Zilumkeleni Zonke Iindlela Zokunqula Izithixo
“Inakudibana kuni na ke itempile kaThixo nezithixo?”—2 KORINTE 6:16.
1. Yintoni eyayifanekiselwa ngumnquba neetempile zakwaSirayeli?
UYEHOVA unetempile engahlali zithixo. Yafanekiselwa ngumnquba kaSirayeli owakhiwa nguMoses naziitempile ezakhiwa kamva eYerusalem. Ezo zakhiwo zazifanekisela ‘umnquba wenyaniso,’ itempile kaYehova enkulu yokomoya. (Hebhere 8:1-5) Loo tempile lilungiselelo lokusondela kuThixo ngokumnqula ngesizinzi sedini lentlawulelo likaYesu Kristu.—Hebhere 9:2-10, 23.
2. Ngoobani ababa ziintsika kwitempile kaThixo enkulu yokomoya, ibe sisiphi isikhundla esinanditshwa sisihlwele esikhulu?
2 UmKristu ngamnye othanjisiweyo uba ‘yintsika etempileni kaThixo,’ efumana indawo ezulwini. “Isihlwele esikhulu” sabanye abanquli bakaYehova ‘sinikela [kuThixo] inkonzo engcwele’ sikuloo ndawo yayifanekiselwa yintendelezo yeeNtlanga kwitempile eyaphinda yakhiwa nguHerode. Ngenxa yokholo kwidini likaYesu, sinokuma okulungileyo okubangela ukuba silondolozwe ukutyhubela ‘imbandezelo enkulu.’—ISityhilelo 3:12; 7:9-15.
3, 4. Ibandla lamaKristu athanjisiweyo emhlabeni lifaniswa nantoni, yaye kokuphi ukungcola elingafanele libandakanyeke kuko?
3 Ibandla lamaKristu athanjisiweyo emhlabeni ngokomfuziselo likwafaniswa nenye itempile engenanto yakwenza nokunqula izithixo. Kwabanjalo ‘abatywinwe ngomoya oyingcwele,’ umpostile uPawulos wathi: “Nakhelwe phezu kwelitye lesiseko sabapostile nabaprofeti, inguYesu Kristu ngokwakhe ilitye lembombo; esithi kuye sonke isakhiwo, sihlangane kakuhle, sikhule, sibe yitempile engcwele eNkosini; enithi nani nakhelwe ndawonye kuye, ukuze nibe yindawo yokuhlala kaThixo ngaye uMoya.” (Efese 1:13; 2:20-22) Aba batywiniweyo bali-144 000 ‘bangamatye aphilileyo’ aye ‘akheka aba yindlu eyiyeyomoya, isibingeleli esingcwele,’—1 Petros 2:5; ISityhilelo 7:4; 14:1.
4 Ekubeni aba babingeleli abangaphantsi ‘besisakhiwo sikaThixo,’ akayivumeli le tempile ukuba ingcoliswe. (1 Korinte 3:9, 16, 17) UPawulos walumkisa: “Nize ningabotshwa dyokhweni inye nabangakholwayo, kuba kunakwabelana kuni na ubulungisa nokuchasa umthetho? Kunabudlelane buni na ke ukukhanya nobumnyama? Unakuvumelana kuni na ke uKristu noBheliyali? Unasahlulelwano sini na okholwayo nongakholwayo? Inakudibana kuni na ke itempile kaThixo nezithixo?” AmaKristu athanjisiweyo, ‘kaYehova onguSomandla,’ afanele azikhwebule ekunquleni izithixo. (2 Korinte 6:14-18, NW) Nabo besihlwele esikhulu bafanele baziphephe zonke iindlela zokunqula izithixo.
5. Esazi ukuba uYehova ufuna kunqulwe yena kuphela, yintoni amaKristu okwenyaniso ayenzayo?
5 Kukho iindlela ezicace nakuthathatha neendlela ezichuliweyo zokunqula izithixo. Ukunqula izithixo akupheleliselwanga ekunquleni oothixo noothixokazi bobuxoki. Kukunqulwa kwayo nayiphi na into okanye umntu ongenguye uYehova. NjengoMongami weNdalo Iphela, ngokufanelekileyo ufuna yaye kufanele kunqulwe yena kuphela. (Duteronomi 4:24) Ekubeni ekuqonda oku, amaKristu okwenyaniso ayazithobela izilumkiso zeZibhalo ezinxamnye nako konke ukunqula izithixo. (1 Korinte 10:7) Makhe siqwalasele iintlobo ezithile zokunqula izithixo ezifanele ziphetshwe ngabakhonzi bakaYehova.
Ukunqula Izithixo KweNgqobhoko Kwafanekiselwa Kusengaphambili
6. Ziziphi izinto ezingamasikizi uHezekile awazibonayo embonweni?
6 Ngoxa wayesekuthinjweni eBhabhiloni ngowama-612 B.C.E., umprofeti uHezekile waba nombono wezinto ezingamasikizi ezazisenziwa ngamaYuda awexukileyo etempileni kaYehova eYerusalem. UHezekile wabona “umfanekiso wobukhwele.” Wabona amadoda amakhulu angamashumi asixhenxe enyusa iziqhumiso etempileni. Wabona abafazi belilela uthixo wobuxoki. Yaye amadoda angama-25 ayenqula ilanga. Zazinayiphi intsingiselo ezi zenzo zowexuko?
7, 8. “Umfanekiso wobukhwele” usenokuba wawuyintoni, yaye kutheni wabangela ukuba uYehova abe nobukhwele?
7 Izinto ezimasikizi ezabonwa nguHezekile embonweni zazifanekisela kusengaphambili ukunqula izithixo kweNgqobhoko. Ngokomzekelo, wathi: “Nanko ngasentla kwesango lesibingelelo kukho loo mfanekiso wobukhwele usekungeneni kwalo. Wathi kum [uYehova uThixo], Nyana womntu, uyakubona na abakwenzayo? Ngamasikizi amakhulu la, iwenzayo apha indlu kaSirayeli, ukuze ndikhwelele kude nengcwele yam.”—Hezekile 8:1-6.
8 Umfanekiso wobukhwele wokunqula izithixo kusenokuba wawusisibonda esingcwele esasifanekisela uthixokazi wobuxoki amaKanan awayemgqala njengomfazi wothixo wawo uBhahali. Kungakhathaliseki ukuba wawuyintoni na loo mfanekiso, wawubangela ukuba uYehova abe nobukhwele kuba wawusahlulahlula ukuzinikela okupheleleyo kukaSirayeli kuye nto leyo eyayikukwaphulwa kwemiyalelo yakhe ethi: “NdinguYehova uThixo wakho . . . Uze ungabi nathixo bambi ngaphandle kwam. Uze ungazenzeli umfanekiso oqingqiweyo, nokuba ngowayiphi na into emilise esezulwini phezulu, nesemhlabeni phantsi, nesemanzini aphantsi komhlaba. Uze ungaqubudi kwezo nto, ungazikhonzi: kuba mna, Yehova Thixo wakho, ndinguThixo onekhwele [“ofuna uzinikelo olupheleleyo,” NW].”—Eksodus 20:2-5.
9. INgqobhoko iye yamshukumisela njani uThixo ukuba abe nobukhwele?
9 Ukunqula umfanekiso wobukhwele etempileni kaThixo kwakuyenye yezona zinto zingamasikizi ezazisenziwa ngamaSirayeli awexukileyo. Ngokufanayo, iicawa zeNgqobhoko zingcoliswe yimifanekiso nezithixo zokungahloneli Thixo ezahlulahlula ukuzinikela okupheleleyo ezizibanga zikunikela kuLowo zithi ziyamkhonza. Kwakhona uThixo ushukunyiselwa ukuba abe nobukhwele kuba abefundisi bayabuchasa uBukumkani bakhe njengobukuphela kwethemba loluntu yaye banqula iZizwe Ezimanyeneyo—‘isikizi elimi endaweni engcwele,’ apho belingafanele kuma khona.—Mateyu 24:15, 16; Marko 13:14.
10. Yintoni uHezekile awayibonayo phakathi etempileni, yaye oku kuthelekiseka njani noko kuphawuleka kwiNgqobhoko?
10 Ekungeneni kwakhe etempileni, uHezekile unikela le ngxelo: “Ndabona: nazo zonke izinto ezimilise okwezinambuzane nenkomo, izinto ezinezothe, nezigodo zonke zendlu kaSirayeli, zikroliwe eludongeni ngeenxa zonke. Kumi phambi kwazo amadoda angamashumi asixhenxe kumadoda amakhulu endlu kaSirayeli . . . , iyileyo iphethe ngesandla isiqhumiselo, kunyuka ivumba lelifu lokuqhumisela.” Khawufan’ ucinge! Amadoda amakhulu akwaSirayeli asetempileni kaYehova, enyusa iziqhumiso koothixo bobuxoki, ababefanekiselwa yimikrolo engamasikizi eseludongeni. (Hezekile 8:10-12) Ngokwentelekiso, kusetyenziswa iintaka nezilwanyana zasendle ukufuzisela amazwe eNgqobhoko, ahlonelwayo ngabantu. Ngaphezu koko, abefundisi abaninzi babekek’ ityala lokufak’ isandla ekulahlekiseni abantu abaninzi ngokungqinela ingcamango engachananga yokuvela komntu ngendaleko kwizilwanyana ezingaphantsi komntu kunokuba babambelele kwingxelo yeBhayibhile eyinyaniso yokudalwa nguYehova uThixo.—IZenzo 17:24-28.
11. Kwakutheni ukuze amabhinqa awexukileyo amaSirayeli alilele uTamuzi?
11 Ekungeneni kwesango lendlu kaYehova, uHezekile wabona abafazi bamaSirayeli abawexukileyo belilela uTamuzi. (Hezekile 8:13, 14) Abemi baseBhabhiloni nabaseSiriya babemgqala uTamuzi njengothixo wotyani olukhula ngexesha leemvula luze lufe ngexesha lembalela. Ukufa kwalo kwakufanekisela ukufa kukaTamuzi, okwakulilelwa nyaka ngamnye ngabanquli bakhe ngexesha laxa ilanga likhuph’ iintlanzi emanzini. Xa utyani luphinda luvela ebudeni bexesha leemvula, kwakuba ngathi uTamuzi wayebuya kwilizwe labafileyo. Wayefanekiselwa ngunobumba wokuqala wegama lakhe, utau wamandulo owawukwimo yomnqamlezo. Oku kusenokusikhumbuza kakuhle ngokuhlonela kweNgqobhoko umnqamlezo njengesithixo sayo.
12. Yintoni uHezekile awayibona isenziwa ngamadoda awexukileyo akwaSirayeli angama-25, yaye sisiphi isenzo esifanayo esenzekayo kwiNgqobhoko?
12 Kwintendelezo ephakathi yetempile, ngokulandelayo uHezekile wabona amadoda angama-25 angamaSirayeli angabawexuki enqula ilanga—nto leyo eyayikukwaphulwa komyalelo kaYehova onxamnye nokunqula izithixo okunjalo. (Duteronomi 4:15-19) Kwakhona abo banquli bezithixo basondeza isetyana lomthi elingcolileyo emathatheni kaThixo, mhlawumbi elalifanekisela ilungu lesini lomntu oyindoda. Ayimangalisi into yokuba uThixo engayiphenduli imithandazo yabo, kwananjengokuba iNgqobhoko iya kutsho phantsi xa ifuna uncedo lwakhe ebudeni ‘bembandezelo enkulu.’ (Mateyu 24:21) Njengoko loo maSirayeli awexukileyo ayenqula ilanga elalikhanyisa yaye eyinikel’ umva itempile kaYehova, ngoko iNgqobhoko ikunikel’ umva ukukhanya okuvela kuThixo, ifundisa iimfundiso zobuxoki, yenza ubulumko behlabathi bube sisithixo sayo ize ikuqwabazele iliso ukuziphatha okubi.—Hezekile 8:15-18.
13. Kungaziphi iindlela athi amaNgqina kaYehova aphephe iindlela zokunqula izithixo ezabonwa embonweni kaHezekile?
13 AmaNgqina kaYehova ayaziphepha iintlobo zokunqula izithixo eziqheliselwayo kwiNgqobhoko, okanye umfuziselo weYerusalem, njengoko yabonwa kwangaphambili nguHezekile. Asinquli imifuziselo yezinto zokungahloneli Thixo. Nangona sibonakalisa intlonelo ‘ngamagunya awongamileyo,’ ukuwahlonela kwethu kulinganiselwe. (Roma 13:1-7; Marko 12:17; IZenzo 5:29) Ukuzinikela kwethu kwentliziyo sikusa kuThixo nakuBukumkani bakhe. Asimthabatheli indawo uMdali nendalo yakhe ngengcamango yendaleko. (ISityhilelo 4:11) Asiphazameli nokuphazamela ekunquleni umnqamlezo okanye sinqule ulwazi, intanda-bulumko, okanye olunye uhlobo lobulumko behlabathi. (1 Timoti 6:20, 21) Kwakhona siyazilumkela zonke ezinye iindlela zokunqula izithixo. Ziziphi ezinye zezi?
Ezinye Iindlela Zokunqula Izithixo
14. Kukuphi ukuma abakhonzi bakaYehova abanako ngokuphathelele “irhamncwa” leSityhilelo 13:1?
14 AmaKristu akalutheleli uluntu ekunquleni “irhamncwa” lokomfuziselo. Umpostile uYohane wathi: “Ndabona kunyuka, kuphuma elwandle, irhamncwa, lineentloko ezisixhenxe neempondo ezilishumi, ezimpondweni zalo izizithsaba ezilishumi . . . Baya kulinqula bonke abo bemiyo phezu komhlaba.” (ISityhilelo 13:1, 8) Amarhamncwa anokufanekisela “ookumkani,” okanye amagunya ezobupolitika. (Daniyeli 7:17; 8:3-8, 20-25) Ngoko iintloko ezisixhenxe zerhamncwa zimela amagunya ehlabathi—iYiputa, iAsiriya, iBhabhiloni, amaMedi namaPersi, iGrisi, iRoma namaNgesi namaMerika ekukudibana kweBritani neUnited States of America. Abefundisi beNgqobhoko babonakalisa ukungabi nantlonelo okukhulu ngoThixo noKristu ngokukhokelela abantu ekunquleni inkqubo yezobupolitika kaSathana, “umphathi walo eli hlabathi.” (Yohane 12:31) Noko ke, abakhonzi bakaYehova, njengamaKristu angoondilele nabaxhasi boBukumkani, ayakuchasa ukunqula izithixo okunjalo.—Yakobi 1:27.
15. Abantu bakaYehova babagqala njani abantu ababalaseleyo ehlabathini, yaye elinye iNgqina lathini ngokuphathelele oku?
15 Kwakhona abantu bakaThixo bayakuphepha ukunqula abantu ababalaseleyo kwezolonwabo nezemidlalo kweli hlabathi. Emva kokuba liNgqina likaYehova, enye imvumi yathi: “Umculo wolonwabo nowomdaniso unokuvelisa iminqweno ephosakeleyo . . . Imvumi icula ngolonwabo nokuthantamisa zinto ezo abasenokuthi abaphulaphuli abaninzi bavakalelwe kukuba iqabane labo alinazo. Ngokufuthi imvumi iye yaziwe ngaloo nto icula ngayo. Ngenxa yesi sizathu ezinye iimvumi eziphambili endizaziyo zithandwa gqitha ngamabhinqa. Akuba ubani etshone kule ndlela yokuphupha kwehlabathi, inokumkhokelela ekuyinquleni imvumi leyo. Oku kusenokuqalisa ngokungenabungozi kwaphela ngokuthi umntu afune into etyikitywe nguloo mntu njengesikhumbuzo. Kodwa abanye baye bamgqale umntu lowo njengoyena ubalulekileyo kubo, bamenze isithixo. Basenokuxhoma eludongeni umfanekiso womntu lowo ubalaseleyo baze baqalise ukunxiba baze bazilungise njengaye. AmaKristu afanele akhumbule ukuba nguThixo kuphela ofanele anqulwe.”
16. Yintoni ebonisa ukuba izithunywa ezilungileyo zikuchasile ukunqula izithixo?
16 Ewe, nguThixo kuphela ofanelwe kukunqulwa. Xa uYohane ‘wawa waqubuda phambi kweenyawo zesithunywa’ esasimbonise izinto ezimangalisayo, eso sidalwa somoya sala ukunqulwa ngayo nayiphi na indlela kodwa sathi: “Lumka, ungenjenjalo; kuba ndingumkhonzi kunye nawe, nabazalwana bakho abaprofeti, nabo bawagcinayo amazwi ale ncwadi; qubuda kuThixo.” (ISityhilelo 22:8, 9) Ukoyika uYehova, okanye ukumhlonela ngokunzulu, kusenza sinqule yena kuphela. (ISityhilelo 14:7) Ngaloo ndlela, ukuhlonela uThixo kokwenyaniso kuyasikhusela ekunquleni izithixo.—1 Timoti 4:8.
17. Sinokukulumkela njani ukuziphatha okubi ngokwesini okukukunqula izithixo?
17 Ukuziphatha okubi ngokwesini lolunye uhlobo lokunqula izithixo oluchaswayo ngabakhonzi bakaYehova. Bayazi ukuba “wonke umenzi wombulo, nomntu ongcolileyo, nolibawa, engumkhonzi wezithixo, akanalifa ebukumkanini bukaKristu noThixo.” (Efese 5:5) Apha ukunqula izithixo kubandakanyekile kuba ukunqwenela ukuzonwabisa kokuziphatha okubi kuba yinto enqulwayo. Iminqweno yesini engafanelekanga iyazonakalisa iimpawu zobuThixo. Ngokumilisel’ amehlo neendlebe zakhe kwizinto ezibonisa amanyala, umntu uyalonakalisa naluphi na ulwalamano asenokuba unalo noThixo ongcwele, uYehova. (Isaya 6:3) Ngoko, ukuze bazilinde nxamnye nokunqula izithixo okunjalo, abakhonzi bakaThixo bafanele baziphephe izinto ezibonisa amanyala nomculo owonakalisayo. Bafanele banamathele kwimilinganiselo yomoya enamandla esekelwe kwiZibhalo, yaye bafanele baqhubeke ‘nobuntu obutsha obuthe ngokukaThixo badalelwa ebulungiseni, nasebungcweleni benyaniso.’—Efese 4:22-24, NW.
Phepha Ukubawa Nokunyoluka
18, 19. (a) Kuyintoni ukubawa nokunyoluka? (b) Sinokuzilinda njani nxamnye nokunyoluka nokubawa okukukunqula izithixo?
18 Kwakhona amaKristu ayakulumkela ukubawa nokunyoluka, zinto ezo eziziintlobo ezisondeleleneyo zokunqula izithixo. Ukubawa kukuba ngungxow’ ayibotshwa nokufuna ukutshabalalisa nantoni na etyiwayo ephambi kwakho, yaye ukunyoluka kukubawela nayiphi na into engeyoyakho. UYesu walumkisa nxamnye nokubawa waza wathetha ngomntu othile owayesisityebi nowayebawa gqitha owayengazange azuze nto kubutyebi bakhe xa wafayo yaye wayekwimeko ebuhlungu yokungabi ‘nabutyebi kuThixo.’ (Luka 12:15-21) Ngokufanelekileyo uPawulos wawaluleka ngolu hlobo amakholwa awayekhonza kunye nawo: “Bhubhisani ngoko amalungu enu asemhlabeni: . . . nokubawa, okuyinkonzo yezithixo kona oko.”—Kolose 3:5.
19 Abo bathe phithi thwanga kukuthanda imali, nokurhalela into etyiwayo neselwayo, okanye ngamabhongo okuba negunya benza ukuba iminqweno enjalo ibe zizithixo zabo. Kunjengokuba uPawulos wabonisayo, umntu obawayo ungumnquli wezithixo ibe akasayi kubudla ilifa uBukumkani bukaThixo. (1 Korinte 6:9, 10; Efese 5:5) Ngenxa yoko, abantu ababhaptiziweyo abanqula izithixo njengabantu ababawayo babenokususwa kubudlelane ebandleni lamaKristu. Noko ke, ngokusebenzisa iZibhalo nangokuthandaza ngokunyaniseka, sinokukuphepha ukubawa. IMizekeliso 30:7-9 ithi: “Ndicele kuwe [Yehova Thixo] izinto ezimbini; musa ukundivimba zona ndingekafi: Khwelelisa kum inkohlakalo nelizwi lamanga; musa ukundinika ubuhlwempu nobutyebi; ndihlafunise isonka endisimiselweyo; hleze ndihluthe, ndikhanyele, ndithi, Ngubani na uYehova? Hleze ndihlwempuzeke, ndibe, ndilicukuceze igama likaThixo wam.” Umoya onjalo unokusinceda sizilinde nxamnye nokunyoluka nokubawa okunjalo okukunqula izithixo.
Kulumkele Ukunqula Isiqu Sakho
20, 21. Abantu bakaYehova bakulumkela njani ukunqula iziqu zabo?
20 Kwakhona abantu bakaYehova bayakulumkela ukunqula iziqu zabo. Kweli hlabathi kuqhelekile ukuba ubani anqule isiqu sakhe nokuthanda kwakhe. Ukunqwenela uzuko nembeko kubangela abaninzi benze ngeendlela zobuqhetseba. Bafuna kwenziwe okwabo ukuthanda, ingekuko okukaThixo. Kodwa asinakuba nolwalamano noThixo ukuba siyekelela ekunquleni iziqu zethu ngokuthi ngobuqhetseba sifune ukuhamba ngesiyibonayo size sizame ukugagamela abanye. (IMizekeliso 3:32; Mateyu 20:20-28; 1 Petros 5:2, 3) Njengabalandeli bakaYesu, siye sazilahla izinto ezifihlakeleyo zehlabathi.—2 Korinte 4:1, 2.
21 Kunokuba bafune udumo, abantu bakaThixo bavumelana nomyalelo kaPawulos othi: “Nokuba niyadla, nokuba niyasela, nokuba nenza yiphi na into, zenzeleni uzuko lukaThixo izinto zonke.” (1 Korinte 10:31) Ekubeni singabakhonzi bakaYehova, asithi ngokungathi sinqula izithixo sigxininise kweyethu indlela yokwenza izinto kodwa ngovuyo senza ukuthanda kukaThixo, sisamkela ukhokelo oluvela ‘kumkhonzi othembekileyo noqondayo’ yaye sisebenzisana ngokuzeleyo nentlangano kaYehova.—Mateyu 24:45-47.
Hlala Uzilindile!
22, 23. Kungayiphi indlela esinokuzilumkela ngayo zonke iindlela zokunqula izithixo?
22 Njengabantu bakaYehova, asiqubudi kwizithixo ezenziwe ngezandla. Kwakhona siyazilumkela naziphi na iindlela ezichuliweyo zokunqula izithixo. Enyanisweni, sifanele siqhubeke siziphepha zonke iindlela zokunqula izithixo. Ngoko ke sivumelana nesiluleko sikaYohane esithi: “Zigcineni kuzo izithixo.”—1 Yohane 5:21.
23 Ukuba ungomnye wabakhonzi bakaYehova, ngalo lonke ixesha sebenzisa isazela sakho esiqeqeshwe ngeBhayibhile namandla akho okucalula okuhle kwanokubi. (Hebhere 5:14) Ngoko akuyi kungcoliswa ngumoya wehlabathi wokunqula izithixo kodwa uya kuba njengamaHebhere amathathu athembekileyo nanjengamaKristu okuqala anyanisekileyo. Uya kuzinikela kuYehova kuphela, yaye uya kukunceda uzilumkele zonke iindlela zokunqula izithixo.
Ucinga Ntoni?
◻ AmaNgqina kaYehova aziphepha njani iindlela zokunqula izithixo ezabonwa embonweni kaHezekile?
◻ Liyintoni “irhamncwa” leSityhilelo 13:1, ibe kokuphi ukuma kwabakhonzi bakaYehova ngokuphathelele lona?
◻ Kutheni sifanele sikulumkele ukunqula abantu ababalaseleyo kwezolonwabo nezemidlalo?
◻ Sinokukulumkela njani ukunqula iziqu zethu?
◻ Kutheni sifanele sizilumkele zonke iindlela zokunqula izithixo?
[Imifanekiso ekwiphepha 26]
Ngaba uyayazi indlela izinto ezingamasikizi ezabonwa embonweni kaHezekile ezakufanekisela ngayo kwangaphambili ukunqula izithixo kweNgqobhoko?
[Inkcazelo]
Artwork (phezulu ngasekhohlo) based on photo by Ralph Crane/Bardo Museum