yakhe.” (INdumiso 136:1-4) Ngoku obo bubele bunothando bumshukumisela ukuba enze izinto ezimangalisayo ezilunge ngakumbi kakhulu kunayo yonke indalo esisandul’ ukuyichaza. Ewe, nangona esathe xha ekudaleni izinto zokwenyama, uyadala ngokomoya. Ngokwenza oku uphendula ucelomngeni olungendawo olwajoliswa kuye ngokuthe ngqo. Njani njalo?

Indoda nomfazi bokuqala babekwa kwiparadisi ezukileyo, e-Eden. Noko ke, isithunywa esingumvukeli, uSathana, wazimisa njengothixo waza wakhokelela isibini esingabantu ekuvukeleni uYehova. Ngokusesikweni, uThixo wabagwebela ukufa, nto leyo eye yaphumela ekubeni abantwana babo, uhlanga lwabantu luphela, lukhulele kwimeko enesono nenokufa. (INdumiso 51:5) Ingxelo yeBhayibhile engoYobhi ibonisa ukuba uSathana wamcel’ umngeni uThixo, esithi akukho mntu unokugcina ingqibelelo Kuye ephantsi kovavanyo. Kodwa uYobhi njengabanye abakhonzi bakaThixo abathembekileyo ababephila kumaxesha okubhalwa kweBhayibhile kwanabo baphila kumhla wethu, wamngqina uSathana elixoki elivunyiweyo. (Yobhi 1:7-12; 2:2-5, 9, 10; 27:5) UYesu, njengomntu ofezekileyo wamisela umzekelo wokugcina ingqibelelo ongenakuthelekiswa nanto.—1 Petros 2:21-23.

Ngaloo ndlela, uYesu wayenokuthi, ‘Umphathi weli hlabathi [uSathana] akananto nam.’ (Yohane 14:30) Sekunjalo, ukuza kuthi ga kulo mhla “ihlabathi liphela lilele kongendawo.” (1 Yohane 5:19) Ephikise ukuthi tye kolongamo lukaYehova, uSathana uye wanikwa iminyaka engama-6 000 ukuze abonakalise ukuba ulawulo lwakhe kuluntu lungaphumelela kusini na. Hayi indlela aye wasilela ngokulusizi ngayo, njengokuba iimeko zehlabathi eziya ziwohloka ziqhubeka zikungqina oko! UThixo wethu onothando, uYehova, kungekudala uza kuyishenxisa le nkqubo yehlabathi yonakeleyo, engqina ukuthi tye kolongamo lwakhe phezu komhlaba. Esinjani sona ukuvuyisa isiqabu kuluntu olulangazelela ulawulo olunoxolo nobulungisa!—INdumiso 37:9-11; 83:17, 18.

Noko ke, oko akuphelelanga apho! Ububele obunothando bukaThixo buya kubonakaliswa ngokungakumbi ngesizinzi samazwi kaYesu akuYohane 3:16: “Wenjenje uThixo ukulithanda kwakhe ihlabathi [loluntu], ude wancama uNyana wakhe okuphela kwamzeleyo, ukuze bonke abakholwayo kuye bangatshabalali, koko babe nobomi obungunaphakade.” Oku kubuyiselwa koluntu kwithemba lobomi obungunaphakade emhlabeni kuquka ukudalwa kwezinto ezintsha. Zintoni ezo? Zinokuba yingenelo njani kuluntu oluncwinayo? Inqaku lethu elilandelayo liza kusixelela.